Tərtər Rayon Məhkəməsi Qərar — İş №3(061)-639/2025

Azərbaycan Respublikası adından QƏRAR Tərtər rayonu İş № 3(061)-639/2025 18.09.2025 TƏRTƏR RAYON MƏHKƏMƏSİ Hakim Qubadov Tahir Möhsüm oğlunun sədrliyi, X11 oğlunun katibliyi, İnzibati xəta haqqında protokolu tərtib edən Tərtər rayon Polis Şöbəsinin İTB-nin polis sahə rəisi X2 İnzibati xəta törətmiş şəxs Şəxs iştirakı ilə, xx.xx.1992-ci ildə Tərtər rayonununu Əskipara kənddində anadan olmuş, Azərbaycan Respublikası vətəndaşı, orta təhsilli, subay, fərdi əməklə məşğul olan, Tərtər rayonunun Əskipara kəndində qeydiyyatda olan və Tərtər rayonunun Səhləbad kəndində yaşayan Azərbaycan Respublikası İXM-nin 535.1-ci maddəsi ilə Şəxs barəsində Tərtər rayon Polis Şöbəsindən daxil olmuş inzibati xəta haqqında protokola və əlavə edilmiş materiala Tərtər Rayon Məhkəməsinin binasında açıq məhkəmə iclasında baxaraq, MÜƏYYƏN ETDİ: Tərtər rayon Polis Şöbəsindən daxil olmuş xx.xx.2025-ci il tarixli, MN ******* saylı inzibati xəta haqqında protokoldan və əlavə edilmiş materiallardan görünür ki, Şəxs xx.xx.2025-ci il tarixdə, saat 11:30 radələrində Tərtər rayonu, Səhləbad kəndi ərazisində polis əməkdaşının qanuni tələblərinə tabe olmamışdır. Məhkəmə iclasında inzibati xəta haqqında protokolu tərtib edən Tərtər rayon Polis Şöbəsinin İTB-nin polis sahə rəisi X4 izahatında bildirmişdir ki, əməliyyat-istintaq qrupunda olarkən DİN-nin 102 xidmətindən daxil olmuş məlumata əsasən təhqiqatçı Anar İsmayıllı və sürücü ilə birlikdə ünvan 1 ünvana getmişlər. Orada onları Şəxs qarşılayaraq nə məqsədlə gəldiklərini soruşmuşdur. Ona gəlmələrinin səbəbini dedikdə, o, mübahisənin ailə məsələsi olduğunu deyərək onlara irad etmişdir. Şəxs Tərtər rayon Polis Şöbəsinə dəvət etdikdə, o, getmək istəməyərək maşına könüllü olaraq minməmişdir. Buna baxmayaraq onu zorla post patrul maşınına mindirib Tərtər rayon Polis Şöbəsinə gətirərək barəsində raportla şöbənin rəhbərliyinə müraciət etmişlər. Şəxs izahat verməkdən imtina etmiş, heç bir sənədi imzalamamışdır. Bundan sonra onun barəsində xx.xx.2025-ci il tarixli,MN ******* saylı inzibati xəta haqqında protokol tərtib etmişdir. Şəxs protokolu da imzalamamışdır. Məhkəmə iclasında inzibati xəta törətmiş şəxs qismində dindirilən Şəxs məhkəmə iclasında izahatında bildirmişdir ki, asma-bronxit xəstəliyiindən əziyyət çəkir. Həm də beyin daxili təzyiqi mövcud olduğundan əsəblərinə hakim ola bilmir. Həmin səbəbdən dərmanlar qəbul edir, lakin maddi vəziyyətinin yaxşı olmadığı üçün dərmanları ala bilməmiş və dərman qəbul edə bilməmişdir. Dərmanlarını vaxtında qəbul etmədiyi üçün anası Baxşalıyeva Könül iradını bildirdiyi üçün aralarında sözlü mübahisə olmuşdur. Bu səbəbdən nənəsi Mirzəliyeva Şərqiyyənin də halı pisləşdiyi üçün təcili tibbi yardım çağırmaq (103) əvəzinə polisə (102) zəng etmişdir. Polis əməkdaşları gəldikdə onlara mübahisənin ailə məsələsi olduğunu deyərək gəlmələrinə iradını bildirmişdir. Həmin vaxt polis əməkdaşı Anar İsmayıllı qolundan tutub buraraq arxa tərəfinə keçmiş və boğazını sıxmışdır. Asma xəstəsi olduğu üçün nəfəs almaqda çətinlik çəkmiş, istər-istəməz reaksiya vermişdir. Anası da onun vəziyyətini görərək özündən getmişdir. Bu səbəbdən