Azərbaycan Respublikası adından QƏRAR Qusar şəhəri İş № 3(029)-146/2025 23.05.2025 QUSAR RAYON MƏHKƏMƏSİ Hakim Cəlilov Əli İsa oğlunun sədrliyi Ağaliyev Hümmət Rahib oğlunun katibliyi ilə “Qusar rayon Mərkəzi Xəstəxanası” PHŞ nümayəndələri X2 və X1, Azərbaycan Respublikasının Fövqəladə Hallar Nazirliyi X8 Xidməti Şimal Regional X8 İdarəsinin nümayəndəsi X3 iştirakları ilə, “Qusar rayon Mərkəzi Xəstəxanası” PHŞ (VÖEN №**********) barəsində Azərbaycan Respublikasının Fövqəladə Hallar Nazirliyi X8 Xidməti Şimal Regional X8 İdarəsindən daxil olmuş inzibati xəta haqqında materiala Qusar rayon Məhkəməsinin binasında açıq məhkəmə baxışı iclasında baxaraq məhkəmə, M Ü Ə Y Y Ə N E T D İ: Təqdim edilmiş inzibati xəta haqqında protokoldan və ona əlavə olunmuş sənədlərdən görünür ki, xx.xx.2025-ci Qusar rayonu, Urva kəndində yerləşən tibb məntəqəsində keçirilən planlı YTM zamanı AR-nın YTQ-01.2001 2.5, 4.4, 6.1, 6.5, 9.3-cü bəndlərinin tələbləri pozulmuşdur. Həmin faktla bağlı Azərbaycan Respublikasının Fövqəladə Hallar Nazirliyi X8 Xidməti tərəfindən inzibati araşdırma aparılmış və hüquqi şəxs “Qusar rayon Mərkəzi Xəstəxanası” PHŞ-nin barəsində Azərbaycan Respublikası İXM-nin 518.1-ci maddəsi ilə MN № ******* saylı, xx.xx.2025-ci il tarixli inzibati xəta haqqında protokol tərtib edilərək baxılması üçün Qusar rayon məhkəməsinə göndərilmişdir. Azərbaycan Respublikasının Fövqəladə Hallar Nazirliyi X8 Xidmətinin nümayəndəsi X4 protokolda göstərilənləri müdafiə edərək izahatında Qusar rayonu, Urva kəndində yerləşən tibb məntəqəsində həmin pozuntuların olduğunu və həmin pozuntuların Qusar RMX-nin cavabdehlik daşıdığını bildirmişdir. “Qusar rayon Mərkəzi Xəstəxanası” PHŞ nümayəndəsi protokol üzrə özlərini təqsirli bilməmişdir. Qusar rayonu, Urva kəndində yerləşən tibb məntəqəsi istismara yararsızdır. Binanın yaşı çoxdur. Protokolda göstərilən çatışmazlıqların aradan qaldırılması üçün müvafiq orqanlara sorğu verilsə də yuxarı aidiyyatı orqanlar həmin sorğulara cavab verməmişlər. Əgər Azərbaycan Respublikası FHN Qusar rayonu, Urva kəndində yerləşən tibb məntəqəsinin binasının istismara yararsız olması ilə bağlı müvafiq rəy versə həmin bina istifadəyə bağlanacaqdır. Protokolda göstərilən çatışmazlıqlar Qusar RMX-nin təqsiri nəticəsində baş verməmişdir. İş materiallarında olan xx.xx.2025-ci il tarixli, 3-18-79/Q-350/2025 nömrəli planlı (növbəti) yoxlamanın aparılması haqqında qərardan görünür ki, xx.xx.2025-xx.xx.2025-ci il tarixləri arasında Qusar rayon Urva kənd həkim məntəqəsində plan üzrə yoxlamanın keçirilməsi qərara alınmışdır. İş materiallarında olan xx.xx.2025-ci il tarixli KY252290818 nömrəli Sahibkarlıq sahəsində aparılan yoxlamaların vahid məlumat reyestrindən çıxarışdan görünür ki, Azərbaycan Respublikası FHN-nin X8 Xidməti tərəfindən xx.xx.2025-xx.xx.2025-ci il tarixləri arasında keçiriləcək planlı yoxlama “Qusar RMX” PHŞ-nin VÖEN-i üzrə sistemə yerləşdirilmişdir. İş materiallarında olan xx.xx.2025-ci il tarixli 350 saylı yanğın-texniki müayinə aktından görünür ki,
1. Binanın yanar taxta konstruksiyaları odadavamlı məhlulla hopdurulmayıb.
2. Elektrik naqilləri və işıqlandırılan EQQQ-ya uyğun yerinə yetirilməmişdir
3. Daxili elektrik naqillərinin izoliyasiyalarının gərginliyinə qarşı müqavimətlərinin ölçülməsi barədə mütəxəssis aktı tərtib edilməmişdir.
