Saatlı Rayon Məhkəməsi Qərar — İş №3(055)-1249/2025

Azərbaycan Respublikası adından QƏRAR Saatlı rayonu İş № 3(055)-1249/2025 29.12.2025 SAATLI RAYON MƏHKƏMƏSİ Hakim Qasımov Vüqar İnqilab oğlunun sədrliyi, Məhkəmə iclasının katibi X1 iştirakı ilə "xxxx" Məhdud Məsuliyyətli Cəmiyyətinin barəsində Azərbaycan Respublikası İnzibati Xətalar Məcəlləsinin 539.1-1-ci maddəsi ilə Azərbaycan Respublikası Əmək və Əhalinin Sosial Müdafiəsi Nazirliyi yanında AR ƏƏSMN yanında DƏMX Mil-Muğan regional şöbəsindən (bundan sonra - AR ƏƏSMN yanında DƏMX Mil-Muğan regional şöbəsi) daxil olmuş inzibati xəta haqqında materiala Saatlı Rayon Məhkəməsinin binasında açıq məhkəmə iclasında baxaraq, məhkəmə M ü ə y y ə n e t d i: Məhkəməyə daxil olmuş inzibati xəta haqqında 12 noyabr 2025-ci il tarixli MN ******* saylı protokolda və ona əlavə olunmuş sənədlərdə göstərilmişdir ki, "xxxx" Məhdud Məsuliyyətli Cəmiyyətinə göndərilmiş 3-17-5/2-97315/2025 nömrəli 21 oktyabr 2025-ci il tarixli 2 nəfər işçinin əmək müqaviləsinin elektron sənəd formasına keçirilməsi barədə göstəriş məktubuna cəmiyyətin rəhbərliyi tərəfindən əməl olunmamışdır. AR ƏƏSMN yanında DƏMX Mil-Muğan regional şöbəsinə və barəsində inzibati xəta aqqında iş üzrə icraat aparılan şəxs "xxxx" Məhdud Məsuliyyətli Cəmiyyətinə işin baxılmasının yeri və müddəti vaxtında bildirilmiş, lakin onların nümayəndələri üzrlü səbəb olmadan məhkəmə iclasına gəlməmiş, gəlməməsinin səbəbləri barədə məhkəməyə məlumat verməmişlər və işə baxılmasının təxirə salınması haqqında məhkəməyə vəsatət daxil olmamışdır. Məhkəmə inzibati xəta haqqında işə AR ƏƏSMN yanında DƏMX Mil-Muğan regional şöbəsinin və "xxxx" Məhdud Məsuliyyətli Cəmiyyətinin nümayəndələrinin iştirakı olmadan baxılmasını mümkün hesab etmişdir. Məhkəmə iş materiallarını nəzərdən keçirib belə nəticəyə gəlir ki, "xxxx" Məhdud Məsuliyyətli Cəmiyyətinin barəsində Azərbaycan Respublikası İnzibati Xətalar Məcəlləsinin 539.1-1-ci maddəsi ilə başlanmış inzibati xəta haqqında iş üzrə icraata xitam verilməlidir. Belə ki, Azərbaycan Respublikası İnzibati Xətalar Məcəlləsinin 539.1-1-ci maddəsinin dispozisiyasına görə əmək müqaviləsinin bağlanması, dəyişdirilməsi və xitamının əsasları və sənədləşdirilməsi, kollektiv müqavilənin (sazişin) bağlanması və yerinə yetirilməsi, əmək şəraiti, işçilərin və iş yerlərinin attestasiyasının keçirilməsi, iş və istirahət vaxtı, məzuniyyət hüququnun həyata keçirilməsi, əmək və məzuniyyət haqlarının, ezamiyyə xərclərinin, müavinət və digər ödənişlərin ödənilməsi, qadınların və yaşı 18-dən az olan işçilərin əməyindən istifadənin xüsusiyyətləri, işçilərin sığorta olunmasının tənzimlənməsi, əməyin mühafizəsi norma və qaydaları ilə bağlı əmək qanunvericiliyinə əməl olunmasına dövlət nəzarətini həyata keçirən müvafiq icra hakimiyyəti orqanının icrası məcburi olan göstərişinin əmək münasibətlərinin iştirakçıları tərəfindən icra edilməməsinə görə inzibati məsuliyyət nəzərdə tutulmuşdur. İnzibati xəta haqqında protokola əlavə edilərək məhkəməyə göndərilmiş AR ƏƏSMN yanında DƏMX Mil-Muğan regional şöbəsininin 3-17-5/2-97315/2025 nömrəli 21 oktyabr 2025-ci il tarixli məktubundan görünür ki, "xxxx" Məhdud Məsuliyyətli Cəmiyyətinə 2 nəfər işçinin əmək müqaviləsinin elektron sənəd formasına keçirilməsi barədə icrası məcburi olan göstəriş məktubu yazılmışdır. Lakin həmin məktubun "xxxx" Məhdud Məsuliyyətli Cəmiyyətinə rəsmi qaydada verilməsini təsdiq edən müvafiq sənəd iş materiallarına əlavə edilməmişdir. AR ƏƏSMN yanında DƏMX Mil-Muğan regional şöbəsi inzibati xəta haqında protokola əlavə edilmiş poçtun göndərilməsinə dair reyestrin surətindən görünür ki, "xxxx" Məhdud Məsuliyyətli Cəmiyyətinə xx.xx.2025-ci il tarixdə SS930693509AZ nömrəli məktub göndərilmişdir. Lakin Azərpoçtun rəsmi saytında poçt göndərişlərinin izlənməsi bölməsindən görünür ki, SS930693509AZ nömrəli məktub xx.xx.2025-ci il tarixdə göndərilib, xx.xx.2025-ci il tarixdə alıcıya çatmışdır. Hazırki iş üzrə inzibati xəta haqqında protokol