həm də çabalayaraq polislərin əlindən çıxıb anasına köməklik etmək istəmişdir. Məqsədi polisə müqavimət göstərmək olmamışdır. Polis şöbəsinə getməkdən imtina etməmişdir. Özündən asılı olmadan işin bu yerə gəlib çatmasına peşmandır. Protokolla razı deyil və bu səbəbdən protokolu imzalamqdan imtina etmişdir. Məhkəmə iclasında şahid qismində izahat verən X6 izahatında bildirmişdir ki, Tərtər RPŞ-də təhqiqatçı vəzifəsində xidmət edir. xx.xx.2025-ci il tarixdə saat 11:30 radələrində əməliyyat-istintaq qrupunda olarkan Tərtər rayonu Səhləbad kənd sakini Şərqiyyə Mirzəliyeva adlı şəxsin DİN-nin 102 xidmətinə zəng edərək verdiyi məlumat əsasında polis sahə rəisi Cabbarov Elmidar və sürücü ilə birlikdə hadisə yerinə getmişdir. Orada onları Şəxs qarşılayaraq nə məqsədlə gəldiklərini soruşmuşdur. Ona gəlmələrinin səbəbini dedikdə, o, mübahisənin ailə məsələsi olduğunu deyərək onlara irad etmişdir. Şəxs Tərtər rayon Polis Şöbəsinə dəvət etdikdə, o, getmək istəməyərək maşına könüllü olaraq minməmiş, onlara tabesizlik göstərmişdir. Buna baxmayaraq onu zorla post patrul maşınına mindirib Tərtər rayon Polis Şöbəsinə gətirmişlər. Məhkəmə iclasında şahid qismində izahat verən X5 izahatında bildirmişdir ki, Şəxs onun oğludur. Ruslanın uşaq vaxtından beyin daxili təzyiqi olmuş, maddi vəziyyətlərilə əlaqədar onu müalicə etdirə bilməmişlər. Bu səbəbdən də əsəb problemləri yaşadığı üçün dərman qəbul edir. Həmçinin asma xəstəliyi olduğu üçün nəfəs almasında çətinliyi vardır. Ruslan dərmanları vaxtında qəbul etmədiyi üçün xx.xx.2025-ci il tarixdə saat 11:30 radələrində aralarında ailə daxili mübahisə yaranmışdır. Bu səbəbdən anası Mirzalıyeva Şərqiyyə (Ruslanın nənəsi) də narahatçılıq keçirmiş və təcili tibbi yardım çağırmaq (103) əvəzinə polisə (102) zəng etmişdir. Polis əməkdaşları gəldikdə Ruslan onlara mübahisənin ailə məsələsi olduğunu deyərək gəlmələrinə iradını bildirmişdir. Həmin vaxt polis əməkdaşı X7 qolundan tutub buraraq arxa tərəfinə keçmiş və boğazını sıxmışdır. Asma xəstəsi olduğu üçün Russlan nəfəs almaqda çətinlik çəkmiş, istər-istəməz reaksiya vermişdir. Özü də Ruslanın vəziyyətini görərək özündən getmişdir. Bu səbəbdən həm də Ruslan ona kömək edə bilmək üçün çabalayaraq polislərin əlindən çıxmaq istəmişdir. Ruslanın məqsədi polisə müqavimət göstərmək olmamış, nə də ki, Ruslan Polis şöbəsinə getməkdən imtina etməmişdir. Məhkəmə iclasında şahid qismində izahat verən X1 izahatında bildirmişdir ki, Şəxs onun nəvəsidir. Ruslanın uşaq vaxtından beyin daxili təzyiqi var, həmçinin bronxial-asma xəstəliyindən əziyyət çəkir. Ruslan dərmanları vaxtında qəbul etmədiyi üçün qızı Könül ilə aralarında mübahisə yaranmışdır. Həmin vaxt özü də narahatçılıq keçirdiyi üçün təcili tibbi yardım çağırmaq istəmişdir. Səhhəti ilə əlaqədar tez-tez özünə görə təscili tibbi yardım çağırmalı olur. Həmin vaxtı da 103 yığmaq əvəzinə səhvən 102-ni yığmışdır. Polislərr gəldikdən sonra Ruslanla onların arasında mübahisə olmuş, polislər Ruslanı yaxalamışlar. Həmin vaxt Ruslanın anasının ürəyi getmişdir.Ruslan istədi ki, polisslərin əlindən çıxın anasına kömək etsin. Lakin polislər onu buraxmadılar. Ruslan “panikatak” xəstəsidir. Dərman atmayanda