Sumqayıt Şəhər Məhkəməsi Qərar — İş №3(060)-2820/2024

Azərbaycan Respublikası adından QƏRAR Sumqayıt şəhəri İş № 3(060)-2820/2024 10.12.2024 SUMQAYIT ŞƏHƏR MƏHKƏMƏSİ Hakim İsmayılov Samir Bəyistan oğlunun sədrliyi, İsgəndərov Aslan Haqverdi oğlunun katibliyi, Barəsində inzibati xəta haqqında iş üzrə icraat aparılan şəxs Şəxs MMC-nin nümayəndəsi Nümayəndə2 iştirakı ilə, Hüquqi şəxs Şəxs (VÖEN: **********) barəsində Azərbaycan Respublikası İnzibati Xətalar Məcəlləsinin 430.4-cü maddəsi ilə tərtib edilmiş inzibati xəta haqqında protokola və ona əlavə edilmiş materiallara məhkəmənin binasında açıq məhkəmə iclasında baxaraq, məhkəmə MÜƏYYƏN ETDİ: Azərbaycan Respublikasının Mərkəzi Bankı hüquqi ünvanı Sumqayıt şəhəri, 9-cu məhəllə, ev 11, mənzil 4 olan hüquqi şəxs Şəxs MMC (VÖEN: **********) barəsində Azərbaycan Respublikası İnzibati Xətalar Məcəlləsinin 430.4-cü maddəsi ilə 06 noyabr 2024-cü il tarixli, EP seriyalı ******* nömrəli inzibati xəta haqqında protokol tərtib edərək baxılması üçün aidiyyəti üzrə Sumqayıt Şəhər Məhkəməsinə göndərmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs MMC-nin nümayəndəsi Nümayəndə2 protokola etiraz edərək izahatında bildirmişdir ki, Şəxs MMC tərəfindən 035-22 nömrəli müqaviləyə əsasən ödəniş aparılmışdır, mallar 067-22 müqaviləyə əsasən gəlmişdir, gömrük orqanı isə müqavilə nömrəsi fərqli yazıldığına görə ödəniş tapşırığını qəbul etməmişdir. Şəxs MMC gömrük orqanına müraciət etmişdir ki, gələn malları 067-22 nömrəli müqaviləyə əsasən rəsmiləşdirilsin, faktiki olaraq hansı müqavilə ilə gəlibsə ona əsasən rəsmiləşdirilsin. Çünki gömrük orqanı onu rəsmiləşdirmirdi. Bankda isə ödəniş tapşırığı müqavilənin nömrəsi 035-22 olduğuna görə ŞəxsMMC tərəfindən banka 067-22 nömrəli müqavilə üzrə bəyannaməni təqdim edilmişdir. Bankdan isə bildirilmişdir ki, bəyannamədə müqavilə nömrəsi fərqli yazıldğı üçün bunu bağlaya bilmirlər. ŞəxsMMC tərəfindən xaricə köçürülmüş vəsaitə görə mallar ölkəyə idxal edilmişdir, sadəcə müqavilə nömrələrində texniki səhv ucbatından belə problem yaranmışdır. Bütün vəsait bank vasitəsilə köçürülmüşdür, bank da müraciətə cavab olaraq uyğunsuzluq olması səbəbindən bəyannamənin bağlanılmadığını bildirmişdir. Bu da köçürülən pullar müqabilində malların ölkəyə idxal edildiyini təsdiq edir. Texniki səhvlik səbəbindən hüquqi şəxs barəsində protokol tərtib edilməsi əsassızdır. Bütün sənədlər malların idxal olunduğunu təsdiq edir. Şəxs MMC-nin əməlində inzibati xəta tərkibi yoxdur. Göstərilənləri nəzərə alaraq Şəxs MMC barəsində tərtib edilmiş inzibati xətaya dair iş üzrə icraata xitam verilməsi xahiş etmişdir. Məhkəmə iclasının yeri və vaxtı barədə qanunamüvafiq qaydada məlumat verilməsinə baxmayaraq, Azərbaycan Respublikasının Mərkəzi Bankının səlahiyyətli nümayəndəsi məhkəməyə gəlməmiş, gəlməməsinin səbəbləri barədə məhkəməyə məlumat verməmişdir. Məhkəmə, işə Azərbaycan Respublikası İnzibati Xətalar Məcəlləsinin 112.1.4-cü maddəsinə əsasən Azərbaycan Respublikasının Mərkəzi Bankının səlahiyyətli nümayəndəsinin iştirakı olmadan baxılmasını mümkün hesab etmişdir. İş materiallarında olan və məhkəmə baxışında tədqiq edilmiş; - inzibati xəta haqqında protokoldan görünür ki, Şəxs MMC 3.104.730,00 Rusiya rublu məbləğində vəsaiti 11 oktyabr 2022-ci il tarixdə xaricə köçürmüş və 2 il müddət keçsə də, həmin vəsait hesabına alınan malları (xidməti) ölkəyə idxal etməmiş, valyuta vəsaitini geri qaytarmamışdır. Xəta 12 oktyabr 2024-cü il tarixdə hüquqi şəxsin qeyd olunan ünvanında törədilmişdir. - xx.xx.2022-ci il tarixli **********808 sorğu nömrəli gömrük bəyannaməsindən görünür ki, Rusiya Federasiyasında fəaliyyət göstərən OOO “MF Sistema” şirkəti tərəfindən Şəxs MMC-nin ünvanına göndərilmiş 3.104.730,00 Rusiya rublu dəyərində mallar ölkəyə