Mingəçevir Şəhər Məhkəməsi Qərar — İş №3(051)-339/2020

Azərbaycan Respublikası adından QƏRAR Mingəçevir şəhəri İş № 3(051)-339/2020 22.07.2020 MİNGƏÇEVİR ŞƏHƏR MƏHKƏMƏSİ Hakim Kərimova Məhburə Kərim qızının sədrliyi, Hacıyev Fəzail Hacı oğlunun katibliyi ilə xx.xx.1983-cü ildə Samux rayonunda anadan olmuş, Azərbaycan Respublikasının vətəndaşı, orta təhsilli, evli, ünvan 1 ünvanda yaşayan Şəxs barəsində Azərbaycan Respublikası İnzibati Xətalar Məcəlləsinin 211.1-ci maddəsi ilə Mingəçevir şəhər Polis Şöbəsindən daxil olmuş inzibati xəta haqqında materiala baxaraq M ü ə y y ə n e t d im : Mingəçevir şəhər Polis Şöbəsi tərəfindən tərtib olunmuş MN ******* №li 22.07.2020-ci il tarixli protokol və ona əlavə olunmuş sənədlərdən görünür ki, Şəxs 22.07.2020-ci il tarixdə saat 00:30 radələrində şəhərlərarası sərnişin daşıma üçün icazələri olmadan sərnişinləri daşıyaraq karantin rejim qaydalarını pozmuşdur. Barəsində inzibati xəta haqqında iş üzrə icraat aparılan şəxs Şəxs izahatında bildirdi ki, özünə məxsus “Mersedes” markalı mikro avtobusu var. Həmin mikroavtobusla hərdənbir sərnişin daşıma ilə məşğul olur. Ancaq karantin müddətində fəaliyyət göstərə bilmirdi. Himayəsində 3 nəfər uşaqları var. İşləyə bilmədiyinə görə ailəsinin maddi tələbatını ödəyə bilmirdi. Rəşad adlı tanışının sərnişindaşıma ilə bağlı icazəsi olduğuna görə razılığa gəldilər ki, Rəşad ona məxsus mikroavtobusla fəaliyyət göstərsin, əldə etdiyi qazancdan da ona da versin. 22.07.2020-ci ildə təxminən, saat 00:30 radələrində tanışı Rəşad avtomaşını içərisində 12 nəfər sərnişinlə Bakı şəhəri istiqamətində idarə edərkən Mingəçevir şəhəri “Ala qapı” deyilən yerdə yerləşən postda polis əməkdaşları tərəfindən saxlanıldı. Həmin vaxt o da avtomaşında idi. Araşdırma zamanı avtomaşının ona məxsus olması, lakin elektron icazə sistemində icazə almamsı aşkar olundu. Onun barəsində protokol tərtib edildi. Əməlindən peşimandır. Toplanmış sübutları məcmuu halda araşdırıb, qiymət verərək hesab edirəm ki, Şəxs əməlində Azərbaycan Respublikası İnzibati Xətalar Məcəlləsinin 211.1-ci maddəsinin tərkibi vardır və həmin maddə ilə təqsirli bilinərək ona inzibati tənbeh tətbiq olunmalıdır. Azərbaycan Respublikasi İnzibati Xətalar Məcəlləsinin inzibati tənbehin məqsədlərini müəyyən edən 21-ci maddəsində qeyd edilmişdir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsini qarşısını almaq məqsədi daşıyır. Azərbaycan Respublikası İnzibati Xətalar Məcəlləsinin 31-ci maddəsinin tələblərinə görə fiziki şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdiriən və ağırlaşdıran hallar nəzərə alınır. Şəxs əməlindən peşiman olması, himayəsində üç nəfər azyaşlı uşaqları olması, ilk dəfə inzibati məsuliyyətə cəlb olunması məsuliyyətini yüngülləşdirən haldır. Məsuliyyətini ağırlaşdıran hal müəyyən edilmədi. Şəxs himayəsində azyaşlı uşaqlarının olmasını, məsuliyyətini yüngülləşdirən digər halları nəzərə alaraq hesab edirəm ki, onun barəsində məhkəməyə verildiyi maddənin sanksiyasında nəzərdə tutulmuş inzibati cərimə tətbiq edilməsi İXM-nin 21-ci maddəsində göstərilən inzibati tənbehin məqsədlərini təmin edə bilər. Göstərilənlərə əsasən və Azərbaycan Respublikasının İXM-nin 40, 43, 48-51, 114, 128- 130-ci maddələrini rəhbər tutub, Qərara aldım : Şəxs Azərbaycan Respublikası İnzibati Xətalar Məcəlləsinin 211.1-ci maddəsi ilə nəzərdə tutulan inzibati xətanı törətməkdə təqsirli bilinərək 400 (dörd yüz) manat miqdarında inzibati cərimə edilsin. Qərarın surəti rəsmi qaydada verildiyi vaxtdan 10 (on) gün müddətində Mingəçevir şəhər məhkəməsi vasitəsi ilə və ya birbaşa Şəki Apellyasiya Məhkəməsinə şikayət verilə bilər. Məhkəmənin hakimi: Məhburə Kərimova