Masallı Rayon Məhkəməsi Qərar — İş №3(050)-2010/2023

Azərbaycan Respublikası adından QƏRAR Masallı rayonu İş № 3(050)-2010/2023 30.11.2023 MASALLI RAYON MƏHKƏMƏSİ Hakimi Bəhmənov Habil Xanoğlan oğlunun sədrliyi, Hakim köməkçisi X2 iştirakı ilə, xx xxxxxxx 1961-ci ildə Masallı rayonu, Təzəkənd kəndində doğulmuş, Masallı rayonu, Təzəkənd kəndində qeydiyyatda olmaqla yaşayan Şəxs Azərbaycan Respublikası İnzibati Xətalar Məcəlləsinin 327.8-ci maddəsi ilə inzibati xəta törətməsinə dair inzibati xəta haqqında işə açıq məhkəmə iclasında baxaraq, müəyyən etdi: Şəxs 23 sentyabr 2023-cü il tarixdə saat 09:00 radələrində idarə etdiyi “VAZ 21063 MİNİK” markalı, **-BG-*** dövlət qeydiyyat nişanlı avtomobillə piyada X1 vuraraq onun sağlamlığına yüngül bədən xəsarəti dəymişdir. Şəxs bu hərəkəti ilə Azərbaycan Respublikası İnzibati Xətalar Məcəlləsinin 327.8-ci maddəsinin tələblərini pozmuşdur. Barəsində inzibati xəta haqqında iş üzrə icraat aparılan şəxs Şəxs məhkəmə iclasının vaxtı və yeri barədə məlumat verilməsinə baxmayaraq, o, məhkəmə iclasına gəlməmiş və gəlməməsinin səbəbi barədə məlumat verməmişdir. Məhkəmə Azərbaycan Respublikası İnzibati Xətalar Məcəlləsinin 61.3-cü maddəsinə əsaslanaraq inzibati xəta haqqında işə Şəxs iştirakı olmadan baxılmasını mümkün hesab etmişdir. İşə əlavə olunmuş 07 noyabr 2023-cü il tarixli cinayət işinin başlanılmasının rədd edilməsi haqqında qərardan görünür ki, Qərarın təsviri hissəsində göstərilənlərə əsasən, Şəxs barəsində cinayət işinin başlanması rədd edilməsi, Qərarın təsviri hissəsində göstərilənlərə əsasən, Şəxs Azərbaycan Respublikası İXM-nin 327.8-ci maddəsi ilə inzibati qaydada məsuliyyətə cəlb olunması məqsədi ilə Masallı RPŞ-nin DYPB-nə verilməsi, Qəbul edilmiş qərarın surəti məlumat üçün ibtidai araşdırmaya prosessual rəhbərliyi həyata keçirən prokurora təqdim edilməsi, Qərar barədə qanunla müəyyən edilmiş maraqlı şəxslərə məlumat verilməsi qərara alınmışdır. Həmin qərarda olan Şəxs izahatında görünür ki, VAZ 21063 markalı **-BG-*** dövlət qeydiyyat nişanlı avtomobil ona məxsusdur və o, arabir idarə etdiyi avtomobil ilə Masallı şəhəri ərazisinə gəlmişdir. xx.xx.2023-cü il tarixdə saat 08 radələrində o, idarə etdiyi VAZ 21063 markalı **-BG-*** dövlət qeydiyyat nişanlı avtomobil ilə yaşadığı evdən çıxmış və Masallı şəhərinə gəlmişdir. Masallı şəhəri ərazisində yerləşən “Köhnə bazar” adlanan yerdə olan “Yaşıl aptek”-ə getmiş və oradan dərman aldıqdan sonra yaşadığı Təzəkənd kəndinə getməyə qərar vermişdir. Bunun üçün idarə etdiyi avtomobilin sükanı arxasına keçmiş, saat 09 radələrində avtomobili ilə Masallı şəhəri H.