Kəlbəcər Rayon Məhkəməsi Qərar — İş №3(040)-241/2025

Azərbaycan Respublikası adından QƏRAR Göygöl rayonu İş № 3(040)-241/2025 02.09.2025 KƏLBƏCƏR RAYON MƏHKƏMƏSİ Hakim Qəniyev Həsən Salman oğlunun sədrliyi, Məmişova Arzu Ramiz qızının katibliyi, Barəsində inzibati xəta haqqında iş üzrə icraat aparılan şəxs- Şəxs, İnzibati xəta haqqında protokolu tərtib edən səlahiyyətli vəzifəli şəxs-Kəlbəcər Rayon Polis Şöbəsinin İctimai təhlükəsizlik bölməsinin polis sahə rəisi, polis mayoru X2 iştirakları ilə, xx xxxxxx 1975-ci ildə Azərbaycan Respublikasının Kəlbəcər rayonunda doğulmuş, Azərbaycan Respublikasının vətəndaşı, FİN: xxxxxxx, evli, tam orta təhsilli, işləməyən, ünvan 1 ünvanında yaşayış yeri üzrə qeydiyyatda olmaqla ünvan 2, mənzil 04-də məcburi köçkün qismində məskunlaşan Şəxs Azərbaycan Respublikasının İnzibati Xətalar Məcəlləsinin (bundan sonra- İnzibati Xətalar Məcəlləsi) 510-cu maddəsi ilə təqsirləndirilməsi ilə bağlı inzibati xəta haqqında işə Kəlbəcər Rayon Məhkəməsinin binasında açıq məhkəmə iclasında baxaraq, müəyyənetdi: Şəxs Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətməsi ilə bağlı Kəlbəcər Rayon Polis Şöbəsində toplanmış material (inzibati xəta haqqında protokol və digər sənədlər) baxılması üçün Kəlbəcər Rayon Məhkəməsinə göndərilmişdir. Materiala əlavə edilmiş: Kəlbəcər Rayon Polis Şöbəsinin İctimai təhlükəsizlik bölməsinin polis sahə rəisi, polis mayoru X3 tərəfindən tərtib edilmiş 02 sentyabr 2025-ci il tarixli “MN № 1964872” saylı inzibati xəta haqqında protokola əsasən, Şəxs Gəncə şəhəri Yeni qəsəbə ərazisində 12 avqust 2025-ci il tarixdə Daxili İşlər Nazirliyinin 102 xidmətinə zəng edərək Kəlbəcər Rayon İcra Hakimiyyəti başçısının onu qəbul etməməsini bildirərək təhqiredici ifadələr işlətmişdir- bununla da İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətmişdir. Materiala əlavə edilmiş: Daxili İşlər Nazirliyinin X1 xidmətinin rəisi, polis polkovniki Mirəziz Mirəliyev tərəfindən tərtib edilmiş və Azərbaycan Respublikası daxili işlər nazirinin birinci müavini, polis-general-leytenantı Seyfulla Əzimova ünvanlanmış yazılı raportda göstərilir ki, 12 avqust 2025-ci il tarixdə saat 18:57-də özünü üçüncü qrup Qarabağ müharibəsinin əlili kimi təqdim edən, Gəncə şəhəri Yeni qəsəbə ev 21 mənzil 04-də yaşayan vətəndaş Şəxs ***-***-**-** nömrəsindən “102” xidmətinə zəng etmiş, Kəlbəcər Rayon İcra Hakimiyyəti başçısının onu qəbul etməməsindən narazı olduğunu bildirmiş, təhqiredici ifadələr işlətmişdir (raportverən həmin məlumatın araşdırılması üçün müvafiq göstəriş verilməsini daxili işlər nazirinin birinci müavinindən xahiş edir) Kəlbəcər Rayon Məhkəməsində işin baxılması 02 sentyabr 2025-ci il tarixə təyin edilmişdir. İnzibati xəta haqqında protokolu tərtib edən səlahiyyətli vəzifəli şəxs- Kəlbəcər Rayon Polis Şöbəsinin İctimai təhlükəsizlik bölməsinin polis sahə rəisi, polis mayoru X3 məhkəmə iclasında bildirmişdir ki, Şəxs barəsində