Siyəzən Rayon Məhkəməsi Qərar — İş №3(059)-116/2021

Azərbaycan Respublikası adından QƏRAR Siyəzən Rayonu İş № 3(059)-116/2021 30.06.2021 SİYƏZƏN RAYON MƏHKƏMƏSİ Mən, Siyəzən Rayon Məhkəməsinin hakimi Ələkbərov Bəylər Ramiz oğlu, Barəsində inzibati xəta haqqında iş üzrə icraat aparılan şəxs Şəxs, Protokol tərtib etmiş vəzifəli şəxs, Siyəzən rayon icra və probasiya şöbəsinin böyük icra məmuru X1 iştirakları ilə xx xxxxxx 1987-ci ildə Siyəzən şəhərində doğulmuş, Azərbaycan Respublikasının vətəndaşı, subay, orta təhsilli, fərdi qaydada əmək fəaliyyəti ilə məşğul olan, ünvan 1 ünvanında qeydiyyatda olan, deməsinə görə Siyəzən rayonu, Yenikənd kəndində yaşayan Şəxs Azərbaycan Respublikası İnzibati Xətalar Məcəlləsinin (bundan sonra İXM-nin) 528.1-ci maddəsində müəyyən olunmuş inzibati xəta törətməsinə dair Siyəzən rayon icra və probasiya şöbəsindən daxil olmuş inzibati xəta haqqında materiala baxaraq, müəyyən etdim: Siyəzən rayon icra və probasiya şöbəsinin böyük icra məmuru X2 icra sənədi üzrə borclu Şəxs İXM-nin 528.1-ci maddəsi ilə inzibati məsuliyyətə cəlb olunması barədə protokol tərtib edərək baxılması üçün Siyəzən Rayon Məhkəməsinə təqdim etmişdir. Tərtib edilmiş inzibati protokoldan və iş materiallarından görünür ki, Şəxs dəfələrlə rəsmi və şifahi xəbərdarlıq olunmasına baxmayaraq, Siyəzən Rayon Məhkəməsinin 21 sentyabr 2016-cı il tarixli, 2(059)-842/2016 saylı və Bakı şəhəri Qaradağ Rayon Məhkəməsinin 21 noyabr 2019-cu il tarixli, 2(002)-2910/2019 saylı icra vərəqələrinə əsasən cəmi 4262 manat aliment borcunu Zərərçəkmiş şəxs ödəməkdən yayınır. Bu barədə Siyəzən rayon icra və probasiya şöbəsinin böyük icra məmuru X2 tərəfindən 30 iyun 2021-ci il tarixli, MN seriyalı, ******* nömrəli inzibati xəta haqqında protokol tərtib olunmuş və baxılması üçün Siyəzən Rayon Məhkəməsinə göndərilmişdir. Məhkəmə iclasında iştirak edən Siyəzən rayon icra və probasiya şöbəsinin böyük icra məmuru X2 tərtib etdiyi protokolun məzmununa uyğun, eyni məzmunlu izahat verərək bildirdi ki, Siyəzən Rayon Məhkəməsinin 21 sentyabr 2016-cı il tarixli, 2(059)-842/2016 saylı və Bakı şəhəri Qaradağ Rayon Məhkəməsinin 21 noyabr 2019-cu il tarixli, 2(002)- 2910/2019 saylı icra vərəqələri rayon icra və probasiya şöbəsinə daxil olduqdan sonra müvafiq qərarlarla icraata başlanılmış, borcluya icra sənədləri üzrə tələbi könüllü icra etməsi üçün dəfələrlə rəsmi və şifahi xəbərdarlıq olunmasına baxmayaraq, yuxarıda qeyd olunan icra sənədləri, borclu tərəfindən üzrsüz səbəbdən tam şəkildə icra edilməmiş, o cümlədən zərərçəkmiş şəxsə cüzi ödənişlər edilməklə, aliment borcunun böyük qismi ödənilməmiş qalmışdır. Hazırkı vaxta sözügedən icra sənədləri üzrə Şəxs 4262 manat məbləğində aliment borcu vardır və hazırda sonuncu həmin borcu ödəməkdən imtina edərək, bunu maddi imkanının olmaması, eləcə də daimi işləməməsi ilə izah edir. Bundan başqa, Şəxs zərərçəkmişin xeyrinə aliment ödənişləri etdiyini bildirməsinə baxmayaraq, bununla bağlı icra və probasiya şöbəsinə mötəbər sənəd və ya sübutlar təqdim olunmamışdır. Eyni zamanda, Şəxs borcunun ödənilməsi istiqamətində hər hansı bir əməli tədbir görmədən, uzun