Xaçmaz Rayon Məhkəməsi Qərardad — İş №3(067)-189/2023

Azərbaycan Respublikası adından QƏRARDAD Xaçmaz şəhəri İş № 3(067)-189/2023 08.02.2023 XAÇMAZ RAYON MƏHKƏMƏSİ Hakim Səmədzadə Sərxan Akif oğlu, Şəxs barəsində Azərbaycan Respublikasının İnzibati Xətalar Məcəlləsinin (bundan sonra - İXM) 227-ci maddəsi ilə tərtib olunmuş inzibati xəta haqqında protokol üzrə toplanmış materialı məhkəmə iclasında baxılmağa hazırlayarkən MÜƏYYƏNETDİ: Məhkəmənin icraatına Şəxs barəsində İXM-in 227-ci maddəsi ilə Xaçmaz rayon X1 Polis Bölməsi tərəfindən tərtib edilmiş inzibati xəta haqqında material daxil olmuşdur. İş materialları təhlil olunarkən müəyyən etdim ki, Xaçmaz rayon Polis Şöbəsi tərəfindən Şəxs barəsində İXM-in 227- ci maddəsi ilə tərtib edilmiş inzibati xəta haqqında protokollar üzrə materiallar natamamdır. Belə ki, iş materiallarında olan əlyazma izahatlarından görünür ki, Şəxs adından izahatlar tərtib olunub, hər bir izahatın sonunda “izahat mənim sözlərimlə düzgün yazılıb, doğruluğunu imzamla təsdiq edirəm” sözləri yazılsa da, Şəxs 8 izahatdan heç birində imzası yoxdur. Azərbaycan Respublikası İnzibati Xətalar Məcəlləsinin 61.1.2-ci maddəsinə əsasən barəsində inzibati xəta haqqında iş üzrə icraat aparılan şəxsin izahat vermək hüququ vardır. Məhkəmə hesab edir ki, hazırki materialda barəsində inzibati xəta haqqında iş üzrə icraat aparılan Şəxs adından tərtib olunmuş 8 izahatdan heç birində imzasının olmaması ona dəlalət edir ki, izahatlar formal xarakterlidir və bununla da barəsində inzibati xəta haqqında iş üzrə icraat aparılan şəxsin hüquqları pozulmuşdur. Azərbaycan Respublikası İXM-in 109.1.6-cı maddəsinə görə inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Belə olan halda hesab edirəm ki, Şəxs barəsində İXM-in 227-ci maddəsi ilə toplanmış materiallar natamam olduğundan Xaçmaz rayon Polis Şöbəsinə geri qaytarılmalıdır. Qeyd olunanlara əsasən və İXM-in 109-cu maddəsini rəhbər tutaraq məhkəmə QƏRARA ALDİ: Şəxs barəsində Azərbaycan Respublikasının İnzibati Xətalar Məcəlləsinin 227-ci maddəsi ilə toplanmış material Xaçmaz rayon Polis Şöbəsinə geri qaytarılsın. HAKİM SƏRXAN SƏMƏDZADƏ