Masallı Rayon Məhkəməsi Qərar — İş №3(050)-2135/2023

Azərbaycan Respublikası adından QƏRAR Masallı rayonu İş № 3(050)-2135/2023 12.12.2023 MASALLI RAYON MƏHKƏMƏSİ Masallı Rayon Məhkəməsinin hakimi Zeynalov Zeynal Ağabala oğlunun sədrliyi, məhkəmə iclas katibi Səfərli İbrahim İqrar oğlunun katibliyi, barəsində inzibati xəta haqqında iş üzrə icraat aparılan şəxs Şəxs iştirakı ilə, Barəsində inzibati xəta haqqında iş üzrə icraat aparılan şəxs Şəxs (xx xxxx 1986-cı ildə Masallı rayonunda doğulmuş, Masallı rayonu, Xırmandalı kəndində qeydiyyatda olmaqla yaşayan) Azərbaycan Respublikasının İnzibati Xətalar Məcəlləsinin 590.2-ci maddəsi ilə nəzərdə tutulan inzibati xətanı törətməsi barədə inzibati xəta haqqında işə açıq məhkəmə iclasında baxaraq, müəyyən etdi: Şəxs 09 noyabr 2023-cü il tarixdə Masallı rayonu Xırmandalı kəndi ərazisində müvafiq icra hakimiyyəti orqanının xüsusi icazəsi olmadan mülki ov silahını saxlama və daşıma qaydasını pozmuşdur. Şəxs bu hərəkəti ilə Azərbaycan Respublikasının İnzibati Xətalar Məcəlləsinin 590.2-ci maddəsində nəzərdə tutulan inzibati xətanı törətmişdir. Bu barədə Azərbaycan Respublikası DİN-in Masallı RPŞ-in İTB-in polis mayoru İlqar Qasımov tərəfindən 14 noyabr 2023-cü il tarixdə MN ******* nömrəli inzibati xəta haqqında protokol tərtib edilmişdir. Barəsində inzibati xəta haqqında iş üzrə icraat aparılan şəxs Şəxs məhkəmə iclasında bildirdi ki, qeyd edilən ov silahını tanımadığı şəxsdən almışdır. Aldığı zaman nə aldığı şəxs, nə də o silaha dair heç bir sənəd almamışdır. Belə ki, həmin gün quş ovlamış və evə qayıdarkən polis əməkdaşları tərəfindən saxlanılmışdır. Bu zaman polis əməkdaşları ona yaxınlaşmış, sənədsiz ov tüfənginin və ovlanmış quşların olmasını aşkar etmişlər. Etdiyi əməldən peşmandır. İşdə olan DİN-in Masallı RPŞ-in İTB-in polis mayoru İlqar Qasımov tərəfindən tərtib edilmiş 14 noyabr 2023-cü il tarixdə MN ******* nömrəli inzibati xəta haqqında protokoldan görünür ki, Şəxs 09 noyabr 2023-cü il tarixdə Masallı rayonu Xırmandalı kəndi ərazisində müvafiq icra hakimiyyəti orqanının xüsusi icazəsi olmadan mülki ov silahını saxlama və daşıma qaydasını pozmuşdur. İşdə olan Masallı RPŞ-nın TB-nin rəisi polis mayoru Zaur Talıbov tərəfindən tərtib edilmiş xx.xx.2023-cü il tarixli raportdan görünür ki, araşdırma zamanı Şəxs müvafiq icra hakimiyyəti orqanlarından xüsusi icazəsi olmadan 12 kalibrili, İJ-58 markalı, nömrəsiz, qoşa lüləli mülki ov tüfəngi, patrondaş, 24 ədəd patron, ov üçün nəzərdə tutulmuş 2 ədəd radio tipli meqafon, 1 ədəd baş üçün fənər, 9 ədəd quşun ovlanmasını aşkar etməsi barədə Masallı RPŞ-nin PPXB-nin manqa komandiri, polis baş serjantı İsgəndər Rəhimovun yazdığı raport xx.xx.2023-cü il tarixdə Cinayətlər haqqında ərizələr və məlumatların uçotu kitabında 3377 sayda qeydiyyata alınaraq icraatına daxil olmuşdur. Araşdırma zamanı müəyyən edilmişdir ki, Masallı rayon Xırmandalı kənd sakini Şəxs əməlində Azərbaycan Respublikası İXM-nin 590.2-ci maddəsinin (Müvafiq icra hakimiyyəti orqanından xüsusi icazə almamış şəxslər tərəfindən mülki silahın və ya onun üçün döyüş sursatının əldə edilməsi, saxlanılması, daşınması, başqa şəxslərə verilməsi və ya satılmasına görə) tərkibi olduğu üçün, Şəxs inzibati qaydada məsuliyyətə cəlb edilməsi məqsədi ilə qəbul edilmiş qərarın surəti Masallı RPŞ-nin İTB-nə verilmişdir. İşdə olan Masallı RPŞ-nın TB-nin təhqiqatçısı, polis kapitanı Əli Sadıqov tərəfindən qəbul edilmiş xx.xx.2023-cü il tarixli cinayət işinin başlanmasının rədd edilməsi haqqında qərardan görünür ki, toplanmış materialda təsviri hissəsində göstərilənlərə əsasən toplanmış materialda cinayət tərkibi olmadığından material üzrə cinayət işi başlanması