Gəncə Şəhəri Nizami Rayon Məhkəməsi Qərar — İş №3(044)-40/2022

Azərbaycan Respublikası adından QƏRAR Gəncə şəhəri İş № 3(044)-40/2022 06.01.2022 GƏNCƏ ŞƏHƏRİ NİZAMİ RAYON MƏHKƏMƏSİ hakim Hüseynov Kənan Zakir oğlunun sədrliyi, Quliyeva Günay Ələstun qızının katibliyi, barəsində inzibati xəta haqqında icraat aparılan şəxs Şəxs, inzibati xəta haqqında protokolu tərtib etmiş Gəncə şəhər DYPŞ-nin polis kapitanı X3 iştirakı ilə, Şəxs Azərbaycan Respublikasının İnzibati Xətalar Məcəlləsinin (bundan sonra İXM) 332.4-cü maddəsi ilə nəzərdə tutulan inzibati xəta törətməsi barədə Gəncə Şəhər Baş Polis İdarəsinin Dövlət yol polisi şöbəsindən daxil olmuş inzibati xəta haqqında işə məhkəmənin inzibati binasında açıq məhkəmə iclasında baxaraq, məhkəmə MÜƏYYƏN ETDİ: Şəxs İXM-nin 332.4-cü maddəsi ilə nəzərdə tutulan inzibati xəta törətməsi haqqında tərtib edilmiş protokol Gəncə şəhəri Nizami Rayon Məhkəməsinə daxil olmuşdur. Məhkəmə iclasında dindirilmiş, inzibati xətanın törədilməsi haqqında protokol tərtib etmiş şəxs X8 protokolda qeyd olunanları təsdiq edərək bildirdi ki, 30.12.2021-ci il tarixdə saat 16:20 radələrində Gəncə şəhər Ozan küçəsində Vaz 2106 markalı ** ED *** dövlət qeydiyyat nişanlı avtomobil X11 markalı ** GG *** dövlət qeydiyyat nişanlı avtomobil ilə toqquşmuş, toqquşmanın zərbəsindən VAZ 2106 markalı avtomobil yolun kənarında dayanmış Hyundai markalı ** ZB *** və Mersedes markalı ** EL *** dövlət qeydiyyat nişanlı avtomobillərlə toqquşmuş sonradan 1 saylı tam orta məktəbin hasarına dəyərək dayanmışdır. Baş vermiş yol nəqliyyat hadisəsi ilə bağlı təqsirkar Vaz 2106 markalı ** ED *** dövlət qeydiyyat nişanlı avtomobilin sürücüsü Şəxs barəsində baş vermiş hadisə ilə bağlı inzibati araşdırma aparılmış və protokol tərtib edilmişdir. Məhkəmə iclasında dindirilmiş barəsində inzibati xəta haqqında icraat aparılan şəxs Şəxs ifadəsində bildirdi ki, 30.12.2021-ci il tarixdə saat 16:20 radələrində özünə məxsus Vaz 2106 markalı ** ED *** dövlət qeydiyyat nişanlı avtomobil ilə Gəncə şəhəri İ.Qayıbov küçəsi ilə düzünə hərəkətdə olan zaman, onunla eyni istiqamətdə olan X11 markalı ** GG *** dövlət qeydiyyat nişanlı avtomobil qarşısında manevrə başlamış sola dönərkən o, həmin avtomabili ötüb küçmək istəyərkən onun avtomobilinin sağ yan hissəsinə dəyərək toqquşmuş, toqquşmanın zərbəsindən o, idarəetməni itirərək yolun sol kənarında dayanmış Hyundai markalı ** ZB *** və Mersedes markalı ** EL *** dövlət qeydiyyat nişanlı avtomobillərlə toqquşmuş sonradan 1 saylı tam orta məktəbin hasarına dəyərək dayanmışdır. Hadisə zamanı xəsarət alan olmamışdır. İfadəsinin sonunda Şəxs etdiyi əməldə özünü tam təqsirli bildiyini, törətdiyi əməldən səmimi peşman olduğunu, zərərçəkmiş şəxsə dəymiş ziyanı sığorta şirkətinin ödədiyini və İ qrup əlil olduğunu nəzərə alaraq məhkəmədən ona yüngül cəza təyin edilməsini xahiş etdi. İş materiallarında olan: - Yol nəqliyyat hadisəsinin sxemindən görünür ki, Vaz 2106 markalı ** ED *** dövlət qeydiyyat nişanlı avtomobil əvvəl X11 markalı ** GG *** dövlət qeydiyyat nişanlı avtomobillə