Hacıqabul Rayon Məhkəməsi Qərar — İş №3(071)-325/2023

Azərbaycan Respublikası adından QƏRAR Hacıqabul rayonu İş № 3(071)-325/2023 05.10.2023 HACIQABUL RAYON MƏHKƏMƏSİ X12 Nazim oğlunun sədrliyi, Səlimova Günel Rauf qızının katibliyi ilə, İnzibati xəta haqqında protokolu tərtib etmiş şəxs X5, barəsində inzibati xəta haqqında icraat aparılan şəxs Şəxs iştirakları ilə xx.xx.1985-ci il tarixdə Hacıqabul rayonunda doğulmuş, Azərbaycan Respublikasının vətəndaşı, evli, Hacıqabul şəhəri, İ.Qayıbov küçəsi ev 13, mənzil 3-də qeydiyyatda olan və yaşayan Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə inzibati məsuliyyətə cəlb edilməsinə dair Hacıqabul rayon İcra və Probasiya Şöbəsindən daxil olmuş inzibati xəta haqqında materiala baxaraq, müəyyənetdi: Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə inzibati məsuliyyətə cəlb edilməsinə dair Hacıqabul rayon İcra və Probasiya Şöbəsində tərtib edilmiş inzibati xəta haqqında protokol və ona əlavə edilmiş sənədlər baxılması üçün Hacıqabul rayon Məhkəməsinə göndərilmişdir. Materiala əlavə edilmiş Hacıqabul rayon İcra və Probasiya Şöbəsinin icra məmuru X8 tərəfindən tərtib edilmiş xx.xx.2023 -cü il tarixli MN ******* nömrəli inzibati xəta haqqında protokolda və ona əlavə edilmiş sənədlərdə göstərilmişdir ki, Hacıqabul rayon Məhkəməsinin 2(071)-57/2020 saylı xx.xx.2020-ci il tarixli icra sənədinə əsasən -əvvəli 07 yanvar 2020-ci il tarixdən hesablanmaqla 10 sentyabr 2008-ci il təvəllüdlü X2 və 20 iyun 2013-cü il təvəllüdlü X3 yetkinlk yaşlarına çatana kimi saxlanılmaları üçün ilkin iddia üzrə iddiaçı, qarşılıqlı iddia üzrə cavabdeh Şəxs hər ay bir uşağa 160 manat olmaqla, cəmi 320 manat sabit pul məbləğində aliment tutularaq ilkin iddia üzrə cavabdeh, qarşılıqlı iddia üzrə iddiaçı Hüseynova Günay (Şirinbəyim) Musaxan qızına ödənilməlidir. Hazırda icra sənədi üzrə borc 3140 manat təşkil edir. Borclu Şəxs icra sənədi üzrə borcunu üzrsüz səbəbdən ödəmir. İcra sənədi üzrə zəruri icra tədbirləri görülmüş və bununla da borclu borcunu qanunda müəyyən edilmiş müddətdə ödəməkdən boyun qaçırmışdır. Məhkəmə iclasında icra məmuru X8 inzibati xəta haqqında protokolu müdafiə edərək əlavə olaraq bildirdi ki, xx.xx.2020-ci il tarixdə borcluya “icraata başlamaq haqqında” qərar və tələbin könüllü icrası haqqında bildiriş rəsmi qaydada təqdim edilmişdir. “Elektron icra sistemindən” əldə olunmuş borclunun şəxsi məlumatlarından çıxarışa əsasən hər hansı bir gəlir və əmlak aşkar edilməmişdir. Borclunun əmlakına yerində baxış keçirmək üçün ünvan 1 ünvanında evə baxış keçirilmiş və tələbin yönəldilə biləcəyi hər hansı əmlak aşkar edilməmişdir. Hal hazırda icra sənədi üzrə 3140 manat borcu vardır. Borclu tələbkara olan borcunun ödənilməsindən boyun qaçırır. Bu səbəbdən borclu barəsində inzibati xəta haqqında protokol tərtib edilərək məhkəməyə təqdim edilmişdir. Odur ki, borclunun icra sənədinin icrasından qəsdən yayındığını nəzərə alaraq, onun barəsində qanunamüvafiq qaydada qərar qəbul edilməsini xahiş edir. Məhkəmə iclasında barəsində inzibati xəta haqqında icraat aparılan Şəxs izahatında bildirdi ki, icra sənədində göstərilən borcunu inkar etmir. Hərbi qulluqda olmuş, 44 günlük Vətən Müharibəsində döyüşlərdə iştirak etmişdir. Müqaviləsi bitdikdən sonra ordudan təxris olunmuşdur. Döyüşlərdə iştirakı üçün hər ay 80 manat təqaüd alır. Hacıqabul rayonu ərazisində fəhlə işləməklə məşğuldur. Ödənişləri vaxtında etməməsinin səbəbi stabil qazancının olmaması ilə əlaqədar olmuşdur. Son dövrlər ərzində 380 manat aliment borcundan ödəniş etmişdir. Məhkəmə baxışı zamanı da tələbkara 150 manat aliment borcundan ödəniş etmişdir. Növbəti aydan başlayaraq isə qalan yığılmış aliment borcunu hissə-hissə tələbkara ödəyəcəkdir. Bundan sonra da icra vərəqəsinin icrasını vaxtıvaxtında icra edəcəkdir. O, borcunu ödəməkdən qəsdən yayınmır. Odur ki, qeyd edilənləri nəzərə alaraq, onun barəsində başlanmış inzibati xəta haqqında icraata xitam verilməsini xahiş edir. Məhkəmə iclasında iştirak etmiş zərərçəkmiş şəxs X6 izahatında bildirdi ki, borclu Şəxs ona olan aliment borcunu