Gədəbəy Rayon Məhkəməsi Qərar — İş №3(042)-125/2021

Azərbaycan Respublikası adından QƏRAR Gədəbəy rayonu İş № 3(042)-125/2021 16.05.2021 GƏDƏBƏY RAYON MƏHKƏMƏSİ Gədəbəy Rayon Məhkəməsi hakim Mirzəquliyev Fizuli Balağa oğlunun sədrliyi, məhkəmə iclas katibi Orucov Anar Möhübbət oğlunun katibliyi, şikayət vermiş şəxs X6 oğlunun iştirakı ilə, X6 oğlunun Gəncə şəhər Polis İdarəsi Polis Bölməsinin rəisi polis polkovnik-leytenantı Üzeyir Atamovun inzibati tənbeh verilmə haqqında 10.04.2021-ci il tarixli, MN ******* nömrəli qərarından şikayətinə iş materialları ilə birlikdə məhkəmənin binasında açıq məhkəmə iclasında baxaraq, MÜƏYYƏN ETDİ: X6 oğlu Gəncə şəhər Polis İdarəsi Polis Bölməsinin rəisi polis polkovnik-leytenantı Üzeyir Atamovun inzibati tənbeh verilmə haqqında 10.04.2021-ci il tarixli, MN ******* nömrəli qərarından şikayət verərək həmin qərarın ləğv edilməsini məhkəmədən xahiş etmişdir. Məhkəmə iclasında şikayət vermiş şəxs X6 oğlu şikayətin məzmununa uyğun izahat verərək bildirmişdir ki, o, 10.04.2021-ci il tarixdə Gəncə şəhərində Yeni Şəmkir avtovağzalının arxasında avtomobil ehtiyat hissələri mağazasının qarşısında açıq havada qoruyucu maskadan istifadə etməyərək karantin rejimi qaydalarını pozmuşdur. Lakin həmin vaxt avtomobildən düşərkən maska əlində olmuş, bu hal bir dəqiqəyə yaxın müddət ərzində baş vermiş, bu zaman polis əməkdaşları ona yaxınlaşaraq, tibbi maskadan düzgün istifadə etmədiyi üçün Azərbaycan Respublikası İXM-nin 211.2-ci maddəsi ilə ona 100 manat inzibati tənbeh tətbiq edilmişdir. Polis əməkdaşı isə ona qərəzli olaraq, cərimə tənbehi tətbiq etmişdir. Ona görə də həmin qərarın ləğv edilməsini xahiş edir. Məhkəmə iclasının yeri və vaxtı barədə qərarı barəsində şikayət verilmiş şəxslərə lazımi qaydada məlumat verilməsinə baxmayaraq, məhkəmə iclasına gəlməmiş, bunun səbəbləri barədə məhkəməyə məlumat verməmişlər. Məhkəmə, Azərbaycan Respublikası İXM-nin 61.3-cü maddəsinə əsasən, tərəflərin iştirakı olmadan işə baxılmasını mümkün hesab etmişdir. Məhkəmə, işdə olan sənədlərlə əlaqəli təhlil edərək belə nəticəyə gəlir ki, şikayət təmin edilməlidir. İş materiallarında olan Gəncə şəhər Polis İdarəsi Polis Bölməsinin rəisi polis polkovnik-leytenantı Üzeyir Atamovun inzibati tənbeh verilmə haqqında 10.04.2021-ci il tarixli, MN ******* nömrəli qərarının surətindən görünür ki, X6 oğluna Azərbaycan Respublikası İXM-nin 211.2-ci maddəsinə əsasən 100 manat miqdarında inzibati cərimə cəzası tətbiq edilmişdir. Azərbaycan Respublikası İXM-in 211.2-ci maddəsinə əsasən epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti orqanı tərəfindən müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslər yüz manat məbləğində, vəzifəli şəxslər üç yüz manat məbləğində, hüquqi şəxslər altı yüz manat məbləğində cərimə edilir. Məcəllənin 134.1-ci maddəsinə əsasən, inzibati xəta haqqında iş üzrə qərardan verilən şikayətə və ya protestə baxılaraq aşağıdakı qərarlardan biri qəbul edilir: 134.1.1. qərarın dəyişdirilmədən, şikayətin və ya protestin isə təmin edilmədən saxlanılması haqqında; 134.1.2. bu Məcəllənin 135.1.2 – 135.1.5-ci maddələri ilə müəyyən edilmiş hallarda qərarın dəyişdirilməsi haqqında və ya qərarı ləğv edərək yeni qərarın çıxarılması haqqında; 134.1.3. bu Məcəllənin 53-cü maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında; 134.1.4. bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında; 134.1.5. şikayətə və ya protestə baxılarkən inzibati xəta haqqında iş üzrə qərarı buna səlahiyyəti çatmayan hakimin, orqanın (vəzifəli şəxsin) qəbul etdiyi müəyyən olunduqda, qərarın ləğv edilməsi və işin aidiyyəti üzrə baxılmaq üçün göndərilməsi haqqında. Məcəllənin 135.1 və 135.1.6-cı maddələrinə əsasən, bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması, inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Beləliklə, X6 oğlu Gəncə şəhər Polis İdarəsi Polis Bölməsinin rəisi polis polkovnikleytenantı Üzeyir Atamovun inzibati tənbeh verilmə haqqında 10.04.2021-ci il tarixli, MN ******* saylı inzibati tənbeh verilmə haqqında qərarından şikayət verərək, həmin qərarın ləğv edilməsini xahiş etmiş, ona cərimə inzibati tənbehi tətbiq edilərkən maşından yeni düşdüyü üçün maskasız olmasını, maskanın əlində olmasını və maska taxmaq istədiyini bildirmişdir. Gəncə şəhər Polis İdarəsi Polis Bölməsinin rəisi polis polkovnik-leytenantı Üzeyir Atamov məhkəmə iclasında nümayəndəsinin iştirakını təmin etməmiş, X6 oğlunun təqsirini sübut etməmişdir. Ona görə də, şikayət təmin edilməli, Gəncə şəhər Polis İdarəsi Polis Bölməsinin rəisi polis polkovnik-leytenantı Üzeyir Atamovun inzibati tənbeh verilmə haqqında 10.04.2021-ci il tarixli, MN ******* saylı inzibati tənbeh verilmə haqqında qərarı ləğv edilməlidir. Məhkəmə, göstərilənlərə əsasən və Azərbaycan Respublikasının İXM-in 38, 53, 115, 119 və 130-137-ci maddələrini rəhbər tutaraq, QƏRARA ALDİ: X6 oğlunun şikayəti təmin edilsin. Gəncə şəhər Polis İdarəsi Polis Bölməsinin rəisi polis polkovnik-leytenantı Üzeyir Atamovun inzibati tənbeh verilmə haqqında 10.04.2021-ci il tarixli, MN ******* saylı inzibati tənbeh verilmə haqqında qərarı ləğv edilsin. Qərarın icrası Gədəbəy Rayon İcra və Probasiya Şöbəsinə həvalə edilsin. Qərardan, onun surəti rəsmi qaydada verildiyi gündən 10 (on) gün müddətində Gədəbəy rayon Məhkəməsi vasitəsilə Gəncə Apellyasiya Məhkəməsinə şikayət verilə bilər. Sədrlik edən: Fizuli Mirzəquliyev