Masallı Rayon Məhkəməsi Qərar — İş №3(050)-746/2024

Azərbaycan Respublikası adından QƏRAR Masallı rayonu İş № 3(050)-746/2024 28.03.2024 MASALLI RAYON MƏHKƏMƏSİ Masallı Rayon Məhkəməsinin hakimi Zeynalov Zeynal Ağabala oğlunun sədrliyi, məhkəmə iclas katibi Əhmədov Xəyyam Adəm oğlunun katibliyi, barəsində inzibati xəta haqqında iş üzrə icraat aparılan şəxs Şəxs iştirakı ilə. xx.xx.1959-cu ildə Masallı rayonu Qədirli kəndində anadan olmuş, Azərbaycan Respublikasının vətəndaşı, evli, orta təhsilli, fərdi əməklə məşğul olan, Masallı rayonu, Qədirli kəndində qeydiyyatda olmaqla yaşayan Şəxs Azərbaycan Respublikasının İnzibati Xətalar Məcəlləsinin 510 və 535.1-ci maddələri ilə nəzərdə tutulan inzibati xətaları törətməsi barədə inzibati xəta haqqında işə açıq məhkəmə iclasında baxaraq, MÜƏYYƏN ETDİ: Şəxs xx.xx.2024-cü il tarixdə Masallı RPŞ-nin inzibati binasında ucadan ünvansız söyüşlər söyərək ictimai qaydanı pozmuşdur. Bundan əlavə Şəxs eyni tarixdə polis əməkdaşlarının qanuni tələblərinə qəsdən tabe olmamışdır. Şəxs bu hərəkətləri ilə Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulan inzibati xətaları törətmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahatında bildirdi ki, kənd ərazisində yerləşən dövlət torpağı olan örüş sahəsini rayon icra başçısı istifadə etmələri üçün onlara vermişdir. Həmin şəxslərində həmin torpaq sahəsi ilə bağlı sənədləri olmuş, lakin həmin sənədlərin vaxtı bitmişdir. Keçən il icra başçısı ona artıq həmin şəxslər torpaq sahəsini əkib-becəriblər, qoy onlar biçin işlərini aparsınlar ondan sonra siz istifadə edərsiz. Lakin bütün bunlara baxmayaraq həmin şəxslər onlara həmin torpaq sahəsindən istifadə etməyə qoymurlar. Onlara məxsus malqaranı həmin örüş sahəsindən qovub çıxarırlar. Həmin şəxslər onları söyüb təhqir edirlər. Həmin şəxslərdən biri öz azyaşlı uşağını gətirib ayın 24-də polis şöbəsinə ərizə vermişdir ki, guya onlar beş nəfər birləşib azyaşlı uşağı döyüblər. Təhqiqatçı Zeynalov xx.xx.2024-cü il tarixdə ona zəng vuraraq iki oğlu ila birlikdə polis şöbəsinə gəlmələrini demişdir. O da xx.xx.2024-cü il tarixdə saat 10-da iki oğlu ilə birlikdə polis şöbəsində olmuşdur. Polis şöbəsində onlardan şikayət olduğunu bilmişlər. Həmin vaxt təhqiqatçı onlardan izahat almışdır. Həmin vaxtdanda polis şöbəsində saxlanılmışlar. Lakin qarşı tərəfi dəvət etməmişlər ki, bilsinlər ki uşağı necə döyüblər. Qarşı tərəfin izahatındanda xəbəri olmamışdır. Həmin gün axşamı polis şöbəsində qalmışlar, bu gün isə barələrində protokol tərtib edib, izahatları alınıb onlara bildirilmişdir ki, Zaur Zeynalovun otağında hay-küy etmişlər. O, yaşlı adamdır, orada hay-küy etmək onun yaşına yaraşmaz. Düzdür həmin vaxt o, bildirmişdir ki, haqsızlıqdır, araşdırılmalıdır, ekspert təyin olunsun və ekspert müəyyən etsinki uşaq nə ilə döyülüb necə döyülüb, əgər gunahı olsa barəsində lazımı tədbir görülsün. Həmçinin izahat alındığı zaman onlara bildirilmişdir ki, “siz müqavimət göstərmisiz, hirslənibsiz, hirsli olmusuz belə etmisiz”. Əsəbi olsalarda, hirslənsələrdə bir səhvdi etmişlər. Həmin vaxt əsəbi olduğu üçün ləhnət olsun sözünü demişdir. Oğlu Ərşad həmin vaxt həmin günü yəni 23-xx.xx.2024-cü il tarixlərində Astara rayonunda olmuş ot bağlaması satmağa getmişdir. Polis şöbəsində ona ucadan danışmaması, sakit olması bildirilmişdir. Yaşlı olmasının nəzərə alınıb ədalətli qərar qəbul edilməsini xahiş etdi. Məhkəmə iclasında şahid qismində dindirilmiş X4 ifadə verərək bildirdi ki, xx.xx.2024-cü il tarixli, HK-1/752 saylı materialın icrası ilə bağlı xx.xx.2024-cü il tarixdə saat 12 radələrində RPŞ-in inzibati binasında Qədirli kənd sakinləri Şəxs, X5, X6, X2 və X1 izahatları alındıqdan sonra xidməti otağında onlar uca səslə aparılan araşdırmadan, qanundan narazı olduqlarını bildirib hay-küy salırdılar, dəfələrlə onları nizam intizama dəvət etsədə onun qanuni tələblərinə məhəl qoymayaraq, öz qanunsuz hərəkətlərinə davam edərək, bundan sonra adları qeyd olunan şəxslər RPŞ-in Növbətçi hissənin qarşısında hay-küy salaraq, qanundan narazı olduqlarını küçə söyüşləri ilə ifadə edib Növbətçi hissəsnin və inzibati binada xidmətdə olan digər polis əməkdaşları Vasif Ağazadə, Xalid Qurbanov, Əli