Gəncə Şəhəri Kəpəz Rayon Məhkəməsi Qərar — İş №3(043)-610/2021

Azərbaycan Respublikası adından QƏRAR Gəncə şəhəri İş № 3(043)-610/2021 05.10.2021 GƏNCƏ ŞƏHƏRİ KƏPƏZ RAYON MƏHKƏMƏSİ Hakim Mustafayev Rəşad Mustafa oğlunun sədrliyi, X2 iclas katibliyi, şikayət vermiş şəxs X1 iştirakı ilə, İX Tağım YPX inspektoru, polis baş serjantı X3 tərəfindən qəbul edilən TP ******* saylı, 26.07.2021-ci il tarixli inzibati tənbeh vermə haqqında qərardan X4 tərəfindən verilmiş şikayətə açıq məhkəmə iclasında baxaraq məhkəmə müəyyən etdi: X4 şikayət ərizəsi ilə məhkəməyə müraciət edərək, barəsində tərtib edilmiş, 26.07.2021-ci il tarixli, TP ******* saylı qərar ləğv edilməsi və inzibati xəta haqqında iş üzrə icraata xitam verilməsini xahiş etmişdir. Şikayət onunla əsaslandırmışdır ki, Gəncə şəhərində yaşamaqla Şəmkir, Tovuz və Gədəbəy rayonlarında dəmir tullantılarının pərakəndə alışı ilə məşğul olur. 26.07.2021-ci il tarixdə telefonuna SMS gəlmişdir ki, İXM-nin 372.2-ci maddəsində göstərilən inzibati xətanı törətmişdir və bunun əsasında 60 manat cərimə olunmuşdur. Bununla bağlı olaraq Şəxsi kabinetinə baxmış görsün hansı qayda pozuntusu etmişdir. Ancaq, şəxsi kabinetində inzibati xətanın törədilməsini təsdiq edən foto və ya video görüntü yoxdur. Həmçinin, şəxsi kabinetimdə qərar bölməsində qərarın qabağı boş olmuşdur. Şəxsi kabinetində olan şikayət bölməsi vasitəsi ilə şikayət edərək, foto və ya video görüntünün təqdim edilməsi, həmçinin qərarın rəsmi qaydada ünvanına göndərilməsini xahiş etmişdir. Şikayəti ilə əlaqədar olaraq Bakı şəhərindən ona zəng olunmuş və bildirilmişdir ki, Şəmkir rayon tras qayısına yaxınlaşsın. Oradan isə ona hər hansı foto və video görüntü göstərilməmişdir. Bundan sonra DİN-nin 102 xidmətinə müraciət edərək ona qərarın rəsmi qaydada verilməsini bildirmişdir. 08.09.2021-ci il tarixdə Gəncə şəhərində yerləşən X8 İdarəsindən zəng edərək bildirmişlər ki, gəlib qərarı götürsünlər. 26.07.2021-ci il tarixli, TP ******* saylı qərar ona rəsmi qaydada 08.09.2021-ci il tarixdə verilmişdir. Həmin qərardan narazıdır. Belə ki, 26.07.2021-ci il tarixli, TP ******* saylı qərarın verilməsinə əsas olmuş 26.07.2021-ci il tarixli, ******* saylı protokol tam qanunsuzdur. Çünki, qanunvericiliyin tələbinə görə inzibati xətanın aşkar edilməsində xüsusi texniki vasitələrdən istifadə olunmuşdursa, onların göstəriciləri, habelə istifadə olunmuş xüsusi texniki vasitənin tipi, markası, modeli, yerləşdiyi yer, ölçmə vasitəsinin son dəfə müqayisəli dövlət yoxlamasından keçdiyi vaxt (bunu təsdiq edən sənədin nömrəsi, tarixi) və növbəti yoxlamanın keçirilməli olduğu vaxt barədə məlumatlar göstərilməlidir. Həmçinin, mənim inzibati xəta törətməyimi təsdiq edən sənədlər əlavə edilməlidir. Bura isə foto və video görüntü daxildir. Məhkəmə iclasında şikayət vermiş X4 şikayətin dəlillərinə uyğun izahat verərək şikayətin