əsəbi olur. İşdə olan Tərtər rayon Polis Şöbəsinin İTB-nin polis sahə rəisi X4 tərəfindən tərtib edilmiş xx.xx.2025-ci il tarixli, MN MN ******* saylı inzibati xəta haqqında protokoldan görünür ki, Şəxs xx.xx.2025-ci il tarixdə, saat 11:30 radələrində Tərtər rayonu, Səhləbad kəndi ərazisində polis əməkdaşının qanuni tələblərinə qəsdən tabe olmamışdır. Onun əməli Azərbaycan Respublikası İXM-nin 535.1-ci maddəsi ilə tövsif edilmişdir. Şəxs həmin protokolla razılaşmayaraq imzalamqdan imtina etmişdir. İşdə olan xx.xx.2025-ci il tarixli inzibati qaydada tutma haqqında protokoldan görünür ki, Şəxs xx.xx.2025-ci il tarixdə saat 13:45-də inzibati qaydada tutulmuşdur. Azərbaycan Respublikası İXM-nin 76.1-ci maddəsinə əsasən inzibati xətanın olubolmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, müvafiq icra hakimiyyəti orqanının müəyyən etdiyi orqanın (qurumun) informasiya sistemində, habelə digər dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Beləliklə, məhkəmə araşdırması zamanı inzibati xəta haqqında protokolu tərtib edən Tərtər rayon Polis Şöbəsinin İTB-nin polis sahə rəisi X2, inzibati xəta törətmiş şəxsin və şahidlərin izahatları, məhkəmə iclasında tədqiq edilən inzibati xəta haqqında protokol və işin digər materialları ilə müəyyən olundu ki, Şəxs xx.xx.2025-ci il, saat 11:30 radələrində Tərtər rayonu, Səhləbad kəndi ərazisində polis əməkdaşının qanuni tələblərinə qəsdən tabe olmamışdır. Bununla da, o, Azərbaycan Respublikası İXM-nin 535.1-ci maddəsində nəzərdə tutulmuş inzibati xətanı törətmişdir. O, törətdiyi inzibati xətaya görə xx.xx.2025-ci il tarixdə saat 13:45-də inzibati qaydada tutulmuşdur. Azərbaycan Respublikası İXM-nin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə, fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Məhkəmə işin yuxarıda müəyyən olunmuş hallarına əsaslanaraq hesab edir ki, Şəxs əməli inzibati orqan tərəfindən düzgün olaraq Azərbaycan Respublikası İXM-nin 535.1-ci maddəsi ilə töfsif edilmişdir. Azərbaycan Respublikası İXM-nin 32 və 33-cü maddələrinə görə fiziki və ya vəzifəli şəxslər barəsində inzibati tənbeh tətbiq edilərkən xətanın xatakteri, inzibati xəta törədən şəxsin şəxsiyyəti, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə Şəxs əməlindən səmimi peşimanlıq hissi keçirməsini məsuliyyəti yüngülləşdirən hal kimi nəzərə alır, onun barəsində məsuliyyəti ağırlaşdıran hal müəyyən edilməmişdir. Azərbaycan Respublikası İXM-nin 3-cü maddəsinə görə yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 16.1-ci maddəsinə görə inzibati xəta törədərkən on altı yaşı tamam olmuş fiziki şəxslər inzibati məsuliyyətə cəlb olunurlar. Həmin Məcəllənin 21-ci maddəsinə görə inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Məhkəmə inzibati xəta haqqında iş materallarını araşdıraraq, işin yuxarıda müəyyən olunmuş hallarına əsaslanaraq və yuxarıda istinad olunan qanunvericilik normalarının müddəalarını rəhbər tutaraq hesab edir ki, Şəxs Azərbaycan Respublikası İXM-nin 535.1-ci maddəsində nəzərdə tutulmuş inzibati xətanı törətmişdir və o, həmin maddə ilə inzibati məsuliyyətə cəlb olunmalıdır. Məhkəmə qeyd etməyi lazım bilir ki, inzibati xəta törətmiş Şəxs