Xaçmaz Rayon Məhkəməsi Qərar — İş №3(067)-1077/2021

Azərbaycan Respublikası adından QƏRAR Xaçmaz şəhəri İş № 3(067)-1077/2021 12.11.2021 XAÇMAZ RAYON MƏHKƏMƏSİ Hakim Səmədzadə Sərxan Akif oğlunun sədrliyi, məhkəmə iclas katibi Ahmatov Bəxtiyar Mamat oğlunun katibliyi, Şəxs ASC-nin nümayəndəsi X1, Şəxs ASC barəsində Azərbaycan Respublikası İXM-nin 496.1-ci maddəsi üzrə tərtib olunmuş inzibati xəta haqqında protokola və ona əlavə edilmiş sənədlərə açıq məhkəmə iclasında baxaraq, müəyyən etdi: Şəxs ASC barəsində Azərbaycan Respublikası İXM-nin 496.1-ci maddəsi ilə inzibati xəta protokolu tərtib edilərək baxılması üçün Xaçmaz rayon məhkəməsinə göndərilmişdir ondan ötrü ki, "xxxx" ASC-nin ünvanına idxal olunmuş “heyvan yeminin hazırlanması üçün maşınlar və mexanizmlər” yükü Şimal Ərazi Baş Gömrük idarəsində 25.12.2020-ci il tarixli, **********7891 saylı gömrük bəyannaməsi ilə “müvəqqəti saxlanc” xüsusi gömrük prosedurunda rəsmiləşdirilmişdir. Lakin müvəqqəti saxlanc müddətinin 23.04.2021-cı il tarixdə bitməsinə baxmayaraq, hüquqi şəxs-"xxxx" ASC tərəfindən malların digər gömrük proseduru altında yerləşdirilməsi üçün heç bir tədbir görülməmişdir. Məhkəmə iclasında Şəxs ASC-nin nümayəndəsi izahatında göstərmişdir ki, Türkiyədən 37 TİR üzrə mal göndərilir. Pandemiya ilə əlaqədar şirkət fəaliyyətini müvəqqəti dayandırmışdır. Əmlakı Gömrükdən hissə-hissə çıxarmaq mümkün deyildir. Gömrükdən malları kompleks şəklində çıxarmaq mümkün olmamışdır. Törətdikləri inzibati xətanı etiraf edir, yüngül tənbeh tətbiq edilməsini xahiş etmişdir. Dövlət Gömrük Komitəsi Şimal Ərazi Baş Gömrük İdarəsinə işə baxılmasının yeri və müddəti barədə lazımi qaydada məlumat verilməsinə baxmayaraq məhkəmə içlasına gəlməmiş, həmçinin işə baxılmasının təxirə salınması barədə vəsatət daxil olmamışdır. Məhkəmə iş materiallarında olan inzibati xətaya dair protokolu və digər sənədləri əlaqəli şəkildə araşdırıb hesab edir ki, barəsində inzibati xəta haqqında icraat aparılan şəxsin Azərbaycan Respublikasının İnzibati Xətalar Məcəlləsinin 496.1-ci maddəsi ilə nəzərdə tutulmuş inzibati xətanı törətməsi tam sübut edilir. Azərbaycan Respublikası İnzibati Xətalar Məcəlləsinin 496.1-ci maddəsinə əsasən malların saxlanca qoyulması və saxlanc qaydalarının (müddətlərinin) pozulmasına, o cümlədən gömrük və müvəqqəti saxlanc anbarlarında mallarla müxtəlif əməliyyatların aparılmasının müəyyən olunmuş tələblərinə və şərtlərinə riayət edilməməsinə görə fiziki şəxslər əlli manatdan yüz manatadək məbləğdə, vəzifəli şəxslər yüz əlli manatdan iki yüz əlli manatadək məbləğdə, hüquqi şəxslər üç yüz manatdan beş yüz manatadək məbləğdə cərimə edilir. Qeyd olunanlara əsasən məhkəmə hesab edir ki, barəsində inzibati xəta haqqında icraat aparılan şəxsin barəsində cərimə növündə inzibati tənbeh təyin edilməsi məqsədə müvafiqdir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 106 və 114-cü maddələrini rəhbər tutaraq qərara aldı: Şəxs ASC (VÖEN № **********) Azərbaycan Respublikası İnzibati Xətalar Məcəlləsinin 496.1-ci maddəsi ilə təqsirli bilinsin və barəsində 300 (üç yüz) manat məbləğində cərimə növündə inzibati təyin edilsin. Qərarın surəti rəsmi qaydada verildiyi vaxtdan 10 gün müddətinə Sumqayıt Apellyasiya məhkəməsinə şikayət verilə bilər. Hakim: Sərxan Səmədzadə