Sadıqov, Elşad Məmmədov, Ramil Qasımov və Əlisa Novruzovun iş fəaliyyətini dayandırmışlar. Onlara yaxınlaşan polis əməkdaşları dəfələrlə adları qeyd olunan şəxsləri nizam intizama dəvət etsələrdə, lakin onlar öz qanunsuz hərəkətlərinə son qoymayıb, polisin qanuni tələblərinə qəsdən tabe olmayaraq ünvansız küçə söyüşləri söyürdülər. Məhkəmə iclasında şahid qismində dindirilmiş X3 şahid X4 ilə eyni məzmunlu ifadə verdilər. Azərbaycan Respublikası DİN-nin Masallı RPŞ-nin İTB-nin sahə rəisi Orxan Balakişiyev tərəfindən 27 mart 2024-cü il tarixdə MN ******* və ******* saylı inzibati xəta haqqında protokollar tərtib edilmişdir. İş materiallarında olan 27 mart 2024-cü il tarixli 007381 nömrəli protokoldan görünür ki, Şəxs 27 mart 2024-cü il tarixdə saat 15:12-də inzibati qaydada tutulmuş, 28 mart 2024-cü il tarixdə saat 10:56-da azad edilmişdir. Barəsində inzibati xəta haqqında iş üzrə icraat aparılan şəxs Şəxs təqsiri özünün qismən etirafı ilə yanaşı, şahidlərin ifadəsi, inzibati xəta haqqında protokol, habelə işə əlavə edilmiş digər sənədlərlə tam sübuta yetirilmişdir. Odur ki, Şəxs İXM-in 510 və 535.1-ci maddələri ilə təqsirli bilinərək, İXM-nin 535.1ci maddəsi ilə inzibati məsuliyyətə cəlb edilməlidir. Azərbaycan Respublikası İnzibati Xətalar Məcəlləsinin 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə-əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Azərbaycan Respublikası İnzibati Xətalar Məcəlləsinin 535.1-ci maddəsinə əsasən Polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə-fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Həmin Məcəllənin 30.1-ci maddəsində göstərilir ki, inzibati həbs, yalnız müstəsna hallarda bu Məcəllənin Xüsusi hissəsinin müvafiq maddələrində nəzərdə tutulan inzibati xətaların ayrı-ayrı növlərinə görə üç gündən üç ay müddətinədək hakim tərəfindən tətbiq edilir. Həmin Məcəllənin 30.2-ci maddəsində göstərilir ki, hamilə qadınlar və ya himayəsində on dörd yaşınadək uşağı olan qadınlar, on dörd yaşına çatmamış uşağını təkbaşına böyüdən kişilər, on səkkiz yaşına çatmayan şəxslər, orqanizmin funksiyalarının 61-80 faiz və ya 81-100 faiz pozulmasına görə əlilliyi müəyyən edilmiş şəxslər, 18 yaşınadək əlilliyi müəyyən edilmiş şəxslər, altmış yaşına çatmış qadınlar və altmış beş yaşına çatmış kişilər, habelə bu Məcəllənin 41-ci fəslində nəzərdə tutulmuş inzibati xətalar istisna olmaqla digər inzibati xətalara görə hərbi qulluqçular barəsində inzibati həbs tətbiq edilə bilməz. Azərbaycan Respublikası İnzibati Xətalar Məcəlləsinin 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Azərbaycan Respublikası İnzibati Xətalar Məcəlləsinin 31-ci maddəsində göstərilir ki, fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Şəxs əməlində məsuliyyətini yüngülləşdirən və ağırlaşdıran hallar yoxdur. Məhkəmə Şəxs qanunlara əməl edilməsi ruhunda tərbiyələndirmək, yeni inzibati xətanın törədilməsinin qarşısının alınması məqsədi ilə, habelə törədilmiş inzibati xətanın xarakterini, törədilmə hallarını və onun şəxsiyyətini nəzərə alaraq hesab edir ki, onun barəsində inzibati tənbeh tədbiri tətbiq edilərkən Azərbaycan Respublikası İnzibati Xətalar Məcəlləsinin 535.1-ci maddəsinin sanksiyası həddində inzibati qaydada cərimə edilməsi məqsədəuyğundur. Azərbaycan Respublikası İnzibati Xətalar Məcəlləsinin 31.4-1-ci maddəsində qeyd edilmişdir ki, İnzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Bu səbəbdən Şəxs inzibati qaydada tutulduğu müddət ona cərimə cəzası təyin edilən zamanı nəzərə alınmalıdır. Yuxarıda göstərilənlərə əsasən, Azərbaycan Respublikası İnzibati Xətalar Məcəlləsinin 40, 43, 115 və 156-cı maddələrini rəhbər tutaraq, məhkəmə QƏRAR VERDİ: Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələri ilə təqsirli bilinsin. Şəxs Azərbaycan Respublikası İnzibati Xətalar Məcəlləsinin 535.1-ci maddəsi ilə təqsirli bilinərək 150 (yüz əlli) manat məbləğində inzibati qaydada cərimə edilsin. Qərarın icrası Masallı Rayon İcra və Probasiya Şöbəsinə tapşırılsın. Qərardan surəti təqdim edildiyi 10 (on) gün müddətində Masallı Rayon Məhkəməsi vasitəsilə Şirvan Apellyasiya Məhkəməsinin Cinayət Kollegiyasına apellyasiya şikayəti verilə bilər. Sədrlik edən: Zeynal Zeynalov