Qusar Rayon Məhkəməsi Qərardad — İş №3(029)-288/2021

Azərbaycan Respublikası adından QƏRARDAD Qusar şəhəri İş № 3(029)-288/2021 22.06.2021 QUSAR RAYON MƏHKƏMƏSİ Mən, Qusar rayon məhkəməsinin hakimi Adil Yaqub oğlu Vəliyev xx.xx.1965-ci il təvəllüdlü, ünvan 1 ünvanda qeydiyyatda olan, Azərbaycan Respublikasının vətəndaşı Şəxs haqqında Azərbaycan Respublikasının İXM-nin 528.1-ci maddəsi ilə Qusar rayon İcra və Probasiya Şöbəsindən daxil olmuş inzibati xəta haqqında materialları Qusar rayon məhkəməsinin binasında nəzərdən keçirib, MÜƏYYƏN ETDİM: Təqdim edilmiş inzibati xəta haqqında protokoldan görünür ki, Yasamal rayon məhkəməsinin MƏ-493/01 saylı 06.09.2001-ci il tarixli icra sənədinə əsasən Şəxs 10000 manat aliment borcu yaranmışdır. Lakin, borclu aliment borcunu ödəməmişdir. Həmin faktla bağlı Qusar rayon İcra və Probasiya şöbəsi tərəfindən 22 iyun 2021-ci il tarixli MN ******* saylı inzibati xəta haqqında protokol tərtib olunaraq baxılması üçün Qusar rayon məhkəməsinə göndərilmişdir. İş materiallarını araşdıraraq hesab edirəm ki, inzibati xəta haqqında protokol və ona əlavə olunmuş sənədlər protokolu tərtib etmiş orqana geri qaytarılmalıdır. Belə ki, inzibati xəta haqqında protokolda Şəxs haqqında məlumat-yəni təvəllüdü və yaşayış yeri barədə məlumatlar, o cümlədən fərdi identifikasiya nömrəsi göstərilməmiş, onun Qusar rayonunda hansı ünvanda yaşaması barədə müvafiq sənəd protokola əlavə olunmamışdır. Bundan başqa, inzibati xəta haqqında protokolda Elman Bədəlovun 10000 manat məbləğində aliment borcunun olması göstərilsə də, bu barədə dəqiq və konkret sübutlar protokola əlavə olunmamış, icra işinin materialları ilə isə müəyyən olunur ki, icra sənədi üzrə tələb borclu X3 şəhəri L.Nemət küçəsində 4 sot torpaq sahəsində yerləşən 1 otaqlı 233A saylı fərdi yaşayış evinə yönəldilmiş, həmin ev hərrac vasitəsi ilə tələbkar X1 verilmiş, lakin həmin ev həmin şəxsin mülkiyyətinə keçməmiş, bu barədə mübahisə yaranmış, hazırda həmin işlə əlaqədar Bakı şəhəri Nərimanov rayon və Sumqayıt İnzibati Məhkəmələrində mübahisələrə baxılır. Bununla da, hazırkı inzibati xəta haqqında protokol düzgün tərtib olunmamaqla yanaşı natamamdır və baxılarkən tamamlanması mümkün deyildir. Azərbaycan Respublikasının İXM-nin 100.1, 100.1.3-cü maddələrinə əsasən inzibati xəta haqqında protokolda barəsində inzibati xəta haqqında iş üzrə icraat aparılan şəxs haqqında məlumat, o cümlədən vətəndaşın fərdi identifikasiya nömrəsi göstərilir. Göründüyü kimi inzibati xəta haqqında protokol Azərbaycan Respublikasının İXMnin 100-cü maddəsinin tələbləri pozulmaqla tərtib edilmiş, natamamdır və işə baxılarkən həmin protokola baxıb tamamlamaq mümkün deyildir. Həmin Məcəllənin 109.1, 109.1.6-cı maddələrinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Beləliklə, iş materiallarını tam şəkildə araşdırıb belə qənaətə gəlirəm ki, Şəxs barəsində Azərbaycan Respublikasının İXM-nin 528.1-ci maddəsi ilə tərtib edilmiş inzibati xəta haqqında 22.06.2021-ci il tarixli MN ******* saylı protokol düzgün tərtib olunmadığından, natamam olduğundan, bu səbəbdən də işə baxılarkən tamamlamaq mümkün olmadığından inzibati xəta haqqında protokol və ona əlavə olunmuş digər sənədlər onu tərtib etmiş Qusar rayon İcra və Probasiya Şöbəsinə geri qaytarılmalıdır. Şərh olunanlara əsaslanaraq və Azərbaycan Respublikasının İnzibati Xətalar Məcəlləsinin 100, 106, 109-cu maddələrini rəhbər tutaraq, QƏRARA ALDİM: Şəxs barəsində Azərbaycan Respublikasının İXM-nin 528.1-ci maddəsi ilə tərtib edilmiş inzibati xəta haqqında 22.06.2021-ci il tarixli MN ******* saylı protokol və ona əlavə edilmiş sənədlər Qusar rayon İcra və Probasiya Şöbəsinə geri qaytarılsın. Qusar rayon Məhkəməsinin hakimi Adil Vəliyev