Sumqayıt Şəhər Məhkəməsi Qərar — İş №3(060)-1983/2021

Azərbaycan Respublikası adından QƏRAR Sumqayıt şəhəri İş № 3(060)-1983/2021 08.06.2021 SUMQAYIT ŞƏHƏR MƏHKƏMƏSİ Hakim Hacıyev Pərviz Əhməd oğlunun sədrliyi, Məsləhətçi (məhkəmə iclas katibi) Oruczadə Urfan Eynur oğlunun katibliyi, İnzibati xəta haqqında protokolu tərtib etmiş şəxs - Sumqayıt şəhəri 3-cü PB-nin sahə rəisi, polis leytenantı X1, Barəsində inzibati xəta haqqında iş üzrə icraat aparılan şəxs - Şəxs, Sumqayıt şəhər 1 saylı Vəkil Bürosunun vəkili Vəkil iştirakları ilə, xx.xx.1986-cı il təvəllüdlü, Azərbaycan Respublikasının vətəndaşı, ünvan 1 ünvanında yaşayan Şəxs Azərbaycan Respublikasının İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanı törətməsinə dair Sumqayıt şəhər Polis İdarəsinin 3-cü Polis Bölməsindən daxil olmuş inzibati xəta haqqında materiala açıq məhkəmə iclasında baxaraq, məhkəmə Müəyyən etdi : Vətəndaş Şəxs barəsində 08.06.2021-ci il tarixli MN ******* saylı inzibati xəta haqqında protokol tərtib olunmuşdur ona görə ki, o, 08.06.2021-ci il tarixdə Sumqayıt şəhəri, 6-cı mikrorayon ərazisində yol patrul xidməti əməkdaşının qanuni tələbinə tabe olmamışdır. Bununla da, Şəxs Azərbaycan Respublikası İXM-nin 535.1-ci maddəsində nəzərdə tutulan inzibati xətanı törətmişdir. Şəxs barəsində tərtib olunmuş inzibati xəta haqqında protokol və ona əlavə edilmiş sənədlər aidiyyəti üzrə Sumqayıt şəhər Məhkəməsinə göndərilmiş və 08.06.2021-ci il tarixdə Məhkəməyə daxil olmuşdur. İnzibati xəta haqqında protokolu tərtib etmiş şəxs Sumqayıt şəhəri 3-cü PB-nin sahə rəisi X2 məhkəmə iclasında çıxış edərək bildirdi ki, 08.06.2021-ci il tarixdə polis bölməsinə raport daxil olmuşdur. Belə ki 08.06.2021-ci il tarixdə Sumqayıt şəhəri, Ü.Hacıbəyov küçəsində Hyundai markalı **-AF-*** dövlət qeydiyyat nişanlı avtomaşının sürücüsü sükan arxasında mobil telefonu əldə saxlamaqla ondan istifadə etdiyi üçün polis əməkdaşları tərəfindən saxlanılmış, yoxlama zamanı sürücünün etibarnaməsinin müddətinin bitməsi və ödənilməyən cərimələrinin olduğu məlum olmuşdur. Polis əməkdaşları sürücüyə avtomaşının duracağa təmin olunacağını bildirmiş, sürücü isə avtomaşının açarını təqdim etməyib tabesizlik göstərmişdir. Sürücünü nizam-intizama dəvət etməyə baxmayaraq o, tabesizlik göstərmiş, öz hərəkətlərini davam etdirmişdir. Buna görə də həmin şəxs aidiyyəti üzrə 3-cü polis bölməsinə təmin edilmişdir. Məlum olmuşdur ki, həmin şəxs vətəndaş Şəxsdur. Odur ki, Şəxs barəsində qanunamüvafiq tədbir görülməsini Məhkəmədən xahiş etdi. Barəsində inzibati xəta haqqında protokol tərtib edilmiş Şəxs məhkəmə iclasında izahatında göstərdi ki, 08.06.2021-ci il tarixdə Sumqayıt şəhəri, Ü.Hacıbəyov küçəsində Hyundai markalı **-AF-*** dövlət qeydiyyat nişanlı avtomobil ilə hərəkətdə