törətdiyi inzibati xətanı səmimi şəkildə etiraf edərək peşiman olmasını bildirməsi onun müsbət fərdi-psixi xüsusiyyəti barədə mülahizə yürütməyə əsas verir, onun islah olunmaz, yaxud çətin islah olunan insan kimi xarakterizə etməyə imkan vermir. Məhkəmə prosesinin gedişində Şəxs müsbət fərdipsixi xüsusiyyətləri müşahidə olunmuş, proses iştirakçısı kimi mədəni və etik qaydalara uyğun davranış nümayiş etdirmişdir. Qeyd olunan hallar ona inzibati tənbehin məqsədlərinin təmin olunması baxımından daha yüngül tənbeh təyin edilməsinin zəruriliyini şərtləndirir. Məhkəmə hesab edir ki, Şəxs cərimə növündə inzibati tənbeh təyin etməklə də inzibati tənbehin məqsədlərinə çatmaq olar. Ona görə də məhkəmə ona təqsirləndiyi maddənin sanksiyasında nəzərdə tutulan cərimə inzibati tənbehinin təyin edilməsini məqsədəmüvafiq hesab edir. Məhkəmə Şəxs törətdiyi inzibati xətanın xarakterini, barəsində olan məsuliyyəti yüngülləşdirən halları nəzərə alaraq, onun barəsində Azərbaycan Respublikası İXM-nin 535.1-ci maddəsinin sanksiyasında nəzərdə tutulan cərimə növündə inzibati tənbeh tətbiq edilməli və o, dərhal məhkəmə iclas zalından azad edilməlidir. Azərbaycan Respublikası İXM-nin 31.4-1-ci maddəsinə əsasən, inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Azərbaycan Respublikası İXM-nin 128.1-ci maddəsinə görə barəsində qərar çıxarılmış fiziki şəxs, yetkinlik yaşına çatmayanların qanuni nümayəndəsi, hüquqi şəxsin nümayəndəsi, zərər çəkmiş şəxs, müdafiəçi və nümayəndə, həmçinin bu Məcəllənin 43.2-ci maddəsində nəzərdə tutulan vəzifəli şəxs inzibati xəta haqqında iş üzrə qərardan şikayət, prokuror isə protest verə bilər. Həmin Məcəllənin 130.1-ci maddəsinə görə bu Məcəllənin 126.1-ci maddəsində nəzərdə tutulmuş hallar istisna olmaqla, qərarın surəti bu Məcəllənin 57.1-57.5-ci maddələrində nəzərdə tutulmuş rəsmi qaydada verildiyi vaxtdan on gün müddətində inzibati xəta haqqında iş üzrə qərardan şikayət və ya protest verilə bilər. Həmin Məcəllənin 137.2-ci maddəsinə görə inzibati xəta haqqında iş üzrə qərardan şikayət və ya protest üzrə hakim (vəzifəli şəxs) tərəfindən qəbul edilmiş qərardan bu Məcəllənin 130cu maddəsində nəzərdə tutulmuş müddətdə şikayət verilə bilər. Beləliklə, məhkəmə yuxarıda göstərilənlərə əsaslanaraq və Azərbaycan Respublikası İnzibati Xətalar Məcəlləsinin 114.1.1, 128-130, 137-ci maddələrini rəhbər tutaraq, Q Ə R A R A A L D İ: Şəxs Azərbaycan Respublikası İnzibati Xətalar Məcəlləsinin 535.1-ci maddəsi ilə təqsirli bilinsin və barəsində 200 (iki yüz) manat məbləğində cərimə inzibati tənbehi tətbiq edilsin. Şəxs xx.xx.2025-ci il saat 13:45-dən inzibati qaydada tutulduğu müddət nəzərə alınaraq barəsində Azərbaycan Respublikası İnzibati Xətalar Məcəlləsinin 31.4-1-ci maddəsi tətbiq edilməklə ona təyin edilmiş 200 manat cərimə inzibati tənbehi azaldılaraq cərimənin məbləği 150 (bir yüz əlli) manat müəyyən edilsin. Şəxs məhkəmə iclas zalından dərhal azad edilsin. Qərarın icrası Tərtər rayon İcra və Probasiya Şöbəsinə həvalə edilsin. Qərardan rəsmi qaydada verildiyi vaxtdan 10 gün müddətinə Tərtər Rayon Məhkəməsi vasitəsi ilə Gəncə Apellyasiya Məhkəməsinə apellyasiya şikayəti verilə bilər. Hakim: Tahir Qubadov