rədd edilməsi, Şəxs əməlində Azərbaycan Respublikası İXM-nin 590.2-ci maddəsinin (Müvafiq icra hakimiyyəti orqanmdan xüsusi icazə almamış şəxslər tərəfindən mülki silahın və ya onun üçün döyüş sursatının əldə edilməsi, saxlanılması, daşınması, başqa şəxslərə verilməsi və ya satılmasına görə) tərkibi olduğu üçün, Şəxs inzibati qaydada məsuliyyətə cəlb edilməsi məqsədi ilə qəbul edilmiş qərarın surəti Masallı RPŞ-nin İTB-nə göndərilməsi, “İJ-58" markalı, 12 kalibrli, qoşalüləli, nömrəsiz ov tüfənginin saxlanılmasından ötrü qəbul edilmiş qərarın surəti Masallı RPŞ-nin İTB-nə göndərilməsi, Qərarın surəti tərəflərə göndərilməklə qəbul edilmiş qərardan narazı olduğu halda Prokurora, yuxarı Prokurora və Məhkəməyə şikayət etmək hüququnun olması onlara izah edilməsi, Qərarın surəti ibtidai araşdirmaya prosessual rəhbərliyi həyata keçirən Masallı rayon prokurorluğuna göndərilməsi, Material saxlanmasından ötrü Masallı RPŞ-nin arxivinə verilməsi qərara alınmışdır. Barəsində inzibati xəta haqqında iş üzrə icraat aparılan şəxs Şəxs təqsiri özünün səmimi etirafı, inzibai xəta haqqında protokol, cinayət işinin başlanmasının rədd edilməsi haqqında qərardan, habelə işə əlavə edilmiş digər sənədlərlə tam sübuta yetirilmişdir. Odur ki, Şəxs Azərbaycan Respublikası İnzibati Xətalar Məcəlləsinin 590.2-ci maddəsi ilə təqsirli bilinərək, həmin maddə ilə də inzibati məsuliyyətə cəlb edilməlidir. Azərbaycan Respublikası İnzibati Xətalar Məcəlləsinin 31.2-ci maddəsində göstərilir ki, fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Barəsində inzibati xəta haqqında iş üzrə icraat aparılan şəxs Şəxs inzibati tənbehini yüngülləşdirən və ağırlaşdıran hallar yoxdur. Azərbaycan Respublikası İnzibati Xətalar Məcəlləsinin 26.1-ci maddəsinə əsasən inzibati xəta törətmiş şəxsin xüsusi mülkiyyətində olan, habelə inzibati xətanın törədilməsində alət və ya inzibati xətanın bilavasitə obyekti olmuş predmetin müsadirəsi bu Məcəllənin xüsusi hissəsində nəzərdə tutulmuş hallarda həmin predmetin məcburi qaydada və ödənişsiz dövlətin mülkiyyətinə keçməsindən ibarətdir. Həmin Məcəllənin 26.2-ci maddəsinə əsasən inzibati xətanın törədilməsində alət və ya inzibati xətanın bilavasitə obyekti olmuş predmetin müsadirəsi hakim tərəfindən tətbiq edilir. Həmin Məcəllənin 590.2-ci maddəsinə əsasən müvafiq icra hakimiyyəti orqanından xüsusi icazə almamış şəxslər tərəfindən mülki silahın və ya onun üçün döyüş sursatının əldə edilməsi, saxlanılması, daşınması, başqa şəxslərə verilməsi və ya satılmasına görə-silah və döyüş sursatı müsadirə edilməklə səksən manatdan yüz manatadək məbləğdə cərimə edilir. Odur ki, məhkəmə Şəxs götürülmüş 1 ədəd, “İJ-58" markalı, 12 kalibrli, qoşalüləli, nömrəsiz ov tüfəngi, patrondaş, 24 ədəd patron dövlət nəfinə müsadirə edilməsini və onun cərimə edilməsini məqsədə müvafiq hesab edir. Yuxarıda göstərilənlərə əsasən, Azərbaycan Respublikası İnzibati Xətalar Məcəlləsinin 40, 43, 114-116, 128-130-cu maddələrini rəhbər tutaraq, qərara aldı: Şəxs Azərbaycan Respublikasının İnzibati Xətalar Məcəlləsinin 590.2-ci maddəsi ilə təqsirli bilinərək ondan götürülmüş 1 ədəd, “İJ-58" markalı, 12 kalibrli, qoşalüləli, nömrəsiz ov tüfəngi, patrondaş, 24 ədəd patron müsadirə edilsin və 80 (səksən) manat məbləğində cərimə edilsin. Qərarın icrası müvafiq olaraq Masallı Rayon Polis Şöbəsinə və Masallı Rayon İcra və Probasiya Şöbəsinə tapşırılsın. Qərardan surəti təqdim edildiyi və ya alındığı gündən 10 (on) gün müddətində (“Elektron məhkəmə” informasiya sistemində yaradılan elektron kabinet vasitəsi ilə) Masallı Rayon Məhkəməsi vasitəsilə Şirvan Apellyasiya Məhkəməsinə şikayət və ya protest verilə bilər. Sədrlik edən: Zeynal Zeynalov