Gədəbəy Rayon Məhkəməsi Qərar — İş №3(042)-434/2023

Azərbaycan Respublikası adından QƏRAR Gədəbəy rayonu İş № 3(042)-434/2023 04.12.2023 GƏDƏBƏY RAYON MƏHKƏMƏSİ Hakim Kazımov Marif Sabir oğlunun sədrliyi, Məhkəmə iclas katibi X2 oğlunun katibliyi, Barəsində inzibati xəta haqqında iş üzrə icraat aparılan şəxs Şəxs və onun müdafiəçisi Vəkil iştirakları ilə, xx.xx.1977-ci ildə Gədəbəy rayonu, Gərgər kəndində anadan olmuş, Azərbaycan Respublikası vətəndaşı, evli, fərdi əməklə məşğul olur, orta təhsilli, Gədəbəy rayonu, Gərgər kəndində qeydiyyatda olmaqla yaşayan Şəxs Azərbaycan Respublikası İnzibati Xətalar Məcəlləsinin (bundan sonra İXM-in) 528.1-ci maddəsi ilə inzibati məsuliyyətə cəlb edilməsi barədə Gədəbəy rayon İcra və Probasiya şöbəsindən daxil olmuş inzibati xəta haqqında materiala baxaraq, Müəyyən etdi: Gədəbəy rayon Məhkəməsinin xx.xx.2015-ci il tarixli, 2(041)-638/2015 saylı qətnaməsinə əsasən, Gədəbəy rayon Məhkəməsinin 04 may 2012-ci il tarixli, 2(041)- 500/12 saylı qətnaməsi ilə müəyyən edilmiş alimentin miqdarı artırılmış və Şəxs 08 may 2015-ci il tarixdən başlayaraq, xx.xx.2004-cü il təvəllüdlü Cansunun yetkinlik yaşına çatanadək saxlanılması üçün hər ay sabit pul məbləğində təyin edilmiş 40 manat alimentin miqdarı hər ay sabit pul məbləğində 80 manat müəyyən edilməsi qət edilmişdir. İcra sənəd Gədəbəy rayon İcra və Probasiya şöbəsinin icraatına daxil olmuş və xx.xx.2015-ci il tarixdə icraata başlanılmışdır. Borcluya aliment borcunu ödəməsi barədə müvafiq qaydada qərar və bildiriş göndərilmişdir. Lakin borc könüllü ödənilməmişdir. Borcun ödənilməsi barədə borcluya təklif edilsə də, o borcunu ödəməmiş, ona görə də məcburi icra tədbirləri həyata keçirilmiş, o cümlədən borclunun əmlak vəziyyəti yoxlanılmış, borcun yönəldilə biləcəyi əmlak aşkar olunmamışdır. Borcluya aliment borcunu ödəməsi təklif edilmiş, lakin borclu tərəfindən əsaslı səbəb olmadan borc ödənilmir. Bununla da borclu aliment borcunu ödəməsi barədə icra məmurunun qanuni tələbinə tabe olmur. Borclu icra sənədini icra etmədiyindən onun barəsində Azərbaycan Respublikasının İXM-in 528.1-ci maddəsi ilə protokol tərtib olunaraq inzibati material baxılması üçün məhkəməyə göndərilmişdir. Məhkəmə iclasında Şəxs izahat verərək bildirdi ki, Gədəbəy rayon Məhkəməsinin xx.xx.2015-ci il tarixli, 2(041)-638/2015 saylı qətnaməsinə əsasən, Gədəbəy rayon Məhkəməsinin 04 may 2012-ci il tarixli, 2(041)-500/12 saylı qətnaməsi ilə müəyyən edilmiş alimentin miqdarı artırılmış və ondan 08 may 2015-ci il tarixdən başlayaraq, xx.xx.2004-cü il təvəllüdlü Cansunun yetkinlik yaşına çatanadək saxlanılması üçün hər ay sabit pul məbləğində təyin edilmiş 40 manat alimentin miqdarı hər ay sabit pul məbləğində 80 manat müəyyən edilməsi qət edilmişdir. O, hazırda başqa şəxslə ailə qurub yaşayır. Bundan əvvəl 2 şəxslə ailə qurub boşanmışdır. Ümumilikdə 5 övladı varıdır və hazırda onlardan ikisi onun himayəsində yaşayır. Cansu yetkinlik yaşına çatmışdır. O, aliment borcunu ödəmiş və cəmi 640 manat borcu qalmışıdır. Usta kimi fəlaliyyət göstərir və hazırda işləmir. Maddi imkanı olmadığına görə aliment borcunu tam ödəməyə bilməmişdir. Onun bir baş iribuynuzlu heyvanı vardır və həmin heyvanı 2024-cü ilin yanvar ayının 15dək satıb borcundan 400 manat məbləğində ödəniş edəcəyinə və qalan hissəsini isə işləyib ödəyəcəyinə söz verir. Gədəbəy rayon İcra və Probasiya şöbəsinin icra məmuru Ruslan Rüstəmov məhkəmə iclasında izahat verərək bildirdi ki, Gədəbəy rayon Məhkəməsinin xx.xx.2015-ci il tarixli, 2(041)-638/2015 saylı qətnaməsinə əsasən, Gədəbəy rayon Məhkəməsinin 04 may 2012-ci il tarixli, 2(041)-500/12 saylı qətnaməsi ilə müəyyən edilmiş alimentin miqdarı artırılmış və X1 08 may 2015-ci il tarixdən başlayaraq, xx.xx.2004-cü il təvəllüdlü Cansunun yetkinlik yaşına çatanadək saxlanılması üçün hər ay sabit pul məbləğində təyin edilmiş 40 manat alimentin miqdarı hər ay sabit pul məbləğində 80 manat müəyyən edilməsi qət edilmişdir. İcra sənəd Gədəbəy rayon İcra və Probasiya şöbəsinin icraatına daxil olmuş və xx.xx.2015-ci il tarixdə icraata başlanılmışdır. Borcluya