Sumqayıt Şəhər Məhkəməsi Qərar — İş №3(060)-2003/2023

Azərbaycan Respublikası adından QƏRAR Sumqayıt şəhəri İş № 3(060)-2003/2023 18.08.2023 SUMQAYIT ŞƏHƏR MƏHKƏMƏSİ Hakim Xəlilov Rövşən Elbrus oğlunun sədrliyi, Aslanova İradə Allahverdi qızının katibliyi, Barəsində inzibati xəta haqqında icraat aparılan şəxs Şəxs Çingiz oğlunun iştirakı ilə, xx.xx.2002-ci ildə Sumqayıt şəhərində anadan olmuş, Azərbaycan Respublikasının vətəndaşı, orta təhsilli, subay, ünvan 1 ünvanda yaşayan Şəxs Çingiz oğlu barəsində Sumqayıt şəhər Polis İdarəsinin 1-ci Polis Bölməsindən daxil olmuş inzibati xəta haqqında materiala baxaraq, müəyyənetdi: Sumqayıt Şəhər Polis İdarəsinin 1-ci Polis Bölməsindən daxil olmuş xx.xx.2023-cü il tarixli MN ******* №-li inzibati xəta haqqında protokola əsasən Şəxs Çingiz oğlu xx.xx.2023-cü il tarixdə saat 21:50 radələrində Sumqayıt şəhəri, 48-ci məhəllə ərazisində uca səslə danışaraq ictimai qaydanı pozmuş, xəbərdarlıq olunsa da, öz hərəkətlərinə davam edərək tabesizlik etmişdir. Bununla da, Şəxs Çingiz oğlu Azərbaycan Respublikası İXM-nin 535.1-ci maddəsində nəzərdə tutulan inzibati xətaya yol vermişdir. Məhkəmədə barəsində inzibati xəta haqqında iş üzrə icraat aparılan şəxs Şəxs Çingiz oğlu özünü qismən təqsirli bilərək bildirdi ki, xx.xx.2023-cü il tarixdə saat 21:50 radələrində dostu ilə mopedlə hərəkətdə olan zaman “Opel” markalı avtomaşınla toqquşmuşlar, onlar yerə yıxılmışlar və o, içkili olduğu üçün aralarında mübahisə yaranmışdır. Bu zaman həmin əraziyə PPX əməkdaşları yaxınlaşmış, onlara şikayətlərinin və mopedin sənədlərinin olub-olmamasını soruşmuşlar. Sonra PPX əməkdaşları YPX əməkdaşlarına məlumat vermişlər, onlar hadisə yerinə gəlmişlər və mopedin sənədlərini yoxlayıb nöqsan aşkar etdikləri üçün evakoatr çağıraraq mopedi cərimə dayanacağına apardılar. Həmin vaxt o mobil telefonu ilə mopedi videoya çəkməyə başlamış, YPX əməkdaşları onları çəkməməyi ona bildirmiş, o da onları çəkmədiyini, mopedi çəkdiyini bildirmişdir. Polis əməkdaşları onu PB-nə apardılar. Bildirir ki, o, polis əməkdaşlarına qarşı tabesizlik etməmişdir. Əməlindən peşman olmasını və bir daha belə hərəkətlərə yol verməyəcəyini nəzərə alaraq barəsində yüngül inzibati tənbeh tədbiri tətbiq edilməsini məhkəmədən xahiş etdi. Məhkəmə iclasında iş üzrə şahid qismində dindirilmiş Sumqayıt ŞPİ-nin DYPŞ-nin yol patrul xidməti inspektoru, polis serjantı X2 bildirdi ki, xx.xx.2023-cü il tarixdə saat 21:50 radələrində xidmətdə olan zaman efir vasitəsilə 91:09 çağırışlı post patrul maşını Qartal tikinti şirkətinin qarşısında yol nəqliyyat hadisəsi olduğunu bildirdi. O hadisə yerinə yaxınlaşmış, “Opel” markalı avtomaşınla mopedin toqquşduğu üçün sənədləri araşdırdıqları zaman qıraqdan tanımadıqları vətəndaş xidmətlərinə müdaxilə edərək telefon vasitəsilə xidmətlərini çəkərək uca səslə nalayiq sözlər işlədərək onların xidmətini pozmuş, həmin vətəndaşa yaxınlaşaraq xidmətlərinə maneçilik törətməməsi barədə dəfələlərlə xəbərdarlıq etmələrinə baxmayaraq o tabesizlik göstərərək əməllərini davam etdirmişdir. Həmin vaxt vətəndaşdan kəskin spirtli içki iyi gəlirdi. Bu zaman həmin vətəndaş avtopatrul maşını ilə PB-nə təhvil verilmişdir. İş