Sumqayıt Şəhər Məhkəməsi Qərar — İş №3(060)-2204/2025

Azərbaycan Respublikası adından QƏRAR Sumqayıt şəhəri İş № 3(060)-2204/2025 01.09.2025 SUMQAYIT ŞƏHƏR MƏHKƏMƏSİ X4 Yadigar qızının sədrliyi, Məmmədov Oruc Fəxrəddin oğlunun katibliyi, Sumqayıt şəhər Polis İdarəsinin 1-ci Polis Bölməsinin sahə rəisi, polis mayoru: X1, Zərərçəkmiş şəxs, Barəsində inzibati xəta haqqında protokol tərtib olunmuş şəxs: Şəxs iştirakları ilə, xx.xx.2005-ci ildə Sumqayıt şəhərində anadan olmuş, Azərbaycan Respublikasının vətəndaşı, ünvan 1 ünvanında qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin 510-cu maddəsi ilə Sumqayıt şəhər Polis İdarəsinin 1-ci Polis Bölməsindən daxil olmuş inzibati xəta haqqında protokola açıq məhkəmə iclasında baxaraq müəyyən etdi: Şəxs Azərbaycan Respublikasının İXM-nin 510-cu maddəsi ilə nəzərdə tutulan inzibati xətanı törətməsi haqqında tərtib edilmiş xx.xx.2025-ci il tarixli, MN seriyalı ******* saylı protokol Sumqayıt şəhər Məhkəməsinə daxil olmuşdur. İnzibati xəta haqqında protokoldan görünür ki, Şəxs xx.xx.2025-ci il tarixdə saat 23:40-da Köhnə Corat qəsəbəsi, ev 148 ünvanının qarşısında Zərərçəkmiş şəxs təhqir etmiş, ünvansız söyüşlər söymüş bununla da İXM 510-cu maddəsinin tələblərini pozmuşdur. Azərbaycan Respublikasının İnzibati Xətalar Məcəlləsinin 111.3-cü maddəsinə görə inzibati həbs tənbeh növü nəzərdə tutan inzibati xətalar haqqında işlərə inzibati xəta haqqında protokola daxil olduğu gün baxılır. Məhkəmə iclasında Sumqayıt şəhər Polis İdarəsinin 1-ci Polis Bölməsinin sahə rəisi, polis mayoru X2 bildirdi ki, dünən saat 23:44 radələrində köhnə Corat qəsəbəsində Zərərçəkmiş şəxs DİN-in 102 xidməti zəng mərkəzinə zəng edərək əvvəllər tanıdığı Fərid adlı şəxsin onun ünvanına gələrək ona hədə-qorxu gəlməsi və anası ilə birlikdə çölə çıxmasınını tələb etməsi barədə müraciəti daxil olmuşdur. Qeyd olunan müraciətlə bağlı hadisə yerinə yaxınlaşdıq, şəxsi orda gördük və adını soruşduqda Fərid olduğunu bildirdi, burada nə üçün dayandığını soruşduqda 4 aydır tanıdığı Aydan adlı xanımın ünvanına gəldiyini bildirdi. Daha sonra araşdırma məqsədilə bölməyə getməli olduğumuzu bildirdik və bölməyə getdik. Bununla bağlı protokol tərtib edilib Sumqayıt şəhər məhkəməsinə təqdim edilmişdir.Protokolunu müdafiə etdiyini bildirdi. Məhkəmə iclasında barəsində inzibati xəta haqqında iş üzrə icraat aparılan şəxs Şəxs bildirdi ki, o, Türkiyədən dünən gəlmiş, bəzi iş yoldaşlarına hədiyyələr almışdır, hədiyyələri iş yoldaşlarına paylayarkən, bu zaman Aydan xanımı görmüşdür. Aydan mesajlarına cavab verməmiş, onunla əlaqəni kəsmişdir. Aydanın ona borcu var və ondan borcunu ala bilməmişdir. Ondan pulu tələb etməsin deyə onunla əlaqəni kəsmişdir. Onun Aydanın evinə getməkdə məqsədi anasına qızının borcu barədə məlumat vermək olmuşdur. O, həmin ünvanda səs-küy salmamış, ora çatan kimi polis əməkdaşları gəlmişdir. Məhkəmədən qeyd etdiklərini nəzərə alınmasını xahiş edir. Məhkəmə iclasında zərərçəkən şəxs Zərərçəkmiş şəxs bildirdi ki, dünən Fəridə bildirmişdir ki, evlərinə gəlməsin