4. Bina avtomatik yanğın xəbərverici siqnalizasiya qurğuları ilə təmin edilməmişdir.
5. Bina üzrə yanğın zamanı insanların və qiymətli əşyaların köçürülməsi üçün təxliyyə planı tərtib edilməmişdir. Məhkəmə, iş materiallarını nəzərdən keçirib, hesab edir ki, hüquqi şəxs “Qusar rayon Mərkəzi Xəstəxanası” PHŞ həmin hərəkəti ilə Azərbaycan Respublikası İnzibati Xətalar Məcəlləsinin 518.1-ci maddəsində nəzərdə tutulan inzibati xətanı törətmişdir və onun barəsində inzibati tənbeh tətbiq edilməlidir. “Qusar rayon Mərkəzi Xəstəxanası” PHŞ -nin həmin inzibati xətanı törətməsi, MN № ******* saylı, xx.xx.2025-ci il tarixli saylı inzibati xəta haqqında protokol və protokola əlavə olunmuş sənədlərlə və Azərbaycan Respublikasının Fövqəladə Hallar Nazirliyi X8 Xidmətinin nümayəndəsi X3 izahatı ilə sübuta yetirilir. Azərbaycan Respublikası İXM-nin 18.5-ci maddəsinə əsasən hüquqi şəxs barəsində inzibati tənbeh yalnız hakim tərəfindən tətbiq edilir. Azərbaycan Respublikası İnzibati Xətalar Məcəlləsinin 31.3-cü maddəsinə əsasən hüquqi şəxslər barəsində inzibati tənbeh tətbiq edilərkən, inzibati xətanın xarakteri, inzibati xəta nəticəsində hüquqi şəxsin əldə etdiyi xeyrin həcmi və ya onun maraqlarının təmin edilməsinin xarakteri və dərəcəsi, hüquqi şəxsi xarakterizə edən hallar, o cümlədən onun maliyyə və əmlak vəziyyəti, xeyriyyəçilik və ya digər ictimai faydalı fəaliyyətlə məşğul olması, habelə məsuliyyəti yüngülləşdirən və ağırlaşdıran hallar nəzərə alınır. Azərbaycan Respublikası İnzibati Xətalar Məcəlləsinin 518.1-ci maddəsinə əsasən mülkiyyət formasından asılı olmayaraq müəssisə, idarə və təşkilatlarda, ictimai yerlərdə, anbarlarda, yataqxanalarda və ya digər yaşayış sahələrində, meşələrdə və nəqliyyatda yanğın təhlükəsizliyi standartlarının, normalarının və qaydalarının tələblərinin pozulmasına və ya yerinə yetirilməməsinə görə-fiziki şəxslərə xəbərdarlıq edilir və ya onlar iyirmi manatdan otuz manatadək məbləğdə cərimə edilir, vəzifəli şəxslərə xəbərdarlıq edilir və ya onlar yüz manatdan yüz əlli manatadək məbləğdə, hüquqi şəxslər üç yüz əlli manatdan beş yüz manatadək məbləğdə cərimə edilir. Azərbaycan Respublikası İnzibati Xətalar Məcəlləsinin 12.1-ci maddəsinə görə bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Məhkəmə iş üzrə toplanmış sübutların və onların məcmusunun tam, hərtərəfli və obyektiv baxılmasına əsaslanmaqla belə nəticəyə gəlir ki, “QUSAR RMX” PHŞ-nin Azərbaycan Respublikası İnzibati Xətalar Məcəlləsinin 518.1-ci maddəsində nəzərdə tutulmuş inzibati xətanın törədilməsində təqsirliliyi inzibati xəta haqqında protokol və digər sənədlərlə sübuta yetirilmiş və onun əməli düzgün olaraq İXM-nin 518.1-ci maddəsi ilə tövsif edilmişdir. Məhkəmə istinad edilən və inzibati məsuliyyətə səbəb olan əmələ inzibati xətalar qanunvericiliyin sübutlar və sübutetmə ilə bağlı müddəaları baxımından yanaşaraq hesab edir ki, məhkəmə araşdırmalarında tədqiq edilmiş sübutlar həqiqiliyinə, yaranma mənbəyinə və əldə edilməsi hallarına görə sübut kimi qəbul ediləndir və sübutların məcmusu istinad edilən inzibati məsuliyyətə səbəb olan əmələ qiymət verilməsi baxımından kifayət edir. Habelə, əməlin inzibati xəta olmasını aradan qaldıran hallar, həmçinin inzibati məsuliyyətdən azad edilməsi üçün əsaslar olmadığından, “QUSAR RMX” PHŞ inzibati məsuliyyətinə cəlb edilməli və barəsində inzibati tənbeh tətbiq edilməlidir. Azərbaycan Respublikası İXM-nin 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmin Məcəllənin 31.3-cü