Sumqayıt Şəhər Məhkəməsi Qərar — İş №3(060)-2953/2025

Azərbaycan Respublikası adından QƏRAR Sumqayıt şəhəri İş № 3(060)-2953/2025 27.11.2025 SUMQAYIT ŞƏHƏR MƏHKƏMƏSİ Hakim İsmayılova Günel Rza qızının sədrliyi, Əhmədli Amid Yusif oğlunun katibliyi, Şikayət verən şəxs X1 iştirakı ilə, Azərbaycan Respublikası DİN Baş Dövlət Yol Polisi İdarəsinin xx.xx.2025-ci il tarixli, EQ29930035 nömrəli inzibati tənbeh vermə haqqında qərarından X2 tərəfindən verilmiş şikayətə açıq məhkəmə iclasında baxaraq, məhkəmə MÜƏYYƏN ETDİ: X2 şikayətlə məhkəməyə müraciət edərək Azərbaycan Respublikası DİN Baş Dövlət Yol Polisi İdarəsinin xx.xx.2025-ci il tarixli, EQ29930035 nömrəli inzibati tənbeh vermə haqqında qərarının ləğv edilməsini xahiş etmişdir. Şikayət onunla əsaslandırmışdır ki, xx.xx.2025 ci il tarixdə Qəbələ rayonu H.Əliyev prospektində idarə etdiyi avtomobilə Azərbaycan Respublikası İnzibati Xətalar Məcələsinin 346.4 maddəsi ilə (Yanqoşqusu olmayan motosikletlər və kiçik elektirik nəqliyat vasitələri istisna olmaqla, digər nəqliyat vasitələrinin yolun hərəkət hissəsinin kənarında ikinci və sonraki cərgələrdə dayanmasına və ya durmasına görə) EQ29930035 nömrəli qərar çıxarılaraq 80 azn cərimə olunmuşdur. Barəsində tərtib edilmiş qərarla razı olmadığı üçün Sumqayıt şəhər Məhkəməsinə şikayət ərizəsi yazmış, Sumqayıt şəhər Məhkəməsi ərizəsinə baxılması üçün Qəbələ rayon Məhkəməsinə göndərmişdir. Sonra o, xahiş edərək (İXM-nin 110.1 maddəsi və MPM- nin 35-ci maddəsinə əsasən, işə yaşadığım ərazi üzrə Sumqayıt şəhər Məhkəməsində baxılması üçün, Qəbələ rayon Məhkəməsindən işin baxılmadan geri qaytarılmasını istəmiş, Qəbələ rayon Məhkəməsi işə baxmadan geri qaytarmışdır. Barəsində tərtib edilmiş EQ29930035 nömrəli qərarla razı olmadığı üçün aşağıdakıları bildirir. 1. İstənilən yol hərəkəti haqqında qaydalar xüsusi nişanlarla təmin edilir. Lakin, burda hər hansı yol nişanı mövcud deyil. 2. Törədilmiş inzibati xətanın təhlükəsizlik kamerası ilə qeydə alınması əsas sayılmır. 3. O, idarə etdiyi **-HV-*** nömrəli avtomomobillə həmin ərazidə yolun birinci cərgəsi ilə hərəkətdə olmuşdur (şəkildən aydın göründüyü kimi yolun hərəkət hissəsi olmayan sağ tərəfi, CİB adlandırılan hissədir). 346.4 İnzibati Xətalar Məcəlləsində isə “yolun hərəkət hissəsinin kənarında ikinci və sonrakı cərgələrdə dayanmasına və ya durmasına görə” cərimə nəzərdə tutulur. 4. O, həmin vaxt sağ CİB-dən geri çıxan maşına görə qısa müddətə dayanmalı olmuşdur. Bu zaman o, avtomobili tərk etməmiş, yol boşaldıqdan sonra hərəkətə davam etmişdir. Qısa müddət dayandığı zaman belə, digər nəqliyyat vasitələrinin hərəkətinə mane olmamış tıxac yaratmamışdır. Bütün bunlar və qarşından geri çıxan maşına görə dayanmağı şəkildən aydın görünür. 5. O, yol vergisi ödəyən bir vətəndaş kimi, Azərbaycan Respublikasının bütün yollarında şəxsinə aid avtomobillə, qanunla qadağan olunmamış yolun hərəkət hissəsində dayana, dura və hərəkət etmək hüququna malikdir. Odur ki, yuxarıda qeyd etdilkərini nəzərə alaraq, İnzibati xətalar haqqında 110.1-ci maddəsinə əsasən iddia ərizəsinə yaşadığı ərazi üzrə Sumqayıt şəhər Məhkəməsində baxılaraq, barəsində tərtib edilmiş inzibati xəta haqqında EQ29930035 nömrəli qərarın ləğv edilərək cərimənin silinməsi barədə qərar qəbul edilməsini xahiş edir. Məhkəmə iclasında iştirak edən şikayət verən şəxs X2 şikayətinin mahiyyətinə uyğun izahat vermiş, həmçinin bildirmişdir ki, o, yolun birinci cərgəsində qarşıdakı avtomobilə yol vermək üçün dayanmış, avtomobili söndürməmişdir. Qeyd edilənləri nəzərə alaraq Azərbaycan Respublikası DİN Baş Dövlət Yol Polisi İdarəsinin xx.xx.2025-ci