və o, borcunu qaytaracaqdır. Fərid qapılarına gəlmiş, 10- 20 metr aralıda dayanmışdır. O, sonuncunun səsini eşitmiş, lakin dəqiq nə danışdığını bilməmişdir. Fərid ona yazmışdır ki, ananla danışmaq istəyir. Fəridə gəlməməsini bildirmiş, lakin gəlmiş və o da polisə məlumat vermişdir. Fəridin yanında heç kəs olmamışdır. Fərid onun ünvanına heç nə deməmişdir. Məhkəmənin gəldiyi nəticə və onun əsaslandırılması: Məhkəmə, proses iştirakçılarını dinləyib, məhkəmə iclasında toplanmış sübutları tədqiq edərək hesab edir ki, Şəxs barəsində tərtib edilmiş inzibati xəta haqqında protokol üzrə sonuncunun hərəkətlərində İXM-in 510-cu maddəsində nəzərdə tutulmuş inzibati xəta tərkibi olmadığından barəsində başlanılmış inzibati xəta haqqında iş üzrə icraata xitam verilməlidir. İlk növbədə qeyd edilməldir ki, “Xuliqanlıq işləri üzrə məhkəmə təcrübəsi haqqında” Azərbaycan Respublikası Ali Məhkəməsinin Plenumunun 23 mart 2004-cü il tarixli Qərarında qeyd edilir ki, ictimai qaydanın pozulması və cəmiyyətə açıqca hörmətsizlik ifadə edən hərəkətlər fiziki şəxslər üzərində zor tətbiq olunması ilə və ya belə zorun tətbiq ediləcəyi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilmədikdə, təqsirkar şəxsin əməli Azərbaycan Respublikası İnzibati Xətalar Məcəlləsinə müvafiq olaraq, xırda xuliqanlığa görə inzibati məsuliyyətə səbəb olur. İXM-in 510 maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Məhkəmə iclasında tədqiq edilmiş sübutlarla Şəxs əməlinə münasibətdə sonuncunun xırda xuliqanlıq etməsi məhkəmədə öz təsdiqini tapmamış və toplanmış sübutlarla təkzib edilmişdir. Belə ki, tərtib edilmiş inzibati xəta haqqında protokol əsasında toplanmış materialda Şəxs nalayiq ifadələr işlətməklə ictimai qaydanı kobud surətdə pozması göstərilsə də, həmin halın baş verməsi məhkəmədə sübuta yetirilə bilməmişdir. İş materiallarında olan inzibati qaydada tutma haqqında protokoldan görünür ki, Şəxs xx.xx.2025-ci il tarixdə saat 00:30-da inzibati qaydada tutulmuş, xx.xx.2025-ci il tarix, saat 16:30-da azad edilmişdir. İş materiallarında olan Zərərçəkmiş şəxs xx.xx.2025-ci il tarixli ərizəsindən görünür ki, təxminən 4 aydır ki, tanıdığı Fərid adlı şəxs xx.xx.2025-ci il tarixdə ona dəfələrlə zəng edərək, narahat etmiş, onu rüsvay edəcəyi ilə hədələmiş, ünvanına gələcəyini bildirmişdir. xx.xx.2025-ci il tarixdə saat təxminən 23:40 radələrində artıq qapılarına çataraq uca səslə onu təhqir etməyə başladı, o, 102 zəng xidmətinə məlumat verərək təcili polisin gəlməsini xahiş etmişdir. Məhkəmə araşdırılması zamanı Şəxs xx.xx.2025-ci il tarixdə Zərərçəkmiş şəxs təhqir etməsi, ünvansız söyüşlər söyməsi müəyyən edilmir və sübuta yetirilmir. İş materiallarında Şəxs Zərərçəkmiş şəxs təhqir etməsini və ünvansız söyüşlər söyməsini təsdiq edən hallar öz əksini tapmamışdır. Belə ki, tərtib edilmiş inzibati xəta haqqında protokolda göstərilmişdir ki, Şəxs 30 avqust 2025-ci il tarixdə təxminən saat 23:40 radələrində Köhnə Corat qəsəbəsi, ev 148 ünvanınında Zərərçəkmiş şəxs təhqir etməsi, ünvansız söyüşlər söyməsi ilə İXM 