İmişli Rayon Məhkəməsi Qərar — İş №3(036)-1012/2025

Azərbaycan Respublikası adından QƏRAR İmişli rayonu İş № 3(036)-1012/2025 11.07.2025 İMİŞLİ RAYON MƏHKƏMƏSİ İmişli Rayon Məhkəməsinin hakimi Ağayeva Gülsaba Xeyrulla qızının sədrliyi, Məhkəmə iclasının katibi Əsədli Xuraman Emin qızının katibliyi ilə, Şəxs barəsində Azərbaycan Respublikası İnzibati Xətalar Məcəlləsinin 347-ci maddəsi ilə tənbeh tədbirinin tətbiq edilməsinə dair İmişli rayon Polis Şöbəsindən daxil olmuş inzibati xəta haqqında materiala açıq məhkəmə iclasında baxaraq müəyyən etdi: İmişli Rayon Polis şöbəsindən daxil olmuş İXP seriyalı ******* nömrəli 14 fevral 2025-ci il tarixli inzibati xəta haqqında protokolda göstərilmişdir ki, Şəxs MMC tərəfindən 5 gün müddətində tələb olunan məlumatla bağlı sorğuya cavab verilməmiş, barəsində Azərbaycan Respublikası İnzibati Xətalar Məcəlləsinin 347-ci maddəsində nəzərdə tutulmuş inzibati xəta haqqında protokol tərtib edilərək məhkəməyə göndərilmişdir. Barəsində inzibati icraat aparılan hüquqi şəxsə və inzibati protokolu tərtib etmiş səlahiyyətli orqana məhkəmə iclasının vaxtı və yeri barədə məhkəmə bildirişi göndərilmiş, lakin onlar məhkəmə iclasına gəlməmiş və bunun səbəbi barədə məlumat verməmişlər. Bu səbəbdən məhkəmə barəsində inzibati icraat aparılan şəxsin və səlahiyyətli orqanın nümayəndəsinin iştirakı olmadan işə baxılmasını mümkün hesab etmişdir. İş materiallarında olan və məhkəmə baxışında tədqiq edilmiş: İmişli Rayon Polis şöbəsindən Şəxs MMC-yə ünvanlanmış xx.xx.2025-ci il tarixli məktubdan görünür ki, xx.xx.2024-cü il tarixdə Şəxs MMC-yə məxsus “X1 21214-013-51” minik markalı, 77PH530 dövlət qeydiyyat nişanlı nəqliyyat vasitəsini idarə edən şəxs Goranboy rayonu Rəhimli-Veyisli yolu, yolda müəyyən edilmiş hərəkət sürətini 14 km/saat həddində aşmış, bununla da Azərbaycan Respublikası İnzibati Xətalar Məcəlləsinin 328.1-ci maddəsi ilə nəzərdə tutulmuş inzibati xətanı törətmişdir. Həmin məktubdan görünür ki, Şəxs MMC-yə məxsus “X1 21214-013-51” minik markalı, 77PH530 dövlət qeydiyyat nişanlı nəqliyyat vasitəsini idarə etmiş fiziki şəxs barədə rəsmi məlumat verilməsi, əks halda şirkət barəsində Azərbaycan Respublikası İXM-nin 347ci maddəsi ilə protokol tərtib olunaraq baxılması üçün məhkəməyə göndəriləcəyi barədə xəbərdarlıq edilmişdir; İmişli Rayon Polis şöbəsi tərəfindən Şəxs MMC-yə ünvanlanmış məktubun geri qayıtmış poçt zərfindən görünür ki, qeyd olunan məktub Şəxs MMC-nin rəsmi qeydiyyat ünvanına-İmişli rayonu, Qaralar kəndi ünvanına göndərilsə də, “ünvanda yaşamır” qeydi ilə geri qayıtmışdır. Eynilə məhkəmə tərəfindən göndərilmiş poçt zərfi də MMC-nin hüquqi ünvanına göndərilsə də, “bu ünvanda