Füzuli Rayon Məhkəməsi Qərar — İş №3(064)-422/2025

Azərbaycan Respublikası adından QƏRAR Füzuli rayonu İş № 3(064)-422/2025 15.07.2025 FÜZULİ RAYON MƏHKƏMƏSİ Hakim İsmayılov Elmir Akif oğlunun sədrliyi, Hüseynzadə Fərid Səid oğlunun katibliyi, inzibati xəta haqqında protokol tərtib etmiş səlahiyyətli orqan – Füzuli Rayon İcra və Probasiya Şöbəsinin rəis vəzifəsini icra edən, böyük icra məmuru X1, Zərərçəkmiş şəxs və barəsində inzibati xəta haqqında iş üzrə icraat aparılan Şəxs iştirakları ilə xx.xx.1976-cı il tarixdə Füzuli rayonu, Mahmudlu-2 kəndində doğulmuş, Azərbaycan Respublikasının vətəndaşı, Füzuli rayonu, Mahmudlu-2 kəndində qeydiyyatda olmaqla yaşayan Şəxs Azərbaycan Respublikası İnzibati Xətalar Məcəlləsinin (bundan sonra - Azərbaycan Respublikası İXM) 528.1-ci maddəsində nəzərdə tutulmuş inzibati xətanı törətməsi ilə bağlı Füzuli Rayon İcra və Probasiya Şöbəsindən (bundan sonra – Füzuli RİPŞ) daxil olmuş 02 iyul 2025-ci il tarixli, MN ******* nömrəli inzibati xəta haqqında protokol və ona əlavə edilmiş digər sənədlərdən ibarət inzibati xəta haqqında icraat materiallarına Füzuli Rayon Məhkəməsinin binasında açıq məhkəmə iclasında baxaraq M Ü Ə Y Y Ə N E T D İ: Füzuli Rayon İcra və Probasiya Şöbəsindən daxil olmuş 02 iyul 2025-ci il tarixli, MN ******* nömrəli inzibati xəta haqqında protokola görə Əliyev X3 Rayon Məhkəməsi tərəfindən verilmiş xx.xx.2021-ci il tarixli, 2(064)-1956/2021 nömrəli icra sənədinin icrası ilə əlaqədar Füzuli RİPŞ-nin rəis vəzifəsini icra edən, böyük icra məmuru X1 qanuni tələblərini yerinə yetirməmişdir. Buna görə də, Füzuli RİPŞ-nin rəis vəzifəsini icra edən, böyük icra məmuru X2 tərəfindən Şəxs Azərbaycan Respublikası İXM-in 528.1-ci maddəsində nəzərdə tutulmuş inzibati xətanı törətməsi ilə bağlı tərtib edilmiş 02 iyul 2025-ci il tarixli, MN ******* nömrəli inzibati xəta haqqında protokol toplanmış digər sənədlərdən ibarət inzibati xəta haqqında icraat materialları ilə birlikdə baxılması üçün Füzuli Rayon Məhkəməsinə göndərilmişdir. Məhkəmənin əvvəlki iclasında Füzuli RİPŞ-nin rəis vəzifəsini icra edən, böyük icra məmuru X2 verdiyi izahatında bildirmişdir ki, Füzuli Rayon Məhkəməsinin xx.xx.2021-ci il tarixli, 2(064)-1956/2021 nömrəli icra sənədinə əsasən Şəxs (bundan sonra - borclu) borclu olduğu 20000 manat məbləğində pul alınaraq tələbkar Zərərçəkmiş şəxs xeyrinə tutulmalıdır. İcra vərəqəsi üzrə xx.xx.2022-ci il tarixdə Füzuli rayon İcra və Probasiya Şöbəsində müvafiq qaydada icraata başlanılmışdır. Borclu Şəxs məhkəmə qətnaməsindən apellyasiya şikayəti vermiş, Şirvan Apelyasiya Məhkəməsinin 15 fevral 2022-ci il tarixli 2(106)-680/2022 saylı qətnaməsi ilə apelyasiya şikayəti təmin edilməmiş, qətnamə dəyişdirilmədən saxlanılmışdır. Borclu Şəxs icra sənədi üzrə 20000 (iyirmi min) manat borcundan bu günədək cəmi 11750 (on bir min yeddi yüz əlli) manat pulu tələbkar Zərərçəkmiş şəxs xeyrinə ödəmişdir. Borclu Şəxs icra sənədi üzrə pul borcunun tam ödənilməsi barədə dəfələrlə rəsmi xəbərdarlıqlar edilməsinə baxmayaraq o, qanuni tələbləri yerinə yetirməyərək icra sənədi üzrə 20000 (iyirmi min) manat məbləğində pul borcundan ödənilməmiş qalan cəmi 8250 (səkkiz min iki yüz əlli) manat pulu tələbkar Zərərçəkmiş şəxs xeyrinə ödəməmişdir. Tələbkar Zərərçəkmiş şəxs qalan borcun hissəhissə ödənilməsinə razı olmadığını