Tovuz Rayon Məhkəməsi Qərar — İş №3(062)-124/2024

Azərbaycan Respublikası adından QƏRAR Tovuz rayon İş № 3(062)-124/2024 14.02.2024 TOVUZ RAYON MƏHKƏMƏSİ Hakim Baxşıyev Qafil Yavər oğlunun sədrliyi, İsayev Emin Arif oğlunun katibliyi, Protokolu tərtib etmiş Tovuz RPŞ İTB-nin sahə rəisi, polis leytenantı X2, Zərərçəkmiş şəxs X1, Barəsində inzbati xəta haqda iş üzrə icraat aparılan Şəxs iştirakları ilə xx xxxx 1986-cı ildə Tovuz rayonunda anadan olmuş, Azərbaycan Respublikası vətəndaşı, orta təhsilli, ailəli, fərdi əməklə məşğul olan, əlilliyi olmayan, deməsinə görə əvvəllər məhkum olunmamış, Tovuz rayonu Bozalqanlı kəndində qeydiyyatda olan və yaşayan, Şəxs barəsində Azərbaycan Respublikası İXM-nin 227-ci maddəsi ilə Tovuz Rayon Polis Şöbəsindən daxil olmuş inzibati xəta haqqında materiala baxaraq, MÜƏYYƏN ETDİ Şəxs məhkəməyə verilmişdir ona görə ki, xx.xx.2024-cü il tarixdə X3 məxsus Tovuz rayonu Abulbəyli kəndində yaşadığı fərdi yaşayış evinin həyətindən İslam Mirzəliyevə məxsus ümumilikdə 11 ədəd göyərçini oğurlayaraq xırda talama əməli törətmişdir. Barəsində inzibati xəta haqda iş üzrə icraat aparılan Şəxs məhkəmə iclasında verdiyi izahatında törətdiyi xətanı etiraf edərək bildirdi ki, zərərçəkmişi əvvəllər də tanımışdır. Əvvəllər özü də göyərçin saxlamışdır. 14 yanvar 2024-cü il tarixdə İslam Mirzəliyevə məxsus həyətdən ümumilikdə 11 ədəd göyərçin oğurlamışdır. Sonradan həmin göyərçinlərin ikisi istisna olmaqla qalanını qaytarmışdır. İkisini isə pişik yediyi üçün qaytara bilməmişdir. İkisinin əvəzinə isə İslam Mirzəliyev ilə razılaşmalarına əsasən ona pul ödəmişdir. İslam Mirzəliyevə dəyən zərəri ödəyib, onunla barışıq əldə etmişdir. Odur ki, məhkəmədən barəsində olan işin ictraatına xitam verilməsini xahiş etdi. İş üzrə zərərçəkmiş şəxs X4 məhkəmə iclasında göstərdi ki, əvvəldən Eldarı tanıyır. Onunla heç bir ədavəti və düşmənçiliyi olmamışdır. Özü quş saxlamaqla məşğuldur. 14 yanvar 2024-cü il tarixdə axşam saat 18 radələrində quşlarını yemləyərək damlarına salmışdır. 15 yanvar 2024-cü il tarixdə yuxudan durub saat 10 radələrində quş damına daxil olanda görmüşdür ki, göyərçinlərinin 11 ədədi yerində olmamışdır. Bundan sonra polisə müraciət etmişdir. Sonradan bəlli olmuşdur ki, quşları Eldar götürmüşdür. Sonradan Eldar səhvini başa düşərək quşlardan ikisindən başqa qalanlarını qaytarmışdır. Vermədiyi iki quşun isə pulunu qaytarmışdır. Hazırda Şəxs ona vurduğu zərəri tam olaraq ödəmişdir. Onunla barışıq əldə etmişdir. Şəxs qarşı heç bir şikayət və tələbinin olmadığını nəzərə alaraq işin icraatına xitam verilməsini xahiş etdi. İşə əlavə edilmiş 25 yanvar 2024-cü il tarixli cinayət işinin başlanmasının rədd edilməsi barədə qərarın surətindən görünür ki, Şəxs əməlində cinayət tərkibi olmadığından barəsində cinayət işinin başlanması rədd edilmişdir. İşə əlavə edilmiş, X1 ərizəsindən görünür ki, Şəxs ona vurmuş olduğu zərəri tam olaraq ödəmişdir, onunla barışmışdır, ona qarşı heç bir şikayət və tələbi qalmamışdır. Odur ki, işin icraatına xitam verilməsini məhkəmədən xahiş etmişdir. Məhkəmə barəsində inzibati xəta haqda iş üzrə icraat aparılan şəxsin və zərərçəkmiş şəxsin ifadələrini və iş materiallarını araşdıraraq hesab edir ki, inzibati xəta törətmiş Şəxs barəsində olan inzibati xəta haqda iş üzrə icraata xitam verilməlidir. Azərbaycan Respublikası İXM-nin 39.2-ci maddəsinə əsasən bu Məcəllənin 227, 232-1-ci və 351-1-ci maddələrində nəzərdə tutulmuş inzibati xəta haqqında iş üzrə icraat zamanı inzibati xəta törətmiş şəxs vurulmuş ziyanı tamamilə ödədikdə və zərər çəkmiş şəxslə barışdıqda inzibati iş üzrə icraata xitam verilir. Həmin Məcəllənin 53.1.10-cu maddəsinə əsasən bu Məcəllənin Xüsusi hissəsinin müvafiq maddələrinin Qeyd hissələrində bilavasitə müəyyən edilmiş hallarda inzibati xətanı törətmiş şəxs vurulmuş ziyanı tamamilə ödədikdə və zərərçəkmiş şəxslə barışdıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 114.1.4-cü maddəsinə əsasən, inzibati xəta haqqında işlərə baxılarkən inzibati xəta barədə iş üzrə icraata xitam verilməsi haqqında qərar çıxarılır. Həmin Məcəllənin 114.2.1-ci maddəsinə əsasən ğu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilir. Məhkəmə iclasında müəyyən edildi ki, barəsində inzibati xəta haqda iş üzrə icraat aparılan Şəxs zərərçəkmiş şəxs kimi tanımış X4 ilə barışmışlar, ona dəymiş ziyanı tam ödəmişdir. Zərərçəkmiş şəxsin heç bir şikayəti və tələbi yoxdur. Odur ki, məhkəmə hesab edir ki, iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İXM-nin 106, 114 və 115-ci maddələrini rəhbər tutaraq, məhkəmə QƏRARA ALDİ: Şəxs barəsində Azərbaycan Respublikası İXM-nin 227-ci maddəsi ilə olan inzibati xəta haqqında iş üzrə icraata zərərçəkmiş şəxslə barışması əsası ilə xitam verilsin. Qərardan 10 (on) gün müddətinə Tovuz Rayon Məhkəməsi vasitəsi ilə Gəncə Apelyasiya Məhkəməsinə apelyasiya şikayəti və ya protesti verilə bilər. Sədrlik edən Qafil Baxşıyev