İmişli Rayon Məhkəməsi Qərar — İş №3(036)-1214/2025

Azərbaycan Respublikası adından QƏRAR İmişli rayonu İş № 3(036)-1214/2025 21.07.2025 İMİŞLİ RAYON MƏHKƏMƏSİ Hakim Ağayeva Gülsaba Xeyrulla qızının sədrliyi, Məhkəmə iclas katibi Əsədli Xuraman Emin qızının katibliyi, İnzibati xəta haqqında protokolu tərtib edən İmişli Rayon İcra və Probasiya şöbəsinin icra məmuru X1, Barəsində inzibati xəta haqqında iş üzrə icraat aparılan şəxs Şəxs iştirakı ilə, xx.xx.1991-ci il tarixdə Füzuli rayon Yuxarı Seyidəhmədli kəndində doğulmuş, Azərbaycan Respublikasının vətəndaşı, evli, orta təhsilli, rəsmi işləməyən, Füzuli rayon Yuxarı Seyidəhmədli kəndində qeydiyyatda olan və İmişli rayonu Meliorator qəsəbəsində yaşayan, Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə tənbeh tədbirinin tətbiq edilməsinə dair İmişli rayon İcra və probasiya şöbəsindən daxil olmuş inzibati xəta haqqında materiala açıq məhkəmə iclasında baxaraq, məhkəmə müəyyənetdi: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə inzibati xəta haqqında protokol ondan ötrü tərtib olunmuşdur ki, İmişli Rayon Məhkəməsinin 2(036)-91/2023 saylı, xx.xx.2023-cü il tarixli icra sənədi üzrə icra məmurunun qanuni tələblərini yerinə yetirməmiş və hazırda 1117 manat aliment borcu yaranmışdır. Məhkəmə iclasında İmişli Rayon İcra və Probasiya Şöbəsinin icra məmuru Aqil Əfəndiyev izahat verərək bildirdi ki, borclu Şəxs İmişli Rayon Məhkəməsinin 2(036)- 91/2023 saylı, xx.xx.2023-cü il tarixli icra sənədini tam icra etməmiş, bu səbəbdən ödənilməmiş 1117 manat borcu qalmışdır. Odur ki, borclu Şəxs barəsində İXM-nin 528.1-ci maddəsi ilə protokol tərtib edilərək məhkəməyə göndərilmişdir. Beləliklə, göstərilənlərə əsasən o, Şəxs barəsində məhkəmə qərarının qəbul olunmasını məhkəmənin mülahizəsinə buraxdı. İcra məmuru məhkəmənin suallarını cavablandıraraq bildirdi ki, barəsində inzibati xəta haqqında iş üzrə icraat aparılan şəxsin bildirdikləri-yəni başqa kart hesabına ödəmələr etməsi ilə bağlı onda məlumat yoxdur. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahat verərək bildirdi ki, rəsmi olaraq işləmir. Çayçı kimi işləyərək, qazanc əldə edir. Qazandıqca aliment borcundan ödəyir. Hazırda işlərinin olmamasından aliment borcunu tam ödəyə bilməmişdir. İşlədikcə aliment borcundan ödəmələr edəcəkdir, əlavə olaraq bildirdi ki, onun tərəfindən 3000 manatdan artıq, 4000 manata yaxın ödəmələr edilmişdir. Lakin tələbkarın kart hesabına deyil, başqa kart hesabına edilmiş ödəmələr nəzərə alınmamışdır. Şəxs məhkəmə iclasında qalıq borcundan tələbkara 200 manat verməyə hazır olduğunu bildirdi və məhkəmə qərarının qəbul olunmasını məhkəmənin mülahizəsinə buraxdı. Məhkəmə iclasında tələbkar X6 izahatında göstərmişdir ki, özü işləyə bilmir, çünki uşağı heç kimin yanında saxlaya bilmir. Onun valideynləri vəfat etmişlər. Borclu aliment ödənişlərini vaxtlı-vaxtında etmir. 