Xaçmaz Rayon Məhkəməsi Qərar — İş №3(067)-1583/2023

Azərbaycan Respublikası adından QƏRAR Xaçmaz şəhəri İş № 3(067)-1583/2023 19.12.2023 XAÇMAZ RAYON MƏHKƏMƏSİ Hakim Əliyeva Aynur Məhəmməd qızının sədrliyi, Həsənli Rövşən Xudat oğlunun katibliyi ilə, İnzibati xəta haqqında protokolu tərtib etmiş şəxs Azərbaycan Yerüstü Nəqliyyat X3 İdarəsinin inspektoru Nümayəndə, barəsində inzibati xəta haqqında icraat aparılan şəxs Şəxs iştirakı ilə, xx xxxxxx 1977-ci ildə Xaçmaz rayonunun Qusarçay kəndində doğulmuş, Azərbaycan Respublikasının vətəndaşı, Xaçmaz rayonunun Qusarçay kəndində qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin (bundan sonra İXM-nin) 552-ci maddəsi ilə Azərbaycan Respublikası Rəqəmsal İnkişaf və Nəqliyyat Nazirliyinin Tabeliyində Azərbaycan Yerüstü X1 Regional İdarəsindən daxil olmuş inzibati xəta haqqında işə baxaraq, MÜƏYYƏN ETDİM: Azərbaycan Respublikası Rəqəmsal İnkişaf və Nəqliyyat Nazirliyinin Tabeliyində Azərbaycan Yerüstü X1 Regional İdarəsindən daxil olmuş 29 noyabr 2023-cü il tarixli, MN seriyalı ******* nömrəli inzibati xəta haqqında protokoldan görünür ki, Şəxs 27 noyabr 2023-cü il tarixdə, saat 12:30 radələrində Xaçmaz rayonu, Bakı prospekti, Köhnə Avtovağzalın ərazisində “VAZ-2107” markalı, ** OB *** dövlət qeydiyyat nişanlı avtomaşınla sərnişindaşıma fəaliyyəti həyata keçirərkən yoxlama zamanı fərqlənmə nişanını təqdim etməmişdir. İnzibati xəta haqqında protokolu tərtib etmiş şəxs Azərbaycan Yerüstü X1 Regional İdarəsinin nümayəndəsi Nümayəndə məhkəmə iclasında izahat verərək bildirmişdir ki, İnzibati xəta haqqında protokolu özü tərtib etmişdir. İnzibati xəta törətmiş şəxsə, NK-nin qərarına əsasən fərqlənmə nişanı əldə edilməli və həmin fərqlənmə nişanı avtomobilin ön və arxa şüşəsinin sağ tərəfinə yerləşdirilməlidir. Fərqlənmə nişanı olmadan fəaliyyət göstərdiyinə görə, barəsində inzibati xəta törətmiş şəxsə X1 Regional İdarəsinin əməkdaşları tərəfindən bir neçə dəfə xəbərdarlıq edilmişdir. Lakin, bu dəfə o, fərqlənmə nişanı olmadan taksi fəaliyyəti ilə məşğul olduğu üçün cərimə olunmuşdur. Akt yerində tərtib olunmuş, akta imza edən şəxslər aparılan reyddə iştirak etmiş və akta imza etmişdirlər. Barəsində inzibati xəta aparılan şəxs Şəxs məhkəmə iclasında izahat verərək bildirmişdir ki, barəsində inzibati protokol tərtib edilməsi haqqında məlumatı olmamış və protokol ona təqdim olunmamışdır. İş materiallarına əlavə olunmuş fotoşəkil onun avtomobilidir. Həmin fotoşəkil çəkil zaman o, avtomobilinin yanında olmamışdır. Əvvəllər taksi fəaliyyəti ilə məşqul olduğu dövrlərdə lisenziya almışdır. Xeyli müddətdir ki, taksi fəaliyyəti ilə məşğul olmadığına görə adına açılmış VÖEN-i ləğv etmişdir. Məhkəmə, tərəflərin izahatlarını dinləyib, Şəxs barəsində tərtib edilmiş inzibati xəta haqqında protokolu və ona əlavə edilmiş sənədləri nəzərdən keçirərək hesab edir ki, Şəxs barəsində Azərbaycan Respublikası İnzibati Xətalar Məcəlləsinin 552-ci maddəsində nəzərdə tutulan inzibati xəta haqqında iş üzrə icraata xitam verilməlidir. Belə ki, Azərbaycan