olan zaman sükan arxasında mobil telefonu əlində saxlamaqla ondan istifadə etdiyi üçün yol patrul xidməti əməkdaşları tərəfindən saxlanılmış, yoxlama zamanı etibarnaməsinin müddətinin 07.06.2021-ci il tarixdə bitdiyi məlum olmuşdur. Buna görə də avtomobilin duracağa təmin olunacağı bildirilmiş, o isə avtomaşında ailə üzvlərinin də olduğunu bildirmişdir. Buna görə də polis əməkdaşı ona evə qədər onları müşayiət etməyi təklif etmişdir. O da razılaşmışdır. Bundan sonra o, avtomobilin cərimə meydançasına aparılması üçün evakuator tələb etmişdir. Lakin polis əməkdaşı hadisə yerinə post-patrul xidməti əməkdaşlarını çağıraraq onu avtomobilə əyləşdirib aidiyyəti üzrə 3-cü polis bölməsinə aparmışlar. Odur ki, barəsində inzibati xətaya dair iş üzrə icraata xitam verilməsini Məhkəmədən xahiş edir. Məhkəmə iclasında çıxış edən şahid Sumqayıt şəhər Pİ-nin DYPŞ-nin YPX inspektoru, polis leytenantı X3 izahatında göstərdi ki, 08.06.2021-ci il tarixdə Sumqayıt şəhəri, Ü.Hacıbəyov küçəsində xidmət apararkən Hyundai markalı **-AF-*** dövlət qeydiyyat nişanlı şirkət avtomaşının sürücüsü sükan arxasında mobil telefonu əlində saxlamaqla ondan istifadə etdiyi üçün tərəfindən saxlanılmış, yoxlama zamanı sürücünün etibarnaməsinin müddətinin bitdiyi, ödənilməyən cərimələrinin olduğu, yol vərəqəsinin də olmadığı məlum olmuşdur. Sürücüyə avtomaşının duracağa təmin olunacağı bildirmiş, sürücü isə avtomaşında ailə üzvlərinin də olduğunu bildirmişdir. Buna görə də ona evə qədər onları müşayiət etməyi təklif etmişdir. Sürücünü ünvana qədər müşayiət etmişdir. Lakin sürücü avtomaşının açarını təqdim etməyib tabesizlik göstərmiş, evakuator tələb etmişdir. O isə evakuatorun çağırılmasına belə razı olaraq polis əməkdaşının avtomobili cərimə meydançasına aparmaq hüququ olduğunu bildirərək sürücünü nizam-intizama dəvət etməyinə baxmayaraq sonuncu avtomobilin açarını təqdim etməyib tabesizlik göstərmişdir. Buna görə də hadisə yerinə post-patrul xidməti əməkdaşları çağırılaraq həmin şəxs aidiyyəti üzrə 3-cü polis bölməsinə təmin edilmişdir. Məlum olmuşdur ki, həmin şəxs vətəndaş Şəxsdur. Məhkəmə iclasında çıxış edən barəsində inzibati xəta haqqında iş üzrə icraat aparılan şəxs Şəxs müdafiəçisi Vəkil hüquqlarını müdafiə etdiyi şəxs barəsində inzibati xətaya dair iş üzrə icraata xitam verilməsini Məhkəmədən xahiş etdi. İş materiallarını araşdıraraq, inzibati protokol tərtib etmiş şəxsi, inzibati xəta törətmiş şəxsi, şahidi və müdafiəçini dinləyərək və işin bütün hallarının məcmusuna hərtərəfli, tam və obyektiv qiymət verərək Məhkəmə hesab edir ki, Şəxs əməlində Azərbaycan Respublikası İXM-nin 535.1-ci maddəsində nəzərdə tutulan inzibati xətanın tərkibi vardır. Belə ki o, polis əməkdaşının qanuni tələbinə baxmayaraq avtomobilin açarını