Əliyev prospektində 40 km saat sürətlə hərəkətdə olduğu vaxt həmin prospektin ərazisində yerləşən Masallı rayon Məhkəməsinin inzibati binasının qarşısından bir nəfər qadın avtomobil yoluna çıxmışdır. O da idarə etdiyi avtomobili saxlamaq üçün dərhal əyləci basmış, lakin hava yağmurlu olduğu üçün idarə etdiyi avtomobil sürüşmüşdür. Sonra idarə etdiyi avtomobilin sağ qanad hissəsi həmin qadının diz nahiyəsinə dəymiş və qadın asfalt örtüyün üzərinə yıxılmışdır. O, avtomobili saxlamış və cəld xəsarət alan şəxsə yaxınlaşmışdır. Bundan sonra ətrafda olan şəxslərin köməkliyi ilə həmin qadını avtomobilə əyləşdirmiş və Masallı RMX-na aparmışdır. Onun B ateqoriyalı sürücülük vəsiqəsi vardır, hadisə zamanı idarə etdiyi avtomobildə iki nəfər qadın olmuş, o, hadisə zamanı xəsarəti almamış, hadisə yerindən qaçmamış Zərərçəkmiş şəxs əvvəllər tanımamış, hər hansı münasibəti və düşmənçiliyi olmamışdır. O, hadisədən öncə spirtli içki qəbul etməmiş, o, piyadanın avtomobil yolunu keçməsini 5-6 metr məsafədə görmüş və piyada hadisə vaxtı yolu sağdan sola doğru yavaş addımla keçmək istəmişdir. Həmin qərarda olan X1 izahatında görünür ki, xx.xx.2023-cü il tarixdə saat 08 radələrində o, yaşadığı evdən çıxıb Masallı şəhərinə gəlmiş, marşrut ilə Masallı rayon Məhkəməsinin inzibati binasının qarşısına gəlmiş və orada avtomobildən yerə düşmüşdür. Bundan sonra o, H.Əliyev prospektində avtomobil yolunu sağdan sola doğru keçməyə qərar vermiş, yavaş addımla yolu keçmək istəyən zaman Köhnə bazar adlanan ərazidən gələn VAZ 2106 markalı avtomobil onu sol ayağından vurmuş və o da yerə yıxılmışdır. Sürücü dərhal avtomobili saxlayıb yerə düşərək ona yaxınlaşmış və daha sonra sürücü onu Masallı RMX-na aparmışdır. Hadisə Masallı şəhəri H.Əliyev prospektində Olimpiya Kompleksi istiqamətində yolun sağ hərəkət hissəsində baş vermiş, Şəxs əvvəllər tanımamış, hər hansı düşmənçiliyi olmamış, hadisə zamanı Şəxs idarə etdiyi avtomobilin sürətinin nə qədər olması barədə hər hansı məlumatı olmamış, Şəxs baş vermiş hadisədən sonra ona yardım etmiş və hadisə yerindən qaçmamışdır. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur; İnzibati Xətalar Məcəlləsinin 8-ci maddəsində təqsirsizlik prezumpsiyası prinsipi öz əksini tapmışdır. Belə ki, barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 9-cu maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. İnzibati Xətalar Məcəlləsinin 76.1-ci maddəsinə görə, inzibati xətanın olubolmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktiki məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Azərbaycan Respublikası İXM-in 75.0.6-cı maddəsində göstərilir ki, inzibati xətalar haqqında işlər üzrə icraatı rədd edən hallar inzibti xəta haqqında iş üzrə sübut etməli olan haldır. Azərbaycan Respublikası İnzibati Xətalar Məcəlləsinin 80.1.-ci maddəsinə əsasən sənədlərdə müəssisələrin, idarələrin, təşkilatların, vəzifəli şəxslərin və fiziki şəxslərin təsdiq etdikləri və ya şərh etdikləri məlumatların inzibati xəta haqqında iş üzrə icraat üçün əhəmiyyəti vardırsa, bu sənədlər iş üzrə sübutlar hesab edilir. Azərbaycan Respublikası İnzibati Xətalar Məcəlləsinin 84.1.-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 84.2.