Sumqayıt Şəhər Məhkəməsi Qərardad — İş №3(060)-3005/2021

Azərbaycan Respublikası adından QƏRARDAD Sumqayıt şəhəri İş № 3(060)-3005/2021 08.09.2021 SUMQAYIT ŞƏHƏR MƏHKƏMƏSİ Hakim Hacıyev Pərviz Əhməd oğlunun sədrliyi, Məhkəmə iclas katibi Oruczadə Urfan Eynur oğlunun katibliyi ilə, X2 oğlunun 07.09.2021-ci il tarixli müraciətinə baxaraq, müəyyən etdi: X1 İsaq oğlu Sumqayıt şəhər Məhkəməsinə müraciət edərək Bakı Nəqliyyat Agentliyinin 2020-ci ilin fevral və mart aylarında onun barəsində Azərbaycan Respublikası İnzibati Xətalar Məcəlləsinin 346.1-ci maddəsi ilə təqsirləndirilməsinə dair qəbul etdiyi inzibati tənbeh vermə haqqında qərarların ləğv edilməsini xahiş etmişdir. Məhkəmə tərəfindən iş materialları araşdırılarkən müəyyən olundu ki, inzibati xəta haqqında qərardan şikayət üzrə icraatı rədd hallar mövcuddur. Barəsində inzibati tənbeh vermə haqqında qərarlar qəbul edilmiş şəxs X2 oğlu tərəfindən verilmiş ərizə natamamdır. Belə ki X2 oğlu ərizəsində konkret olaraq hansı qərardan şikayət etməsini göstərməmişdir. Onun ərizəsinə əlavə etdiyi inzibati tənbeh vermə haqqında qərarlar hər biri müxtəlif vaxtlarda qəbul edilmişdir. Həmçinin şikayət verilmiş qərarların qəbul edilmə tarixindən 1 ildən artıq müddət keçmişdir və həmin qərarlardan hazırda verilmiş şikayət üzrə şikayət vermə müddətinin ötürülüb-ötürülməməsi iş materiallarından müəyyən oluna bilmir. X2 oğlu buraxılmış müddətin üzrlü hesab edilməsi üçün Məhkəməyə hər hansı bir vəsatət də verməmişdir. Qeyd olunan halların mövcudluğu Məhkəməyə yekun nəticəyə gəlməyə imkan vermir. Belə ki Azərbaycan Respublikası İnzibati Xətalar Məcəlləsinin 132.1.2-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxmağa hazırlıq zamanı hakim, səlahiyyətli orqan (vəzifəli şəxs) tərəfindən inzibati xəta haqqında iş üzrə icraatı rədd edən halların mövcudluğu məsələsini həll edir. Həmin Məcəllənin 133.2.8-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxılarkən qəbul edilmiş qərarın qanuniliyi və əsaslılığı iş üzrə olan və əlavə təqdim edilmiş materiallar əsasında yoxlanılır. Həmin Məcəllənin 134.1-ci maddəsinə əsasən Məhkəmə inzibati xəta haqqında iş üzrə qərardan verilən şikayətə və ya protestə baxaraq qərar qəbul edir. Həmin Məcəllənin 132.2-ci maddəsinə əsasən şikayətə və ya protestə baxılma hakimin, səlahiyyətli orqanın (vəzifəli şəxsin) səlahiyyətinə aid olmadıqda, şikayət və ya protest bütün materiallarla birlikdə aidiyyəti üzrə göndərilir. Həmin Məcəllənin 126.1-ci maddəsinə əsasən barəsində inzibati xəta haqqında iş üzrə qərar qəbul edilmiş şəxs yol hərəkəti qaydaları, yol hərəkəti təhlükəsizliyinin təmin edilməsi və avtomobil yollarından istifadə qaydaları əleyhinə olan inzibati xətaların törədilməsinə görə inzibati tənbeh tətbiq etmə haqqında qərar ona bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan 20 (iyirmi) gün müddətində yuxarı səlahiyyətli orqana (vəzifəli şəxsə) və ya məhkəməyə şikayət edə bilər. Beləliklə yuxarıda qeyd olunanları nəzərə alaraq Məhkəmə hesab edir ki, X2 oğlunun müraciəti baxılmadan geri qaytarılmalıdır. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 109, 118-ci maddələrini rəhbər tutaraq, məhkəmə qərara aldı: X2 oğlunun müraciəti baxılmadan geri qaytarılsın. HAKİM: PƏRVİZ HACİYEV