müvafiq tədbir görülməsi barədə Daxili İşlər Nazirliyinin X1 Xidmətinin rəisi, polis polkovniki Mirəziz Mirəliyev tərəfindən tərtib edilmiş raport onun icraatında daxil omuşdur. Şəxs 12 avqust 2025-ci il tarixdə Daxili İşlər Nazirliyinin 102 xidmətinə zəng edərək Kəlbəcər Rayon İcra Hakimiyyətinin başçısı Azər Qocayevin ünvanına nalayiq ifadələr işlədərək onları təhqir etmiş, bununla da İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətmişdir. Tərəfindən bununla bağlı inzibati xəta haqqında protokol tərtib edilmişdir. Şəxs izahatında etdiyi əməldən səmimi peşman olduğunu etiraf etmişdir. O, tərtib etdiyi 02 sentyabr 2025ci il tarixli “MN № 1964872” saylı inzibati xəta haqqında protokolu qanuni və əsaslı hesab edir. Barəsində inzibati xəta haqqında iş üzrə icraat aparılan şəxs- Şəxs məhkəmə iclasında verdiyi izahatında bildirmişdir ki, o, Qarabağ müharibəsi veteranıdır; əvvəllər üçüncü dərəcəli müharibə əlili olaraq pensiya alsa da, sonradan onun əlilliyi ləğv olunmuş və pensiyası kəsilmişdir. 12 avqust 2025-ci il tarixdə yaşadığı mənzildə qaz və elektrik enerjisi kəsildiyi üçün əsəbləşmiş, Daxili İşlər Nazirliyinin 102 xidmətinə zəng edərək Kəlbəcər Rayon İcra Hakimiyyəti başçısı Azər Qocayevin onu qəbul etməməsi səbəbindən Azər Qocayevin ünvanına nalayiq ifadələr işlətmişdir. Törətdiyi əməldən peşmandır, müharibə veteranıdır, barəsində həbslə bağlı olmayan tənbeh tətbiq edilməsini xahiş edir. Məhkəmə araşdırması nəticəsində təsdiq edilmişdir ki, Şəxs 12 avqust 2025-ci il tarixdə saat 18:57-də Daxili İşlər Nazirliyinin “102” xidmətinə zəng edərək Kəlbəcər Rayon İcra Hakimiyyəti başçısı Azər Qocayevin ünvanına nalayiq ifadələr işlətmişdir. Azərbaycan Respublikası Konstitusiyasının 72-ci maddəsinin: birinci (İ) hissəsinə əsasən, dövlət və cəmiyyət qarşısında hər bir şəxs onun hüquq və azadlıqlarından bilavasitə irəli gələn vəzifələr daşıyır; hər kəsin üzərinə vəzifələr yalnız bu Konstitusiya ilə və ya qanunla qoyula bilər; ikinci (İİ) hissəsinə əsasən, hər bir şəxs Azərbaycan Respublikasının Konstitusiyasına və qanunlarına əməl etməli, başqa şəxslərin hüquq və azadlıqlarına hörmət bəsləməli, qanunla müəyyən edilmiş digər vəzifələri yerinə yetirməlidir; İİİ hissəsinə əsasən, qanunu bilməmək məsuliyyətdən azad etmir. İnzibati Xətalar Məcəlləsinin: -3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. -12.1-ci maddəsinə əsasən, bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. -510-cu maddəsinin məzmunundan görünür ki, ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlər xırda xuliqanlıq hesab olunur. -75.0-cı maddəsinə əsasən, inzibati xəta haqqında iş üzrə aşağıdakılar müəyyən edilməlidir: 75.0.1. inzibati xəta hadisəsi (inzibati xəta törədilmişdirmi); 75.0.2. inzibati xəta törətmiş şəxs; 75.0.3. inzibati xəta törətməkdə şəxsin təqsiri; 75.0.4. inzibati məsuliyyəti ağırlaşdıran və yüngülləşdirən hallar; 75.0.5. inzibati xəta nəticəsində vurulan