150 manat ödəniş edir, onu da tam ödəmir. Bank çıxarışını icraçıya təqdim etmişdir, çıxarışda edilmiş ödənişlər öz əksini tapır. Şəxs ödədiyi aliment məbləği az miqdardadır. Onlara kifayət etmir. O həmişə ödənişlər üçün yalnız öz kartını təqdim etmişdir. Borclunun bildirdikləri, başqa kart hesabına pul köçürməsi həqiqəti əks etdirmir. Belə bir hal olmayıb. Tələbkar məhkəmə qərarının qəbul olunmasını məhkəmənin mülahizəsinə buraxdı. İş materiallarında olan və məhkəmə baxışında tədqiq edilmiş: İmişli Rayon Məhkəməsinin 2(036)-91/2023 saylı, xx.xx.2023-cü il tarixli icra vərəqəsindən görünür ki, birgə nikahdan doğulmuş xx.xx.2019-cu il təvəllüdlü X3 yetkinlik yaşına çatanadək saxlanması üçün 21 fevral 2023-cü il tarixdən hesablanmaqla cavabdeh Şəxs hər ay 150 manat sabit pul məbləğində aliment tutularaq X4 verilməsi qət edilmişdir; İmişli Rayon İcra və Probasioya şöbəsinin icra məmuru Aqil Əfəndiyevin icraata başlamaq haqqında xx.xx.2023-cü il tarixli qərarı ilə icra sənədi üzrə icraata başlanılmış və icra sənədinin könüllü icrası üçün borcluya 10 gün müddət verilmişdir. Tələbin könüllü icrası üçün borcluya eyni tarixli bildiriş göndərilmişdir. Elektron İcra Sistemindən çıxarışdan görünür ki, Şəxs heç bir yerdə işləmir və adına hər hansı daşınmaz əmlak və dövlət qeydiyyatına alınmalı daşınar əmlakı yoxdur; İşdə olan bank çıxarışlarından görünür ki, tələbkar X2 hesabına xx.xx.2023-cü il tarixdən xx.xx.2025-ci il tarixə kimi müxtəlif vaxtlarda və məbləğlərdə ödənişlər edilmiş, sonuncu ödənişlər 2025-ci ilin may ayında 100 manat, iyun ayında 50 manat olmuşdur. Borclunun izahatından görünür ki, ödənilən məbləğ cəmi 3323 manat təşkil edir. Tələbkar tərəfindən təqdim olunmuş ərizə ilə müəyyən olunur ki, borclu tərəfindən məhkəmə iclasında 200 manat aliment borcu ödənilmişdir. Azərbaycan Respublikası Konstitusiyasının 125-ci maddəsinin Vİİ bəndi ilə müəyyən edilmişdir ki, məhkəmə icraatı həqiqətin müəyyən edilməsini təmin etməlidir. Azərbaycan Respublikası İnzibati Xətalar Məcəlləsinin: 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. 8.3-cü maddəsinə əsasən isə inzibati məsuliyyətə cəlb olunan şəxsin təqsirli olması barəsində olan şübhələr onun xeyrinə həll olunur. 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir; 84.1-ci maddəsinə əsasən inzibati xətalar haqqında işlərə baxan hakim, kollegial orqanın üzvü, vəzifəli şəxs işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. 105.1-ci maddəsinə əsasən Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir; 114.2.1-ci maddəsinə əsasən Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar qəbul edilir. 528.1-ci maddəsinə əsasən məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə - fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir; “İcra haqqında” Qanunun 82.1-ci maddəsinə görə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədi icra məmuru tərəfindən müəyyən olunmuş müddətdə üzrsüz səbəbdən icra olunmadıqda, icra məmuru borclunun Azərbaycan Respublikasının qanunvericiliyi ilə nəzərdə tutulmuş qaydada inzibati məsuliyyətə cəlb olunması üçün inzibati xəta haqqında protokol tərtib edir və onu işin digər materialları ilə birlikdə müvafiq məhkəməyə göndərir. Həmçinin icra məmuru tərəfindən borcluya icra üçün yeni müddət təyin edilir. Azərbaycan Respublikası İnzibati Xətalar Məcəlləsinin 528.1-ci maddəsinin həmin Məcəllənin 9.2 və 35-ci maddələri baxımından şərh