Sabirabad Rayon Məhkəməsi Qərar — İş №3(056)-42/2023

Azərbaycan Respublikası adından QƏRAR Sabirabad rayon İş № 3(056)-42/2023 23.01.2023 SABİRABAD RAYON MƏHKƏMƏSİ Hakim Allahverdiyev Səlim Məhərrəm oğlunun sədrliyi, Məhkəmə iclasının katibi Quliyev Mətin Azər oğlunun katibliyi, Barəsində inzibati xəta haqqında iş üzrə icraat aparılan şəxs X1 və Zərərçəkmiş şəxs iştirakları ilə, xx.xx.1985-ci ildə tarixdə Sabirabad rayonunda anadan olmuş, Azərbaycan Respublikası vətəndaşı, orta təhsilli, işləməyən, evli, Sabirabad rayonunun Qaralar kəndində qeydiyyatda olmaqla həmin rayonun Məmişlər kəndində yaşayan X1 barəsində Azərbaycan Respublikası İnzibati Xətalar Məcəlləsinin 332.4-cü maddəsi ilə Sabirabad Rayon Polis şöbəsindən daxil olmuş inzibati xəta haqqında protokola və protokol əsasında toplanmış materiala Sabirabad Rayon Məhkəməsinin inzibati binasında açıq məhkəmə iclasında baxaraq, məhkəmə MÜƏYYƏN ETDİ: Sabirabad Rayon Polis şöbəsindən daxil olmuş inzibati xəta haqqında protokola və protokol əsasında toplanmış materiala görə, X3 xx.xx.2023-cü ildə saat 15:00 radələrində Sabirabad şəhəri, Vüqar Əhmədov küçəsi istiqamətində «VAZ-21063» markalı **-DU-*** dövlət nömrə nişanlı avtomobili sürücülük hüququ olmadan idarə edərkən manevr etmə qaydalarını düzgün etmədiyi üçün qarşı zolaqda hərəkətdə olan Zərərçəkmiş şəxs idarə etdiyi «Hyundai-İX-35» markalı **-CF-*** dövlət nömrə nişanlı avtomobillə toqquşmaqla həmin avtomobilə maddi zərər vurmuşdur. Bununla da o, Azərbaycan Respublikası İnzibati Xətalar Məcəlləsinin 332.4-cü maddəsində nəzərdə tutulmuş inzibati xətanı törətmişdir. Məhkəmə iclasında iştirak edən barəsində inzibati xəta haqqında iş üzrə icraat aparılan şəxs X3 izahat verərək bildirdi ki, o, etibarnamə ilə «VAZ-21063» markalı **-DU-*** dövlət nömrə nişanlı avtomobili idarə edir. xx.xx.2023-cü il tarixdə qeyd edilən avtomobillə Sabirabad şəhəri, Vüqar Əhmədov küçəsi istiqamətində hərəkətdə olan «Hyundai-İX-35» markalı **-CF-*** dövlət nömrə nişanlı avtomobili ötmə aparmaq istəyərkən sola manevr etdikdə onu sağ hisssəsi ilə Zərərçəkmiş şəxs idarə etdiyi «Hyundai-İX-35» markalı **-CF-*** dövlət nömrə nişanlı avtomobillə toqquşmuş, hər iki avtomobil əzilmiş, lakin xəsarət alan olmamışdır. Hazırda əməlindən peşmandır. Zərərçəkmiş şəxslə barışıq əldə etmişdir. Ona dəymiş ziyanı tamamilə ödəmişdir. Özü ailəlidir, himayəsində 3 azyaşlı uşağı vardır. Arvadı iflic xəstəsidir. Söz verir ki, bundan sonra sürücülük hüququ əldə edənədək avtomobil idarə etməyəcəkdir. Ona görə də barəsində həbslə bağlı olmayan tənbeh tədbiri tətbiq edilməsini məhkəmədən xahiş edir. Məhkəmə iclasında iştirak edən Zərərçəkmiş şəxs izahat verərək bildirdi ki, onun «Hyundai-İX- 35» markalı **-CF-*** dövlət nömrə nişanlı avtomobil var. Belə ki, xx.xx.2023-cü ildə saat 15:00 radələrində Sabirabad