Tovuz Rayon Məhkəməsi Qərar — İş №3(062)-541/2025

Azərbaycan Respublikası adından QƏRAR Tovuz rayon İş № 3(062)-541/2025 22.07.2025 TOVUZ RAYON MƏHKƏMƏSİ Hakim Hünmətov Zaur Adil oğlunun sədrliyi, Məhkəmə iclasının katibi İsmayılov Emil İsrayıl oğlunun katibliyi, Protokol tərtib etmiş Tovuz RPŞ-si İTB-nin sahə rəisi, polis leytenantı X3, Barəsində inzibati xəta haqqında iş üzrə icraat aparılan şəxs Şəxs iştirakları ilə xx.xx.1998-ci il tarixdə Tovuz rayonu Aşağı Öysüzlü kəndində anadan olmuş, Azərbaycan Respublikası vətəndaşı, subay, orta təhsilli, işsiz, əlilliyi olmayan, Tovuz rayonu Aşağı Öysüzlü kəndində qeydiyyatda olan və yaşayan Şəxs barəsində Azərbaycan Respublikası İnzibati Xətalar Məcəlləsinin 510 və 535.1-ci maddələri ilə nəzərdə tutulmuş inzibati xətaları törətməsinə dair Tovuz Rayon Polis Şöbəsidən daxil olmuş inzibati xəta haqqında protokola məhkəmənin inzibati binasında açıq məhkəmə iclasında baxaraq, məhkəmə Müəyyən etdi: Tovuz RPŞ-si İTB-nin sahə rəisi, polis leytenantı X6 tərəfindən Şəxs Firidun oğlunun barəsində Azərbaycan Respublikası İnzibati Xətalar Məcəlləsinin 510 və 535.1-ci maddələri ilə nəzərdə tutulmuş inzibati xətaları törətməsi barədə xx.xx.2025-ci il tarixli, MN ******* saylı protokol tərtib edilərək Tovuz Rayon Məhkəməsinə təqdim edilmişdir. Protokolda qeyd olunmuşdur ki, Şəxs xx.xx.2025-ci il tarixdə Tovuz RPŞ-nin inzibati binasında ucadan nalayiq ifadələr işlətmiş və orada olan polis əməkdaşları onu nizamintizama dəvət etməsinə baxmayaraq, polis əməkdaşlarının qanuni tələblərinə tabe olmamışdır. Bununla da onun tərəfindən Azərbaycan Respublikası İnzibati Xətalar Məcəlləsinin 510 və 535.1-ci maddələri ilə nəzərdə tutulmuş inzibati xətalar törədilmişdir. Məhkəmə iclasında rotokol tərtib etmiş Tovuz RPŞ-si İTB-nin sahə rəisi, polis leytenantı X6 protokola uyğun izahat verərək göstərdi ki, barəsində inzibati icraat aparılan şəxs Şəxs xx.xx.2025-ci il tarixdə Tovuz RPŞ-nin inzibati binasında ucadan nalayiq ifadələr işlətmiş və orada olan polis əməkdaşları onu nizam-intizama dəvət etməsinə baxmayaraq, polis əməkdaşlarının qanuni tələblərinə tabe olmamışdır. Ona görə də bu barədə müvafiq protokol tərtib edilərək aidiyyəti üzrə baxılması üçün məhkəməyə göndərilmişdir. Odur ki, Şəxs barəsində inzibati həbs növündə inzibati tənbehin tətbiq edilməsini qanunamüvafiq hesab edir. Məhkəmə iclasında inzibati xəta haqqında iş üzrə icraat aparılan şəxs Şəxs inzibati xətanı etiraf etməyərək bildirdi ki, o, ailəsi ilə birlikdə Tovuz şəhəri Aşağı Öysüzlü kəndində yaşayır. xx.xx.2025-ci il tarixdə barəsində daxil olmuş şikayətlə bağlı Tovuz Rayon Polis Şöbəsinə gəlmişdir. O, polis şöbəsində nalayiq söyüşlər söyməmiş və polis qanuni tələblərinə tabesizlik göstərməmişdir. Odur ki, barəsində olan inzibati materialın icraatına xitam verilməsini xahiş etdi. Məhkəmə iclasında şahid qismində dindirilmiş X1 izahatında göstərdi ki, o, 2006-cı ildən DİO-da, 2018-ci ildən isə Tovuz RPŞ-nin TB-nin baş təhqiqatçısı kimi xidmət edir. xx.xx.2025-ci il tarixdə saat 20 radələrində o, Tovuz RPŞ-nin inzibati binasında olarkən, Tovuz RPŞ-nin təhqiqatçısı polis baş leytenantı X2 xidməti iş otağından səs-küy gəldiyini eşitmişdir. O, otağa daxil