isə xx.xx.2025-ci il tarixdə tərtib olunmuşdur. Göründüyü kimi, inzibati xəta haqqında protkol tərtib edildiyi tarixdə AR ƏƏSMN yanında DƏMX Mil-Muğan regional şöbəsininin 3-17-5/2-97315/2025 nömrəli 21 oktyabr 2025-ci il tarixli məktubu "xxxx" Məhdud Məsuliyyətli Cəmiyyətinə çatmamışdır. Bildiriş, inzibati xəta haqında protokol tərtib edildikdən sonra "xxxx" Məhdud Məsuliyyətli Cəmiyyətinə çatmışdır. Azərbaycan Respublikası İnzibati Xətalar Məcəlləsinin 57.1-ci maddəsinə əsasən inzibati xətalar haqqında işlər üzrə icraatın iştirakçılarına bu Məcəllədə müəyyən edilmiş hallarda inzibati xətalar haqqında işlər üzrə sənədlər (qərarlar, qərardadlar, protokollar, bildirişlər) hakim və ya səlahiyyətli orqan (vəzifəli şəxs) tərəfindən “Poçt haqqında” Azərbaycan Respublikasının Qanununda nəzərdə tutulmuş sifarişli poçt göndərişi ilə çatdırılır, yaxud səlahiyyətli vəzifəli şəxs tərəfindən şəxsən verilir. Sifarişli poçt göndərişi - göndərilmək üçün qəbul olunduğuna dair istifadəçiyə qəbz verilməsi, çatdırılarkən isə ünvan sahibinin müvafiq sənədi imzalaması tələb olunan poçt göndərişidir. Göründüyü kimi, şəxsin əməlində İXM-nin 539.1-1-ci maddəsinin tərkibinin yaranması üçün əmək qanunvericiliyinə əməl olunmasına dövlət nəzarətini həyata keçirən müvafiq icra hakimiyyəti orqanının icrası məcburi olan göstərişi əmək münasibətlərinin iştirakçıları tərəfindən icra edilmədiyinə görə yaranır. Yəni, əmək münasibətlərinin iştirakçısı ilk öncə qanunvericilikdə nəzərdə tutulmuş qaydada müvafiq icra hakimiyyəti orqanının icrası məcburi olan göstərişi barədə rəsmi qaydada məlumatlandırılmalıdır. Daha sonra, sözügedən göstərişə əmək münasibətlərinin iştirakçısı tərəfindən əməl edilməzsə onun barəsində İXM-nin 539.1-1-ci maddəsi ilə inzibati xəta haqqında protokol tərtib edilməlidir. Hazırki iş materiallarına AR ƏƏSMN yanında DƏMX Mil-Muğan regional şöbəsinin 3-17-5/2-97315/2025 nömrəli 21 oktyabr 2025-ci il tarixli icrası məcburi olan göstəriş məktubunun "xxxx" Məhdud Məsuliyyətli Cəmiyyətinə inzibati xəta haqqında protokol tərtib edildikdən sonra çatdırıldığı müəyyən olunur. Ona görə də, iş materiallarında olan sənədlərlə "xxxx" Məhdud Məsuliyyətli Cəmiyyətinin 3-17-5/2-97315/2025 nömrəli 21 oktyabr 2025-ci il tarixli icrası məcburi olan göstəriş barədə protokol tərtib edildiyi tarixdə məlumatlı olmaması müəyyən edilmişdir. Belə olan halda da şəxsin təqsirliliyi sübuta yetirilmir. Azərbaycan Respublikası İnzibati Xətalar Məcəlləsinin 53.2-ci maddəsinə əsasən hər hansı şəxs barəsində başlanılmış inzibati xətalar haqqında işlər üzrə icraata, həmçinin onun inzibati xəta törədilməsinə aidiyyəti olmadıqda və ya təqsirliliyi sübuta yetirilmədikdə, o cümlədən təqsirliliyin sübuta yetirilməsində qanuna zidd olaraq əldə edilmiş sübutlardan istifadə edildikdə xitam verilir. Beləliklə məhəkəmə hesab edir ki, "xxxx" Məhdud Məsuliyyətli Cəmiyyətinin barəsində AR ƏƏSMN yanında DƏMX Mil-Muğan regional şöbəsindən daxil olmuş, Azərbaycan Respublikasının İnzibati Xətalar Məcəlləsinin 539.1-1-ci maddəsi ilə tərtib edilmiş 12 noyabr 2025-ci il tarixli MN ******* saylı inzibati xəta haqqında protokola dair inzibati xəta haqqında iş üzrə icraata şəxsin təqsirliliyi sübuta yetirilmədiyindən xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48, 114, 128-130-cu maddələrini rəhbər tutaraq, Qəraraaldım: "xxxx" Məhdud Məsuliyyətli Cəmiyyətinin barəsində Azərbaycan Respublikasının İnzibati Xətalar Məcəlləsinin 539.1-1-ci maddəsi ilə tərtib edilmiş 12 noyabr 2025-ci il tarixli MN ******* saylı inzibati xəta haqqında protokola dair inzibati xəta haqqında iş üzrə icraata şəxsin təqsirliliyi sübuta yetirilmədiyindən xitam verilsin. Qərardan onun rəsmi qaydada verildiyi vaxtdan 10 (on) gün müddətində Saatlı Rayon Məhkəməsi vasitəsi ilə Şirvan Apellyasiya Məhkəməsinə şikayət və ya protest verilə bilər. Qərardan apellyasiya şikayəti və ya protesti verilmədikdə həmin müddət başa çatdığı vaxtdan sonrakı gün qərar qanuni qüvvəyə minir.