Sabirabad Rayon Məhkəməsi Qərar — İş №3(056)-843/2024

Azərbaycan Respublikası adından QƏRAR Sabirabad rayon İş № 3(056)-843/2024 24.05.2024 SABİRABAD RAYON MƏHKƏMƏSİ Hakim Allahverdiyev Səlim Məhərrəm oğlunun sədrliyi, Məsləhətçi (məhkəmə iclasının katibi) Quliyev Mətin Azər oğlunun katibliyi, İnzibati protokolu tərtib etmiş şəxs Sabirabad rayon X2 Təhlükəsizlik Bölməsinın sahə rəisi Rahim Şahkərəmovun, Barəsində inzibati xəta haqqında iş üzrə icraat aparılan şəxs Şəxs, Zərərçəkmiş şəxs iştirakları ilə, xx.xx.1962-ci il tarixdə Sabirabad rayonu, Əsədli kəndində anadan olmuş, Azərbaycan Respublikası vətəndaşı, evli, İ və İİ qrup əlil, Sabirabad rayonu, Əsədli kəndində qeydiyyatda olmaqla həmin kənddə yaşayan Şəxs Azərbaycan Respublikasının İnzibati Xətalar Məcəlləsinin 510-cu maddəsi ilə inzibati xəta törətməsinə dair Sabirabad Rayon Polis Şöbəsindən daxil olmuş inzibati xəta haqqında materiala Sabirabad Rayon Məhkəməsinin binasında açıq məhkəmə iclasında baxaraq, məhkəmə M Ü Ə Y Y Ə N E T D İ: Sabirabad Rayon Məhkəməsinə Sabirabad Rayon Polis Şöbəsindən Şəxs barəsində Azərbaycan Respublikası İnzibati Xətalar Məcəlləsinin 510-cu maddəsi ilə xx.xx.2024-cü il tarixli, MN ******* nömrəli protokol məhkəməyə daxil olmuşdur. Daxil olmuş protokola görə, Şəxs xx.xx.2024-cü il tarixdə Zərərçəkmiş şəxs söyüb təhqir etmişdir. Bununla da o, Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətmişdir. Məhkəmə iclası zamanı barəsində inzibati xəta haqqında icraat aparılan şəxs Şəxs izahat verərək özünü təqsirli bilməyərək bildirdi ki, Əsədli kənd məktəbində xadimə işləyir. Zərərçəkmiş şəxs məktəbin direktorudur. Rəsmiyyə xanım ona böhtan atır. Bunun da səbəbi onun əvvəllər bir neçə dəfə məktəbdəki nöqsanlar, qohumbazlıqlar barədə yuxarı orqanlara müraciət etməsidir. O, heç vaxt rəsmiyyə xanımı söyüb təhqir etməmişdir. Fevral ayında aralarında bir mübahisə olmuş, həmin mübahisəyə görə də o, məhkəmə tərəfindən cərimə edilmişdir. Bundan sonra o, heç bir şey etməmişdir. Rəsmiyyə xanım deyir ki, guya o, çəktəbin çölündə yerləşən ayaq yoluna gedən qadın müəllimələrin şəkillərini çəkir. Bu da yalandı. Məhkəmədən barəsində ədalətli qərar qəbul edilməsini xahiş edir. Məhkəmə iclasında zərərçəkmiş şəxs qismində dindirilmiş Zərərçəkmiş şəxs bildirdi ki, Şəxs onun direktoru olduğu məktəbdə xadimə işləyir. Ayaq yoluna gedən qadın müəllimələri telefonu ilə çəkir. O, mütəmadi olaraq məktəbdə fəaliyyət göstərən pedoqoji kollektivə qarşı qeyri-etik hərəkətlər edir, onu və digər məktəb kollrktivini söyüb təhqir edir, tədris prosesini pozur. Ona görə də o, Şəxs barəsində qanuni tədbir görülməsini məhkəmədən xahiş edir. Məhkəmə iclasında şahid qismində dindirilmiş X3 ifadəsində göstərdi ki, o, Əsədli kənd məktəbində coğrafiya müəllimi işləyir. xx.xx.2024-cü il tarixində məktəbin həyətində olarkən Əvəzağa onların şəklini çəkmiş, səbəbini soruşduqda əcəb etdiyini bildirmişdir. Əvəzağa gündə şikayətlər yazır. Buna görə məktəbə tez-tez yoxlamalar gəlir. xx.xx.2024-cü il tarixində o, bunun şahidi olmuşdur. Məhkəmə iclasında şahid qismində dindirilmiş X1 ifadəsində göstərdi ki, onun arvadı Əsədli məktəbində xadimə işləyir. O da tez-tez arvadına kömək etmək üçün məkətəb gedir. xx.xx.2024-cü il tarixində o, məktəbə arvadına kömək etməyə getmiş, Əvəzağanın müəllimlərin şəklini çəkməsini eşitmişdir. Bundan başqa, Əvəzağa 3 ay bundan əvvəl direktorun otağından çıxarkən söyüş söymüş, o, bunu eşidib ona irad bildirmişdir. Məhkəmə işdə iştirak edən şəxsləri və şahidləri dinləyib, inzibati xəta haqqında protokolu və ona əlavə