təmin edilməsini, DYPŞ tərəfindən qəbul edilən 26.07.2021-ci il tarixli, TP ******* nömrəli inzibati tənbeh vermə haqqında qərarının ləğv edilməsini və inzibati xəta haqqında iş üzrə icraata xitam verilməsini xahiş etdi. Məhkəmə iclasının vaxtı və yeri barədə Baş Dövlət Yol Polis İdarəsinə və Şəmkir rayonu DYPŞ-nə qanunvericilikdə nəzərdə tutulmuş qaydada məlumat verilməsinə baxmayaraq, nümayəndəsi məhkəmə iclasında iştirak etməmiş, qeyd olunan inzibati xəta ilə bağlı materiallar və sübutlar məhkəməyə təqdim edilməmiş və bunun səbəbləri barədə də məhkəməyə heç bir məlumat verilməmişdir. Məhkəmə Baş Dövlət Yol Polis İdarəsinin nümayəndəsinin iştirakı olmadan şikayətə baxılmasını mümkün hesab etmişdir. İş materiallarına əlavə edilmiş İX Tağım YPX inspektoru, polis baş serjantı X3 tərəfindən X1 barəsində 26.07.2021-ci il tarixdə, saat 09:54-də “QAZ-3110” markalı, **- BH-*** qeydiyyat nişanlı avtomobili idarə etməsi ilə bağlı Azərbaycan Respublikası İnzibati Xətalar Məcəlləsinin 327.2-ci maddəsi ilə İXP ******* saylı 26.07.2021-ci il tarixli protokol tərtib etmişdir. İş materiallarında olan İX Tağım YPX inspektoru, polis baş serjantı X3 tərəfindən qəbul edilən 26 iyul 2021-ci il tarixli, TP ******* nömrəli qərardan görünür ki, X4 Azərbaycan Respublikası İnzibati Xətalar Məcəlləsinin 327.2-ci maddəsində nəzərdə tutulan inzibati xətanı törətməkdə təqsirli bilinib 60 (altmış) manat cərimə olunmuşdur. Azərbaycan Respublikası İnzibati Xətalar Məcəlləsinin 100.1-ci maddəsinə əsasən inzibati xəta haqqında protokolda protokolun tərtib edildiyi tarix və yer, protokolu tərtib etmiş şəxsin vəzifəsi, soyadı, adı, atasının adı, barəsində inzibati xəta haqqında iş üzrə icraat aparılan şəxs haqqında məlumat, o cümlədən vətəndaşın fərdi identifikasiya nömrəsi, inzibati xətanın törədildiyi yer, vaxt və bu xətanın mahiyyəti, inzibati xətaya görə məsuliyyət nəzərdə tutan bu Məcəllənin müvafiq maddəsi, olduğu halda, şahidlərin və zərər çəkmiş şəxslərin adı, atasının adı, soyadı və onların yaşadığı yerin ünvanı, barəsində inzibati xəta haqqında iş üzrə icraat aparılan fiziki şəxsin və ya hüquqi şəxsin nümayəndəsinin izahatları, inzibati xətanın aşkar edilməsində xüsusi texniki vasitələrdən istifadə olunmuşdursa, onların göstəriciləri, habelə istifadə olunmuş xüsusi texniki vasitənin tipi, markası, modeli, yerləşdiyi yer, ölçmə vasitəsinin son dəfə müqayisəli dövlət yoxlamasından keçdiyi vaxt (bunu təsdiq edən sənədin nömrəsi, tarixi) və növbəti yoxlamanın keçirilməli olduğu vaxt barədə məlumatlar, inzibati xətanın törədilməsi nəticəsində şəxsin sağlamlığına yüngül zərər vurulmuşdursa və ya maddi zərər yetirilmişdirsə, bu hallar barədə qeydlər, inzibati xəta haqqında iş üzrə icraat üçün zəruri olan digər məlumatlar göstərilməlidir. Azərbaycan Respublikası İnzibati Xətalar Məcəllənin 106.0, 106.0.3 və 106.0.5-ci maddələrinə