Sumqayıt Şəhər Məhkəməsi Qərar — İş №3(060)-121/2024

Azərbaycan Respublikası adından QƏRAR Sumqayıt şəhəri İş № 3(060)-121/2024 13.01.2024 SUMQAYIT ŞƏHƏR MƏHKƏMƏSİ Hakim Abdullayev Emin Ağamusa oğlunun sədrliyi, Güliyeva Aytac İsrayıl qızının katibliyi, inzibati xəta haqqında protokolu tərtib etmiş şəxs Sumqayıt şəhər polis idarəsinin 2-ci polis bölməsinin sahə rəisi X1, barəsində inzibati xəta haqqında iş üzrə icraat aparılan şəxs Şəxs, müdafiəçi Sumqayıt Regional Vəkil Bürosunun vəkili Vəkil iştirakları ilə, xx.xx.1966-cı ildə, Naxçıvan Muxtar Respublikası, Şərur rayonu, Alışar kəndində doğulmuş, Azərbaycan Respublikasının vətəndaşı, subay, ünvan 1 ünvanında yaşayan Şəxs barəsində Azərbaycan Respublikası İnzibati Xətalar Məcəlləsinin 535.1-ci maddəsi ilə tərtib edilmiş Sumqayıt şəhər Polis İdarəsi 2-ci polis bölməsindən daxil olmuş inzibati xəta haqqında protokola və ona əlavə olunmuş materiallara Sumqayıt Məhkəmə Kompleksinin binasında açıq məhkəmə iclasında baxaraq, məhkəmə müəyyən etdi: Şəxs barəsində Azərbaycan Respublikası İnzibati Xətalar Məcəlləsinin 535.1-ci maddəsi ilə (bundan sonra İXM) 12 yanvar 2024-cü il tarixli, MN № ******* saylı inzibati xəta haqqında protokol tərtib olunmuşdur ona görə ki, xx.xx.2024-cü il tarixdə Kimyaçılar qəsəbəsi ərazisində sərxoş vəziyyətdə ünvansız nalayiq ifadələr işlətmiş, ona ictimai qaydanı pozmasını dayandırmağı dəfələrlə tələb edən polis əməkdaşlarının qanuni göstərişlərinə qəsdən tabe olmamışdır. Sumqayıt şəhər Polis İdarəsinin 2-ci polis bölməsi tərəfindən Şəxs barəsində toplanmış materiallar baxılmaq üçün Sumqayıt Şəhər Məhkəməsinə göndərilmiş və qeyd olunan materiallar 12 yanvar 2024-cü il tarixdə məhkəməyə daxil olmuşdur. İXM-in 111.3-cü maddəsinə görə inzibati həbs tənbeh növü nəzərdə tutan inzibati xətalar haqqında işlərə inzibati xəta haqqında protokola daxil olduğu gün baxılır. Barəsində inziabti xətaya dair iş üzrə icraat aparılan şəxs məhkəmə iclası təxirə salınarsa məhkəməyə videogörüntülər təqdim edəcəyini bildirdiyi üçün məhkəmə iclası xx.xx.2024-cü il tarixinə, saat 12:00-a təxirə salınmışdır. Məhkəmə iclasında Sumqayıt şəhər polis idarəsinin 2-ci polis bölməsinin sahə rəisi X2 tərtib etdiyi inzibati xəta haqqında protokola uyğun izahat verərək bildirdi ki, Sumqayıt şəhəri Kimyaçılar qəsəbəsi ərazisində ərazidə olarkən Şəxs sərxoş vəziyyətdə küçədə ünvansız nalayiq ifadələr işlətdiyini görmüşdür. O, həmin şəxsi sakitləşdirmək istəsə də, Şəxs onun tələbinə tabe olmamış və öz hərəkətlərini davam etdirmişdir. Bundan sonra o, tək olduğu üçün polis bölməsindən kömək çağırmış və bu zaman Şəxs həmin ərazini tərk etmişdir. O, digər polis əməkdaşı ilə birlikdə Şəxs yaşadığı ünvana gedərək onu polis bölməsinə gətirmişlər və protokol tərtib edilmişdir. Polis bölməsinə gətirilərkən Şəxs hər hansı tabesizlik göstərməyib. Videogörüntülərdə olan şəxs həqiqətən Şəxsdur. O, həmin vaxt polisin xidməti avtomobilində olmuşdur. Qeyd edilənlərə əsasən sahə rəisi məhkəmədən qanuna müvafiq qərar qəbul edilməsini xahiş etdi. Məhkəmə iclasında barəsində inzibati xəta haqqında iş üzrə icraat aparılan şəxs Şəxs özünü təqsirli bilməyərək bildirdi ki, o xx.xx.2024-cü il tarixində polisə hər hansı tabesizlik göstərməyib. O, hadisədən bir neçə gün əvvəl 102 xidmətinə zəng vurmuşdu. Çünki qonşusu olan narkotik vasitə aludəçisi olan şəxs onun qapısını döyüb narahat edirdi. Polis əməkdaşları həmin yerə gəlmiş və onunla birlikdə qonşusunun qapısını döymüşlər. Lakin, qonşusu evdə olmamışdır. xx.xx.2024-cü ildə isə polis əməkdaşları onun evinə gələrək polis bölməsinə dəvət etmişlər. O, polis əməkdaşlarının xidməti avtomobilinə əyləşərək polis bölməsinə getmişdir. Polis bölməsində onu inzibati qaydada həbs etmiş və bir gün saxlayaraq barəsində protokol tərtib edərək məhkəməyə gətirmişlər. Qeyd edilənlərə əsasən Şəxs iş üzrə icraata xitam verilməsini xahiş etdi. Məhkəmə iclasında müdafiəçi Sumqayıt Regional Vəkil Bürosunun vəkili Vəkil bildirdi ki, hüquqlarını müdafiə etdiyi şəxs xx.xx.2024-cü il tarixdə, saat 19:30 radələrində protokolun tərtib