şəhəri, Vüqar Əhmədov küçəsi istiqamətində hərəkətdə olan zaman sonradan adını bildiyi şəxs X3 idarə etdiyi «VAZ-21063» markalı **-DU-*** dövlət nömrə nişanlı avtomobillə düzgün istiqamət seçməyərək onun avtomobili ilə toqquşmuş və nəticədə ona maddi ziyan dəymişdir. Lakin bədən xəsarəti alan olmamışdır. Hazırda Haşim ona dəymiş ziyanı tam olaraq ödəmişdir. Ona görə də ona qarşı heç bir şikayəti və tələbi yoxdur. Barəsində yüngül tənbeh tədbiri tətbiq edilməsini məhkəmədən xahiş edir. İnzibati materiala yol-nəqliyyat hadisəsinin sxemi və Zərərçəkmiş şəxs idarə etdiyi avtomobilə dəymiş ziyanla bağlı rəy aktı əlavə edilmiş, məhkəmə qeyd edilən sübutları tədqiq etmişdir. Azərbaycan Respublikasının İXM-nin 332.4-cü maddəsinə əsasən, bu Məcəllənin 332.2-ci maddəsində nəzərdə tutulmuş xəta nəticəsində zərər çəkmiş şəxsin sağlamlığına yüngül bədən xəsarətinin yetirilməsinə və ya zərər çəkmiş şəxsə maddi zərər vurulmasına görə - dörd yüz manat məbləğində cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur. İnzibati tənbehin məqsədlərindən bəhs edən İXM-nin 22-ci maddəsinə əsasən inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikasının İXM-nin 9.1-ci maddəsinə görə inzibati xəta törətmiş şəxs haqqında tətbiq edilən tənbeh ədalətli, yəni inzibati xətanın xarakterinə, onun törədilməsi hallarına uyğun, qanuni və əsaslı olmalıdır. Həmin Məcəllənin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə Azərbaycan Respublikasının İXM-nin 32.1.1-ci maddəsinə əsasən barəsində inzibati xəta haqqında iş üzrə icraat aparılan X1 etirafedici izahatını, əməlindən peşman olmasını, himayəsində 3 azyaşlı uşağının olmasını, arvadının xəstə olmasını, zərərçəkmiş şəxslə barışmasını və ona dəymiş ziyanı ödəməsini inzibati xətaya görə məsuliyyəti yüngülləşdirən hal hesab edir. X1 əməlində İXM-nin 33-cü maddəsində göstərilən inzibati xətaya görə məsuliyyəti ağırlaşdıran hallar müəyyən edilmədi. Məhkəmə barəsində inzibati xəta haqqında iş üzrə icraat aparılan şəxs X2 qarşı inzibati tənbeh tətbiq edərkən xətanın xarakterini, təqsirinin dərəcəsini, şəxsiyyətini, dəymiş ziyanı ödəməsini, zərərçəkmiş şəxslə barışmasını, həmçinin onun izahatının məzmununu (ailə üzvlərinə dair hissədə) nəzərə alaraq barəsində inzibati qaydada həbs tənbeh tədbiri tətbiq edilməsini məqsədəmüvafiq hesab etmir. Göstərilənlərə əsasən və Azərbaycan Respublikasının İnzibati Xətalar Məcəlləsinin 31, 40,43, 48-51, 114, 128-130-cu maddələrini rəhbər tutaraq, məhkəmə QƏRARAALDİ: X3 Azərbaycan Respublikasının İnzibati Xətalar Məcəlləsinin 332.4-cü maddəsi ilə təqsirli bilinərək barəsində 400 (dörd yüz) manat miqdarında cərimə tənbeh tədbiri tətbiq edilsin. Qərarın surəti təqdim edildiyi və ya alındığı gündən 10 (on) gün müddətində Sabirabad Rayon Məhkəməsi vasitəsilə Şirvan Apellyasiya Məhkəməsinə şikayət və ya protest verilə bilər.