Gədəbəy Rayon Məhkəməsi Qərar — İş №3(042)-98/2022

Azərbaycan Respublikası adından QƏRAR Gədəbəy rayonu İş № 3(042)-98/2022 12.05.2022 GƏDƏBƏY RAYON MƏHKƏMƏSİ Gədəbəy Rayon Məhkəməsi hakim Mirzəquliyev Fizuli Balağa oğlunun sədrliyi, məhkəmə iclas katibi Orucov Anar Möhübbət oğlunun katibliyi ilə, X4 oğlunun Azərbaycan Respublikasının Daxili İşlər Nazirliyinin elektron portalına yerləşdirilmiş inzibati tənbeh verilmə haqqında 23.03.2022-ci il tarixli, EXP ******* nömrəli qərarından şikayətinə iş materialları ilə birlikdə məhkəmənin binasında açıq məhkəmə iclasında baxaraq, MÜƏYYƏN ETDİ: X3 Azərbaycan Respublikasının Daxili İşlər Nazirliyinin elektron portalına yerləşdirilmiş inzibati tənbeh verilmə haqqında 23.03.2022-ci il tarixli, EXP ******* nömrəli qərarından şikayət verərək həmin qərarın ləğv edilməsini məhkəmədən xahiş etmişdir. X4 oğlu şikayətini onunla əsaslandırmışdır ki, 23.03.2022-ci il tarixində Bakı şəhəri, İnşaatçılar metrostansiyasında hərəkət edərkən, Samir adlı polis əməkdaşı ona müraciət edərək, covid pasportumu və şəxsiyyət vəsiqəsini təqdim etməli olduğunu bildirmişdir. Şəxsiyyət vəsiqəsi üzərində olmadığına görə ad, soyad və ata adını polis əməkdaşına bildirmişdir. Daha sonra polis əməkdaşından onu nəyə görə saxladığını soruşduqda, o covid pasportunu yoxlamaq üçün saxladığını demişdir. Həmin vaxt o, maskanı düzgün taxmış və heç bir inzibati xəta törətməmişdir, Lakin həmin günün axşamı evdə olarkən ona maskadan düzgün istifadə etməməsi əsası ilə 100 manat məbləğində cərimə yazılması barədə məlumat gəlmişdir. Ona görə də həmin qərarın ləğv edilməsini xahiş edir. Məhkəmə iclasının yeri və vaxtı barədə tərəflərə lazımi qaydada məlumat verilməsinə baxmayaraq, məhkəmə iclasına gəlməmiş, bunun səbəbləri barədə məhkəməyə məlumat verməmişlər. Məhkəmə, Azərbaycan Respublikası İXM-nin 61.3-cü maddəsinə əsasən, tərəflərin iştirakı olmadan işə baxılmasını mümkün hesab etmişdir. Məhkəmə işdə olan sənədlərlə əlaqəli təhlil edərək belə nəticəyə gəlir ki, şikayət təmin edilməlidir. İş materiallarında olan Azərbaycan Respublikasının Daxili İşlər Nazirliyinin elektron portalına yerləşdirilmiş inzibati tənbeh verilmə haqqında 23.03.2022-ci il tarixli, EXP ******* nömrəli qərarının surətindən görünür ki, X2 Azərbaycan Respublikası İXM-nin 211.2-ci maddəsinə əsasən 100 manat miqdarında inzibati cərimə cəzası tətbiq edilmişdir. Azərbaycan Respublikası İXM-in 211.2-ci maddəsinə əsasən epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti orqanı tərəfindən müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslər yüz manat məbləğində, vəzifəli şəxslər üç yüz manat məbləğində, hüquqi şəxslər altı yüz manat məbləğində cərimə edilir. Məcəllənin 134.1-ci maddəsinə əsasən, inzibati xəta haqqında iş üzrə qərardan verilən şikayətə və ya protestə baxılaraq aşağıdakı qərarlardan biri qəbul edilir: 134.1.1. qərarın dəyişdirilmədən, şikayətin və ya protestin isə təmin edilmədən saxlanılması haqqında; 134.1.2. bu Məcəllənin 135.1.2 – 135.1.5-ci maddələri ilə müəyyən edilmiş hallarda qərarın dəyişdirilməsi haqqında və ya qərarı ləğv edərək yeni qərarın çıxarılması haqqında; 134.1.3. bu Məcəllənin 53-cü maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında; 134.1.4. bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında; 134.1.5. şikayətə və ya protestə baxılarkən inzibati xəta haqqında iş üzrə qərarı buna səlahiyyəti çatmayan hakimin, orqanın (vəzifəli şəxsin) qəbul etdiyi müəyyən olunduqda, qərarın ləğv edilməsi və işin aidiyyəti üzrə baxılmaq üçün göndərilməsi haqqında. Məcəllənin 135.1 və 135.1.6-cı maddələrinə əsasən, bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması, inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Beləliklə, X4 oğlu Azərbaycan Respublikasının Daxili İşlər Nazirliyinin elektron portalına yerləşdirilmiş inzibati tənbeh verilmə haqqında 23.03.2022-ci il tarixli, EXP ******* saylı inzibati tənbeh verilmə haqqında qərarından şikayət verərək, həmin qərarın ləğv edilməsini xahiş etmiş, həmin ona əsassız cərimə yazıldığını bildirmiş, Qərarından şikayət verilmiş orqana məhkəmə iclasının vaxtı və yeri barədə lazımi qaydada məlumat verilməsinə baxmayaraq, məhkəmə iclasında nümayəndəsinin iştirakını təmin etməmiş, məhkəməyə sübutlar təqdim etməmişdir. Ona görə də, şikayət təmin edilməli, Azərbaycan Respublikasının Daxili İşlər Nazirliyinin elektron portalına yerləşdirilmiş inzibati tənbeh verilmə haqqında 23.03.2022-ci il tarixli, EXP ******* saylı inzibati tənbeh verilmə haqqında qərarı ləğv edilməli, iş üzrə icraata xitam verilməlidir. Məhkəmə, göstərilənlərə əsasən və Azərbaycan Respublikasının İXM-in 38, 53, 115, 119 və 130-137-ci maddələrini rəhbər tutaraq, QƏRARA ALDİ: X4 oğlunun şikayəti təmin edilsin. Azərbaycan Respublikasının Daxili İşlər Nazirliyinin elektron portalına yerləşdirilmiş inzibati tənbeh verilmə haqqında 23.03.2022-ci il tarixli, EXP ******* saylı inzibati tənbeh verilmə haqqında qərarı ləğv edilsin. Qərarın icrası Gədəbəy Rayon İcra və Probasiya Şöbəsinə həvalə edilsin. Qərardan, onun surəti rəsmi qaydada verildiyi gündən 10 (on) gün müddətində Gədəbəy Rayon Məhkəməsi vasitəsilə Gəncə Apellyasiya Məhkəməsinə şikayət verilə bilər. Sədrlik edən: Fizuli Mirzəquliyev