Tərtər Rayon Məhkəməsi Qərar — İş №3(061)-552/2025

Azərbaycan Respublikası adından QƏRAR Tərtər rayonu İş № 3(061)-552/2025 23.07.2025 TƏRTƏR RAYON MƏHKƏMƏSİ Hakim Məmmədova Maya Vahid qızının sədrliyi, X2 oğlunun katibliyi, inzibati xəta haqqında protokolu tərtib etmiş X1, barəsində inzibati xəta haqqında iş üzrə icraat aparılan şəxs Şəxs iştirakları ilə, Şəxs Azərbaycan Respublikası İnzibati Xətalar Məcəlləsinin 535.1-ci maddəsi ilə nəzərdə tutulmuş inzibati xətaları törətməsi barədə Tərtər Rayon Polis şöbəsindən daxil olmuş inzibati xəta haqqında iş materiallarına baxaraq, məhkəmə MÜƏYYƏN ETDİ: Tərtər Rayon Polis şöbəsinin sahə rəisi X3 tərəfindən Şəxs barəsində Azərbaycan Respublikası İXM-in 535.1-ci maddəsi ilə nəzərdə tutulmuş inzibati xətaların törədilməsi barədə protokol tərtib edilərək baxılması üçün məhkəməyə göndərilmişdir. İş materiallarına əlavə edilmiş xx.xx.2025-ci tarixli, MN ******* nömrəli inzibati xəta haqqında protokolda qeyd edilmişdir ki, xx.xx.2025-ci il tarixdə Şəxs Ağdərə Rayon dördyol postunda polisin qanuni tələbinə qəsdən tabe olmamış, nəticədə Azərbayan Respublikası İXM-in 535.1-ci maddəsində nəzərdə tutulmuş inzibati xətanı törətmişdir. Məhkəmə iclasında Tərtər Rayon Polis şöbəsinin sahə rəisi, polis leytenantı X3 protokolun məzmununa uyğun çıxış edərək protokolun təmin edilməsini məhkəmədən xahiş etmişdir. Məhkəmə iclasında barəsində inzibati icraat aparılan şəxs Şəxs çıxışında bildirmişdir ki, xx.xx.2025-ci il tarixdə saat 02:05 radələrində Ağdərə rayon dördyol postuna içkili halda özünə məxsus Daf markalı **-JL-*** dövlət qeydiyyat nişanlı avtomobili ilə getmiş, polis əməkdaşları onu saxlayaraq portalının olmasını yoxlamışlar. Onun portalı olmuş, yanında əyləşən avtomobil ustasının portalı olmamışdır. Bu vaxt polis əməkdaşları ustanı buraxmadıqları üçün əsəbləşmiş, polis əməkdaşları ilə aralarına mübahisə yaranmışdır. İçkili olduğundan polis əməkdaşlarına hörmətsizlik edərək onların ünvanlarına xoşagəlməz ifadələr işlətmişdir. Dəfələrlə onu nizam intizama dəvət etsələr də, o məhəl qoymayaraq əməlinə davam edərək, polisin geyim formasına əl atmışdır. İfadəsinin sonunda barəsində yüngül inzibati tənbeh tətbiq edilməsini məhkəmədən xahiş etmişdir. Məhkəmə iclasında şahid qismində çıxış edən Tərtər Rayon Polis şöbəsinin polis nəfəri polis kiçik serjantı X4 çıxışında bildirmişdir ki, xx.xx.2025-ci il tarixdə saat 02:05 radələrində Ağdərə rayon dördyol postunda xidmətdə olarkən bir nəfər şəxsin avtomobil ilə posta yaxınlaşdığını görüb həmin şəxsin və yanında əyləşən şəxsin icazə portalının olubolmamasını yoxlamaq məqsədilə avtomobilə yaxınlaşaraq özünü təqdim etmiş, həmin şəxslərin icazə portalını yoxlayan zaman onlardan birinin icazə portalının olmamasını müəyyən etmişdir. Onun əraziyə keçməsinə icazə olmamasını bildirən zaman avtomobilin sürücüsü içkili halda olduğu aşkar görünən sonradan adını bildiyi Şəxs ucadan nalayiq ifadələr işlətmişdir. Dəfələrlə