Hacıqabul Rayon Məhkəməsi Qərardad — İş №3(071)-111/2025

Azərbaycan Respublikası adından QƏRARDAD Hacıqabul rayonu İş № 3(071)-111/2025 10.04.2025 HACIQABUL RAYON MƏHKƏMƏSİ Hakim Əkbərli Günel Bəkir qızı, X2 barəsində Azərbaycan Respublikası DİN BDYPİ-si tərəfindən qəbul edilmiş 11 noyabr 2024-cü il tarixli EQ seriyalı 24599103 nömrəli qərardan verilmiş şikayət ərizəsini işin baxılmağa hazırlanması zamanı nəzərdən keçirib, MÜƏYYƏNETDİ: X4 məhkəməyə müraciət edərək Azərbaycan Respublikası DİN BDYPİ-si tərəfindən qəbul edilmiş 11 noyabr 2024-cü il tarixli EQ seriyalı 24599103 nömrəli inzibati tənbeh vermə haqqında qərarın ləğv edilməsini xahiş etmişdir. Məhkəmə şikayət ərizəsini işin baxılmağa hazırlanması zamanı nəzərdən keçirib hesab edir ki, şikayət ərizəsi və ona əlavə edilmiş sənədlər icraata qəbul edilmədən şikayətçiyə geri qaytarılmalıdır. Belə ki, Azərbaycan Respublikası İXM-nin 129.1.3-cü maddəsinə əsasən səlahiyyətli orqanın (vəzifəli şəxsin) qərarından məhkəməyə verilən şikayət - şikayət verən şəxsin yaşayış yeri və ya hüquqi şəxsin ünvanının olduğu yer üzrə rayon (şəhər) məhkəməsinə verilir. Azərbaycan Respublikası Konstitusiya Məhkəməsi Plenumunun “Azərbaycan Respublikası İnzibati Xətalar Məcəlləsinin 129.1.3-cü maddəsinin şərh edilməsinə dair 04 noyabr 2020-ci il tarixli qərarında qeyd edilmişdir ki, qanunverici tərəfindən Azərbaycan Respublikası İnzibati Xətalar Məcəlləsinin 129.1.3-cü maddəsində dəyişikliklər edilənədək səlahiyyətli orqanın (vəzifəli şəxsin) qərarından məhkəməyə şikayət həmin Məcəllənin 110.1-ci maddəsində müəyyən olunmuş qaydaya uyğun olaraq, yəni inzibati xətanın törədildiyi və yaxud barəsində qərar çıxarılmış şəxsin vəsatətinə əsasən onun yaşadığı yer üzrə verilə bilər. Elektron portaldan şəxsin fərdi məlumatları nəzərdən keçirilərkən müəyyən edilmişdir ki, X1 özü Hacıqabul rayonu, Balıqçı qəsəbəsində qeydiyyatdadır. Lakin iş materiallarına əlavə edilmiş 11 noyabr 2024-cü il tarixli EQ seriyalı 24599103 nömrəli inzibati tənbeh vermə haqqında qərardan görünür ki, inzibati xətanın törədildiyi yer Şirvan şəhəri ərazisidir. Göründüyü kimi, inzibati xətanın törədildiyi yer üzrə Hacıqabul rayon ərazisi deyildir. X1 tərəfindən işə onun yaşayış yeri üzrə baxılmasına dair hər hansı bir vəsatət daxil olmamışdır. Göstərilənlərlə yanaşı, qərardan şikayət verilməsi üçün ötürülmüş prosessual müddətin bərpasına dair ərizə verilməmişdir. Yuxarıda qeyd edilənlərə əsasən məhkəmə hesab edir ki, hazırki iş üzrə məhkəməyə təqdim edilmiş sənədlər əsasında inzibati xəta haqqında işin baxılmağa hazırlanması mümkün deyil, ona görə də, Azərbaycan Respublikası DİN BDYPİ-si tərəfindən qəbul edilmiş 11 noyabr 2024-cü il tarixli EQ seriyalı 24599103 nömrəli qərardan verilmiş şikayət ərizəsi və ona əlavə edilmiş sənədlər X1na geri qaytarılmalıdır. Göstərilənlərə əsasən və Azərbaycan Respublikasının İnzibati Xətalar Məcəlləsinin 109 və 118-ci maddələrini rəhbər tutaraq, məhkəmə Q Ə R A R A A L D İ: X2 Azərbaycan Respublikası DİN BDYPİ-si tərəfindən qəbul edilmiş 11 noyabr 2024cü il tarixli, EQ seriyalı, 24599103 nömrəli inzibati tənbeh vermə haqqında qərarından verdiyi şikayəti və ona əlavə edilmiş sənədlər geri qaytarılsın. Hakim: Günel Əkbərli