daha sonra Hyundai markalı ** ZB *** dövlət qeydiyyat nişanlı avtomobillə və Mersedes markalı ** EL *** dövlət qeydiyyat nişanlı avtomobillə toqquşmuş, hadisə Gəncə şəhəri Ozan küçəsində baş vermişdir. Sxemi hal şahidləri Şəxs, Samid Kərimov, Elnur Qocayev və Qədir Hüseynzadə imzalamışlar. - zərərçəkmiş X4 izahatından görünür ki, ona məxsus X11 markalı ** GG *** dövlət qeydiyyat nişanlı avtomobillə 30.12.2021-ci il tarixdə saat 16:20 radələrində Gəncə şəhəri İsmət Qayıbov küçəsi ilə hərəkət edib sola dönmə işiğını yandırıb qarşıdan gələn nəqliyyat vasitəsini buraxıb sola manevrə başlamış, bu an onunla eyni istiqamətdə olan soldan qarşı zolağa çıxmaqla ötmə edən Vaz 2106 markalı ** ED *** dövlət qeydiyyat nömrəli avtomobillə toqquşmuş, toqquşmanın zərbəsindən həmin avtomobil yolun sol tərəfində dayanmış, Hyundai markalı ** ZB *** dövlət qeydiyyat nişanlı avtomobillə sonra isə Mersedes markalı ** EL *** dövlət qeydiyyat nişanlı avtomobillə toqquşmuş daha sonra isə avtomobilini saxlaya bilməyərək 1 saylı tam orta məktəbin qapısına dəyərək saxlamış, hadisə zamanı xəsarət alan olmamışdır. - zərərçəkmiş X5 izahatından görünür ki, ona məxsus Hyundai markalı ** ZB *** dövlət qeydiyyat nişanlı avtomobili 30.12.2021-ci il tarixdə saat 16:20 radələrində Gəncə şəhəri İsmət Qayıbov 1 saylı orta məktəbin yaxınlığında saxlamış, həmin vaxt Vaz 2106 markalı ** ED *** dövlət qeydiyyat nömrəli avtomobil ötmə əməliyyatı edərkən X11 markalı ** GG *** dövlət qeydiyyat nişanlı avtomobillə toqquşmuş, zərbənin gücündən həmin VAZ 2106 markalı avtomobil idarəetməni itirib onun saxladığı avtomobillə daha sonra onunla eyni istiqamətdə dayanan Mersedes markalı ** EL *** dövlət nömrə nişanlı avtomobillə toqquşmuş və 1 saylı orta məktəbin giriş qapısına dəyərək dayanmışdır. Hadisə zamanı xəsarət alan olmamışdır. - Qüsur aktından görünür ki, X6 məxsus Hyundai markalı ** ZB *** dövlət qeydiyyat nişanlı ağ mirvari rəng avtomobilin dəyəri 50 manat olan 1 güzgüsünün kapronu dəyişdirilmiş, dəmirçi haqqı 100 manat, çilingər haqqı 50 manat rəngsaz haqqı 400 manat olmaqla ümumilikdə 600 manat ziyan dəymişdir. - zərərçəkmiş X1 izahatından görünür ki, ona məxsus Mersedes markalı ** EL *** dövlət nömrə nişanlı avtomobili 30.12.2021-ci il tarixdə saat 16:2 radələrində Gəncə şəhəri İsmət Qayıbov 1 saylı orta məktəbin yaxınlığında saxlamış, həmin vaxt Vaz 2106 markalı ** ED *** dövlət qeydiyyat nömrəli avtomobil ötmə əməliyyatı edərkən X11 markalı ** GG *** dövlət qeydiyyat nişanlı avtomobillə toqquşmuş, zərbənin gücündən həmin VAZ 2106 markalı avtomobil idarəetməni itirib əvvəl onunla eyni istiqamətdə dayanmış Hyundai markalı ** ZB *** dövlət qeydiyyat nişanlı avtomobilə daha sonra onun avtomobilinə dəymiş və 1 saylı orta məktəbin giriş qapısına dəyərək dayanmışdır. Hadisə zamanı xəsarət alan olmamışdır. - Qüsur aktından görünür ki, X2 məxsus Mersedes benz E220 minik markalı ** EL *** dövlət nömrə nişanlı tünd göy metalik rəngli avtomobilə ümumilikdə 1905 manat ziyan dəymişdir. - 06.01.2022-ci il tarixli, İXP ******* saylı inzibati xəta