Laçın Rayon Məhkəməsi Qərardad — İş №3(047)-136/2024

Azərbaycan Respublikası adından QƏRARDAD Laçın rayonu İş № 3(047)-136/2024 04.06.2024 LAÇIN RAYON MƏHKƏMƏSİ Hakim İbrahimov Cavad Cavanşir oğlunun sədrliyi, Məhkəmə iclas katibi Şükürov Yaşasın Valeh oğlunun katibliyi ilə, Şəxs barəsində Azərbaycan Respublikasının İnzibati Xətalar Məcəlləsinin 528.1-ci maddəsi ilə Ağcabədi rayon İcra və Probasiya Şöbəsi tərəfindən tərtib edilmiş inzibati xəta haqqında protokol əsasında toplanmış materialın baxılmağa hazırlanması zamanı, m ü ə y y ə n e t d i m: Məhkəmənin icraatına Ağcabədi rayon İcra və Probasiya Şöbəsi tərəfindən Şəxs barəsində Azərbaycan Respublikasının İnzibati Xətalar Məcəlləsinin 528.1-ci maddəsi ilə tərtib edilmiş xx.xx.2024-cü il tarixli, MN ******* nömrəli inzibati xəta haqqında protokol əsasında toplanmış material daxil olmuşdur. İnzibati xəta haqqında işin materiallarını nəzərdən keçirərək hesab edirəm ki, Şəxs barəsində Azərbaycan Respublikasının inzibati Xətalar Məcəlləsinin 528.1-ci maddəsi ilə tərtib edilmiş xx.xx.2024-cü il tarixli, MN ******* nömrəli inzibati xəta haqqında protokol əsasında toplanmış material geri qaytarılmalıdır. Belə ki, səlahiyyətli orqan tərəfindən Şəxs Azərbaycan Respublikasının İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətməsi əsası ilə inzibati xəta haqqında protokol tərtib edilərək baxılması üçün məhkəməyə göndərilsə də, barəsində inzibati xəta haqqında icraat aparılan şəxs məhkəməyə təqdim olunmamışdır. Halbuki Şəxs törətməsi ehtimal edilən Azərbaycan Respublikasının inzibati Xətalar Məcəlləsinin 528.1-ci maddəsinin sanksiyasında inzibati həbs növündə tənbeh tədbiri nəzərdə tutulmuşdur ki, qanunvericiliyin tələblərinə əsasən həmin kateqoriya işlərə məhkəmə tərəfindən inzibati xəta haqqında işin daxil olduğu gün baxılmalıdır. Həmçinin, Azərbaycan Respublikası İnzibati Xətalar Məcəlləsinin 528.1-ci maddəsinə əsasən icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsinə və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsinə görə - fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Bundan başqa, Azərbaycan Respublikasının İnzibati Xətalar Məcəlləsinin 101.1-ci maddəsinə əsasən inzibati xətanın törədilməsi faktı aşkar edildikdən dərhal sonra inzibati xəta haqqında protokol tərtib edilir. Azərbaycan Respublikasının İnzibati Xətalar Məcəlləsinin 103.1-ci maddəsinə əsasən inzibati xəta haqqında protokol (prokurorun inzibati xəta haqqında iş üzrə icraatın başlanması haqqında qərarı və ya bu Məcəllənin 102.6-cı maddəsində nəzərdə tutulmuş qaydada tərtib etdiyi protokol) tərtib edildiyi vaxtdan 48 saatadək müddətdə hakimə, səlahiyyətli orqana (vəzifəli şəxsə) göndərilir. Azərbaycan Respublikasının İnzibati Xətalar Məcəlləsinin 111.3-cü maddəsinə əsasən inzibati həbs tənbeh növü nəzərdə tutan inzibati xətalar haqqında işlərə inzibati xəta haqqında protokol daxil olduğu gün, inzibati qaydada tutulan şəxslər barəsində isə onların tutulduğu vaxtdan ən geci 48 saat keçənədək baxılır. Azərbaycan Respublikasının İnzibati Xətalar Məcəlləsinin 106.0.3-cü maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən inzibati xəta haqqında protokol və işin digər materialları bu Məcəllənin tələblərinə müvafiq olaraq