olan zaman əvvəllər tanımadığı Tovuz rayonu Aşağı Öysüzlü kənd sakinləri X7 və Şəxs polisin ünvanına nalayiq ifadələr işlətməyə başlamışdır. Onlar sonuncuları nizam-intizama dəvət etmişlər, lakin onlar polislərin qanuni tələblərinə tabe olmamışlar. Məhkəmə iclasında şahid qismində dindirilmiş X5 izahatında göstərdi ki, o, Tovuz RPŞ-də sahə rəisi işləyir. Şəxs tanımır, sonuncu ilə heç bir ədavət və düşmənçiliyi yoxdur. xx.xx.2025-ci il tarixdə Tovuz RPŞ-də olarkən 2 nəfər adı onlara sonradan məlum olan Emin və Elməddin adlı şəxslər Tovuz RPŞ-nin inzibati binasında ucadan nalayiq ifadələr işlədərək ictimai qaydanı pozmuş və polislərin qanuni tələblərinə tabe olmamışlar. Məhkəmə inzibati xəta haqqında işin materiallarını tədqiq edərək, inzibati xəta haqqında protokolu tərtib etmiş şəxsi, barəsində inzibati xəta haqqında icraat aparılan şəxsi və şahidləri dinləyərək hesab edir ki, toplanmış sübutlarla Şəxs əməlində Azərbaycan Respublikası İXM-nin 510 və 535.1-ci maddələrinə daxil olan bütün tövsifedici əlamətlər olmadığından onun barəsində olan inzibati xətalar barədə iş üzrə icraata xitam verilməlidir. Məhkəmə iclasında müəyyən edildi ki, inzibati qaydada işinə baxılan Şəxs ictimai qaydanı pozmamış, cəmiyyətə açıqca hörmətsizlik ifadə edən hərəkətlərə yol verməmiş və polis əməkdaşlarının qanuni tələblərinə qarşı hər hansı tabesizlik hərəkətlərinə yol verməmişdir. Azərbaycan Respublikasının inzibati xətalar qanunvericiliyinin prinsiplərindən bəhs edən Azərbaycan Respublikası İnzibati Xətalar Məcəlləsinin 4-cü maddəsində qeyd olunmuşdur ki, bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır. İnzibati xəta anlayışından bəhs edən Azərbaycan Respublikası İnzibati Xətalar Məcəlləsinin 12-ci maddəsində təsbit edilmişdir ki, Bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Bu Məcəllənin Xüsusi hissəsində nəzərdə tutulan əməllərə görə inzibati məsuliyyət o halda yaranır ki, bu əməllər cinayət məsuliyyətinə səbəb olmasın. Həmin Məcəllənin 114.1.4-cü maddəsinə əsasən, şəxsin əməlində inzibati xətalar barədə işə baxılarkən inzibati xəta haqqında iş üzrə icraata xitam verilməsi haqqında qərar çıxarıla bilər. Həmin Məcəllənin 53.1.2-ci maddəsinə əsasən, şəxsin əməlində inzibati xəta tərkibi olmadıqda inzibati xətalar haqqında işlər üzrə icraat başlana bilməz, başlanılmış icraata isə xitam verilir. Həmin Məcəllənin 114.2.1-ci maddəsinə əsasən, bu Məcəllənin 53-cü maddəsində nəzərdə tutulan hallardan biri mövcud olduqda inzibati xətalar haqqında işlərə baxılarkən qərar (qərardad) çıxarılır. Azərbaycan Respublikası İXM-nin 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Həmin Məcəllənin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Məhkəmə şərh olunanlara əsaslanaraq və Azərbaycan Respublikası İnzibati Xətalar Məcəlləsinin 40, 43, 53, 114, 115 və 128-130-cu maddələrini rəhbər tutaraq, Q ə r a r a a l d ı: Şəxs Firidun oğlunun barəsində Azərbaycan Respublikası İnzibati Xətalar Məcəlləsinin 510 və 535.1-ci maddələri ilə olan inzibati xəta haqqında iş üzrə materiala xitam verilsin. Qərardan surəti təqdim edildiyi və ya alındığı gündən 10 (on) gün müddətində Gəncə Apellyasiya Məhkəməsinə şikayət və ya protest verilə bilər. Hakim Zaur Hünmətov