Respublikasının İnzibati Xətalar Məcəlləsinin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Həmin Məcəllənin 12.1-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 16.1-ci maddəsinə əsasən inzibati xəta törədərkən on altı yaşı tamam olmuş fiziki şəxslər inzibati məsuliyyətə cəlb olunurlar. İXM-nin 552-ci maddəsinə əsasən avtomobil nəqliyyatı ilə sərnişin və yük daşımalarını yerinə yetirən şəxslər tərəfindən müvafiq icra hakimiyyəti orqanın müəyyən etdiyi orqanın (qurumun) əməkdaşının xidməti vəzifəsinin yerinə yetirilməsinə mane olmağa, o cümlədən qanunvericiliklə müəyyən olunmuş tələb olunan sənədlərin təqdim edilməməsinə görə əlli manat məbləğində cərimə edilir. Göründüyü kimi, inzibati xətalar haqqında qanunvericilik inzibati xəta hadisəsinin baş verməsini və bunun əsasında inzibati məsuliyyətin yaranma əsasını dəqiq müəyyən etmişdir. Belə ki, inzibati xəta hadisəsi şəxsin öz hərəkəti və ya hərəkətsizliyi ilə ictimai münasibətlərə qəsd edən, hüquqazidd olan və təqsirli sayılan əməl kimi qəbul olunur. Qanunvericilik eyni zamanda, xəta hadisəsinin subyektini də dəqiq müəyyən etmişdir ki, bu da inzibati xəta nəticəsində baş vermiş qanun pozuntusunun tənbehsiz qalmamasını şərtləndirir. Yuxarıda qeyd edilənlərin təhlilindən aydın olur ki, İXM-in 552-ci maddəsinin dispozisiyasında avtomobil nəqliyyatı ilə sərnişin və yük daşımalarını yerinə yetirən şəxslər tərəfindən müvafiq icra hakimiyyəti orqanın müəyyən etdiyi orqanın (qurumun) əməkdaşının xidməti vəzifəsinin yerinə yetirilməsinə mane olmağa, o cümlədən qanunvericiliklə müəyyən olunmuş tələb olunan sənədlərin təqdim edilməməsi inzibat xəta kimi nəzərdə tutulub, barəsində inzibati xəta haqqında iş üzrə icraat aparılan şəxsin isə qəsdən deyil, müvafiq sənədi olmadığı üçün tələb olunan sənədləri təqdim edə bilmədiyi müəyyən olunmuşdur. Həmin şəxsin zəruri sənədlər olmadan taksi minik avtomobili ilə sərnişin daşımalarının həyata keçirilməsi məşğul olması isə İnzibati Xətalar Məcəlləsinin müvafiq maddəsi ilə tövsif edilə və şəxs barəsində tədbir görülə bilərdi. Bu hallar Şəxs əməlində İXM-in 552-ci maddəsində nəzərdə tutulmuş inzibati xəta tərkibinin olmasını bilavasitə istisna edir. İXM-in 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. İXM-nin 114.1.4-cü maddəsinə əsasən inzibati xəta haqqında işə baxılarkən inzibati xəta haqqında iş üzrə icraata xitam verilməsi haqqında qərar çıxarılır. Bu Məcəllənin 114.2.1-ci maddəsinə əsasən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Beləliklə məhkəmə hesab edir ki, Şəxs əməlində izibati xəta tərkibi olmadığındanonun barəsində başlanmış inzibati xəta haqqında iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xəta Məcəlləsinin 53, 114-cü maddəsini rəhbər tutaraq, QƏRARA ALDİ: Şəxs barəsində İnzibati Xətalar Məcəlləsinin 552-ci maddəsi ilə başlanmış inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Xaçmaz Rayon Məhkəməsi vasitəsilə və ya birbaşa Sumqayıt Apellyasiya Məhkəməsinə apellyasiya şikayəti və ya protesti verilə bilər. Sədrlik edən: Aynur Əliyeva