il tarixli EQ29930035 nömrəli inzibati tənbeh vermə haqqında qərarının ləğv edilməsini, cərimənin silinməsini xahiş etmişdir. Məhkəmə iclaslarının vaxtı və yeri barədə lazımi qaydada məlumat verilməsinə baxmayaraq qərar qəbul etmiş Azərbaycan Respublikası DİN Baş Dövlət Yol Polisi İdarəsinin nümayəndəsi məhkəmə iclaslarında iştirak etməmiş və iştirak etməməsinin səbəbləri barədə məlumat verməmişdir. Məhkəmə Azərbaycan Respublikasının İnzibati Xətalar Məcəlləsinin 133.2.4-cü maddəsinə əsasən hesab edir ki, hazırki şikayətə Azərbaycan Respublikası DİN Baş Dövlət Yol Polisi İdarəsinin nümayəndəsinin iştirakı olmadan baxılması mümkün hesab edilməlidir. Məhkəmə şikayət verən şəxsin izahatını dinləyib, iş materiallarını araşdıraraq hesab edir ki, şikayət təmin edilməli, Azərbaycan Respublikası DİN Baş Dövlət Yol Polisi İdarəsinin xx.xx.2025-ci il tarixli, EQ29930035 nömrəli elektron inzibati tənbeh vermə haqqında qərarı ləğv edilməli və X2 barəsində başlanmış inzibati xəta haqqında iş üzrə icraata xitam verilməlidir. Belə ki, iş materiallarında olan və məhkəmə iclasında tədqiq edilmiş: Azərbaycan Respublikası DİN Baş Dövlət Yol Polisi İdarəsinin xx.xx.2025-ci il tarixli, EQ29930035 nömrəli elektron inzibati tənbeh vermə haqqında qərarından görünür ki, “KİA SORENTO MİNİK” minik markalı, **-HV-*** dövlət qeydiyyat nişanlı avtomobil yanqonşusu olmayan motosikletlər, mopedlər, velosipedlər və kiçik elektrik nəqliyyat vasitələri istisna olmaqla, digər nəqliyyat vasitələrinin yolun hərəkət hissəsinin kənarında ikinci və sonrakı cərgələrdə dayanmasına və ya durmasına görə X2 Azərbaycan Respublikasının İXM-in 346.4-cü maddəsi ilə təqsirli bilinərək 80 manat məbləğində inzibati cərimə edilmişdir. Azərbaycan Respublikasının İnzibati Xətalar Məcəlləsinin 346.4-cü maddəsinin dispozitiv şərtlərindən görünür ki, həmin maddənin tərkibinin yaranması üçün nəqliyyat vasitəsinin yolun hərəkət hissəsinin kənarında ikinci və sonrakı cərgələrdə dayanmasına və ya durması halı mövcud olmalıdır. Lakin, indiki halda “KİA SORENTO MİNİK” minik markalı, **-HV-*** dövlət qeydiyyat nişanlı avtomobilin sürücüsünün hərəkətləri dayanma və durma kimi qiymətləndirilməməlidir. Belə ki, DİN Baş Dövlət Yol Polisi İdarəsinin xx.xx.2025-ci il tarixli, EQ29930035 nömrəli elektron inzibati tənbeh vermə haqqında qərarına əlavə edilmiş foto görüntüdən görünür ki, “KİA SORENTO MİNİK” minik markalı, **-HV-*** dövlət qeydiyyat nişanlı avtomobil arxa işıqları yanılı vəziyyətdə olması, qarşısında olan qara rəngli markası və dövlət qeydiyyat nişanının görünməsi mümkün olmayan avtomobilə yol verməsi müşahidə edilir. Həmin foto şəkillə də təsdiq edilir ki, sürücü inzibati xəta qeydə alınan zaman avtomobili yolun hərəkət hissəsinin kənarında ikinci və sonrakı cərgədə saxlamamışdır. Məhkəmə tərəfindən DİN BDYPİ-yə məhkəmə X2 barəsində qəbul edilmiş xx.xx.2025-ci il tarixli EQ29930035 nömrəli inzibati tənbeh vermə barədə qərarın qəbul edilməsinə əsas olmuş inzibati icraat materiallarının (foto, video materiallar və s.) təqdim edilməsi barədə sorğu verilməsinə baxmayaraq, nümayəndə məhkəmə iclasına gəlməmiş və qərar qəbul etmiş orqan tərəfindən məhkəmənin qeyd edilən sorğusuna cavab verilməmişdir. Məhkəmə hesab edir ki, belə olan halda qərardan şikayət vermiş şəxsin əməlində Azərbaycan Respublikası İnzibati Xətalar Məcəlləsinin 346.4-cü maddəsində nəzərdə tutulmuş inzibati xətanın tərkib əlamətlərinin olmasını müəyyən etmək mümkün olmamış, həmçinin səlahiyyətli orqan (vəzifəli şəxs) tərəfindən X2 təqsirliliyini sübuta yetirən hər hansı bir mötəbər sübut məhkəməyə təqdim