edildiyi məkanda deyil, evdə olmuşdur. Həmin vaxt polis əməkdaşları ona zəng edərək qapıya çıxmasını bildirmişlər. O da qapıya çıxaraq polis əməkdaşları ilə birlikdə könüllü olaraq 2-ci polis bölməsinə getmişdir. Video görüntüdən də göründüyü kimi polisə Şəxs tərəfindən tabesizlik göstərilməmişdir. Qeyd edilənlərə əsasən müdadiəçi Vəkil inzibati xəta haqqında işə xitam verilməsini xahiş etdi. İş materialında olan 11 yanvar 2024-cü il tarixli inzibati qaydada tutma haqqında protokoldan görünür ki, Şəxs 11 yanvar 2024-cü il tarixdə, saat 21:00-da inzibati qaydada tutulmuş və 12 yanvar 2024-cü il tarixdə, saat 14:00-da azad olunmuşdur. Məhkəmə barəsində inzibati xəta haqqında iş üzrə icraat aparılan şəxsi, protokolu tərtib etmiş şəxsi və müdafiəçini dinləyib və işdə olan materialları tədqiq edərək hesab edir ki, Şəxs İXM-in 535.1-ci maddəsində nəzərdə tutulmuş inzibati xətanı törətməsi sübuta yetirildiyi üçün o, həmin maddəsi ilə inzibati məsuliyyətə cəlb olunmalıdır. İXM-də göstərilmişdir ki, yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir (3). Bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ehtiyatsızlıqdan törədilən) və inzibati məsuliyyətə səbəb olan əməl (hərəkət və hərəkətsizlik) inzibati xəta hesab olunur (12.1). İnzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır (21). Məhkəmə inzibati xətaya görə tənbeh tətbiq edərkən İXM-in 31.2-ci maddəsinin tələblərinə uyğun olaraq xətanın xarakterini, inzibati xəta törətmiş şəxsin şəxsiyyətini, onun təqsirinin dərəcəsini, əmlak vəziyyətini, habelə məsuliyyəti yüngülləşdirən və ağırlaşdıran halları nəzərə alır. Məsuliyyəti yüngülləşdirən və ağırlaşdıran hallar müəyyən olunmadı. İnzibati tənbeh tətbiq edərkən məhkəmə xətaların xarakterini, Şəxs şəxsiyyətini, təqsirinin dərəcəsini və işin hallarını nəzərə alır və hesab edir ki, Şəxs İXM-in 535.1-ci maddəsinin sanksiyası həddində inzibati cərimə növündə inzibati tənbeh tətbiq edilməlidir. İXM-də göstərilmişdir ki, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yalnız yuxarı həddi müəyyən edildikdə, tətbiq edilən inzibati tənbeh onun yuxarı həddinin dörddə birindən az ola bilməz (31.4. ). İnzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz (31.4-1.). Məhkəmə hesab edir ki, Şəxs 200 manat inzibati cərimə tətbiq edilməli, inzibati qaydada tutulduğu 1 gün müddət nəzərə alınmaqla üzərində qəti olaraq 50 manat cərimə saxlanmalıdır. “Müdafiəçilərə, tərcüməçilərə, mütəxəssislərə və ekspertlərə ödənilməli olan məbləğlərin miqdarı haqqında” Azərbaycan Respublikası Nazirlər Kabinetinin 01 fevral 2001-ci il tarixli 31 saylı qərarına (xx.xx.2018-ci il tarixli 202 saylı qərarı ilə edilmiş dəyişikliklərlə) müvafiq olaraq Azərbaycan Respublikası Cinayət Prosessual Məcəlləsinin 193.2-ci maddələri ndə nəzərdə tutulmuş hallarda hüquqi yardımın göstərilməsinə görə müdafiəçiyə ödənilən haqq hər iş saatı üçün 6 (altı) manat miqdarında müəyyən edilmişdir. Göstərilən hüquqi yardıma görə cəmi 24 manat pul dövlət büdcəsindən tutularaq Sumqayıt Regional Vəkil Bürosunun hesabına köçürülməlidir. Yuxarıda göstərilənlərə əsasən və İXM-nin 114-115, 117, 128-130-cu maddələrini rəhbər tutaraq, məhkəmə qərara aldı: Şəxs Azərbaycan Respublikası İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanın törədilməsində təqsirli bilinsin və o, 200 (iki yüz) manat məbləğində cərimə olunsun. Şəxs inzibati qaydada tutulduğu 1 (bir) gün müddət nəzərə alınsın və ona təyin edilmiş cərimə cəzası yüngülləşdirilsin və üzərində qəti olaraq 50 (əlli) manat məbləğində inzibati cərimə saxlansın. Şəxs Sumqayıt Regional Vəkil Bürosunun vəkili Vəkil göstərdiyi 04 saat hüquqi yardımın ödənilməsi Azərbaycan Respublikası dövlət büdcəsi vəsaiti hesabına həyata keçirilsin. Göstərilən hüquqi yardıma görə cəmi 24 (iyirmi dörd) manat dövlət büdcəsindən tutularaq Sumqayıt Regional Vəkil Bürosunun hesabına köçürülsün. Qərarın surəti təqdim edildiyi və ya alındığı gündən 10 (on) gün müddətində Sumqayıt Şəhər Məhkəməsi vasitəsi ilə Sumqayıt Apellyasiya Məhkəməsinə şikayət və ya protest verilə bilər. Hakim Emin Abdullayev