haqqında protokoldan görünür ki, 30.12.2021-ci il tarixdə Şəxs barəsində Azərbaycan Respublikası İXM-nin 327.1, 327.2,332.4 və 332.1-ci maddələri ilə protokol tərtib olunmuşdur. Şəxs barəsində tərtib edilmiş 06.01.2022-ci il tarixli, İXP ******* saylı inzibati xəta haqqında protokolda onun Azərbaycan Respublikasının İXM-nin 327.1, 327.2,332.4 və 332.1-ci maddələri ilə nəzərdə tutulmuş inzibati xətaları törətməsi qeyd olunmuşdur. Lakin Azərbaycan Respublikası Prezidentinin 15.02.2016-cı il tarixli Fərmanının 5.1-ci bəndinə əsasən Azərbaycan Respublikasının İXM-nin 327.1, 327.2-ci,332.1-ci maddəsində nəzərdə tutulmuş inzibati xəta haqqında işə Azərbaycan Respublikası Daxili İşlər Nazirliyi baxdığından, məhkəmə yalnız Azərbaycan Respublikasının İXM-nin 332.4-ci maddəsi ilə nəzərdə tutulmuş inzibati xəta haqqında işə baxır. Belə ki, “Azərbaycan Respublikası İnzibati Xətalar Məcəlləsinin 34-cü maddəsinin şərh edilməsinə dair” Azərbaycan Respublikası Konstitusiya Məhkəməsinin 02.09.2020-ci il tarixli qərarında qeyd edilmişdir ki, “...İnzibati Xətalar Məcəlləsinin 34.1-ci maddəsinə müvafiq olaraq bir şəxs iki və ya daha çox inzibati xəta törətdikdə, onun barəsində hər bir inzibati xətaya görə ayrılıqda inzibati tənbeh tətbiq edilir. Maddənin məzmunundan göründüyü kimi, qanunverici bir şəxsin bir neçə inzibati xəta törətdiyi halda və bu xətalar ayrı-ayrı orqanların səlahiyyətinə aid olduğu halda ona hər bir xətaya görə istisnasız olaraq ayrılıqda inzibati tənbeh tətbiq edilməsini nəzərdə tutmuşdur. Göründüyü kimi, qanunverici bu maddədə inzibati xətaların məcmusunun yaranmasını istisna etmiş və bunu törədilmiş hər bir inzibati xətaya görə müxtəlif orqanlar tərəfindən ayrılıqda inzibati tənbeh tətbiq edilməsi ilə əlaqələndirmişdir. Belə mövqe ondan irəli gəlir ki, İnzibati Xətalar Məcəlləsinin 40-cı maddəsi inzibati xətalar haqqında işlərə baxmağa səlahiyyəti olan orqanların (vəzifəli şəxslərin) dairəsini dəqiq müəyyən etmişdir. Sözügedən maddəyə əsasən, inzibati xətalar haqqında işlərə rayon (şəhər) məhkəmələri, yetkinlik yaşına çatmayanların işləri və hüquqlarının müdafiəsi üzrə komissiyalar (kollegial orqan), müvafiq icra hakimiyyəti orqanları, Mərkəzi Bank, müvafiq icra hakimiyyəti orqanının yaratdığı qurum (vəzifəli şəxslər) baxırlar. Xüsusilə qeyd edilməlidir ki, inzibati xətalar qanunvericiliyində göstərilən digər orqan və vəzifəli şəxslərdən fərqli olaraq, rayon (şəhər) məhkəmələri tərəfindən nisbətən böyük ictimai təhlükəli olan və daha ağır sanksiya ilə nəticələnə biləcək inzibati xətalara dair işlərə baxılır və bu işlərin dairəsi İnzibati Xətalar Məcəlləsinin 43-cü maddəsi ilə müəyyən edilir.” İnzibati xəta haqqında işin materiallarını tədqiq edərək məhkəmə hesab edir ki, toplanmış sübutlarla Şəxs inzibati xətanı törətməsində təqsiri tam sübuta yetir və onun törətdiyi əməl Azərbaycan Respublikasının İXM-nin 332.4-cü maddəsi ilə düzgün tövsif olunmuşdur. Belə ki, Azərbaycan Respublikasının İXM-nin 332.4-cü maddəsinə əsasən bu Məcəllənin 332.2-ci maddəsində nəzərdə tutulmuş xəta, yəni