əsasən hakim inzibati xətalar haqqında işlərə baxarkən digər məsələlərlə yanaşı inzibati xəta haqqında protokolun və işin digər materiallarının bu Məcəllənin tələblərinə müvafiq olaraq tərtib edilib-edilməməsi, mahiyyəti üzrə baxılması üçün işdə kifayət qədər sübutların toplanılıb-toplanılmaması məsələsini həll edir. Məhkəmə, şikayət vermiş şəxsi dinləyib, inzibati xəta haqqında protokolu və qərarı, şikayət və əlavə olunmuş sənədləri araşdıraraq hesab edir ki, X4 barəsində İX Tağım YPX inspektoru, polis baş serjantı X3 tərəfindən qəbul edilən 26 iyul 2021-ci il tarixli, TP ******* saylı inzibati tənbeh vermə haqqında qərarı əsassız olduğundan ləğv edilməlidir. Belə ki, məhkəmə araşdırması zamanı X1 təqsirli olması və onun barəsində tərtib edilmiş inzibati xəta haqda protokolda və inzibati tənbeh vermə haqqında qərarda inzibati xətanın hansı formada aşkar olunması, inzibati pozuntunun nədə ifadə olunması və inzibati xətanın müəyyən edilməsi məqsədi ilə hər hansı bir xüsusi texniki vasitələrdən istifadə edilməsinə dair heç bir sübut və ya qeyd aşkar edilməmiş, məhkəmə tərəfindən dəfələrlə sorğu verilməsinə baxmayaraq DYPŞ-i qeyd edilən məsələyə münasibət bildirməmişdir. İXM-in 76.1-cı maddəsinin tələblərindən aydın olur ki, inzibati xətanın olubolmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 8.3-cü maddəsində göstərilir ki, inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Həmin Məcəllənin 75-ci maddəsinə əsasən inzibati xəta hadisəsi (inzibati xəta törədilmişdirmi), inzibati xəta törətmiş şəxs, inzibati xəta törətməkdə şəxsin təqsiri mütləq sübuta yetirilməlidir. Həmin Məcəllənin 84-cü maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 134.1.3-cü maddəsinin tələbindən aydın olur ki, inzibati xəta haqqında iş üzrə qərardan verilən şikayətə və ya protestə baxılarkən bu Məcəllənin 53-cü maddəsində nəzərdə tutulduğu hallarda qərarın ləğv edilərək inzibati xəta haqqında iş üzrə icraata xitam verilməsi haqqında qərar çıxarılır. Həmin Məcəllənin 53.0.1-ci maddəsinə əsasən inzibati xəta hadisəsi olmadıqda, 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 105.1-ci maddəsinə əsasən bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Beləliklə məhkəmə yuxarıda qeyd olunanlara əsasən və İXM-in 8, 114, 115, 128- 131 -ci və 134-cü maddələrini rəhbər tutaraq, qərara aldı: X4 tərəfindən verilmiş şikayət təmin edilsin. X4 barəsində Azərbaycan Respublikası İnzibati Xətalar Məcəlləsinin 327.2-ci maddəsi ilə inzibati tənbeh vermə haqqında İX Tağım YPX inspektoru, polis baş serjantı X3 tərəfindən qəbul edilmiş TP ******* saylı, 26 iyul 2021-ci il tarixli qərar ləğv edilməklə inzibati xəta haqqında iş üzrə icraata xitam verilsin. Qərardan rəsmi qaydada verildiyi vaxtdan 10 (on) gün müddətində Gəncə şəhəri Kəpəz Rayon Məhkəməsi vasitəsilə Gəncə Apelyasiya Məhkəməsinə şikayəti verilə bilər