Gəncə Şəhəri Nizami Rayon Məhkəməsi Qərar — İş №3(044)-28/2022

Azərbaycan Respublikası adından QƏRAR Gəncə şəhəri İş № 3(044)-28/2022 05.01.2022 GƏNCƏ ŞƏHƏRİ NİZAMİ RAYON MƏHKƏMƏSİ hakim Hüseynov Kənan Zakir oğlunun sədrliyi, Quliyeva Günay Ələstun qızının katibliyi , Gəncə Təhsil İşçiləri X3 şəhər komitəsinin nümayəndəsi X1 iştirakı ilə, Gəncə Təhsil İşçiləri X3 şəhər komitəsi Azərbaycan Respublikası İnzibati Xətalar Məcəlləsinin 347-ci maddəsi ilə nəzərdə tutulmuş inzibati xətanı törətməsi barədə Gəncə Şəhər Baş Polis İdarəsinin X6 şöbəsindən daxil olmuş inzibati xəta haqqında iş materiallarına baxaraq, məhkəmə MÜƏYYƏN ETDİ: Gəncə Şəhər Baş Polis İdarəsinin X6 şöbəsinin inzibati təcrübə üzrə baş inspektoru, polis mayoru X2 tərəfindən tərtib edilmiş, hüquqi şəxs Gəncə Təhsil İşçiləri X3 şəhər komitəsinin Azərbaycan Respublikası İnzibati Xətalar Məcəlləsinin 347-ci maddəsi ilə nəzərdə tutulmuş inzibati xətanı törətməsi barədə 14.09.2021-ci il tarixli, AP ******* saylı inzibati xəta haqqında protokol baxılması üçün Gəncə şəhəri Nizami Rayon Məhkəməsinə göndərilmişdir. Həmin protokolda qeyd edilir ki, Gəncə Təhsil İşçiləri X3 şəhər komitəsinin 26.07.2021-ci il tarixdə qəbul edilmiş sorğuya əsasən mülkiyyətində olan nəqliyyat vasitəsilə inzibati xəta törətmiş fiziki şəxs barədə məlumatı bugünədək təqdim etməmişdir. Bununla da hüquqi şəxsin barəsində Azərbaycan Respublikası İnzibati Xətalar Məcəlləsinin 347-ci maddəsində nəzərdə tutulmuş inzibati xəta haqqında protokol tərtib edilərək məhkəməyə göndərilmişdir. Məhkəmə iclasında Gəncə Təhsil İşçiləri X3 şəhər komitəsinin nümayəndəsi izahat verərək bildirmişdir ki, avtamobili komitənin sürücüsü idarə edir, onların inzibati xəta haqqında məlumatı olmamışdır. 28.12.2021-ci il tarixdə avtomobilə yazılmış cəriməni onlar ödəmişlər. Sonda o, qərarı məhkəmənin mülahizəsinə buraxmışdır. İş materiallarına əlavə edilmiş: - Gəncə şəhəri BPİ DYPŞ tərəfindən Gəncə Təhsil İşçiləri X3 şəhər komitəsinə ünvanlanmış bildirişdən görünür ki, 06.07.2021-ci il tarixdə, saat 13:56-da həmin Komitənin mülkiyyətində olan Hyundai Accent minik markalı, 20 AA480 dövlət qeydiyyatlı nəqliyyat vasitəsini idarə edən şəxs tərəfindən H.Əliyev pr. İ.Məmmədov küçəsinin kəsişməsi təhlükəsizlik kəmərini bağlamadan nəqliyyat vasitəsini idarə etməyə görə Törədilmiş xətaya görə Azərbaycan Respublikası İXM-nin 329.1-ci maddəsi ilə məsuliyyət nəzərdə tutulur. Gəncə Təhsil İşçiləri X3 şəhər komitəsindən inzibati xətanın törədilməsi zamanı nəqliyyat vasitəsini idarə etmək hüququna malik fiziki şəxs barədə məlumat (adı, soyadı, atasının adı, sürücülük vəsiqəsinin seriya və nömrəsi) verilməsi xahiş olunmuş, sorğunun rəsmi qaydada alındığı vaxtdan 5 gün müddətində tələb olunan məlumatın verilməməsinə görə Məcəllənin 347-ci maddəsi ilə məsuliyyət nəzərdə tutulduğu barədə xəbərdar olunmuşdur. - xəbərnamənin