müddət icradan yayındığından barəsində axtarış elan edilmiş, habelə, sonuncu axtarışda olan şəxs kimi gətirilib icra və probasiya şöbəsinə təhvil verilmişdir. Odur ki, icra sənədləri üzrə üzərinə düşən öhdəlik borclu tərəfindən lazımınca icra olunmadığına görə barəsində İnzibati Xətalar Məcəlləsinin 528.1-ci maddəsinə əsasən inzibati protokol tərtib edilməklə müvafiq tədbir görülməsi üçün məhkəməyə təqdim etmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs özünü İXM-nin 528.1-ci maddəsi ilə təqsirli bilərək izahatında göstərdi ki, Siyəzən Rayon Məhkəməsinin 21 sentyabr 2016-cı il tarixli və Bakı şəhəri Qaradağ Rayon Məhkəməsinin 21 noyabr 2019-cu il tarixli icra vərəqələri üzrə olan 4262 manat məbləğində aliment borcunu ödəməmişdir. Belə ki, o, fərdi qaydada əmək fəaliyyəti ilə məşğul olmaqla, aylıq 250-300 manat qazanc əldə edərək, işlədiyi dövrdə hər ay az da olsa aliment ödənişlərini icra etmişdir. Lakin, o, bu ödənişləri Siyəzən rayon icra və probasiya şöbəsi vasitəsilə deyil, birbaşa olaraq zərərçəkmiş şəxsə vermişdir. Hazırda işləmədiyinə görə maddi imkanı ilə bağlı aliment borcunu bir dəfəyə ödəyə bilmir. Gələcəkdə imkanı olarsa, aliment borcunu ödəyəcəkdir. Bundan əlavə, son zamanlar zərərçəkmiş şəxs ona dəfələrlə zəng edərək, aliment borcunun ödənilməsini tələb edir, bu səbəbdən də keçmiş arvadının ondan şikayətçi olmasından xəbərdardır. Odur ki, törətdiyi əməli məqsədyönlü şəkildə etmədiyindən, həmçinin etdiyi əməldən səmimi peşmançılıq hissi keçirməsinin nəzərə alınaraq, barəsində həbslə bağlı olmayan inzibati tənbeh tətbiq edilməsini xahiş edir. Zərərçəkmiş şəxs inzibati xəta haqqında işə baxılmasının vaxtı və yeri barədə qanunla müəyyən olunmuş qaydada məlumat verilmiş, lakin, o, məhkəməyə gəlməmiş, işə baxılmasının təxirə salınması haqqında vəsatət verilməmişdir. İXM-nin 112.1.4-cü maddəsinə əsasən Zərərçəkmiş şəxs iştirakı olmadan işə baxılmasını mümkün hesab edirəm. İşdə olan sənədlərin surətlərindən görünür ki, Siyəzən Rayon Məhkəməsinin 21 sentyabr 2016-cı il tarixli, 2(059)-842/2016 saylı və Bakı şəhəri Qaradağ Rayon Məhkəməsinin 21 noyabr 2019-cu il tarixli, 2(002)-2910/2019 saylı icra sənədləri icra olunması üçün Siyəzən rayon icra və probasiya şöbəsinin icraatına daxil olmuş, həmin icra sənədləri üzrə icraata başlamaq haqqında qərarlar qəbul edilmiş və bu barədə borclu Şəxs tələblərin könüllü icrası haqqında bildirişlər ünvanlanmışdır. Qeyd edilən icra sənədləri 19 iyun 2020-ci il tarixli qərarla bir icraatda birləşdirilmiş, habelə 24 iyun 2021-ci il tarixdə borclu barədə axtarış elan edilmişdir. İşdə olan Zərərçəkmiş şəxs tərəfindən 30 iyun 2021-ci il tarixdə tərtib edilməklə, Siyəzən rayon icra və probasiya şöbəsinə ünvanlanmış ərizənin surətindən görünür ki, Siyəzən Rayon Məhkəməsinin 21 sentyabr 2016-cı il tarixli, 2(059)-842/2016 saylı və Bakı şəhəri Qaradağ Rayon Məhkəməsinin 21 noyabr 2019-cu il tarixli, 2(002)-2910/2019 saylı icra sənədləri üzrə borclu Şəxs ona 4262 manat aliment borcu vardır. Azərbaycan Respublikası Konstitusiyasının 129-cu maddəsinə əsasən, məhkəmənin qəbul etdiyi qərarlar dövlətin adından çıxarılır