Sumqayıt Şəhər Məhkəməsi Qərar — İş №3(060)-2552/2025

Azərbaycan Respublikası adından QƏRAR Sumqayıt şəhəri İş № 3(060)-2552/2025 27.10.2025 SUMQAYIT ŞƏHƏR MƏHKƏMƏSİ Hakim Nəsimiyev Fərid Aydın oğlunun sədrliyi, Aslanova İradə Allahverdi qızının katibliyi ilə, Şəxs MMC-nin direktoru X1 iştirakları ilə, Şəxs Azərbaycan Respublikası İnzibati Xətalar Məcəlləsinin 464-cü maddəsi ilə təqsirləndirilməsinə dair Azərbaycan Respublikası Maliyyə Nazirliyindən daxil olmuş inzibati xəta haqqında materiala Sumqayıt şəhər Məhkəməsinin inzibati binasında açıq məhkəmə iclasında baxaraq, MÜƏYYƏN ETDİ: Azərbaycan Respublikası Maliyyə Nazirliyi tərəfindən AZ5004, Sumqayıt şəhəri, 30cu məhəllə, ev 118, S.Vurğun küçəsində yerləşən Şəxs (VÖEN: **********) barəsində Azərbaycan Respublikası İnzibati Xətalar Məcəlləsinin (bundan sonra İXM-nin) 464-cü maddəsində nəzərdə tutulmuş inzibati xətanın törədilməsinə görə 06 oktyabr 2025-ci il tarixdə MN seriyalı ******* №li inzibati xəta haqqında protokol tərtib edilmişdir. Protokola əsasən adı çəkilən müəssisə 2023-cü il üzrə maliyyə hesabatlarının 2024-cü ildə auditini aparılmamış, nəticədə inzibati xəta törətmişdir. Protokol baxılmaq üçün Sumqayıt Şəhər Məhkəməsinə göndərilmiş və qeyd olunan material xx.xx.2025-ci il tarixdə məhkəməyə daxil olmuşdur. İXM-nin 111.1-ci maddəsinə görə inzibati xəta haqqında işə baxmağa səlahiyyəti olan hakim, orqan (vəzifəli şəxs) bu cür işlərə inzibati xəta haqqında protokolu və işin digər materiallarını aldığı vaxtdan on beş gün müddətində baxır. Məhkəmə iclasının vaxtı və yeri barədə lazımi qaydada xəbərdarlıq edilməsinə baxmayaraq protokol tərtib edən orqanın nümayəndəsi məhkəmə iclasına gəlməmiş, gəlməməsi barədə məhkəməyə heç bir məlumat verməmişdir. Məhkəmə işə protokol tərtib edən orqanın nümayəndəsinin iştirakı olmadan baxılmasını mümkün hesab edir. Məhkəmə iclasında iştirak edən Şəxs MMC-nin nümayəndəsi Oqtay Dilavarov bildirmişdir ki, sözügedən MMC-də struktur dəyişikliyi olmuşdur. Həmin MMC tərkibində başqa müəssisə yaradılmışdır və maliyyə işlərinə sözügedən MMC yox, yaradılmış yeni müəssisə baxır. Həmçinin, bildirmişdir ki, protokolda qeyd olunan illərdə MMC-də işləməmişdir. Buna görə də məcburi auditin aparılıb-aparılmamasından məlumatı yoxdur. Məhkəmədən inzibati xəta haqqında iş üzrə icraata xitam verilməsini xahiş edir. Məhkəmə iclasında şahid qismində iştirak edən X2 bildirmişdir ki, Şəxs MMC-nin tabel olduğu hüquqi şəxsin hüquqşünasıdır. Sözügedən MMC barəsində inzibati xəta haqqında protokol tərtib olunmasını düzgün hesab etmir. Çünki MMC-ni inzibati məsuliyyətə cəlb etmək üçün qanunvericiliklə müəyyən edilmiş 1 il müddət keçmişdir. Həmçinin, bildirmişdir ki, MMC-də struktur dəyişikliyi olmuş, ən əsası rəhbərlər dəyişmişdir. Buna görə də inzibati xəta haqqında protokola xitam verilməlidir. Daha sonra qeyd etmişdir ki, MMC-də bu həftə ərzində audit yoxlaması aparılacaq və auditor rəyi veriləcəkdir. İş materiallarından olan və məhkəmə iclasında tədqiq edilmiş sənədlərdən görünür ki, Azərbaycan Respublikası Maliyyə Nazirliyi tərəfindən Şəxsnə xx.xx.2025-ci il tarixdə yazılı surətdə bildirişdən müəyyən olunur ki, 2023-cü il üzrə maliyyə hesabatlarının auditinin 2024-cü