Gədəbəy Rayon Məhkəməsi Qərar — İş №3(042)-49/2024

Azərbaycan Respublikası adından QƏRAR Gədəbəy rayonu İş № 3(042)-49/2024 26.02.2024 GƏDƏBƏY RAYON MƏHKƏMƏSİ Hakim Kazımov Marif Sabir oğlunun sədrliyi, Məhkəmə iclas katibi X7 oğlunun katibliyi, Barəsində inzibati xəta haqqında iş üzrə icraat aparılan şəxs Şəxs və onun müdafiəçisi Vəkil iştirakları ilə, xx.xx.1983-cü ildə Daşkəsən rayonu, Gurbulaq kəndində anadan olmuş, Azərbaycan Respublikası vətəndaşı, evli, fərdi əməklə məşğul olan, orta təhsilli, Daşkəsən rayonu, Gurbulaq kəndində qeydiyyatda olmaqla Göygöl rayonunda yaşayan Şəxs Azərbaycan Respublikası İnzibati Xətalar Məcəlləsinin (bundan sonra İXM-in) 528.1-ci maddəsi ilə inzibati məsuliyyətə cəlb edilməsi barədə Gədəbəy rayon İcra və Probasiya şöbəsindən daxil olmuş inzibati xəta haqqında materiala baxaraq, Müəyyən etdi: Gəncə Apellyasiya Məhkəməsi tərəfindən verilmiş 01 iyun 2022-ci il tarixli, 2(104)- 1409/2022 saylı icra sənədinə əsasən cavabdeh Şəxs yetkinlik yaşına çatmayan övladları ilə birlikdə iddiaçılar X4, X5 və X2 məxsus Gədəbəy rayonu, Söyüdkü kəndində yerləşən 0.27 ha torpaq sahəsinin həmin torpaq sahəsində yerləşən mətbəx və bir otaqdan ibarət yaşayış sahəsindən çıxarılmalıdır. İcra sənəd Gədəbəy rayon İcra və Probasiya şöbəsinin icraatına daxil olmuş və xx.xx.2023-cü il tarixdə icraata başlanılmışdır. Borcluya borcunu ödəməsi barədə müvafiq qaydada qərar və bildiriş göndərilmişdir. Borclu icra sənədini icra etmədiyindən onun barəsində Azərbaycan Respublikasının İXM-in 528.1-ci maddəsi ilə protokol tərtib olunaraq inzibati material baxılması üçün məhkəməyə göndərilmişdir. Məhkəmə iclasında Şəxs izahat verərək bildirdi ki, Gəncə Apellyasiya Məhkəməsi tərəfindən verilmiş 01 iyun 2022-ci il tarixli, 2(104)- 1409/2022 saylı icra sənədinə əsasən o yetkinlik yaşına çatmayan övladları ilə birlikdə iddiaçılar X4, X5 və X2 məxsus Gədəbəy rayonu, Söyüdkü kəndində yerləşən 0.27 ha torpaq sahəsinin həmin torpaq sahəsində yerləşən mətbəx və bir otaqdan ibarət yaşayış sahəsindən çıxarılmalıdır. O, 2000-ci il tarixdə X6 ilə ailə qurub, sonuncunun yaşadığı evə gəlin köçmüşdür. O, hazırda həmin evdən çıxmışdır və Göygöl rayonunda yaşayır. Uşaqlar E.Mürsəlovun himayəsində yaşayır. O, hazırda mübahisəli evdə yaşamır. Gədəbəy Rayon İcra və Probasiya Şöbəsinin icra məmuru X8 məhkəmə iclasında bildirmişdir ki, Gəncə Apellyasiya Məhkəməsi tərəfindən verilmiş 01 iyun 2022-ci il tarixli icra sənədinə əsasən cavabdeh Şəxs yetkinlik yaşına çatmayan övladları ilə birlikdə iddiaçılar X4, X5 və X2 məxsus Gədəbəy rayonu, Söyüdlü kəndində yerləşən 0.27 ha torpaq sahəsinin həmin torpaq sahəsində yerləşən mətbəx və bir otaqdan ibarət yaşayış sahəsindən çıxarılması qət edilmişdir. İcra sənədi Gədəbəy Rayon İcra və Probasiya Şöbəsinin icraatına daxil olmuş və icraata başlanılmışdır. Gədəbəy rayonu, Söyüdlü kəndində yerləşən mübahisəli fərdi yaşayış evinə icra təyin edilmiş, qonşuların deməsinə görə borclu mübahisəli evdə yaşayır. Borclu axtarışa verilərək polis vasitəsi ilə gətirilmişdir. Borclu icra sənədinin icrasında boyun qaçırır. Ona görə də, borclunun barəsində tədbir görülməsini məhkəmədən xahiş etdi. X1 məhkəmə iclasında bildirdi ki, Gəncə Apellyasiya Məhkəməsi tərəfindən verilmiş 01 iyun 2022-ci il tarixli icra sənədinə əsasən cavabdeh Şəxs yetkinlik yaşına çatmayan övladları ilə birlikdə iddiaçılar o X5 və X2 məxsus Gədəbəy rayonu, Söyüdlü kəndində yerləşən 0.27 ha torpaq sahəsinin həmin torpaq sahəsində yerləşən mətbəx və bir otaqdan ibarət yaşayış sahəsindən çıxarılması qət edilmişdir. Borclu onun gəlinin olmuş və bir neçə ilə onlara zülm vermişdir. Aralarında mübahisələr yaranmışdır. Odur ki, borclunun evdən çıxarılmasını, əks təqdirdə barəsində tədbir görülməsini xahiş