materiallarında olan A/1477 №-li, xx.xx.2023-cü il tarixli sərxoşluq hallarının bütün növlərinin təyini məqsədi ilə aparılan tibbi müayinə protokolundan görünür ki, X1 müayinə vaxtı (xx.xx.2023-cü il, saat 23:20-də) orta dərəcəli sərxoşluq aşkar edilmişdir. İş materiallarında olan xx.xx.2023-cü il tarixli inzibati qaydada tutma haqqında protokoldan görünür ki, Şəxs Çingiz oğlu xx.xx.2023-cü il tarixdə saat 23:50 radələrində tutulmuş, xx.xx.2023-cü il tarixdə saat 15:00 radələrində azad olunmuşdur. Məhkəmə barəsində inzibati xəta haqqında iş üzrə icraat aparılan şəxsin izahatını, şahidin ifadəsini dinləyərək və işdə olan materialları tədqiq edərək hesab edir ki, Şəxs Çingiz oğlunun Azərbaycan Respublikası İXM-nin 535.1-ci maddəsində nəzərdə tutulmuş inzibati xətanı törətməsi tam təsdiq edilir, o, həmin maddə ilə təqsirli bilinib barəsində inzibati tənbeh tətbiq edilməlidir. Məhkəmə inzibati xətaya görə tənbeh tətbiq edərkən xətanın xarakterini, inzibati xəta törətmiş şəxsin şəxsiyyətini, onun təqsirinin dərəcəsini, əmlak vəziyyətini, habelə məsuliyyəti yüngülləşdirən və ağırlaşdıran halları nəzərə alır. Məsuliyyəti yüngülləşdirən və ağırlaşdıran hallar aşkar olunmadı. Azərbaycan Respublikası İXM-nin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Həmin Məcəllənin 12-ci maddəsinə görə bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ehtiyatsızlıqdan törədilən) və inzibati məsuliyyətə səbəb olan əməl (hərəkət və hərəkətsizlik) inzibati xəta hesab olunur. Bu Məcəllənin Xüsusi hissəsində nəzərdə tutulan əməllərə görə inzibati məsuliyyət o halda yaranır ki, bu əməllər cinayət məsuliyyətinə səbəb olmasın. Həmin Məcəllənin 21-ci maddəsinə əsasən inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Beləliklə, məhkəmə işin hallarını, barəsində inzibati xəta haqqında iş üzrə icraat aparılan şəxsin izahatını dinləyib, iş materialları ilə birlikdə qiymətləndirərək hesab edir ki, Şəxs Çingiz oğlu xx.xx.2023-cü il tarixdə saat 21:50 radələrində Sumqayıt şəhəri, 48-ci məhəllə ərazisində uca səslə danışaraq ictimai qaydanı pozmuş, xəbərdarlıq olunsa da, öz hərəkətlərinə davam edərək tabesizlik etmişdir. Onun təqsiri işdə olan sübutlarla təsdiq edilir, əməli düzgün olaraq Azərbaycan Respublikası İXM-nin 535.1-ci maddəsi ilə tövsif edilmişdir və onun 01 (bir) gün inzibati qaydada tutulmağı nəzərə alınaraq o, həmin maddə ilə təqsirli bilinərək inzibati məsuliyyətə cəlb edilməli, ona həmin maddənin sanksiyasında nəzərdə tutulan inzibati cərimə növündə inzibati tənbeh tətbiq edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 114-115, 117, 128-130-cu maddələrini rəhbər tutaraq, məhkəmə qərara aldı: Şəxs Çingiz oğlu Azərbaycan Respublikasının İnzibati Xətalar Məcəlləsinin 535.1-ci maddəsi ilə təqsirli bilinərək 200 (iki yüz) manat məbləğində cərimə edilsin və həmin Məcəllənin 31.4-1-ci maddəsinə əsasən 01 (bir) gün inzibati qaydada tutulduğu müddət nəzərə alınmaqla qəti olaraq 100 (yüz) manat məbləğində cərimə olunsun. Qərarın surəti təqdim edildiyi və ya alındığı gündən 10 (on) gün müddətində Sumqayıt Şəhər Məhkəməsi vasitəsi ilə Sumqayıt Apellyasiya Məhkəməsinə şikayət və ya protest verilə bilər. HAKİM RÖVŞƏN XƏLİLOV