ildə qanunla nəzərdə tutulmuş hallarda həyata keçirilməməsi ilə əlaqədar məcburi auditdən yayınmağa görə inzibati xəta haqqında işə 06 oktyabr 2025-ci il tarixdə, saat 10:15-də Azərbaycan Respublikası Maliyyə Nazirliyinin Uçot siyasəti şöbəsində baxılacağı qeyd olunaraq iştirakının təmin edilməsi üçün Şəxsnə göndərilmişdir. Azərbaycan Respublikasının Auditorlar Palatasının elektron sisteminin xx.xx.2025ci il tarixli çıxarışından görünür ki, Şəxs maliyyə hesabatlarının 2023-cü və 2024-cü illərdə auditi aparılmamışdır. Məhkəmə iş materiallarını araşdıraraq hesab edir ki, Şəxs MMC tərəfindən İXM-nin 464-cü maddəsində nəzərdə tutulan inzibati xətanın törədilməsi tərtib edilmiş inzibati xəta haqqında protokol və işdə olan digər sübutlarla təsdiq edilir, bu səbəbdən həmin MMC qeyd edilən maddə ilə təqsirli bilinib tənbeh edilməlidir. Belə ki, iş materiallarında olan Azərbaycan Respublikasının Auditorlar Palatasının elektron sisteminin xx.xx.2025-ci il tarixli çıxarışı ilə Şəxs MMC tərəfindən maliyyə hesabatları auditi yoxlamasının 2023-cü il üçün 2024-cü ildə aparılmaması faktı öz təsdiqini tapmışdır. İXM-nin 464-cü maddəsinə əsasən “Auditor xidməti haqqında” Azərbaycan Respublikasının Qanunu ilə nəzərdə tutulmuş hallarda həyata keçirilməli olan məcburi auditdən yayınmağa görə vəzifəli şəxslər üç yüz manatdan altı yüz manatadək məbləğdə, hüquqi şəxslər min beş yüz manatdan iki min beş yüz manatadək məbləğdə cərimə edilir. Həmin Məcəllənin 18.5-ci maddəsinə əsasən həmin məcəllənin 127-4.5-ci maddəsində nəzərdə tutulmuş hal istisna olmaqla hüquqi şəxs barəsində inzibati tənbeh yalnız hakim tərəfindən tətbiq edilir. Məhkəmə məsuliyyəti yüngülləşdirən və ağırlaşdıran halları müəyyən etməmişdir. “Azərbaycan Respublikası İnzibati Xətalar Məcəlləsinin təsdiq edilməsi haqqında” Azərbaycan Respublikasının 29 dekabr 2015-ci il tarixli 96-VQ nömrəli Qanununun tətbiqi barədə 15 fevral 2016-cı il tarixli, 795 saylı Azərbaycan Respublikasi Prezidentinin fərmanının 4.37 və həmin Məcəllənin 462.1 (birinci halda) və 465-ci maddələrində “müvafiq icra hakimiyyəti orqanı” dedikdə, Azərbaycan Respublikasının Maliyyə Nazirliyi nəzərdə tutulur. İXM-nin 21-ci maddəsinə əsasən inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. İnzibati xətanın xarakterini nəzərə alaraq məhkəmə hesab edir ki, inzibati xəta törətmiş Şəxs barəsində minimum həddə inzibati tənbeh növü cərimə tətbiq edilməklə inzibati tənbeh öz məqsədinə nail ola bilər. İXM-nin 114.1.1-ci maddəsinə əsasən inzibati xəta haqqında işə baxılarkən inzibati tənbeh vermə haqqında qərar çıxarılır. Yuxarıda göstərilənlərə əsasən və İXM-nin 114, 115, 128-130-cu maddəllərini rəhbər tutaraq məhkəmə, qərara aldı: AZ5004, Sumqayıt şəhəri, 30-cu məhəllə, ev 118, S.Vurğun küçəsində qeydiyyatda olan Şəxs (VÖEN: **********) Azərbaycan Respublikası İnzibati Xətalar Məcəlləsinin 464cü maddəsində nəzərdə tutulmuş inzibati xətanın törədilməsində təqsirli bilinsin və 1500 (min beş yüz) manat məbləğində cərimə olunsun. Qərarın surəti rəsmi qaydada verildiyi gündən 10 gün müddətində qərardan Sumqayıt Şəhər Məhkəməsi vasitəsi ilə və ya birbaşa Sumqayıt Apellyasiya Məhkəməsinə apellyasiya şikayəti verilə bilər. Hakim: Fərid Nəsimiyev