onu nizam intizama dəvət etmişdir. Lakin o, polisin qanuni tələblərinə tabe olmayaraq nalayiq ifadələr işlətməyə davam etmiş, hətta onun formasına əl ataraq polisin qanuni tələbinə tabe olmamışdır. Odur ki, o, Tərtər Rayon Polis şöbəsinə məcburi gətirilərək təhvil verilmişdir. Məhkəmə işdə iştirak edən şəxsləri dinləyib, iş materiallarındakı sübutları tədqiq edərək hesab edir ki, toplanmış sübutlarla Şəxs inzibati xətanı törətməsində təqsiri tam sübuta yetir və onun törətdiyi əməl Azərbaycan Respublikası İXM-in 535.1-ci maddəsi ilə düzgün tövsif olunmuşdur. Belə ki, İXM-in 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Şəxs nalayiq ifadələr işlədərək ictimai qaydanı pozması və polisin qanuni tələblərinə qəsdən tabe olmaması, beləliklə İXM-in 535.1-ci maddəsi ilə nəzərdə tutulmuş inzibati xətanı törətməsi özünün etirafedici izahatı, barəsində tərtib edilmiş protokol və sənədlərlə tam şəkildə sübuta yetirilir. İXM-in 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 9.1-ci maddəsinə görə, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətanın xarakterinə, onun törədilməsi hallarına uyğun, qanuni və əsaslı olmalıdır. Həmin Məcəllənin 31.2-ci maddəsinə görə fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə Şəxs əməlini etiraf etməsini onun məsuliyyəti yüngülləşdirən hal hesab edir, Həmçinin İXM-nin 33.1.1-ci maddəsinə əsasən səlahiyyətli şəxslərin hüquqazidd hərəkəti dayandırmağı tələb etdiklərinə baxmayaraq, bu hərəkəti davam etdirməsi və inzibati xətanı sərxoş halda törətməsi Şəxs məsuliyyətini ağırlaşdıran haldır. Beləliklə, məhkəmə törədilmiş inzibati xətanın xarakterini, inzibati xətanı törətmiş şəxsin şəxsiyyətini, məsuliyyətini ağırlaşdıran və yüngülləşdirən halları nəzərə alıb, iş üzrə toplanmış sübutları qiymətləndirərək hesab edir ki, Şəxs İXM-in 535.1-ci maddəsinin sanksiyasında nəzərdə tutulmuş inzibati həbs növündə inzibati tənbeh tətbiq etməklə inzibati tənbehin məqsədlərinə nail olmaq olar. Bu növ inzibati tənbehin təyin edilməsi qanuni və ədalətli olmaqla yanaşı, həm də inzibati məsuliyyətə cəlbetmənin məqsədlərinə uyğundur. İş materiallarına əlavə edilmiş xx.xx.2025-ci il tarixli inzibati qaydada tutma protokoldan məlum olur ki, Şəxs həmin gün saat 02:40-da inzibati qaydada tutulmuşdur. Buna görə də həbsetmənin əvvəli həmin tarixdən hesablanmalıdır. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 114, 115, 128-130-cu maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 535.1-ci maddəsi ilə nəzərdə tutulmuş inzibati xətanın törədilməsində təqsirli bilinərək 15 (on beş) gün müddətində inzibati həbs edilsin. İnzibati həbsdə olmanın əvvəli xx.xx.2025-ci il tarixdən saat 02:40-dan hesablansın. Qərarın icrası Tərtər Rayon Polis şöbəsinə həvalə edilsin. Qərardan rəsmi qaydada verildiyi vaxtdan 10 (on) gün müddətində Tərtər Rayon Məhkəməsi vasitəsilə və ya birbaşa Gəncə Apellyasiya Məhkəməsinə şikayət verilə bilər. Sədrlik edən Maya Məmmədova