aliment borcunu ödəməsi barədə müvafiq qaydada qərar və bildiriş göndərilmişdir. Borcun ödənilməsi barədə borcluya təklif edilsə də, o borcunu ödəməmiş, ona görə də məcburi icra tədbirləri həyata keçirilmiş, o cümlədən borclunun əmlak vəziyyəti yoxlanılmış, borcun yönəldilə biləcəyi əmlak aşkar olunmamışdır. Borclu aliment borcundan ödənişlər etmiş, ümumilikdə 640 manat məbləğində borcu qalmışdır. Uşaq yetkinlik yaşına çatmışdır. Borclu yığılmış aliment boorcunu ödəyəcəyinə söz versə də ödəniş etməmişdir. Ona görə də, borclunun barəsində tədbir görülməsini məhkəmədən xahiş etdi. Məhkəmə inzibati iş üzrə işdə iştirak edən şəxsləri dinləyib, iş materiallarını nəzərdən keçirib işin faktiki hallarını nəzərə alaraq hesab edir ki, inzibati xəta haqqında iş üzrə icraata xitam verilməlidir. Belə ki, məhkəmə qeyd etməyi zəruri sayır ki, borclu tərəfindən icra məmurunun qanuni tələblərinin yerinə yetirilməməsi və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin icra edilməməsi üzrsüz səbəbdən baş verdiyi, həmçinin qərəzli olaraq icra edilmədiyi hallarda şəxsin məsuliyyətindən söhbət gedə bilər. Əgər borclu ona edilən bildiriş və xəbərdarlıqlardan məlumatlı deyilsə və cinayət və ya inzibati məsuliyyət daşıması barədə onda aydın təsəvvür yoxdursa, bu halda onun məsuliyyəti istisna olunur. Azərbaycan Respublikası Cinayət Məcəlləsinin 306.1-ci maddəsinin şərh edilməsinə dair 02 oktyabr 2012-ci il tarixli qərarında Azərbaycan Respublikası Konstitusiya Məhkəməsinin Plenumu qeyd etmişdir ki, icra sənədini icra etməmə o halda qərəzli olur ki, təqsirkar şəxsə yazılı şəkildə xəbərdarlıq edildikdən sonra da o, məhkəmə aktının tələbini icra etmir və ya məhkəmə aktlarının icrasını mümkünsüz etməyə yönələn hərəkətlərini davam etdirir. Məhkəmə aktlarının qərəzli icra edilməməsini aşağıdakılara əsasən müəyyən etmək olar: - məhkəmə qərarında nəzərdə tutulmuş tələblərin həmin qərarda müəyyən edilmiş müddət ərzində icra edilməməsi; - borcluya məhkəmə qərarının icra edilməməsi haqqında dəfələrlə rəsmi xəbərdarlıq edilməsi; - borclunun məhkəmə qərarını icra etməməsinə görə inzibati məsuliyyətə cəlb edilməsi; - borclu tərəfindən məhkəmə qərarının icrası üçün yetərli tədbirlərin görülməməsi; - borclunun məhkəmə qərarının icrası üçün faktiki imkanlarının olması. İnsan Hüquqları üzrə Avropa Məhkəməsi “Pyersak Belçikaya qarşı” iş üzrə 01 oktyabr 1982-ci il tarixli qərarında qeyd etmişdir ki, adətən, qərəzsizlik mənfi və ya qərəzli münasibətin olmadığını bildirsə də, qərəzsizliyin olması, yaxud əksinə, olmaması, Konvensiyanın 6-cı maddəsinin 1-ci bəndinə uyğun olaraq müxtəlif üsullarla yoxlanıla bilər. Bu baxımdan konkret işdə konkret hakimin şəxsi mülahizələrini əks etdirən subyektiv yanaşma ilə qərəzsizlik məsələsində hər hansı şübhələri aradan qaldırmaq üçün yetərli təminatların olub-olmadığını müəyyən edən obyektiv yanaşma arasında fərq qoymaq olar. Məhkəmə iclasında müəyyən edildi ki, uşaq yetkinlik yaşına çatmışdır. Borclu aliment borcundan ödənişlər etmiş, cəmi 640 manat məbləğində borcu qalmışdır. Borclu 15 yanvar 2023-cü il tarixdək borcundan 400 manat məbləğində ödəniş edəcəyinə söz vermişdir. Bu hallar isə borclunun icra sənədinin icrasından qərəzli boyun qaçırması halını təkzib edir. Məhkəmə yuxarıda qeyd edilən hallara əsaslanaraq hesab edir ki, borclu Şəxs barəsində başlanılmış inzibati xəta haqqında iş üzrə icraata xitam verilməlidir. Belə ki, AR İXM-in 53.0 və 53.0.2-ci maddələrinin tələblərinə görə, inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. İXM-in 114.2 və 114.2.1-ci maddələrinə əsasən, bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Göstərilənlərə əsasən və Azərbaycan Respublikasının İXM-in 39, 40, 43, 48-51, 53 və 114-115-ci maddələrini rəhbər tutaraq, QƏRARA ALDİ: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə olan inzibati xəta haqqında iş üzrə icraata xitam verilsin. Qərardan onun surəti təqdim edildiyi və ya alındığı gündən 10 (on) gün müddətində Gədəbəy rayon Məhkəməsi vasitəsilə Gəncə Apellyasiya Məhkəməsinə apellyasiya şikayəti və protesti verilə bilər. Sədrlik edən: Marif Kazımov