tərtib edilməsi məsələsini həll edir. Azərbaycan Respublikasının İnzibati Xətalar Məcəlləsinin 110.1-ci maddəsinə əsasən inzibati xəta haqqında işə onun törədildiyi yerdə baxılır. Barəsində inzibati xəta haqqında iş üzrə icraat aparılan şəxsin vəsatətinə əsasən inzibati xəta haqqında iş onun yaşadığı yer üzrə baxıla bilər. Qeyd edilən hüquq normalarının tələblərinə əsasən məhkəmə onu da nəzərə çatdırır ki, hal-hazırda inzibati xətanın törədildiyi yer Ağcabədi rayon İcra və Probasiya Şöbəsi tərəfindən inzibati xəta haqqında protokolun tərtib edildiyi yer, yəni Ağcabədi rayon İcra və Probasiya Şöbəsinin yerləşdiyi Ağcabədi rayon ərazisidir. Bundan başqa, məhkəmə onu da bildirir ki, hal-hazırda Laçın rayon icra və probasiya şöbəsi bərpa edilərək fəaliyyətə başladığından Azərbaycan Respublikası İXM-nin qeyd edilən normalarının tələblərinə əsasən Laçın Rayon Məhkəməsi hal-hazırkı halda Ağcabədi rayon icra və probasiya şöbəsi tərəfindən tərtib edilmiş inzibati xəta haqqında protokola deyil, yalnız Laçın rayon icra və probasiya şöbəsi tərəfindən tərtib edilmiş inzibati xəta haqqında protokola baxmağa səlahiyyətlidir. Göstərilənlərə əsasən də, məhkəmə belə hesab edir ki, Şəxs barəsində Azərbaycan Respublikasının İnzibati Xətalar Məcəlləsinin 528.1-ci maddəsi ilə tərtib edilmiş xx.xx.2024-cü il tarixli, MN ******* nömrəli inzibati xəta haqqında protokola Ağcabədi Rayon Məhkəməsi tərəfindən baxılmalıdır. Odur ki, həmin çatışmazlıqlar aradan qaldırılmadan işə mahiyyəti üzrə baxılıb tamamlanması mümkün deyildir. Bundan əlavə, Azərbaycan Respublikası İnzibati Xətalar Məcəlləsinin 109.1.6-cı maddəsində təsbit edilmişdir ki, inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılır. Beləliklə, sadalanmış hüquq normalarının tələblərini rəhbər tutaraq hesab edirəm ki, inzibati həbs nəzərdə tutulan inzibati xətanı törətmiş şəxs səlahiyyətli orqan tərəfindən məhkəməyə təqdim edilmədiyindən Şəxs barəsində Azərbaycan Respublikasının İnzibati Xətalar Məcəlləsinin 528.1-ci maddəsi ilə tərtib edilmiş xx.xx.2024-cü il tarixli MN ******* nömrəli inzibati xəta haqqında protokol əsasında toplanmış material Ağcabədi rayon İcra və Probasiya Şöbəsinə geri qaytarılmalı, həmçinin həmin şöbəyə İXM-nin tələblərinə riayət edilməklə göstərilən nöqsanlar aradan qaldırıldıqdan sonra qeyd edilən inzibati xəta haqqında protokol əsasında toplanmış materialı baxılması üçün inzibati xətanın törədildiyi yerə görə aidiyyəti üzrə Ağcabədi Rayon Məhkəməsinə göndərilməsi hüquqlarının olması izah edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məsəlləsinin 106 və 109-110-cu maddələrini rəhbər tutaraq, qərara aldım: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib edilmiş xx.xx.2024-cü il tarixli, MN ******* nömrəli inzibati xəta haqqında protokol əsasında toplanmış material Ağcabədi rayon İcra və Probasiya Şöbəsinə geri qaytarılsın. Ağcabədi rayon İcra və Probasiya Şöbəsinə İXM-nin tələblərinə riayət edilməklə qeyd edilmiş nöqsanlar aradan qaldırıldıqdan sonra həmin inzibati xəta haqqında protokol əsasında toplanmış materialı baxılması üçün inzibati xətanın törədildiyi yerə görə aidiyyəti üzrə Ağcabədi Rayon Məhkəməsinə göndərilməsi hüquqlarının olması izah edilsin. Hakim: Cavad İbrahimov