Sumqayıt Şəhər Məhkəməsi Qərar — İş №3(060)-1209/2021

Azərbaycan Respublikası adından QƏRAR Sumqayıt şəhəri İş № 3(060)-1209/2021 02.08.2021 SUMQAYIT ŞƏHƏR MƏHKƏMƏSİ Hakim Xəlilov Rövşən Elbrus oğlunun sədrliyi, Mansurov Elvin Vidadi oğlunun katibliyi ilə, «DİADEM” MMC-nin Azərbaycan Respublikası İnzibati Xətalar Məcəlləsinin 430.4cü maddəsi ilə təqsirləndirilməsinə dair Azərbaycan Respublikasının Mərkəzi Bankından daxil olmuş inzibati xəta haqqında materiala Sumqayıt şəhər Məhkəməsinin inzibati binasında açıq məhkəmə iclasında baxaraq, müəyyən etdi: Azərbaycan Respublikasının Mərkəzi Bankı tərəfindən «DİADEM” MMC barəsində inzibati xəta haqqında 31 mart 2021-ci il tarixli, MN № ******* saylı protokol tərtib edilmişdir ona görə ki, «DİADEM” MMC 182000.00 ABŞ dolları məbləğində olan vəsaiti ödəniş tapşırığına əsasən bank hesabından 14.03.2019-cu il tarixdə ölkədən kənara qabaqcadan ödəniş etməklə köçürmüşdür. Lakin ödənişin aparıldığı tarixdən 2 (iki) il artıq müddət keçməsinə baxmayaraq, 182000.00 ABŞ dolları məbləğində vəsait hesabına alınan malların ölkəyə idxalını təsdiq edən gömrük bəyannaməsini və ya idxal olunan xidmətlərin göstərilməsini təsdiq edən sənədi banka təqdim etməmiş və qabaqcadan ödənilmiş valyuta vəsaiti xaricdən geri qaytarılmamışdır. Buna görə də, «DİADEM” MMC barəsində inzibati tənbeh tətbiq etmə haqqında qərar qəbul edilməsi üçün İnzibati Xətalar Məcəlləsinin 430.4-cü maddəsi ilə məhkəməyə verilmişdir. Məhkəmə iclasının vaxtı və yeri barədə xəbərdar edilmiş Azərbaycan Respublikasının Mərkəzi Bankının və «DİADEM” MMC-nin nümayəndəsinin məhkəmə iclasında iştirakını təmin etmədiyindən, məhkəmə Azərbaycan Respublikası İnzibati Xətalar Məcəlləsinin 61.3-cü maddəsinə əsasən işə onların iştirakı olmadan baxılmasını mümkün hesab etmişdir. İş materiallarında olan barəsində inzibati xəta haqqında iş üzrə icraat aparılan şəxs «DİADEM” MMC-nin nümayəndəsi X1 izahatından görünür ki, Azərbaycan Respublikasının Mərkəzi Bankı tərəfindən «DİADEM” MMC barəsində inzibati xəta haqqında 31 mart 2021-ci il tarixli, MN № ******* saylı protokol tərtib olunaraq baxılması üçün Sumqayıt Şəhər Məhkəməsinə göndərilmişdir. Protokol əsassızdır. 14.03.2019-cu il tarixdə Şəxs MMC 182.000 ABŞ dolları məbləğində olan vəsaiti ölkədən kənara qabaqcadan ödəniş etməklə köçürmüşdür. Gömrük bəyannamələri ilə 182.000 ABŞ dolları dəyərində tikinti materialları Şəxs MMC-yə gəlmişdir. Lakin gömrük bəyannamələrində ödəniş kodu səhvən 120 kimi qeyd edilmişdir. Gömrük bəyənnamələrində olan ödəniş kodunun səhv yazılması ilə bağlı 27.02.2020-ci il tarixdə Bakı Baş Gömrük İdarəsinə sorğu göndərilsə də, həmin sorğuya cavab verilməmişdir. Bununla bağlı Bakı Baş Gömrük İdarəsinə rəsmi müraciət olunaraq həmin bəyannamələrdə yol verilmiş texniki səhvin düzəldilməsinə köməklik göstərilməsi xahiş edilmişdir. Burada qanunvericiliyin tələbləri pozulmuş, köçürmə sənədinə uyğun olaraq mallar müəyyən edilmiş müddətdə ölkəyə gətirilmişdir. İş üzrə zəruri olan sübutlar məhkəmə prosesində iştirakları təmin edilmədiyinə görə təqdim edilməmişdir. Bundan başqa, həmin vaxt qüvvədə olan inzibati qanunvericiliyin tələblərinə əsasən müqavilə əsasında ölkədən kənara köçürülmüş vəsaitin ödəniş aparıldığı gündən 270 gün keçdiyi halda Azərbaycan Respublikası İXM-nin 430.4cü maddəsinin tərkibi yaranır. İş materiallarından da görünür ki, ölkədən kənara qabaqcadan valyuta ödənişi, yəni 182.000 ABŞ dolları vəsaiti ödəniş tapşırığına əsasən Şəxs MMC-nin bank hesabından 14.03.2019-cu il tarixdə köçürülmüşdür. Bunları nəzərə alıb iş üzrə icraata xitam verilməsini məhkəmədən xahiş edir. Məhkəmə iş üzrə toplanmış materialları tədqiq edərək və araşdırılan sübutlara məcmu halda hüquqi qiymət verərək hesab edir ki, Azərbaycan Respublikasının Mərkəzi Bankının 31 mart 2021-ci il tarixli, MN № ******* saylı protokol ilə başlanılmış inzibati xəta haqqında icraata