Sumqayıt Şəhər Məhkəməsi Qərardad — İş №3(060)-3336/2025

Azərbaycan Respublikası adından QƏRARDAD Sumqayıt şəhəri İş № 3(060)-3336/2025 10.12.2025 SUMQAYIT ŞƏHƏR MƏHKƏMƏSİ Hakim İsmayılov Samir Bəyistan oğlu, Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə Sumqayıt şəhəri üzrə İcra İdarəsindən daxil olmuş inzibati xəta haqqında materiala baxaraq, MÜƏYYƏN ETDİ: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib edilmiş inzibati xəta haqqında material baxılması üçün məhkəməyə göndərilmişdir. Məhkəmə inzibati xəta haqqında materialın Azərbaycan Respublikasının İnzibati Xətalar Məcəlləsinin 106-cı maddəsinə müvafiq olaraq baxılması üçün hazırlanması zamanı müəyyən etmişdir ki, inzibati xəta haqqında iş üzrə materiallar natamamdır və işə baxılarkən onu tamamlamaq mümkün deyil. Belə ki, Şəxs barəsində inzibati xəta haqqında protokol ona görə tərtib edilmişdir ki, o icra sənədində olan tələbi üzrsüz səbəbdən icra məmuru tərəfindən müəyyən olunmuş müddətdə icra etməmiş və icra məmurunun qanuni tələblərini yerinə yetirməmişdir. Lakin, icra məmuru tərəfindən inzibati xəta haqqında protokol tərtib edilməmişdən öncə borclunun icra tələbini üzrsüz səbəbdən icra etməməsi və icra sənədi üzrə icra məmurunun qanuni tələblərini yerinə yetirməməsi təsdiq edən yetərli sübutlar toplanmamışdır. Belə ki, məhkəməyə təqdim edilmiş iş materiallarına əsasən müəyyən edilir ki, Sumqayıt Şəhər Məhkəməsinin xx.xx.2025-ci il tarixli 8(060)-625/2025 saylı icra sənədinə əsasən xx.xx.2025-ci il tarixdən başlayaraq xx.xx.2009-cu il təvəllüdlü X1 və xx.xx.2025-ci il təvəllüdlü X2 yetkinlik yaşlarına çatana kimi saxlanılmaları üçün Sumqayıt Şəhər Məhkəməsinin xx.xx.2025-ci il tarixli 2(060)-6624/2025 saylı qətnaməsi əsasında tutulan aliment miqdarı hər ay hər uşaq üçün ölkə üzrə müəyyən edilmiş minimum əmək haqqının 0,52 misli həddində indeksasiya edilmişdir. Tərtib edilmiş protokola əsasən isə ödənilməmiş aliment məbləği 392 manat təşkil edir, bu məbləğ isə bir aylıq aliment miqdarından da edir. Bu hal isə borclu tərəfindən aradan keçən bir neçə ay ərzində mütamadi ödənişlər edilməsini təsdiq edir. Eyni zamanda elektron məhkəmə sistemindən çıxarışlara əsasən müəyyən edilir ki, borclu rəsmi qaydada işləyir və ayda 501 manat əmək haqqı alır. Lakin, icra məmuru tərəfindən “İcra haqqında” Azərbaycan Respublikası Qanununda nəzərdə tutulmuş heç bir məcburi icra tədbiri həyata keçirilmədən, yəni tam araşdırma aparılmadan borclu barədə inzibati xəta haqqında protokol tərtib edilmişdir. Belə ki, borclu rəsmi əmək haqqı almasına baxmayaraq tələb onun əmək haqqında yönəldilməmişdir. Bundan əlavə icra sənədinin icra edilməməsinin səbəbləri barədə borclunun izahatı alınmamışdır. Məhkəmə qeyd edir ki, indiki halda mövcud materiallar əsasında borclu Şəxs icra sənədini icra etməməsinin səbəbinin üzrlü və ya üzrsüz səbəbdən olmasını müəyyən etmək mümkün deyil. İcra sənədinin icrası ilə əlaqədar icra məmuru tərəfindən “İcra haqqında” Azərbaycan Respublikası Qanununda nəzərdə tutulmuş müvafiq tədbirlər görüldükdən sonra şəxsin icra sənədini üzrsüz səbəbdən icra edib-etməməsi məsələsi araşdırılaraq müvafiq qiymət verilə bilər. “İcra haqqında” Azərbaycan Respublikası Qanununun 43.1-ci maddəsinə əsasən məcburi icra tədbirləri aşağıdakılardır: 43.1.1. borclunun əmlakı üzərinə həbs qoymaq və onu satmaq yolu ilə tələbin əmlaka yönəldilməsi; 43.1.2. tələbin borclunun əmək haqqına, pensiyasına, təqaüdünə və sair gəlirlərinə yönəldilməsi; 43.1.3. tələbin borclunun üçüncü şəxslərdə olan pul vəsaitlərinə və digər əmlakına yönəldilməsi; 43.1.4. icra sənədində göstərilmiş müəyyən əşyaların borcludan götürülüb tələbkara verilməsi; 43.1.5. bu Qanuna və Azərbaycan Respublikasının digər qanunvericilik aktlarına uyğun olaraq icra sənədinin icrasını təmin edən başqa tədbirlər. Həmin Qanunun 44.1-ci maddəsinə əsasən m əcburi icra tədbirlərinin tətbiqinin əsasları aşağıdakılardır: 44.1.1. bu Qanunla müəyyən edilmiş qaydada tərtib olunmuş icra sənədinin icra məmuruna təqdim olunması; 44.1.2. icra məmuru tərəfindən icraata başlamaq haqqında qərarın qəbul edilməsi; 44.1.3. könüllü icra üçün icra məmuru tərəfindən borcluya verilmiş müddətin keçməsi. Azərbaycan Respublikasının İnzibati Xətalar Məcəlləsinin 109.1.6-cı maddəsinə əsasən protokol və digər materiallar səlahiyyəti olmayan şəxslər tərəfindən tərtib olunduqda, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması haqqında qərardad qəbul edilir. Göstərilənlərə əsasən məhkəmə hesab edir ki, Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə Sumqayıt şəhəri üzrə İcra İdarəsindən daxil olmuş inzibati xəta haqqında material natamam olduğundan geri qaytarılmalıdır. Qeyd olunanlara əsasən və Azərbaycan Respublikası İXM-in 106 və 109-cu maddələrini rəhbər tutaraq, məhkəmə QƏRARA ALDİ: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə Sumqayıt şəhəri üzrə İcra İdarəsindən daxil olmuş inzibati xəta haqqında material geri qaytarılsın. Qərardaddan şikayət verilə bilməz. Hakim: Samir İsmayılov