İsmayıllı Rayon Məhkəməsi Qərar — İş №3(037)-396/2020

Azərbaycan Respublikası adından QƏRAR İsmayıllı rayonu İş № 3(037)-396/2020 13.11.2020 İSMAYILLI RAYON MƏHKƏMƏSİ Şirinov Rəfayel Səməd oğlunun sədrliyi Qasımov Sənani Nazir oğlunun katibliyi, İnzibati xəta haqqında protokol tərtib etmiş şəxs – İsmayıllı rayon Polis Şöbəsinin İctimai Təhlükəsizlik Bölməsinin polis sahə rəisi X3, Zərərçəkmiş şəxs, Barəsində inzibati xəta haqqında iş üzrə icraat aparılan şəxs Şəxs iştirakı ilə xx xxx 1987-ci il tarixdə İsmayıllı rayonu İsmayıllı kəndində anadan olmuş, İsmayıllı şəhəri, 30 A kvartalda yaşayan, Azərbaycan Respublikası vətəndaşı, evli, orta təhsilli, işləməyən, öz deməsinə görə il ərzində eyni inzibati xətaya görə inzibati məsuliyyətə cəlb edilməmiş, fərdi identifikasiya nömrəsi xxxxxxx Şəxs barəsində İsmayıllı rayon Polis Şöbəsindən Azərbaycan Respublikası İnzibati Xətalar Məcəlləsinin 157-ci maddəsi ilə daxil olan inzibati xəta haqqında materiala xx xxxxxx 2020-ci il tarixdə İsmayıllı şəhərində İsmayıllı Rayon Məhkəməsinin binasında açıq məhkəmə iclasında baxaraq müəyyən etdi: Şəxs xx xxxxxxxx 2020-ci il tarixdə saat 12:00 radələrində İsmayıllı şəhəri, 30 A kvartalın həyətyanı sahəsində bacısı Zərərçəkmiş şəxs ilə aralarında baş vermiş mübahisə zamanı sonuncunu vuraraq onu qəsdən döyməsi faktı üzrə İsmayıllı rayon Polis Şöbəsinin Təhqiqat Qrupunun təhqiqatçısı Rüstəm Atakişiyevin xx xxxxxxx 2020-ci il tarixli qərarı ilə cinayət işinin başlanması rədd edilmiş və qərarın surəti barəsində Azərbaycan Respublikası İnzibati Xətalar Məcəlləsinin 157-ci maddəsi ilə inzibati tədbir görülməsindən ötrü şöbənin İctimai Təhlükəsizlik Bölməsinə verilmişdir. İsmayıllı rayon Polis Şöbəsinin sahə rəisi tərəfindən Şəxs barəsində Azərbaycan Respublikası İnzibati Xətalar Məcəlləsinin 157-ci maddəsi ilə xx xxxxxx 2020-ci il tarixli MN ******* saylı inzibati xəta haqqında protokol tərtib edilərək həmin tarixdə baxılması üçün aidiyyəti üzrə məhkəməyə göndərilmişdir. İnzibati xəta haqqında protokol tərtib etmiş şəxs - İsmayıllı rayon Polis Şöbəsinin İctimai Təhlükəsizlik Bölməsinin polis sahə rəisi Ağacan Qarayev izahatında göstərdi ki, Şəxs bacısı Zərərçəkmiş şəxs döyməsi faktı üzrə araşdırma aparılmış və onun əməlində cinayət tərkibinin əlamətləri olmadığından barəsində toplanmış material üzrə cinayət işinin başlanması rədd edilmişdir. Qeyd olunan hadisə nəticəsində zərərçəkmiş şəxsə dərəcəsi təyin edilməyən bədən xəsarəti yetirildiyi üçün barəsində Azərbaycan Respublikası İXM-nin 157-ci maddəsi ilə inzibati xəta haqqında protokol tərtib edilərək baxılması üçün İsmayıllı Rayon Məhkəməsinə göndərilmişdir. Barəsində inzibati xəta haqqında iş üzrə icraat aparılan Şəxs izahat verərək göstərdi ki, arvadı Gülbənizlə bacısı Vüsalə arasında tez-tez söz mübahisəsi olmuşdur. Sonuncu dəfə xx xxxxxxxx 2020-ci il tarixdə Gülbənizlə Vüsalə arasında mübahisə olmuşdur. xx xxxxxxxx 2020-ci il tarixdə əmisi oğlu Amillə birlikdə olarkən bacısı Vüsalə onlara yaxınlaşmış və onun ünvanına nalayiq ifadələr işlətmişdir. O, Vüsalənin sinəsindən itələyərək uzaqlaşmasını tələb etmişdir. Həmin vaxt anası Rəşxəndə küçəyə çıxmış və onların mübahisə etdiyini görüb halı pisləşərək yerə