ödəmir, icra sənədi üzrə 3140 manat borcu qalmaqdadır. Son üç ay ərzində cəmi 380 manat ödəniş etmişdir. O, borclunun cəzalarındırılmasını istəmir. Aliment borcunun vaxtı-vaxtında ödənilməsini istəyir. İş materiallarında olan Hacıqabul rayon Məhkəməsinin 2(071)-57/2020 saylı xx.xx.2020-ci il tarixli icra sənədinə əsasən əvvəli 07 yanvar 2020-ci il tarixdən hesablanmaqla 10 sentyabr 2008-ci il təvəllüdlü X2 və 20 iyun 2013-cü il təvəllüdlü X3 yetkinlk yaşlarına çatana kimi saxlanılmaları üçün ilkin iddia üzrə iddiaçı, qarşılıqlı iddia üzrə cavabdeh Şəxs hər ay bir uşağa 160 manat olmaqla, cəmi 320 manat sabit pul məbləğində aliment tutularaq ilkin iddia üzrə cavabdeh, qarşılıqlı iddia üzrə iddiaçı X1 verilməlidir. İş materiallarında olan qəbzdən görünür ki, Hacıqabul rayon Məhkəməsinin 2(071)- 57/2020 saylı xx.xx.2020-ci il tarixli icra sənədi üzrə yaranmış aliment borcundan Şəxs xx.xx.2023-cü il tarixdə tələbkara 100 manat, xx.xx.2023-cü il tarixdə isə 50 manat pul ödəmişdir. Məhkəmə qeyd edir ki, Azərbaycan Respublikası İXM-in 528.1-ci maddəsində məhkəmə və digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə məsuliyyət nəzərdə tutur. Qanunun mənasına görə Azərbaycan Respublikası İnzibati Xətalar Məcəlləsinin 528.1-ci maddəsi ilə məsuliyyət o vaxt yaranır ki, borclu məhkəmə qərarının icrası ilə əlaqədar icra məmurunun qanuni tələblərini və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə məcbur edən icra sənədini üzrsüz səbəbdən icra etməsin. İcra etməmə isə o halda üzrsüz olur ki, borclunun məhkəmə qərarının icrası üçün faktiki imkanlarının müəyyən edildiyi halda o, məhkəmə aktının tələbini icra etmir və ya məhkəmə aktlarının icrasını mümkünsüz etməyə yönələn hərəkətlərini davam etdirir. İş materialları və proses iştirakçılarının izahatları ilə müəyyən olunur ki, Şəxs icra sənədinin icraya yönəldiyi vaxtdan hal-hazıradək ümumilikdə 14400 manat (45 ay x 320 manat) aliment borcundan maddi imkanının yol verdiyi həddə ödənişlər həyata keçirmiş, inzibati xəta haqqında protokol tərtib edilməmişdən qısa müddət əvvəl 2023-cü ilin iyul ayında 150 manat, avqust ayında 150 manat və 80 manat, məhkəmə baxışı dövründə isə xx.xx.2023-cü il tarixdə 100 manat və xx.xx.2023-cü il tarixdə 50 manat ödəniş etmişdir. Qalan borc məbləğinin isə hissə-hissə ödənilməsi ilə bağlı vəd vermişdir. Borclunun həqiqətən də icra sənədində göstərilən borcu tam şəkildə ödəmək üçün faktiki imkanlarının olmasını sübuta yetirmək səlahiyyətli orqanın nümayəndəsinin (icra məmurunun) üzərinə düşür. Lakin, icra məmuru bu barədə sübutlarını məhkəməyə təqdim edə bilməmişdir. Beləliklə, işin qeyd olunan hallarını nəzərə alaraq məhkəmə hesab edir ki, hazırki halda Şəxs əməlində icra sənədini üzrsüz səbəbdən icra etməməsi halı müəyyən edilmədiyindən, məhkəmə qərarının icra edilməməsi ilə əlaqədar onun inzibati məsuliyyətə cəlb edilməsi əsassızdır. Azərbaycan Respublikası İXM-in 3-cü maddəsinə əsasən yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Azərbaycan Respublikası İXM-in 53.1.2-ci maddəsinə əsasən inzibati xəta tərkibi olmadıqda, inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 114.2.1-ci maddəsinə əsasən Azərbaycan Respublikası İXM-nin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. İşin təsvir edilmiş hallarını və onlara tətbiq ediləcək hüquq normalarının tələblərini nəzərə alaraq məhkəmə hesab edir ki, Şəxs əməlində inzibati xəta tərkibi olmadığından, onun barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə başlanmış inzibati xəta haqqında iş üzrə icraata xitam verilməlidir. Yuxarıda göstərilənlərə əsaslanaraq və İnzibati Xətalar Məcəlləsinin 43, 53, 114 və 115-ci maddələrini rəhbər tutaraq, məhkəmə q ə r a r a a l d ı: MN ******* nömrəli, xx.xx.2023-cü il tarixli inzibati xəta haqqında protokol əsasında Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə başlanmış inzibati xəta haqqında iş üzrə icraata xitam verilsin. Qərardan rəsmi qaydada verildiyi vaxtdan 10 gün müddətində Hacıqabul rayon Məhkəməsi vasitəsi ilə və ya birbaşa Şirvan Apellyasiya Məhkəməsinə şikayət verilə bilər. X13