Gəncə Şəhəri Nizami Rayon Məhkəməsi Qərar — İş №3(044)-143/2022

Azərbaycan Respublikası adından QƏRAR Gəncə şəhəri İş № 3(044)-143/2022 01.04.2022 GƏNCƏ ŞƏHƏRİ NİZAMİ RAYON MƏHKƏMƏSİ hakim Hüseynov Kənan Zakir oğlunun sədrliyi, Quliyeva Günay Ələstun qızının katibliyi, Azərbaycan Respublikası Dövlət X2 Regional Reklam İdarəsinin nümayəndəsi X1, barəsində inzibati xəta haqqında icraat aparılan şəxs Şəxs iştirakı ilə, Azərbaycan Respublikası Dövlət X2 Regional Reklam İdarəsindən daxil olmuş, barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 428.7.1-ci maddəsində nəzərdə tutulan inzibati xətanı törətməsi barədə inzibati xəta haqqında materiala məhkəmənin inzibati binasında açıq məhkəmə iclasında baxaraq, məhkəmə MÜƏYYƏN ETDİ: ünvan 1 ünvanında fərdi sahibkar Şəxs 25 yanvar 2022-ci il tarixdə saat 15:30 radələrində müvafiq icazə olmadan, həmçinin onun tələbləri pozulmaqla açıq məkanda reklam yerləşdirməsi nəticəsində onun barəsində Azərbaycan Respublikası İXM-nin 428.7.1-ci maddəsi ilə inzibati protokol tərtib edilmiş və materiallar baxılması üçün aidiyyatı üzrə məhkəməyə göndərilmişdir. Azərbaycan Respublikası Dövlət X2 Regional Reklam İdarəsinin nümayəndəsi məhkəmə iclasında izahat verərək bildirmişdir ki, ünvan 1 ünvanında fərdi sahibkar Şəxs tərəfindən müvafiq icazə olmadan açıq məkanda reklam yayımlamışdır. Bu əmələ görə ADRA X5 İdarəsi tərəfindən Azərbaycan Respublikası İXM-nin 428.7.1-ci maddəsində nəzərdə tutulmuş inzibati xətanı törətməsinə dair MN № ******* saylı, 25 yanvar 2022-ci il tarixli inzibati xəta haqqında protokol tərtib edilmişdir. Şəxs 2021-ci il üçün 30 manat borcu qalmışdır. Bundan başqa idarənin əməkdaşları 1 kvadratmetrdən artıq reklam üçün ödəniş etməli olduğunu Şəxs izah etmişlər. Şəxs ödəniş etməmək üçün reklamları sökmək istədiyi halda bunu idarə əməkdaşları deyil, özü etməli idi. Ona görə də Şəxs Azərbaycan Respublikasının İXM-nin 428.7.1-ci maddəsinin sanksiyasında nəzərdə tutulmuş həddə inzibati cərimə təyin edilməsi barədə qərar qəbul edilməsini xahiş etdi. Məhkəmə iclasında barəsində iş üzrə icraat aparılan şəxs Şəxs bildrimişdir ki, o, reklamının ölçülərinin neçə olması barədə məlumatsız olmuş, əvvəllər reklamın pulunu vaxtında ödəmiş, keçən il üçün 30 manat borcu qalmışdır. O, rekalm idarəsinin əməkdaşları ilə əlaqə saxlayaraq obyektin təmirə bağlanacağını, reklamı istəmədiyini və gəlib sökmələrini bildirmiş, lakin heç kəs gəlməmişdir. Sonuncu dəfə o, 20 manat ödəniş etmişdir. Sonda o, 30 manat borcunu və hazırkı dövrə qədər reklam üçün ödənilməli pulu ödəməyə razı olduğunu, iş üzrə icraata xitam verilməsini xahiş etmişdir. Məhkəmə iclasında şahid kimi dindirilmiş X3 izahatında bildirmişdir ki, 2019-cu ildən pandemeya olmuş, 2020-ci ilin fevral ayında obyektin fəaliyyəti bərpa olunmuşdur. Şəxs 5 aylıq borcu olmuş, ona dəfələrlə xəbərdarlıq edilməsinə baxmayaraq ödəniş etməmişdir. 