-ci maddəsinə əsasən heç bir sübutun qabaqcadan müəyyən edilmiş qüvvəsi yoxdur. Azərbaycan Respublikası İXM-in 100-cü maddəsində inzibati xəta haqqında protokolda göstərilməli olan hallar qeyd olunmuşdur. Azərbaycan Respublikası İXM-in 115.1. və 115.1.4.-cü maddələrinə əsasən inzibati xəta haqqında iş üzrə qərarda göstərilməli olan hallardan biri də işə baxılarkən müəyyən edilən hallardır. Göründüyü kimi, İnzibati Xətalar Məcəlləsi yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini ehtiva edən əməli (hərəkət və ya hərəkətsizliyi) törətmiş şəxsin inzibati məsuliyyətə cəlb olunmasını müəyyən etmişdir. Məhkəmə verilmiş inzibati xəta haqqında işi tam, obyektiv, hərtərəfli araşdıraraq, inzibati protokolun qanuniliyini yoxlayaraq, belə hüquqi nəticəyə gəlir ki, Şəxs barədə tərtib olunmuş inzibati protokol hazırkı işin faktiki hallarına uyğundur, səlahiyyətli orqan (vəzifəli şəxs) tərəfindən müəyyən edilmiş iş üçün əhəmiyyətli olan hallar sübuta yetir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs təqsiri iş üzrə xx.xx.2023-cü il tarixli, İXP ******* nömrəli inzibati xəta haqqında protokol, 07 noyabr 2023-cü il tarixli cinayət işinin başlanılmasının rədd edilməsi haqqında qərar, habelə işə əlavə edilmiş digər sənədlərlə tam sübuta yetirilmişdir. Odur ki, Şəxs Azərbaycan Respublikası İnzibati Xətalar Məcəlləsinin 327.8-ci maddəsi ilə təqsirli bilinərək həmin maddə ilə də inzibati məsuliyyətə cəlb edilməlidir. Azərbaycan Respublikası İnzibati Xətalar Məcəlləsinin 327.8-ci maddəsinə əsasən bu Məcəllənin 327.1 - 327.6, 328 və 330-cu maddələrində nəzərdə tutulmuş xətalar nəticəsində zərər çəkmiş şəxsin sağlamlığına yüngül bədən xəsarətinin yetirilməsinə görə-üç yüz manat məbləğində cərimə edilir və ya nəqliyyat vasitəsini idarə etmək hüququ аltı аydаn bir ilədək müddətə məhdudlaşdırılır. Azərbaycan Respublikası İnzibati Xətalar Məcəlləsinin 31.2-ci maddəsində göstərilir ki, fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Barəsində inzibati xəta haqqında iş üzrə icraat aparılan şəxs Şəxs inzibati tənbehini yüngülləşdirən və ağırlaşdıran hallar müəyyən edilməmişdir. Məhkəmə hesab edir ki, Şəxs qanunlara əməl edilməsi ruhunda tərbiyələndirmək, yeni inzibati xətanın törədilməsinin qarşısının alınması məqsədi ilə, habelə törədilmiş inzibati xətanın xarakterini, törədilmə hallarını və onun şəxsiyyətini nəzərə alaraq hesab edir ki, Şəxs barəsində inzibati qaydada cərimə cəzası tətbiq olunması qanuni və ədalətlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 114-115, 117, 128-130 və 156-cı maddələrini rəhbər tutaraq, məhkəmə qərar verdi: Şəxs Azərbaycan Respublikasının İnzibati Xətalar Məcəlləsinin 327.8-ci maddəsi ilə təqsirli bilinərək 300 (üç yüz) manat məbləğində inzibati qaydada cərimə edilsin. Qərarın icrası Masallı rayon İcra və Probasiya şöbəsinə tapşırılsın. Qərardan surəti təqdim edildiyi və ya alındığı gündən 10 (on) gün müddətində Masallı Rayon Məhkəməsi vasitəsi ilə Şirvan Apellyasiya Məhkəməsinə şikayət və protest verilə bilər. Sədrlik edən: Habil Bəhmənov