yoxdur” qeydi ilə geri qayıtmışdır. Kommersiya hüquqi şəxslərin dövlət reyestri haqqında məlumatlardan görünür ki, MMC-nin hüquqi ünvanı İmişli rayonu, Qaralar kəndidir. Məhkəmə bununla bağlı qeyd edir ki, MMC-nin hüquqi ünvanına göndərilmiş sorğu zərfinin sorğunu verən orqana, daha sonra isə məhkəmə bildirişinin məhkəməyə geri qayıtması hüquqi şəxs barəsində inzibati tənbeh tədbirinin tətbiqindən imtina üçün əsas kimi qiymətləndirilə bilməz. Belə ki, hüquqi şəxsin elektron kabinetinə məhkəmə bildirişi göndərilmiş, məhkəmə iclası barədə səlahiyyətli nümayəndə sms-bildirişlə lazımi qaydada məlumatlandırılmış, səlahiyyətli nümayəndənin məhkəmə iclasında iştirakının təmin edilməsi üçün məhkəmə iclası təxirə salınmışdır. Buna baxmayaraq, barəsində protokol tərtib edilmiş hüquqi şəxsin nümayəndəsi üzrlü səbəblər olmadan məhkəmə iclasında iştirak etməmiş, tərtib edilmiş protokolun əsassızlığı ilə bağlı məhkəməyə hər hansı sübut təqdim etməmişdir. Azərbaycan Respublikası İnzibati Xətalar Məcəlləsinin 347-ci maddəsinə əsasən nəqliyyat vasitəsinin istifadəçisi barədə məlumat verilməməsinə- hüquqi şəxsin mülkiyyətində və istifadəsində olan nəqliyyat vasitəsini inzibati xətanı törədilməsi zamanı idarə etmiş fiziki şəxs haqqında məlumatın səlahiyyətli orqanın (vəzifəli şəxsin) bu barədə sorğusu daxil olduğu vaxtdan 5 gün müddətinə verilməməsinə görə - vəzifəli şəxslər yüz əlli manat məbləğində, hüquqi şəxslər üç yüz manat məbləğində cərimə edilir. Məhkəmə iclasında tədqiq edilmiş inzibati xəta haqqında protokol, inzibati materialda olan digər sənədlərlə sübuta yetirilmişdir ki, barəsində inzibati icraat aparılan hüquqi şəxs Şəxs MMC hüquqi şəxs olaraq Azərbaycan Respublikası İnzibati Xətalar Məcəlləsinin 347-ci maddəsində nəzərdə tutulmuş inzibati xətanı törətmişdir. Məhkəmə törədilmiş inzibati xətanın xarakterini, məsuliyyəti yüngülləşdirən və ağırlaşdıran halların müəyyən edilməməsini nəzərə alıb, iş üzrə sübutları qiymətləndirərək hesab edir ki, “İnnova İnşaat“ MMC barəsində Azərbaycan Respublikası İnzibati Xətalar Məcəlləsinin 347-ci maddəsinin sanksiyasının hədləri daxilində müəyyən məbləğdə cərimə növündə inzibati tənbeh tətbiq edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 43, 114-115 və 347-ci maddələrini rəhbər tutaraq QƏRARA ALDİ: Şəxs Azərbaycan Respublikası İnzibati Xətalar Məcəlləsinin 347-ci maddəsində nəzərdə tutulmuş inzibati xətanı törətməkdə təqsirli bilinərək 300 (üç yüz) manat məbləğində cərimə edilsin. Qərarın surəti təqdim edildiyi və ya alındığı gündən 10 (on) gün müddətində İmişli Rayon Məhkəməsi vasitəsilə və ya birbaşa Şirvan Apellyasiya Məhkəməsinə şikayət verilə bilər. Hakim Gülsaba Ağayeva