təqdim etməkdən imtina etmişdir. Azərbaycan Respublikasının İnzibati Xətalar Məcəlləsinin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görəfiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Məhkəmə hesab edir ki, Şəxs təqsirli bilindiyi AR İXM-nin 535.1-ci maddəsinin sanksiyası çərçivəsində inzibati tənbeh tətbiq edilməlidir. İnzibati xəta törətmiş şəxs Şəxs məsuliyyətini ağırlaşdıran və yüngülləşdirən hal müəyyən edilmədi. Beləliklə, Məhkəmə, törədilmiş inzibati xətanın ağırlığını və inzibati xəta törətmiş şəxsin şəxsiyyətini, əməlindən peşman olmasını nəzərə alaraq hesab edir ki, Şəxs barəsində cərimə növündə inzibati tənbeh tədbiri tətbiq olunmalıdır. Həmin Məcəllənin 21-ci maddəsindən görünür ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İXM-nin 66.2-ci maddəsinə əsasən barəsində inzibati xəta haqqında iş üzrə icraat aparılan şəxs tərəfindən seçilmiş vəkilin gəlməsi mümkün olmadıqda, hakim, səlahiyyətli orqan (vəzifəli şəxs) həmin şəxsi vəkil ilə təmin edir. Azərbaycan Respublikası İXM-nin 66.3-ci maddəsinə əsasən maddi vəziyyətinə görə öz hesabına vəkil tutmaq imkanı olmadıqda, inzibati qaydada tutulmuş şəxsə hüquqi yardım dövlətin vəsaiti hesabına göstərilir. Belə halda vəkil öz vəzifələrini yerinə yetirməkdən imtina edə bilməz. “Müdafiəçilərə, tərcüməçilərə, mütəxəssislərə və ekspertlərə ödənilməli olan məbləğlərin miqdarı haqqında” Azərbaycan Respublikası Nazirlər Kabinetinin 2001-ci il 1 fevral tarixli 31 nömrəli qərarında dəyişiklik edilməsi barədə 03 may 2018-ci il tarixli, 202 saylı qərarına əsasən Azərbaycan Respublikası CPM-nin 193.2-ci maddəsində nəzərdə tutulmuş hallarda hüquqi yardım göstərilməsinə görə müdafiəçiyə ödənilən haqq hər iş saatı üçün 06 manat məbləğində müəyyən edilmişdir. Yuxarıda göstərilənlərə əsasən və İXM-nin 43, 114,115 və 535.1-ci maddələrini rəhbər tutatarq, məhkəmə Qərara aldı : Şəxs Azərbaycan Respublikasının İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanın törədilməsində təqsirli bilinib, 200 (iki yüz) manat məbləğində edilsin. Qərarın icrası Bakı şəhəri, Binəqədi rayonu üzrə İcra İdarəsinə həvalə edilsin. Sumqayıt 1 saylı Vəkil Bürosunun vəkili Vəkil göstərdiyi 03 (üç) saat hüquqi yardımın ödənilməsi Azərbaycan Respublikası dövlət büdcəsi vəsaiti hesabına həyata keçirilsin. Göstərilən hüquqi yardıma görə cəmi 18 (on səkkiz) manat dövlət büdcəsindən tutularaq Sumqayıt 1 saylı Vəkil bürosunun “xxxx” ASC-nin Sumqayıt filialında olan hesabına köçürülsün: “Kapital Bank” 1 saylı Sumqayıt filialı, hesab AZ09AİİB******************** VÖEN ********** Qərarın surəti təqdim edildiyi və ya alındığı gündən 10 gün müddətinə Sumqayıt Şəhər Məhkəməsi vasitəsi ilə Sumqayıt Apelyasiya Məhkəməsinə apelyasiya şikayəti verilə bilər. HAKİM: Pərviz Hacıyev