510-cu maddəsinin tələblərini pozmuşdur. Tərtib edilmiş inzibati xəta haqqında protokolda Şəxsnın ünvansız nalayiq küçə söyüşləri söyüb, Zərərçəkmiş şəxs təhqir etməsindən bəhs edilsə də, aydın olmur ki, Şəxs İXM-nin 510-cu maddəsinin tələblərini pozması nədə ifadə olunur. Eyni zamanda məhkəmə iclasında vermiş olduğu izahatında Şəxs həmin ünvanda səs-küy salmadığını bildirmişdir. Zərərçəkmiş şəxs isə onun ünvanında Şəxs tərəfindən onun ünvanına təhqiredici ifadələr səsləndirilməmişdir. Şərh olunanlara əsasən məhkəmə hesab edir ki, Şəxs təqsiri İnzibati Xətalar Məcəlləsində nəzərdə tutulmuş qaydada sübuta yetirilməmiş, onun təqsirli olması inzibati xəta haqqında iş üzrə icraata baxmış məhkəmə tərəfindən müəyyən edilməmişdir. İnzibati məsuliyyətə cəlb olunmuş şəxsin təqsirini sübut etməyə borclu olan orqan isə onun təqsirli olmasını mötəbər sübutlarla sübuta yetirə bilməmişdir. Barəsində inzibati xəta haqqında iş üzrə icraat aparılan şəxs tərəfindən Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulan inzibati xəta hadisəsinin törədilməsi istisna edilir və sonuncu tərəfindən Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətanın tərkibini yaradan hərəkətlərə yol verilməsi obyektiv sübutların məcmusu ilə öz təsdiqini tapmır. Belə olan halda, məhkəmə işin obyektiv hallarını və yuxarıda sadalanan qanunun imperativ tələblərini nəzərə alıb belə qənaətə gəlir ki, təqsirliliyi sübuta yetirilmədiyindən Şəxs barəsində İnzibati Xətalar Məcəlləsinin 510-cu maddəsi ilə nəzərdə tutulan inzibati iş üzrə icraata xitam verilməlidir. Azərbaycan Respublikasının İnzibati Xətalar Məcəlləsinin: - 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə - əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. - 105-ci maddəsinə əsasən, İXM-nin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. İnzibati xəta haqqında işin icraatına xitam verilməsi haqqında qərarın surəti barəsində belə qərar qəbul edilmiş şəxslərə və zərərçəkmiş şəxsə göndərilir. - 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 114.1-ci və 114.1.4-cü maddələrinə görə inzibati xətalar haqqında işlərə baxılarkən inzibati xəta haqqında iş üzrə icraata xitam verilməsi haqqında qərar çıxarılır. Həmin Məcəllənin 114.2-ci və 114.2.1-ci maddələrində müəyyən edilmişdir ki, bu Məcəllənin 53-cü maddəsində nəzərdə tutulan hallardan biri mövcud olduqda, inzibati xəta haqqında iş üzrə icraata xitam verilməsi haqqında qərar çıxarılır. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 53, 114, 115 və 130-cu maddələrini rəhbər tutaraq, məhkəmə QƏRARAALDİ: Şəxs Azərbaycan Respublikasının İnzibati Xətalar Məcəlləsinin 510-cu maddəsi ilə başlanmış inzibati xəta haqqında iş üzrə icraata Azərbaycan Respublikasının İnzibati Xətalar Məcəlləsinin 53.1.2-ci maddəsinə əsasən inzibati xəta tərkibi olmadığı üçün xitam verilsin. Qərarın surəti rəsmi qaydada verildiyi gündən 10 gün müddətində qərardan Sumqayıt şəhər Məhkəməsi vasitəsi ilə və ya birbaşa Sumqayıt Apellyasiya Məhkəməsinə apellyasiya şikayəti verilə bilər. Hakim: Vüsalə Qasımova