maddəsinə əsasən hüquqi şəxslər barəsində inzibati tənbeh tədbiq edilərkən, inzibati xətanın xarakteri, inzibati xəta nəticəsində hüquqi şəxsin əldə etdiyi xeyrin həcmi və ya onun maraqlarının təmin edilməməsinin xarakteri və dərəcəsi, hüquqi şəxsi xarakterizə edən hallar, o cümlədən onun maliyyə və əmlak vəziyyəti, xeyriyyəçilik və ya digər ictimai faydalı fəaliyyətlə məşğul olması, habelə məsuliyyəti yüngülləşdirən və ağırlaşdıran hallar nəzərə alınır. Azərbaycan Respublikası İnzibati Xətalar Məcəlləsinin 116.1-ci maddəsinə əsasən eyni inzibati xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsi halları istisna olmaqla, bu Məcəllənin 192.6, 192.10, 192.11, 201, 203, 209, 279.0.1, 393-1.2, 393-1.4, 394.0.5, 394.0.7, 395, 518.1, 532, 533-1, 536, 537.2, 539, 540.3 – 540.5, 541 – 544, 551.2, 557.2 və 603-cü maddələrində nəzərdə tutulan inzibati xətanı törətmiş şəxs barəsində səlahiyyətli orqan (vəzifəli şəxs) inzibati cərimənin şərti olaraq tətbiq edilməsi haqqında qərar çıxarır. Məhkəmə, Azərbaycan Respublikası FHN-nin X8 Xidmətinin nümayəndəsi X3 izahatını sübut kimi, “Qusar RMX” PHŞ-nin X2 izahatını isə özünü müdafiə xarakterli hesab edir. Məhkəmə araşdırması zamanı müəyyən edilmişdir ki, “Qusar RMX” PHŞ Qusar rayon Məhkəməsinin 3(029)-81/2025 xx.xx.2025-ci il qərarı ilə Azərbaycan Respublikası İXM-nin 518.1-ci maddəsi ilə təqsirli bilinərək barəsində 350 (üç yüz əlli) manat miqdarında cərimə inzibati tənbehi tətbiq edilmişdir. Həmin qərar xx.xx.2025-ci il tarixdə qanuni qüvvəyə minmişdir. Odur ki, bu hal “Qusar RMX” PHŞ-nin barəsində inzibati tənbehin şərti tətbiq edilməsini istisna edir. Belə ki, Azərbaycan Respublikası İXM-nin 116.1-ci maddəsinin tələbindən görünür ki, şəxs barəsində inzibati tənbehin şərti tətbiq edilməsinin əsası kimi şəxsin eyni inzibati xətanı 1 il ərzində təkrar törətməməsi halı göstərilmişdir. Lakin iş materiallarından görünür ki, “Qusar RMX” PHŞ 1 il ərzində dəfələrlə eyni inzibati xətanı törətmişdir. Barəsində inzibati xəta haqqında iş üzrə icraat aparılan hüquqi şəxs “Qusar rayon Mərkəzi Xəstəxanası” PHŞ-nin eyni inzibati xətanı 1 il ərzində təkrar törətməsi məhkəmə tərəfindən ağırlaşdıran hal qismində nəzərə alınır. Barəsində inzibati xəta haqqında iş üzrə icraat aparılan hüquqi şəxs “Qusar rayon Mərkəzi Xəstəxanası” PHŞ-nin haqqında inzibati tənbeh tətbiq edilməsi məsələsi müzakirə edilərkən məsuliyyəti yüngülləşdirən hallar müəyyən edilməmişdir. Məhkəmə barəsində inzibati xəta haqqında iş üzrə icraat aparılan hüquqi şəxs “Qusar rayon Mərkəzi Xəstəxanası” PHŞ-nin törətdiyi inzibati xətanın xarakterini və işin digər hallarını nəzərə alaraq hüquqi şəxs “Qusar rayon Mərkəzi Xəstəxanası” PHŞ barəsində inzibati tənbeh növü olaraq inzibati cərimə növündə inzibati tənbeh tətbiq edilməsini məqsədə müvafiq hesab edir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 114, 115, 128-130-cu maddələrini rəhbər tutaraq QƏRARAALDİ: Hüquqi şəxs “Qusar rayon Mərkəzi Xəstəxanası” PHŞ (VÖEN №**********) Azərbaycan Respublikası İnzibati Xətalar Məcəlləsinin 518.1-сi maddəsi ilə təqsirli bilinib 350 (üç yüz əlli) manat məbləğində cərimə edilsin. Qərarın surəti təqdim edildiyi və ya alındığı gündən 10 (on) gün müddətində Qusar Rayon Məhkəməsi vasitəsilə və ya birbaşa Sumqayıt Apellyasiya Məhkəməsinə şikayət və ya protest verilə bilər. Qərardan apellyasiya qaydasında şikayət və protest verilmədikdə qərardan şikayətin verilməsi müddətinin bitdiyi gün qərar qanuni qüvvəyə minir.
Hakim: Əli Cəlilov