edilməmişdir. Məhkəmə qeyd edir ki, inzibati məsuliyyətə cəlb olunmuş şəxs öz təqsirsizliyini sübut etməyə borclu olmadığından, onun təqsirli olması barəsində olan şübhələr onun xeyrinə həll olunduğundan, inzibati orqan xətanı təsdiq edən sübutları məhkəməyə təqdim etmədiyindən, xx.xx.2025-ci il tarixli EQ29930035 nömrəli qərarda inzibati xətanın törədilməsini təsdiq edən hər hansı bir sübuta istinad edilmədiyindən, beləliklə qərar araşdırma aparılmadan, sübutlara qiymət verilmədən qəbul edildiyindən şikayət əsaslıdır. Göstərilən səbəbdən də məhkəmə hesab edir ki, xx.xx.2025-ci il tarixli, EQ29930035 nömrəli elektron inzibati tənbeh vermə haqqında qərar üzrə sürücünün əməllərində inzibati xəta tərkibi mövcud olmamışdır. Azərbaycan Respublikasının İnzibati Xətalar Məcəlləsinin: 346.4-cü maddəsinə əsasən yanqoşqusu olmayan motosikletlər, mopedlər, velosipedlər və kiçik elektrik nəqliyyat vasitələri istisna olmaqla, digər nəqliyyat vasitələrinin yolun hərəkət hissəsinin kənarında ikinci və sonrakı cərgələrdə dayanmasına və ya durmasına görə - səksən manat məbləğində cərimə edilir. 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. 48-ci maddəsinə əsasən inzibati xətalar haqqında işlər üzrə icraatın vəzifələri şəxslərin hüquqlarını və azadlıqlarını, onların qanuni mənafelərini qorumaqdan, inzibati xəta haqqında hər bir işin hallarını vaxtında, hərtərəfli, tam və obyektiv surətdə aydınlaşdırmaqdan, inzibati xəta törətmiş şəxsi aşkar etməkdən və onu inzibati məsuliyyətə cəlb etməkdən, çıxarılmış qərarın icrasını təmin etməkdən, habelə inzibati xətanın törədilməsinə kömək edən səbəbləri və şəraiti aşkar etməkdən və inzibati xətaların qarşısını almaqdan ibarətdir. 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, müvafiq icra hakimiyyəti orqanının müəyyən etdiyi orqanın (qurumun) informasiya sistemində, habelə digər dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. 129.1.3-cü maddəsinin tələbinə əsasən inzibati xəta haqqında iş üzrə səlahiyyətli orqanın (vəzifəli şəxsin) qərarından məhkəməyə verilən şikayət - şikayət verən şəxsin yaşayış yeri və ya hüquqi şəxsin ünvanının olduğu yer üzrə rayon (şəhər) məhkəməsinə verilir. 134.1.3-cü maddəsinə əsasən inzibati xəta haqqında iş üzrə qərardan verilən şikayət və ya protest baxıldıqda bu Məcəllənin 53-cü maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında qərar qəbul edilir. 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Beləliklə, məhkəmə hesab edir ki, şikayət təmin edilməli, Azərbaycan Respublikası DİN Baş Dövlət Yol Polisi İdarəsinin xx.xx.2025-ci il tarixli, EQ29930035 nömrəli elektron inzibati tənbeh vermə haqqında qərarı ləğv edilməli və başlanmış inzibati iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikasının İXM-in 133-137-ci maddələrini rəhbər tutaraq, məhkəmə QƏRARA ALDİ: X1 şikayəti təmin olunsun. Azərbaycan Respublikası DİN Baş Dövlət Yol Polisi İdarəsinin xx.xx.2025-ci il tarixli, EQ29930035 nömrəli elektron inzibati tənbeh vermə haqqında qərarı ləğv edilsin və X1 barəsində başlanmış inzibati xəta haqqında iş üzrə icraata xitam verilsin. Bu qərar Azərbaycan Respublikası DİN Baş Dövlət Yol Polisi İdarəsinin Mərkəzi İnformasiya sistemində X1 adına qeyd edilmiş xx.xx.2025-ci il tarixli, EQ29930035 nömrəli elektron inzibati tənbeh vermə haqqında qərar üzrə inzibati cərimənin və ona hesablanmış dəbbə pulunun silinməsi üçün əsasdır. Qərarın surəti rəsmi qaydada təqdim edildiyi və ya alındığı gündən 10 gün müddətində Sumqayıt Şəhər Məhkəməsi vasitəsi ilə və ya bilavasitə Sumqayıt Apellyasiya Məhkəməsinə şikayət verilə bilər. Hakim: Günel İsmayılova