Sabirabad Rayon Məhkəməsi Qərar — İş №3(056)-850/2024

Azərbaycan Respublikası adından QƏRAR Sabirabad rayon İş № 3(056)-850/2024 27.05.2024 SABİRABAD RAYON MƏHKƏMƏSİ Hakim Allahverdiyev Səlim Məhərrəm oğlunun sədrliyi, Məhkəmə iclasının katibi Quliyev Mətin Azər oğlunun katibliyi, Barəsində inzibati xəta haqqında iş üzrə icraat aparılan şəxs Şəxs iştirakı ilə xx.xx.2001-ci ildə Sabirabad rayonunun Həşimxanlı kəndində anadan olmuş, Azərbaycan Respublikasının vətəndaşı, orta təhsilli, subay, fərdi qaydada taksi sürücüsü işləyən, Sabirabad rayonunun Həşimxanlı kəndində qeydiyyatda olmaqla həmin ünvanda yaşayan Şəxs barəsində Azərbaycan Respublikası İXM-in 334-1.1-ci maddəsi ilə Azərbaycan Respublikası DİN-nin Sabirabad Rayon Polis Şöbəsindən daxil olmuş inzibati xəta haqqında protokola və toplanmış materiala Sabirabad Rayon Məhkəməsinin inzibati binasında açıq məhkəmə iclasında baxaraq, məhkəmə Müəyyən etdi: Sabirabad Rayon Polis Şöbəsindən daxil olmuş inzibati xəta haqqında materiala görə, Şəxs xx.xx.2024-cü ildə saat 11:45 radələrində narkotik vasitənin təsiri altında «Kia Ceed minik» markalı ** YE *** dövlət nömrə nişanlı avtomobilli nəqliyyat vasitələrini idarə etmək hüququ olmadan idarə etmiş və bununla da Azərbaycan Respublikası İnzibati Xətalar Məcəlləsinin 334-1.1-ci maddəsində nəzərdə tutulmuş inzibati xətanı törətmişdir. Barəsində inzibati xəta haqqında iş üzrə icraat aparılan Şəxs izahat verərək bildirdi ki, o, narkotik vasitə olan marixuananı polis əməkdaşları tərəfindən saxlanılmasından bir neçə gün əvvəl qəbul etmiş, polis əməkdaşları tərəfindən saxlaılıb sənədləri yoxlanılarkən hərəkətlərində şübhəlilik hiss edib onu yoxlamadan keçirmişlər və narkotik vasitədən istifadə etmiş olması faktı öz təsdiqini tapmışdır. Hazırda əməlindən peşmandır. Hətta artıq sürücülük hüququ da əldə etmişdir. İlk dəfədir ki, inzibati xəta törədir. Atası vəfat etmişdir. Özü fərdi qaydada taksi sürücüsü işləməklə ailənin tələbatlarını qarşılayır. Himayəsində anası və bir bacısı vardır. Ailəyə yeganə qazanc gətirən şəxsdir. İdarə etdiyi avtomobili də icarə müqaviləsi əsasında əldə etmişdir və günlük icarə haqqı ödəyir. Məhkəmədən barəsində cərimə tənbehi tətbiq edilməsini xahiş edir. Belə ki, əgər barəsində inzibati qaydada həbs tənbeh tədbiri tətbiq edilərsə ailəsinin uzun müddət dolanacaq xərclərini qarşılamaq, həmçinin günlük icarə haqqını ödəyə bilməməklə avtomobili özündə saxlamaq imkanından məhrum olacaqdır. Bir daha bu cür hallara yol verməyəcək, narkotik qəbul etməyəcəkdir. Ona görə də o, məhkəmədən göstərdiyi xüsusatların nəzərə alınmasını xahiş edir. İş materiallarına X1 tibbi yoxlama sənədi əlavə edilmiş, həmin sənəddən müəyyən edilmişdir ki, Şəxs narkotik vasitə qəbul etmişdir. Şəxs İXM-in 334-1.1-ci maddəsi ilə nəzərdə tutulan inzibati xətanı törətməsi onun özünün etirafedici izahatı ilə yanaşı, barəsində tərtib olunmuş xx.xx.2024-cü il tarixli İXP ******* nömrəli protokolla, inzibati işin digər materialları ilə tam sübuta yetirilmişdir. İnzibati məsuliyyəti istisna edən və icraatı rədd edən hallar müəyyən edilmədi. Azərbaycan Respublikasının İXM-nin 334-1.1-ci maddəsinə görə Nəqliyyat vasitəsini idarə etmək hüququ olmayan şəxs tərəfindən nəqliyyat vasitəsinin narkotik vasitələrdən, psixotrop maddələrdən və ya güclü təsir edən digər maddələrdən istifadə olunması nəticəsində sərxoş vəziyyətdə idarə edilməsinə görə – səkkiz yüz manat məbləğində cərimə edilir və ya işin hallarına görə, pozuntunu törədənin şəxsiyyəti nəzərə alınmaqla on beş gündən bir ayadək müddətə inzibati həbs tətbiq olunur. Həmin Məcəllənin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə Azərbaycan Respublikasının İXM-nin 32-ci maddəsinə əsasən barəsində inzibati xəta haqqında iş üzrə icraat aparılan Şəxs etirafedici izahatını, əməlindən peşman olmasını, ailə vəziyyətini və ailəsinə yeganə qazanc gətirən şəxs olmasını inzibati xətaya görə məsuliyyəti yüngülləşdirən hal hesab edir. Şəxs əməlində İXM-nin 33-cü maddəsində göstərilən inzibati xətaya görə məsuliyyəti ağırlaşdıran hallar müəyyən edilmədi. Məhkəmə barəsində inzibati xəta haqqında iş üzrə icraat aparılan şəxs Şəxs qarşı inzibati tənbeh tətbiq edərkən xətanın xarakterini, təqsirinin dərəcəsini, şəxsiyyətini və yüngülləşdirici halları nəzərə alaraq ona cərimə növündə inzibati tənbeh verilməsini məqsədəmüvafiq hesab edir. Göstərilənlərə əsasən və Azərbaycan Respublikası İnzibati Xətalar Məcəlləsinin 31, 40, 43, 48-51, 114, 128-130-cu maddələrini rəhbər tutaraq, məhkəmə Q ə r a r a a l d ı: Şəxs Azərbaycan Respublikası İnzibati Xətalar Məcəlləsinin 334-1.1-ci maddəsi ilə təqsirli bilinib, 800 (səkkiz yüz) manat məbləğində cərimə edilsin. Qərarın icrası Sabirabad rayon İcra və Probasiya şöbəsinə həvalə edilsin. Qərarın surəti, təqdim edildiyi və ya alındığı gündən 10 (on) gün müddətində Sabirabad Rayon Məhkəməsi vasitəsilə Şirvan Apellyasiya Məhkəməsinə şikayət və ya protest verilə bilər.