nəqliyyat vasitəsini idarə etmək hüququ olmadan nəqliyyat vasitəsinin idarə edilməsi nəticəsində zərər çəkmiş şəxsin sağlamlığına yüngül bədən xəsarətinin yetirilməsinə və ya zərər çəkmiş şəxsə maddi zərər vurulmasına görə dörd yüz manat məbləğində cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur. Həmin Məcəllənin 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 9.1-ci maddəsinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətanın xarakterinə, onun törədilməsi hallarına uyğun, qanuni və əsaslı olmalıdır. “Yol hərəkəti haqqında Azərbaycan Respublikasının Qanunu”nun 36-cı maddəsinin 3-cü bəndinin 1-ci hissəsində qeyd olunur ki, yol hərəkətinin iştirakçıları yol hərəkəti üçün təhlükəsiz şərait yaratmalı, öz hərəkətləri və ya hərəkətsizliyi ilə digər hərəkət iştirakçılarına, onların nəqliyyat vasitələrinə və başqa əmlaka zərər vurmamalıdırlar. Azərbaycan Respublikasının İXM-nin 31.2-ci maddəsinə görə isə, fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Həmin Məcəllənin 30.2-ci maddəsinə əsasən hamilə qadınlar və ya himayəsində on dörd yaşınadək uşağı olan qadınlar, on dörd yaşına çatmamış uşağını təkbaşına böyüdən kişilər, on səkkiz yaşına çatmayan şəxslər, birinci və ya ikinci dərəcə əlilliyi olan şəxslər, sağlamlıq imkanları məhdud 18 yaşınadək uşaqlar, altmış yaşına çatmış qadınlar və altmış beş yaşına çatmış kişilər, habelə bu Məcəllənin 41-ci fəslində nəzərdə tutulmuş inzibati xətalar istisna olmaqla digər inzibati xətalara görə hərbi qulluqçular barəsində inzibati həbs tətbiq edilə bilməz. Məhkəmə törətdiyi əməli səmimi etiraf etməsini, əməlindən peşmançılıq çəkməsini, zərərçəkmiş şəxsə dəymiş ziyanı ödəməsini, İ dərəcəli əlil olmasını Şəxs məsuliyyətini yüngülləşdirən hallar hesab edir. İş üzrə Şəxs məsuliyyətini ağırlaşdıran hallar müəyyən edilmədi. Beləliklə məhkəmə törədilmiş inzibati xətanın xarakterini, inzibati xətanı törətmiş şəxsin şəxsiyyətini, məsuliyyətini yüngülləşdirən halları və məsuliyyətini ağırlaşdıran halların müəyyən edilməməsini nəzərə alıb, iş üzrə toplanmış sübutları qiymətləndirərək hesab edir ki, Şəxs Azərbaycan Respublikası İXM-nin 332.4-cü maddəsində nəzərdə tutulan inzibati xətanın törədilməsində təqsirli bilinərək barəsində həmin maddənin sanksiyasında nəzərdə tutulmuş inzibati cərimə növündə inzibati tənbeh tətbiq etməklə inzibati tənbehin məqsədlərinə nail olmaq olar, bu növ inzibati tənbehin təyin edilməsi qanuni və ədalətli olmaqla yanaşı, həm də inzibati məsuliyyətə cəlbetmənin məqsədlərinə uyğundur. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 114, 115, 130-cu maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikasının İnzibati Xətalar Məcəlləsinin 332.4-cü maddəsi ilə nəzərdə tutulmuş inzibati xətanın törədilməsində təqsirli bilinsin və ona, 400 (dörd yüz) manat miqdarında inzibati cərimə növündə inzibati tənbeh tətbiq edilsin. Qərardan təqdim edildiyi və ya alındığı gündən 10 (on) gün müddətində Gəncə şəhəri Nizami Rayon Məhkəməsi vasitəsilə Gəncə Apellyasiya Məhkəməsinə şikayət verilə bilər. Sədrlik edən: Kənan Hüseynov