surətindən görünür ki, Gəncə Təhsil İşçiləri X3 şəhər komitəsinə ünvanlanmış bildiriş 26.07.2021-ci il tarixdə çatmışdır. Məhkəmə protokolu və əlavə edilmiş sənədləri araşdıraraq hesab edir ki, Gəncə Təhsil İşçiləri X3 şəhər komitəsi Azərbaycan Respublikası İnzibati Xətalar Məcəlləsinin 347-ci maddəsi ilə nəzərdə tutulmuş inzibati xətanın törədilməsində təqsirli bilinərək inzibati tənbeh edilməlidir. Belə ki, Azərbaycan Respublikası İnzibati Xətalar Məcəlləsinin 347-ci maddəsinə əsasən hüquqi şəxsin mülkiyyətində və ya istifadəsində, yaxud dövlət qurumunun istifadəsində olan nəqliyyat vasitəsini inzibati xətanın törədilməsi zamanı idarə etmiş fiziki şəxs haqqında məlumatın səlahiyyətli orqanın (vəzifəli şəxsin) bu barədə sorğusu daxil olduğu vaxtdan 5 gün müddətində verilməməsinə görə vəzifəli şəxslər yüz əlli manat məbləğində, hüquqi şəxslər üç yüz manat məbləğində cərimə edilir. Azərbaycan Respublikası İnzibati Xətalar Məcəlləsinin 18.5-ci maddəsinə əsasən, hüquqi şəxs barəsində inzibati tənbeh yalnız hakim tərəfindən tətbiq edilir. Həmin Məcəllənin 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 9.1-ci maddəsinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətanın xarakterinə, onun törədilməsi hallarına uyğun, qanuni və əsaslı olmalıdır. Məhkəmə araşdırması zamanı müəyyən edilmişdir ki, Gəncə Təhsil İşçiləri X3 Şəhər Komitəsinin istifadəsində olan nəqliyyat vasitəsini inzibati xətanın törədilməsi zamanı idarə etmiş fiziki şəxs haqqında məlumatı Gəncə şəhəri Baş Polis İdarəsi X6 Şöbəsinin bu barədə sorğusu daxil olduğu vaxtdan 5 gün müddətində verilməmişdir. Bununla da hüquqi şəxs Gəncə Təhsil İşçiləri X3 Şəhər Komitəsi tərəfindən İXM-in 347-ci maddəsi ilə nəzərdə tutulmuş inzibati xətanı törətməsi tam şəkildə sübuta yetirilmişdir. Odur ki, məhkəmə törədilmiş inzibati xətanın xarakterini və digər diqqətəlayiq halları nəzərə alaraq, hüquqi şəxs Gəncə Təhsil İşçiləri X3 Şəhər Komitəsinin Azərbaycan Respublikasının İnzibati Xətalar Məcəlləsinin 347-ci maddəsinin sanksiyasında nəzərdə tutulmuş inzibati xətanı törətməkdə təqsirli bilinib, barəsində inzibati cərimə növündə tənbeh edilməsini məqsədəmüvafiq hesab edir. Məhkəmə yuxarıda göstərilənlərə əsasən və Azərbaycan Respublikası İXM-in 18.5 və 114, 115-ci maddələrinin tələblərini rəhbər tutaraq, QƏRARA ALDİ: Gəncə Təhsil İşçiləri X3 Şəhər Komitəsi 14.09.2021-ci il tarixli, AP ******* inzibati xəta haqqında protokola əsasən Azərbaycan Respublikası İnzibati Xətalar Məcəlləsinin 347-ci maddəsi ilə nəzərdə tutulmuş inzibati xətanın törədilməsində təqsirli bilinərək, 300 (üç yüz) manat məbləğində cərimə edilsin. Qərardan rəsmi qaydada təqdim edildikdən sonra 10 gün müddətində Gəncə şəhəri Nizami Rayon Məhkəməsi vasitəsi ilə və ya bilavasitə Gəncə Apelyasiya Məhkəməsinə şikayət və ya protest verilə bilər. Sədrlik edən: Kənan Hüseynov