etdi. Müdafiəçi Vəkil məhkəmə iclasında bildirdi ki, borclu hazırda mübahəli evdə yaşamır, evdən çıxmışdır. Borclunun icra sənədinin icrasından boyun qaçırması halı təsdiqini tapmır. Odur ki, inzibati xəta haqqında iş üzrə icraata xitam verilməsini məhkəmədən xahiş etdi. Məhkəmə inzibati iş üzrə işdə iştirak edən şəxsləri dinləyib, iş materiallarını nəzərdən keçirib işin faktiki hallarını nəzərə alaraq hesab edir ki, inzibati xəta haqqında iş üzrə icraata xitam verilməlidir. Belə ki, məhkəmə qeyd etməyi zəruri sayır ki, borclu tərəfindən icra məmurunun qanuni tələblərinin yerinə yetirilməməsi və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin icra edilməməsi üzrsüz səbəbdən baş verdiyi, həmçinin qərəzli olaraq icra edilmədiyi hallarda şəxsin məsuliyyətindən söhbət gedə bilər. Əgər borclu ona edilən bildiriş və xəbərdarlıqlardan məlumatlı deyilsə və cinayət və ya inzibati məsuliyyət daşıması barədə onda aydın təsəvvür yoxdursa, bu halda onun məsuliyyəti istisna olunur. Azərbaycan Respublikası Cinayət Məcəlləsinin 306.1-ci maddəsinin şərh edilməsinə dair 02 oktyabr 2012-ci il tarixli qərarında Azərbaycan Respublikası Konstitusiya Məhkəməsinin Plenumu qeyd etmişdir ki, icra sənədini icra etməmə o halda qərəzli olur ki, təqsirkar şəxsə yazılı şəkildə xəbərdarlıq edildikdən sonra da o, məhkəmə aktının tələbini icra etmir və ya məhkəmə aktlarının icrasını mümkünsüz etməyə yönələn hərəkətlərini davam etdirir. Məhkəmə aktlarının qərəzli icra edilməməsini aşağıdakılara əsasən müəyyən etmək olar: - məhkəmə qərarında nəzərdə tutulmuş tələblərin həmin qərarda müəyyən edilmiş müddət ərzində icra edilməməsi; - borcluya məhkəmə qərarının icra edilməməsi haqqında dəfələrlə rəsmi xəbərdarlıq edilməsi; - borclunun məhkəmə qərarını icra etməməsinə görə inzibati məsuliyyətə cəlb edilməsi; - borclu tərəfindən məhkəmə qərarının icrası üçün yetərli tədbirlərin görülməməsi; - borclunun məhkəmə qərarının icrası üçün faktiki imkanlarının olması. İnsan Hüquqları üzrə Avropa Məhkəməsi “Pyersak Belçikaya qarşı” iş üzrə 01 oktyabr 1982-ci il tarixli qərarında qeyd etmişdir ki, adətən, qərəzsizlik mənfi və ya qərəzli münasibətin olmadığını bildirsə də, qərəzsizliyin olması, yaxud əksinə, olmaması, Konvensiyanın 6-cı maddəsinin 1-ci bəndinə uyğun olaraq müxtəlif üsullarla yoxlanıla bilər. Bu baxımdan konkret işdə konkret hakimin şəxsi mülahizələrini əks etdirən subyektiv yanaşma ilə qərəzsizlik məsələsində hər hansı şübhələri aradan qaldırmaq üçün yetərli təminatların olub-olmadığını müəyyən edən obyektiv yanaşma arasında fərq qoymaq olar. Məhkəmə iclasında müəyyən edildi ki, borclu hazırda mübahisəli fərdi yaşayış evində yaşamır, evdən çıxmışdır. İcra məmuru tərəfindən tərtib edilmiş xx.xx.2024-cü il tarixli aktla da borclunun mübahisəli evdə yaşamaması müəyyən edilir. Bu hal isə borclunun icra sənədinin icrasından qərəzli boyun qaçırması halını təkzib edir. Məhkəmə yuxarıda qeyd edilən hallara əsaslanaraq hesab edir ki, borclu Şəxs barəsində başlanılmış inzibati xəta haqqında iş üzrə icraata xitam verilməlidir. Belə ki, AR İXM-in 53.0 və 53.0.2-ci maddələrinin tələblərinə görə, inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. İXM-in 114.2 və 114.2.1-ci maddələrinə əsasən, bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Göstərilənlərə əsasən və Azərbaycan Respublikasının İXM-in 39, 40, 43, 48-51, 53 və 114-115-ci maddələrini rəhbər tutaraq, QƏRARA ALDİ: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə olan inzibati xəta haqqında iş üzrə icraata xitam verilsin. Qərardan onun surəti təqdim edildiyi və ya alındığı gündən 10 (on) gün müddətində Gədəbəy rayon Məhkəməsi vasitəsilə Gəncə Apellyasiya Məhkəməsinə apellyasiya şikayəti və protesti verilə bilər. Sədrlik edən: Marif Kazımov