və borcun tam şəkildə ödənilməsini tələb etdiyini bildirmişdir. İcra sənədinin icrası ilə əlaqədar borclu Şəxs alınmış izahatda o, icra sənədi üzrə ödənilməmiş qalan cəmi 8250 (səkkiz min iki yüz əlli) manat borcundan tələbkar Zərərçəkmiş şəxs xeyrinə heç bir pul məbləği ödəyə bilməyəcəyini göstərmişdir. Bu səbəbdən də, məhkəmə qətnaməsinə əsasən yaranmış pul borcunu tam ödətdirmək mümkün olmamış, qətnamə icrasız qalmışdır. Bu isə tələbkarın haqlı narazılığına və şikayət etməsinə səbəb olmuşdur. Beləliklə, borclu onun iş üzrə icra sənədinin icrası ilə əlaqədar qanuni tələblərini yerinə yetirməmişdir. Buna görə də 02 iyul 2025-ci il tarixdə borclu barəsində Azərbaycan Respublikası İXM-in 528.1-ci maddəsi ilə inzibati xəta haqqında protokol tərtib etmişdir. Məhkəmənin iclasında barəsində inzibati xəta haqqında iş üzrə icraat aparılan şəxs Şəxs verdiyi izahatında bildirmişdir ki, tələbkara olan pul borcunu maddi vəziyyətinin zəif olması səbəbindən birdəfəlik ödəyə bilməmiş, lakin borcundan 350 ödəmiş və hal-hazırda da borcundan 150 manat ödəyir və borcunu hər ay ödəyəcəkdir. Məhkəmədən barəsində ədalətli qərar qəbul edilməsini xahiş etmişdir. Məhkəmənin iclasında Zərərçəkmiş şəxs ona borclu tərəfindən 350 manat ödənildiyini və hər ay 300 manat ödəməsinə razı olduğunu bildirdi. İş materiallarında olan xx.xx.2025-ci il tarixli qəbzin surətindən görünür ki, borclu tələbkara 350 manat məbləğində pul ödəmişdir. Məhkəmə işdə iştirak edən şəxslərin izahatlarını nəzərə alaraq, iş üzrə əhəmiyyət kəsb edən bütün halları hərtərəfli, tam və obyektiv araşdırıb, işə aid biri digərinə kifayət qədər uyğun gələn mümkün və mötəbər sübutların məcmusuna əsaslanaraq hesab edir ki, Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsilə başlanmış inzibati xəta haqqında iş üzrə icraata xitam verilməlidir. Belə ki, iş materiallarına əlavə edilmiş sənədlərin surətləri və işdə iştirak edən şəxslərin izahatlarından müəyyən olunur ki, borcluya Füzuli Rayon Məhkəməsinin xx.xx.2021-ci il tarixli, 2(064)-1956/2021 nömrəli icra sənədi üzrə öhdəliyini yerinə yetirməməsi bunun üçün yetərli maddi imkanının olmaması ilə bağlıdır. Azərbaycan Respublikası İnzibati Xətalar Məcəlləsinin 528.1-ci maddəsi məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə məsuliyyəti müəyyən edir. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Bu Məcəllənin 53.1.2-ci maddəsinin tələbinə görə əməldə inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Qeyd edilən Məcəllənin 105.1-ci maddəsinə görə bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Göstərilənlərə əsasən məhkəmə hesab edir ki, borclu Şəxs icra sənədini üzürsüz səbəbdən icra etməməsi məhkəmə araşdırması zamanı öz təsdiqini tapmadığından və bununla da onun hərəkətlərində inzibati xətanın tərkibi olmadığından, inzibati xəta haqqında iş üzrə icraata xitam verilməlidir. Məhkəmə şərh olunanlara əsasən və Azərbaycan Respublikası İXM-in 40, 43, 53.1.2, 114.1.1, 115 və 128-130-cu maddələrini rəhbər tutaraq Q Ə R A R A A L D İ: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə başlanılmış inzibati xəta haqqında iş üzrə icraata xitam verilsin. Qərardan rəsmi qaydada verildiyi gündən 10 (on) gün müddətində Füzuli Rayon Məhkəməsi vasitəsi ilə Şirvan Apellyasiya Məhkəməsinə şikayət və ya protest verilə bilər. Hakim Elmir İsmayılov