olunmuş sənədləri araşdıraraq hesab edir ki, hazırki barəsində inzibati xəta haqqında iş üzrə icraat aparılan şəxsin əməlində ictimai qaydanın pozulması halı, yəni şəxsin xırda xuliqanlıq etməsi müəyyən edilməmişdir və araşdırma nəticəsində öz təsdiqini tapmamışdır. Belə ki, Azərbaycan Respublikasının İXM-in 510-cu maddəsi ilə ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə, həmin Məcəllənin 535.1-ci maddəsi ilə isə polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə inzibati məsulliyyət nəzərdə tutulmuşdur. Məhkəmə araşdırılması zamanı müəyyən olundu ki, barəsində inzibati xəta haqqında iş üzrə icraat aparılan şəxs Şəxs xx.xx.2024-cü il tarixində Zərərçəkmiş şəxs söyüb təhqir etməsi ilə əlaqədar onun əməlində inzibati xəta tərkibi olmasını təsdiq edəcək hər hansı sübut isə məhkəməyə təqdim edilməmişdir. Əksinə, şahid qismində dindirilmiş şəxslər də xx.xx.2024-cü il tarixdə belə hal olmasını ifadələrində bildirməmişlər. Beləliklə, məhkəmə araşdırmasının nəticəsi olaraq barəsində inzibati xəta haqqında iş üzrə icraat aparılan şəxs Şəxs əməlində İXM-nin 510-cu maddəsinin dispozisiyasında nəzərdə tutulmuş əsasların olması və mövcudluğu öz təsdiqini tapmamışdır. Qeyd edilməlidir ki, inzibati xətanın tərkibi hüquqla müəyyən edilmiş inzibati xətanın obyektindən, obyektiv cəhətindən, subyektindən və subyektiv cəhətindən ibarət elemetlər məcmusudur. İnzibati xətanın obyektiv cəhəti törədilən (törətdilmiş) inzibati xətanın xarici görünüşü və ya inzibati hüquq normaları ilə nəzərdə tutulan və inzibati xətanın xarici görünüşünü xarakterizə edən elementlər sistemidir. Bu elementlərin hər hansı birinin olmaması inzibati xətanın mövcudluğunu istisna edir. Şəxs istinad olunan İXM-nin 535.1-ci maddəsində nəzərdə tutulan inzibati xəta subyektiv cəhətdən düzünə qəsdlə, obyektiv cəhətdən fəal hərəkətlərdə ifadə olunmalıdır. Azərbaycan Respublikasının İXM-nin 12.1-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 8.1, 8.2 və 8.3-cü maddələrinə görə barəsində inzibati xəta haqqında iş üzrə icraat aparılan şəxsin təqsiri bu Məcəllə ilə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsiri olmayan hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində olan şübhələr onun xeyrinə həll olunur. Həmin Məcələnin 53.1.1 və 53.1.2-ci maddəsinə əsasən, inzibati xəta hadisəsi olmadıqda və inzibati xəta tərkibi olmadıqda olmadıqda inzibati xəta haqqında işlər üzrə icraat başlana bilməz, başlanmış icraata isə xitam verilir. Qeyd edilən normaların tələbləri baxımdan məhkəmə hesab edir ki, Azərbaycan Respublikasının İXM-nin 510-cu maddəsi üzrə Şəxs əməlində nə inzibati xəta hadisəsi, nə də inzibati xəta tərkibi mövcud deyildir. Odur ki, Şəxs barəsində Azərbaycan Respublikasının İXMnin 510-cu maddəsi ilə başlanmış inzibati xəta haqqında iş üzrə icraata xitam verilməlidir. Azərbaycan Respublikasının İXM-nin 114.2.1-ci maddəsinə əsasən, bu Məcəllənin 53-cü maddəsində nəzərdə tutulmuş hallardan hər hansı biri olduqda inzibati xəta haqqında iş üzrə icraata xitam verilməsi barədə qərar qəbul edilir. Göstərilənlərə əsasən və Azərbaycan Respublikası İnzibati Xətalar Məcəlləsinin 8, 12, 32, 33, 53, 114, 128-130-cu maddələrini rəhbər tutaraq, məhkəmə Q Ə R A R A A L D İ: Şəxs barəsində Azərbaycan Respublikasının İnzibati Xətalar Məcəlləsinin 510-cu maddəsi ilə başlanmış inzibati xəta haqqında iş üzrə icraata xitam verilsin. Qərarın surəti, təqdim edildiyi və ya alındığı gündən 10 (on) gün müddətində Sabirabad rayon məhkəməsi vasitəsilə Şirvan Apelyasiya məhkəməsinə şikayət və ya protest verilə bilər.