2021-ci ildən 20 manat borcu qalmışdır. Köhnədən qalan borc ödənilməlidir ki, yeni müqavilə bağlanılsın. Həmçinin reklam yayımı dayandırıldığı halda Şəxs özü idarəyə rəsmi müraciət etməli və reklamları sökdürməli idi. Reklamların sökülməsi idarə əməkdaşlarının vəzifəsi deyildir. Məhkəmə iclasında şahid kimi dindirilmiş Şahid2 izahatında bildirmişdir ki, Şəxs zəng edərək, ödəniş etməsi barədə xəbərdarlıq edəndə o, obyektin təmirə dayandığını və reklamı çıxartmaqlarını, artıq onlarla işləmək istəmədiyini bildirmiş, o, da ona debitor borcu olduğunu, lakin onun köhnədən ödəməyini və təmirə dayananda onlara məlumat verməli olduğunu, eyni zamanda reklamı sökməyin onların səlahiyyətində olmadıqları barədə məlumatlandırmışdır. İnzibati xəta haqqında işin materiallarını araşdıraraq məhkəmə hesab edir ki, Şəxs tərəfindən Azərbaycan Respublikasının İnzibati Xətalar Məcəlləsinin 428.7.1-ci maddəsində nəzərdə tutulan inzibati xəta törədilmişdir. İşdə olan 25 yanvar 2022-ci il tarixli, MN № ******* saylı protokoldan görünür ki, Şəxs açıq məkanda reklam haqqında qanunvericiliyin pozduğuna görə barəsində Azərbaycan Respublikasının İnzibati Xətalar Məcəlləsinin 428.7.1-ci maddəsi ilə nəzərdə tutulmuş inzibati xətanı törətməsinə dair protokol tərtib edilmişdir. İşdə olan İnternet Vergi İdarəsindən çıxarışdan görünür ki, Şəxs vergi ödəyicisi olan fiziki şəxsdir, buna görə o, vəzifəli şəxs hesab olunur. İnzibati xətanın törədilməsi bu barədə tərtib edilmiş 25 yanvar 2022-ci il tarixli, MN № ******* saylı protokol, ona əlavə edilmiş sənədlər və işin digər halları ilə tam təsdiq olunur. Şəxs əməlində Azərbaycan Respublikasının İnzibati Xətalar Məcəlləsinin 32-ci maddəsində nəzərdə tutulmuş məsuliyyəti yüngülləşdirən və Azərbaycan Respublikasının İnzibati Xətalar Məcəlləsinin 33-cü maddəsində nəzərdə tutulmuş məsuliyyəti ağırlaşdıran hallar müəyyən edilməmişdir. Azərbaycan Respublikasının İnzibati Xətalar Məcəlləsinin 17-ci maddəsində göstərilir ki, vəzifəli şəxslər öz qulluq vəzifələrinin yerinə yetirilməməsi və ya lazımınca yerinə yetirilməməsi ilə bağlı inzibati xətalara görə inzibati məsuliyyətə cəlb olunurlar. Həmin maddənin qeydinə əsasən hüquqi şəxs yaratmadan sahibkarlıq fəaliyyəti ilə məşğul olaraq belə səlahiyyətləri yerinə yetirən fiziki şəxslər vəzifəli şəxs hesab edilirlər. Azərbaycan Respublikasının İnzibati Xətalar Məcəlləsinin 428.7.1-ci maddəsinə əsasən açıq məkanda reklam haqqında qanunvericiliyin pozulmasına, yəni müvafiq icazə olmadan, həmçinin onun tələbləri pozulmaqla açıq məkanda reklam yerləşdirilməsinə görə fiziki şəxslər üç yüz manatdan beş yüz manatadək məbləğdə, vəzifəli şəxslər min beş yüz manatdan iki min beş yüz manatadək məbləğdə, hüquqi şəxslər beş min manatdan on min manatadək məbləğdə cərimə edilir. Azərbaycan Respublikasının İnzibati Xətalar Məcəlləsinin 25-ci maddəsinə əsasən inzibati cərimə bu Məcəllədə nəzərdə tutulmuş hallarda hakim, səlahiyyətli orqan (vəzifəli şəxs) tərəfindən təyin edilən və təqsirkar şəxsdən dövlətin xeyrinə məcburi tutulan pul məbləğidir. Məhkəmə işin hallarını nəzərə alaraq, qanunvericiliyin tələblərinə əsasən inzibati xəta törətmiş vəzifəli şəxs Şəxs Azərbaycan Respublikasının İnzibati Xətalar Məcəlləsinin 428.7.1-ci maddəsinin sanksiyası həddində inzibati tənbeh növü təyin edilməsini məqsədəmüvafiq hesab edir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 40, 43, 45-48, 114-116, 119-121-ci maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikasının İnzibati Xətalar Məcəlləsinin 428.7.1-ci maddəsi ilə təqsirli bilinib, 1500 (min beş yüz) manat məbləğində cərimə edilsin. Qərarın surəti təqdim edildiyi və ya alındığı gündən 10 (on) gün müddətində Gəncəşəhəri Nizami Rayon Məhkəməsi vasitəsi ilə Gəncə Apellyasiya Məhkəməsinə apellyasiya şikayəti verilə bilər. Sədrlik edən Kənan Hüseynov