yıxılmışdır. Dərhal anasını götürərək evə aparmış və bundan sonra yenidən Vüsalə ilə mübahisələri davam etmişdir. Mübahisə zamanı Vüsalənin sifətindən iki dəfə sillə ilə vurmuş və sonra anasının yanına qayıtmışdır. Vüsalə təkrarən onun ünvanına nalayiq ifadələr işlətmiş və ora sonradan gələn Amil Vüsaləni itələyərək küçəyə çıxarmaq istəmişdir. Vüsalə Amilində ünvanına nalayiq ifadələr işlətmiş və Amildə Vüsalənin sifətindən sillə ilə vurmuşdur. Bundan sonra Amillə birlikdə oradan uzaqlaşmışdır. Hazırda Vüsalə ilə barışmamışdır. İş üzrə qanuni qərar qəbul edilməsini məhkəmədən xahiş edir. Zərərçəkmiş şəxs izahat verərək göstərdi ki, o, Bakı şəhərində yaşayır. Ata-anası İsmayıllı şəhəri, 30 A kvartalda qardaşı Tural və onun arvadı Gülbənizlə birlikdə yaşayır. Gülbəniz tez-tez onun valideynləri ilə mübahisə edib nalayiq ifadələr işlədir. Bu səbəbdən valideynləri Turalı və arvadını evdən çıxarmışdır. xx xxxxxxxx 2020-ci il tarixdə Gülbəniz anasının ünvanına nalayiq ifadələr işlətmişdir. Bu barədə anası ona məlumat vermiş və o, Gülbənizlə danışmaq üçün rayona atası evinə gəlmişdir. Həmin gün saat 23:00 radələrində əmisi oğlu Amilin evinə gedərək Gülbənizi çağırmış və aralarında mübahisə yaranmışdır. Bir qədər sonra qardaşı Tural gələrək onun sifətindən sillə ilə vurmuşdur. Bundan sonra oradan çıxaraq atası evinə getmişdir. Həmin günün səhəri saat 12 radələrində həyətə düşdükdə Turalla Amilin həyətdə olduğunu görmüş və Turala yaxınlaşaraq bir gün əvvəl onu vurduğuna görə cavab verəcəyini bildirmişdir. Bu zaman Tural Amillə birlikdə onun ünvanına nalayiq ifadələr işlətmişdir. Mübahisə zamanı Tural onun sinəsindən təpiklə vurmuşdur. X4 təkrar vurmasının qarşısını almışdır. Həmin vaxt Amil onun boynundan yapışaraq yerə yıxmış, sifət nahiyəsindən bir neçə dəfə yumruqla vurmuş , saçından yapışaraq yerdə sürümüş və bir neçə dəfə qarın nahiyəsindən yumruqla vurmuşdur. Rəşxəndə Amili güclə aralamış və o, hər ikisi barəsində şikayət edəcəyini bildirmişdir. Bundan sonra Tural Amillə birlikdə oradan qaçıb getmişlər. Bundan sonra o, rayon polis şöbəsinə şikayət etmişdir. Hazırda o, Turalı bağışlamamış və onunla barışmamışdır. Qeyd etdikləri nəzərə alınmaq Şəxs inzibati qaydada həbs olunması barədə qərar qəbul edilməsini məhkəmədən xahiş edir. Məhkəmə-Tibbi Ekspertiza və X1 407 №-li xx.xx.2020-ci il tarixli ekspert rəyindən görünür ki, Zərərçəkmiş şəxs bədəni üzərində aşkar edilmiş xəsarətlər- sol almacıq nahiyəsinin və üzün sol yarısının hiperemiyası və qançır, çənə nahiyəsinin qançırı, sol kürək nahiyəsinin, sol dirsək nahiyəsinin, sol bazunun orta 1/3-nin, sağ bazu nahiyəsinin qançırları küt əşya (alət) təsirindən törənmiş, törənmə müddəti xx.xx.2020ci il tarixə uyğun gəlir, xəsarətlər ayrı-ayrılıqda və ümumilikdə sağlamlığa zərər vurmayan xəsarət olduğu üçün dərəcəsi təyin edilmir. İsmayıllı rayon Polis Şöbəsinin Təhqiqat Qrupunun təhqiqatçısı polis mayoru Rüstəm Atakişiyevin xx.xx.2020-ci il tarixli qərarından görünür ki, Şəxs və X2 əməlində cinayət tərkibi müəyyən edilmədiyi üçün cinayət işinin başlanması rədd edilmiş, qərarın surəti barələrində Azərbaycan Respublikası İnzibati Xətalar Məcəlləsinin 157-ci maddəsi üzrə inzibati tədbir görülməsinin