və onların icrası məcburidir. Azərbaycan Respublikası MPM-in 15.2-ci maddəsinə əsasən məhkəmələrin qanuni qüvvəyə minmiş qətnaməsi, qərardadı, qərarı, əmri bütün dövlət hakimiyyəti, yerli özünüidarə orqanları, onların vəzifəli şəxsləri, ictimai birliklər, siyasi partiyalar, həmkarlar ittifaqları, onların vəzifəli şəxsləri, həmçinin fiziki və hüquqi şəxslər üçün məcburidir, Azərbaycan Respublikasının bütün ərazisində hökmən icra olunmalıdır. Həmin Məcəllənin 15.3-cü maddəsinə əsasən, məhkəmə aktının icra olunmaması, habelə məhkəməyə digər hörmətsizlik halları qanunda nəzərdə tutulmuş məsuliyyətlə nəticələnir. İnzibati xəta haqqında protokolu tərtib etmiş şəxsin, barəsində inzibati xəta haqqında iş üzrə icraat aparılan şəxsin və zərərçəkmişin izahatlarını dinləyib, iş materiallarını araşdırıb, sübutlara məcmu halda hüquqi qiymət verərək hesab edirəm ki, Şəxs İXM-nin 528.1-ci maddəsində nəzərdə tutulmuş inzibati xətanı təqsirli olaraq törətməsi sübuta yetirilmişdir. Barəsində inzibati xəta haqqında iş üzrə icraat aparılan şəxsin səmimi peşmançılıq çəkməsi onun məsuliyyətini yüngülləşdirən hal kimi nəzərə alınır. Barəsində inzibati xəta haqqında iş üzrə icraat aparılan şəxsin məsuliyyətini ağırlaşdıran hallar müəyyən edilməmişdir. İnzibati xətanın xarakterini, inzibati xəta törədən şəxsin şəxsiyyətini, o cümlədən əvvəllər də idarəçilik qaydaları əleyhinə olan inzibati xətalar törətməklə, Siyəzən Rayon Məhkəməsinin 10 yanvar 2019-cu il tarixli, 3(059)-27/2019 saylı qərarı ilə barəsində Azərbaycan Respublikası İXM-nin 528.1-ci maddəsi ilə inzibati tənbeh tədbiri tətbiq edilməsinə baxmayaraq, öz təqsirli, hüquqazidd əməllərini davam etdirməsini, bununla da, tərbiyələnmək niyyətinin olmamasını, təqsirinin dərəcəsini, ailə və əmlak vəziyyətini, habelə onun məsuliyyətini yüngülləşdirən halın olmasını və ağırlaşdıran halların olmamasını nəzərə alaraq, onun İXM-nin 528.1-ci maddəsinin sanksiyasında nəzərdə tutulan həbs növündə tənbeh edilməsini qanuni, əsaslı və ədalətli hesab edirəm. Azərbaycan Respublikası İXM-nin 9.2-ci maddəsinə əsasən bir inzibati xətaya görə heç kim iki dəfə inzibati məsuliyyətə cəlb oluna bilməz. Uzanan inzibati xətaya görə şəxs inzibati məsuliyyətə cəlb olunduqdan sonra da bu xətanı törətməkdə davam edirsə, inzibati məsuliyyətə cəlb olunur. Göstərilənlərə əsasən və Azərbaycan Respublikası İnzibati Xətalar Məcəlləsinin 110- 115-ci maddələrini rəhbər tutaraq, qərara aldım: Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə təqsirli bilinsin və ona inzibati tənbeh olaraq 12 (on iki) gün müddətində həbs təyin olunsun. Şəxs məhkəmə iclas zalından dərhal həbs edilsin. Həbs etmənin əvvəli 30 iyun 2021-ci il tarixdən saat 18:00-dan hesablansın. Şəxs qərarın icrası ilə bağlı olaraq, saxlanılması üçün Azərbaycan Respublikası Daxili İşlər Nazirliyi Siyəzən rayon Polis Şöbəsinin müvəqqəti saxlama yerinə göndərilsin. Qərarın surəti təqdim edildiyi və ya alındığı gündən 10 (on) gün müddətində işə baxan Siyəzən rayon Məhkəməsi vasitəsilə Sumqayıt Apellyasiya Məhkəməsinə apellyasiya şikayəti və ya apelyasiya protesti verilə bilər. Hakim : Bəylər Ələkbərov