zərərin xarakteri və miqdarı; 75.0.6. inzibati xətalar haqqında işlər üzrə icraatı rədd edən hallar; 75.0.7. işin düzgün həlli üçün əhəmiyyətli olan digər hallar, habelə inzibati xətanın törədilməsinə kömək edən səbəblər və şərait. -76.1-ci maddəsinə əsasən, inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etməkdən ötrü hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərərçəkmiş şəxslərin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. -80.1-ci maddəsinə əsasən, sənədlərdə müəssisələrin, idarələrin, təşkilatların, vəzifəli şəxslərin və fiziki şəxslərin təsdiq etdikləri və ya şərh etdikləri məlumatların inzibati xəta haqqında iş üzrə icraat üçün əhəmiyyəti vardırsa, bu sənədlər iş üzrə sübutlar hesab edilir. -84.1-ci maddəsinə əsasən, inzibati xətalar haqqında işlərə baxan hakim, kollegial orqanın üzvü, vəzifəli şəxs işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Məhkəmə, iş materiallarında olan sənədlərə və proses iştirakçılarının izahatlarına məcmu halda qiymət verərək belə hesab edir ki, Şəxs İnzibati Xətalar Məcəlləsinin 510-cu maddəsində nəzərdə tutulan inzibati xəta əməlini törətməsi onun özünün etirafedici izahatı və iş materiallarında olan sənədlərlə tam sübuta yetirilmişdir. İnzibati Xətalar Məcəlləsinin 510-cu maddəsinə əsasən, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə- əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. İnzibati Xətalar Məcəlləsinin 31.2-ci maddəsinə əsasən, fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Şəxs əməlində məsuliyyəti yüngülləşdirən hal- inzibati xəta törətmiş şəxsin səmimi peşmançılığı, iş üzrə məsuliyyəti ağırlaşdıran hal- yoxdur. İnzibati Xətalar Məcəlləsinin 9.1-ci maddəsinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətanın xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. İnzibati Xətalar Məcəlləsinin 21-ci maddəsində qeyd edilmişdir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Beləliklə, məhkəmə Şəxs inzibati tənbeh tətbiq edərkən onun şəxsiyyətini, iş üzrə məsuliyyətini yüngülləşdirən bir halın- inzibati xəta törətmiş şəxsin törətdiyi xətadan səmimi peşman olmasını və ağırlaşdıran halın müəyyən edilməməsini, törətmiş olduğu xətanın xarakterini və təqsirinin dərəcəsini nəzərə alaraq, onun barəsində İnzibati Xətalar Məcəlləsinin 510-cu maddəsinin sanksiyasında nəzərdə tutulan cərimə növündə tənbeh tətbiq edilməsini qanuni və ədalətli hesab edir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 114.1.1 və 115.1-ci maddələrini rəhbər tutaraq, məhkəmə qəraraaldı: Şəxs Azərbaycan Respublikasının İnzibati Xətalar Məcəlləsinin 510-cu maddəsi ilə təqsirli bilinib, barəsində 100 (bir yüz) manat məbləğində inzibati cərimə tənbehi tətbiq edilsin. Qərardan, surəti rəsmi qaydada verildiyi vaxtdan 10 (on) gün müddətində Kəlbəcər Rayon Məhkəməsi vasitəsi ilə və ya birbaşa Gəncə Apellyasiya Məhkəməsinə şikayət və (və ya) protest verilə bilər. Hakim: Həsən Qəniyev