təmin edilməsi üçün İsmayıllı rayon Polis Şöbəsinin İctimai Təhlükəsizlik Bölməsinə göndərilmişdir. Dövlət Sosial Müdafiə Fondunun İsmayıllı rayon Şöbəsinin xx xxxxxx 2020-ci il tarixli, **********6 saylı arayışından görünür ki, Şəxs heç bir növ əmək pensiyası və sosial müavinət almadığı qeyd edilmişdir. Məhkəmə araşdırması ilə müəyyən edildi ki, Şəxs xx xxxxxxxx 2020-ci il tarixdə saat 12:00 radələrində İsmayıllı şəhəri, 30 A kvartalın həyətyanı sahəsində bacısı Zərərçəkmiş şəxs ilə aralarında baş vermiş mübahisə zamanı sonuncunu vuraraq onu qəsdən döymüşdür. Məhkəmə iş materiallarını nəzərdən keçirib tərəflərin izahatlarını dinləyərək qərara gəlir ki, Şəxs Azərbaycan Respublikası İnzibati Xətalar Məcəlləsinin 157-ci maddəsində nəzərdə tutulan inzibati xətanı törətmişdir və o, həmin maddə ilə inzibati məsuliyyətə cəlb edilərək inzibati tənbeh edilməlidir. Məhkəmə Şəxs barəsində inzibati tənbeh tətbiq edərkən onun tərəfindən törədilmiş inzibati xətanın xarakterini, barəsində inzibati xəta haqqında iş üzrə icraat aparılan şəxsin şəxsiyyətini, təqsirinin dərəcəsini, məsuliyyəti yüngülləşdirən və ağırlaşdıran halları nəzərə alır. Şəxs tərəfindən törədilmiş inzibati xətada onun məsuliyyətini yüngülləşdirən və ağırlaşdıran hallar aşkar edilməmişdir. Azərbaycan Respublikası İnzibati Xətalar Məcəlləsinin 157-ci maddəsində nəzərdə tutulan inzibati xətanın törədilməsinə görə üç yüz manatdan beş yüz manatadək məbləğdə cərimə və ya işin hallarına görə, xətanı törədənin şəxsiyyəti nəzərə alınmaqla, iki ayadək müddətə inzibati həbs nəzərdə tutulur. Azərbaycan Respublikası İnzibati Xətalar Məcəlləsinin 31.4-cü maddəsinə əsasən bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz. Məhkəmə Şəxs tərəfindən törədilmiş inzibati xətanın xarakterini, inzibati xəta hadisəsinin baş vermə şəraitini və xəsarətin yetirilmə üsulunu, onun şəxsiyyətini, təqsirinin dərəcəsini, öz əməlindən peşman olmadığını, zərərçəkmiş şəxslə barışmağa təşəbbüs göstərmədiyini, zərərçəkmiş şəxsin hazırda da ondan şikayətçi olmasını, nəzərə alaraq barəsində inzibati cərimə tətbiq edilməsinin işin faktiki hallarına uyğun olmadığı qənaətinə gəlir və Azərbaycan Respublikası İnzibati Xətalar Məcəlləsinin 157ci maddəsində nəzərdə tutulan inzibati həbs tətbiq edilməsini, inzibati həbsin 20 (iyirmi) gün müddətində müəyyən edilməsini məqsədə müvafiq hesab edir. İnzibati həbsin əvvəli qərarın elan edildiyi vaxtdan -xx xxxxxx 2020-ci il tarixdən saat 13:00-dan hesablanmalıdır. Göstərilənlərə əsasən və Azərbaycan Respublikası İnzibati Xətalar Məcəlləsinin 30, 43, 106-115, 117-ci maddələrini rəhbər tutaraq məhkəmə qərara aldı: Şəxs Azərbaycan Respublikası İnzibati Xətalar Məcəlləsinin 157-ci maddəsi ilə təqsirli bilinib 20 (iyirmi) gün müddətində inzibati həbs edilsin. İnzibati həbsin əvvəli xx xxxxxx 2020-ci il tarixdən saat 13:00-dan hesablansın. İnzibati həbs müddəti xx xxxxxx 2020-ci il tarixdə saat 13:00-da başa çatmış hesab edilsin. Qərarın icrası İsmayıllı rayon Polis Şöbəsinə həvalə edilsin. Qərarın surəti təqdim edildiyi və ya alındığı gündən 10 (on) gün müddətində İsmayıllı Rayon Məhkəməsi vasitəsi ilə Şəki Apelyasiya Məhkəməsinə şikayət verilə bilər. Sədrlik edən Rəfayel Şirinov