idxal edilmişdir. - "xxxx" ASC-nin xx.xx.2024-cü il tarixli ZB 2155 nömrəli məktubundan görünür ki, Şəxs MMC-nin 11 oktyabr 2022-ci il tarixli 3.104.730,00 Rusiya rublu məbləğində avans ödənişinə görə təqdim etdiyi **********808 YGB-də müqavilə səhv qeyd edildiyindən bağlanmamışdır. Beləliklə müəyyən edilmişdir ki, Şəxs MMC tərəfindən xx.xx.2022-ci il tarixdə xaricə köçürülmüş 3.104.730,00 Rusiya rublu məbləğində vəsaitlərə görə alınan mallar tam şəkildə ölkəyə idxal edilmişdir. Malların idxal edilməsi ilə bağlı gömrük bəyannaməsində olan texniki yanlışlıqlar səbəbindən anlaşılmazlığa yol verilmiş MMC barəsində hazırki protokol tərtib edilmişdir. Ona görə də məhkəmə hesab edir ki, hazırki iş üzrə Şəxs MMCnin hərəkətlərində inzibati xəta tərkibi mövcud deyil. Azərbaycan Respublikası İnzibati Xətalar Məcəlləsinin 430.4-cü maddəsinə əsasən avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə-vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir. Azərbaycan Respublikası Mərkəzi Bankının 28 noyabr 2016-cı il tarixli 45/1 №li Qərarı ilə təsdiq edilmiş “Azərbaycan Respublikasının rezident və qeyri-rezidentlərinin xarici valyuta əməliyyatlarının aparılması Qaydaları”nın 4.3.1.3-cü bəndinə xx.xx.2020-ci ildə dəyişiklik edilmiş və həmin dəyişiklik xx.xx.2020-ci ildən qüvvəyə minmişdir. Həmin Qaydaların 4.3.1.3-cü bəndinə görə qabaqcadan ödəniş aparıldıqda banka ödənişin təyinatını, şərtlərini və məbləğini əks etdirən sənəd təqdim edilir. Qabaqcadan ödəniş müqabilində malların ölkəyə idxalını (xidmətlərin göstərilməsini) təsdiq edən gömrük bəyannaməsi (xidmətlərin göstərilməsini təsdiq edən sənəd) banka təqdim olunmalıdır və ya xeyrinə qabaqcadan ödənişin edildiyi şəxs və ya üçüncü şəxs tərəfindən qabaqcadan ödənilmiş məbləğ geri qaytarılmalıdır. Müvafiq sənədlər ödənişin aparıldığı gündən ən geci 2 (iki) il müddətində banka təqdim edilmədikdə və ya qabaqcadan ödənilmiş məbləğ geri qaytarılmadıqda və bu zaman idxal edilməyən malların (göstərilməyən xidmətlərin) və ya geri qaytarılmayan məbləğin qalıq dəyəri 10 000 (on min) ABŞ dolları ekvivalenti məbləğindən çox olduqda, bank tərəfindən qabaqcadan ödəniş əməliyyatına dair bütün sənədlər 5 (beş) iş günü ərzində Azərbaycan Respublikasının Mərkəzi Bankına təqdim edilir. Azərbaycan Respublikası İnzibati Xətalar Məcəlləsinin 11.2-ci maddəsinə əsasən inzibati xətalara görə məsuliyyəti yüngülləşdirən və ya onu aradan qaldıran normativ hüquqi aktların geriyə qüvvəsi vardır, yəni həmin aktlar onların qüvvəyə mindiyi vaxtadək törədilmiş, həmçinin inzibati tənbeh tətbiq etmə haqqında qərarı tam icra olunmamış xətalara da şamil edilir. Həmin Məcəllənin 53.1.2-ci maddəsinə əsasən əməldə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 114.2.1-ci maddəsinə əsasən, bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Azərbaycan Respublikası İXM-in 114.1.4-cü maddəsinə əsasən inzibati xəta haqqında iş üzrə icraata xitam verilməsi haqqında inzibati xəta haqqında işə baxılarkən qərar çıxarılır. Qeyd edilən səbəbdən də məhkəmə hesab edir ki, inzibati xəta tərkibi olmadığından Şəxs MMC barəsində Azərbaycan Respublikasının İnzibati Xətalar Məcəlləsinin 430.4-cü maddəsi ilə nəzərdə tutulan inzibati iş üzrə icraata xitam verilməlidir. Yuxarıdakılara əsasən və Azərbaycan Respublikası İnzibati Xətalar Məcəlləsinin 18,4, 40, 43, 53.1.2, 114-115, 128-130-cu maddələrini rəhbər tutaraq, məhkəmə QƏRARA ALDİ: Hüquqi şəxs Şəxs MMC-nin barəsində Azərbaycan Respublikasının İnzibati Xətalar Məcəlləsinin 430.4-cü maddəsi ilə başlanmış inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi gündən 10 gün müddətində qərardan Sumqayıt Şəhər Məhkəməsi vasitəsi ilə və ya birbaşa Sumqayıt Apellyasiya Məhkəməsinə apellyasiya şikayəti verilə bilər. Hakim: Samir İsmayılov