Sumqayıt Şəhər Məhkəməsi Qərardad — İş №3(060)-1567/2021

Azərbaycan Respublikası adından QƏRARDAD Sumqayıt şəhəri İş № 3(060)-1567/2021 28.04.2021 SUMQAYIT ŞƏHƏR MƏHKƏMƏSİ X1 Məmmədov icraatımda olan Şəxs barəsində Azərbaycan Respublikası İnzibati Xətalar Məcəlləsinin 211.1-ci maddəsində nəzərdə tutulan inzibati xətanı törətməsinə dair Sumqayıt şəhər polis idarəsinin 1-ci polis bölməsindən məhkəməyə daxil olmuş 28 aprel 2021-ci il tarixli MN ******* №li inzibati xəta haqqında protokola və ona əlavə olunmuş sənədlərə baxaraq müəyyən etdim: Şəxs barəsində Sumqayıt şəhər polis idarəsinin 1-ci polis bölməsinin sahə rəisi polis kapitanı M.Cabbarov tərəfindən Azərbaycan Respublikası İnzibati Xətalar Məcəlləsinin 211.1-ci maddəsi ilə 28 aprel 2021-ci il tarixli MN ******* №li inzibati xəta haqqında protokol tərtib olunmuşdur ona görə ki, Şəxs 10-cu mikrarayon ərazisində yerləşən “xxxx” MMC hazırlıq kursunda karantin rejimi qaydalarını pozmuşdur. İnzibati xəta haqqında protokolu və ona əlavə olunmuş sənədləri nəzərdən keçirərək hesab edirəm ki, protokol və ona əlavə olunmuş sənədlər İnzibati Xətalar Məcəlləsinin 106.0.3 və 109.1.6-cı maddələrinin tələbinə əsasən onu tərtib etmiş orqana geri qaytarılmalıdır. Məhkəmə qeyd edir ki, Şəxs barəsində tərtib olunmuş inzibati xəta haqqında protokolda Şəxs karantin rejimi qaydalarını pozması ümumi sözlərlə qeyd edilsə də, inzibati xətanın mahiyyətinin konkret olaraq nədən ibarət olması, Şəxs tərəfindən konkret olaraq karantin rejimi qaydalarının hansı qaydada pozulması halları protokolda qeyd edilməmiş, həmçinin bu hallarla bağlı konkret sübutlar materiala əlavə edilməmiş, bundan başqa inzibati xəta haqqında protokolda İnzibati Xətalar Məcəlləsinin 100-cü maddəsinin tələbinə zidd olaraq inzibati xətanın törədildiyi vaxt göstərilməmişdir. İnzibati xəta haqqında işin baxılmağa hazırlanmasını müəyyən edən İnzibati Xətalar Məcəlləsinin 106.0.3-cü madəsinə əsasən hakim inzibati xəta haqqında protokol və işin digər materiallarının bu Məcəllənin tələblərinə müvafiq olaraq tərtib edilib-edilməməsini yoxlayır. Həmin məcəllənin 109.1.6-ci maddəsinə əsasən protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılmasına dair qərar qəbul edilir. Qanunvericiliyin yuxarıda göstərilən tələblərinə əsasən hazırkı iş üzrə inzibati xəta haqqında protokol və ona əlavə olunan sənədlər İnzibati Xətalar Məcəlləsinin tələblərinə cavab vermədiyindən həmin protokol və ona əlavə olunmuş sənədlər onu tərtib edən orqana geri qaytarılmalıdır. Yuxarıda göstərilənlərə və Azərbaycan Respublikası İnzibati Xətalar Məcəlləsinin 100, 106, 109-cu maddələrinə əsasən, məhkəmə qərara aldı: Şəxs Azərbaycan Respublikası İnzibati Xətalar Məcəlləsinin 211.1-ci maddəsində nəzərdə tutulan inzibati xətanı törətməsinə dair Sumqayıt şəhər polis idarəsinin 1-ci polis bölməsindən məhkəməyə daxil olmuş 28 aprel 2021-ci il tarixli MN ******* №li inzibati xəta haqqında protokol və ona əlavə olunmuş sənədlər Sumqayıt şəhər polis idarəsinin 1-ci polis bölməsinə geri qaytarılsın. Hazırkı qərardaddan şikayət verilməsi İnzibati Xətalar Məcəlləsində nəzərdə tutulmamışdır. Hakim: Elçin Məmmədov