xitam verilməlidir. İş materiallarında olan 14.03.2019-cu il tarixli ödəniş tapşırığından görünür ki, 06 fevral 2019-cu il tarixli, 104/19 saylı müqavilə üzrə «DİADEM” MMC tərəfindən 182.000 ABŞ dolları məbləğində pul "xxxx" ASC vasitəsi ilə köçürülmüşdür. İş materiallarına əlavə edilmiş 17.04.2019-cu il tarixli gömrük bəyannaməsindən görünür ki, 06 fevral 2019-cu il tarixli, 104/19 saylı müqavilə üzrə «DİADEM” MMC ünvanına 315717,53 ABŞ dolları məbləğində mallar geri qaytarılmışdır. Azərbaycan Respublikası İnzibati Xətalar Məcəlləsinin 430.4-cü maddəsinə əsasən avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə-vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir. Azərbaycan Respublikası İnzibati Xətalar Məcəlləsinin 18.5-ci maddəsinə əsasən hüquqi şəxs barəsində inzibati tənbeh yalnız hakim tərəfindən tətbiq edilir. Azərbaycan Respublikası Mərkəzi Bankının 28 noyabr 2016-cı il tarixli 45/1 №li Qərarı ilə təsdiq edilmiş “Azərbaycan Respublikasının rezident və qeyri-rezidentlərinin xarici valyuta əməliyyatlarının aparılması Qaydaları”nın 4.3.1.3-cü bəndinə 20.02.2020-ci ildə dəyişiklik edilmiş və həmin dəyişiklik 28.02.2020-ci ildən qüvvəyə minmişdir. Həmin Qaydaların 4.3.1.3-cü bəndinə görə qabaqcadan ödəniş aparıldıqda banka ödənişin təyinatını, şərtlərini və məbləğini əks etdirən sənəd təqdim edilir. Qabaqcadan ödəniş müqabilində malların ölkəyə idxalını (xidmətlərin göstərilməsini) təsdiq edən gömrük bəyannaməsi (xidmətlərin göstərilməsini təsdiq edən sənəd) banka təqdim olunmalıdır və ya xeyrinə qabaqcadan ödənişin edildiyi şəxs və ya üçüncü şəxs tərəfindən qabaqcadan ödənilmiş məbləğ geri qaytarılmalıdır. Müvafiq sənədlər ödənişin aparıldığı gündən ən geci 2 (iki) il müddətində banka təqdim edilmədikdə və ya qabaqcadan ödənilmiş məbləğ geri qaytarılmadıqda və bu zaman idxal edilməyən malların (göstərilməyən xidmətlərin) və ya geri qaytarılmayan məbləğin qalıq dəyəri 10 000 (on min) ABŞ dolları ekvivalenti məbləğindən çox olduqda, bank tərəfindən qabaqcadan ödəniş əməliyyatına dair bütün sənədlər 5 (beş) iş günü ərzində Azərbaycan Respublikasının Mərkəzi Bankına təqdim edilir. Azərbaycan Respublikası İnzibati Xətalar Məcəlləsinin 53.0.2-ci maddəsinə əsasən inzibati xəta tərkibi olmadıqda inzibati xəta haqqında başlanılmış icraata xitam verilir. Həmin Məcəllənin 114.2.1-ci maddəsinə əsasən, bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Azərbaycan Respublikası İXM-nin 114.1.4-cü maddəsinə əsasən inzibati xəta haqqında iş üzrə icraata xitam verilməsi haqqında inzibati xəta haqqında işə baxılarkən qərar çıxarılır. Beləliklə, məhkəmə iş materiallarını araşdırıb hesab edir ki, 06 fevral 2019-cu il tarixli, 104/19 saylı müqavilə üzrə «DİADEM” MMC tərəfindən 182.000 ABŞ dolları məbləğində pul "xxxx" ASC vasitəsi ilə köçürülmüş, 17.04.2019-cu il tarixli gömrük bəyannaməsindən isə görünür ki, 06 fevral 2019-cu il tarixli, 104/19 saylı müqavilə üzrə «DİADEM” MMC ünvanına 315717,53 ABŞ dolları məbləğində mallar geri qaytarılmışdır. Ona görə də, Azərbaycan Respublikası İnzibati Xətalar Məcəlləsinin 53.1.2-ci maddəsinə əsasən inzibati xəta tərkibi olmadıqda iş üzrə icraata xitam verilməlidir. Yuxarıdakılara əsasən və Azərbaycan Respublikası İnzibati Xətalar Məcəlləsinin 53.1.7 və 114.2.1-ci maddələrini rəhbər tutaraq məhkəmə, qərara aldı: ünvan 1 ünvanında yerləşən «DİADEM” Məhdud Məsuliyyətli Cəmiyyəti barəsində Azərbaycan Respublikasının Mərkəzi Bankı tərəfindən tərtib edilmiş 31 mart 2021-ci il tarixli, MN № ******* saylı inzibati xəta haqqında protokola əsasən Azərbaycan Respublikası İnzibati Xətalar Məcəlləsinin 430.4-cü maddəsi ilə başlanmış inzibati xətaya dair iş üzrə icraata Azərbaycan Respublikası İnzibati Xətalar Məcəlləsinin 53.1.2-ci maddəsinə əsasən xitam verilsin. Qərarın surəti təqdim olunduğu və ya alındığı gündən 10 gün müddətində şikayət verilə bilər. Hakim Rövşən Xəlilov