edilməsinə dair Azərbaycan Respublikası Konstitusiya Məhkəməsi Plenumunun 04 sentyabr 2018-ci il tarixli qərarında qeyd edilmişdir ki, İnzibati Xətalar Məcəlləsinin 9-cu maddəsində təsbit edilmiş ədalətlilik prinsipinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. İnzibati Xətalar Məcəlləsində təsbit edilən ədalətlilik prinsipi özünün fərqləndirici meyarı ilə inzibati xəta sayılan əməl və başqa hüquq pozuntuları arasında sərhəd müəyyən edir. Bu prinsip inzibati xəta sayılan əmələ görə qanun qarşısında xəta törətmiş hər bir şəxsin məsuliyyətini müəyyən etməklə, inzibati məsuliyyətin həcminin mütənasibliyini müəyyənləşdirir. İnzibati xətanın növlərinə görə tənbeh nəzərdə tutan maddələr isə ədalətlilik prinsipini rəhbər tutaraq fərdiləşdirici ölçüləri müəyyən edir. İnzibati xəta haqqında protokolu, icra məmurunun, tələbkarın və barəsində inzibati xəta haqqında iş üzrə icraat aparılan şəxsin izahatlarını, eləcədə inzibati materialda olan sənədləri nəzərə alıb iş üzrə sübutları qiymətləndirərək məhkəmə hesab edir ki, Azərbaycan Respublikası İXM-nin 528.1-ci maddəsində nəzərdə tutulmuş inzibati xətanın Şəxs tərəfindən törədilməsi məhkəmə iclasında öz təsdiqini tapmamışdır. Qanunun müddəasına görə icra sənədinin üzrsüz səbəbdən icra edilməməsi inzibati məsuliyyətə səbəb olur. Borclunun isə icra sənədi üzrə olan borcunu ödəməkdən yayınması hazırki iş üzrə istisna olunur. Belə ki, məhkəmə baxışında müəyyən edilmişdir ki, İmişli Rayon Məhkəməsinin 2(036)-91/2023 saylı, xx.xx.2023-cü il tarixli icra sənədi üzrə icraata başlama haqqında qərar qəbul edilmiş və həmin qərar tələbin könüllü icrası barədə bildirişlə bərabər borclunun ünvanına göndərilmişdir. Şəxs tərəfindən icra sənədi üzrə olan borcundan X2 xeyrinə borcundan yuxarıda qeyd edilən məbləğlərdə ödənişlər edilmiş və qalan hissəsi də yaxın günlərə ödəniləcəkdir. Yuxarıda sadalanan qanunun tələbləri və işin həqiqi halları baxımından məhkəmə belə qənaətə gəlir ki, barəsində inzibati icraat aparılan şəxsə istinad olunan maddənin dispozisiyasına əsasən icra sənədinin borclu tərəfindən üzrsüz səbəbdən icra edilməməsi inzibati məsuliyyətə səbəb olduğundan, hazırkı halda isə borclu Şəxs tərəfindən icra sənədi üzrə ödənişin edilməsi qismən təmin olunmaqla icra sənədinin üzrsüz səbəblərdən icra edilməməsi halının mövcudluğu istisna olunduğundan Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə təqsirləndirilməsinə dair inzibati xəta haqqında iş üzrə icraata əməlində inzibati xəta tərkibi olmadığından xitam verilməlidir. Göstərilənlərə əsasən və Azərbaycan Respublikası İnzibati Xətalar Məcəlləsinin 43, 48-51, 53, 114, 15, 128-130-cu maddələrini rəhbər tutaraq QƏRARAALDİ: Şəxs Azərbaycan Respublikasının İnzibati Xətalar Məcəlləsinin 528.1-ci maddəsi ilə nəzərdə tutulan inzibati xətanı törətməsinə dair iş üzrə icraata barəsində inzibati icraat aparılan şəxsin əməlində inzibati xəta tərkibi olmadığından xitam verilsin. Qərarın surəti təqdim edildiyi və ya alındığı gündən 10 (on) gün müddətində İmişli rayon Məhkəməsi vasitəsilə və ya birbaşa Şirvan Apellyasiya Məhkəməsinə apellyasiya şikayəti verilə bilər. Hakim Gülsaba Ağayeva