Şamaxı Rayon Məhkəməsi Qərar — İş №3(074)-88/2022

Azərbaycan Respublikası adından QƏRAR Şamaxı rayonu İş № 3(074)-88/2022 04.03.2022 ŞAMAXI RAYON MƏHKƏMƏSİ Şamaxı rayon Məhkəməsinin hakimi İsmayılov Natiq Əvəz oğlunun sədrliyi, Babayeva Günel Pərvin qızının katibliyi, İnzibati xəta haqqında protokolu tərtib etmiş şəxs Şamaxı rayon Polis Şöbəsinin İTBnin sahə rəisi X1 və barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.1996-cı ildə Şamaxı şəhərində anadan olmuş, Azərbaycan Respublikasının vətəndaşı, subay, ünvan 1 ünvanında qeydiyyatda olan Şəxs barəsində Azərbaycan Respublikasının İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətaları törətməsi barədə Şamaxı rayon Polis Şöbəsindən daxil olmuş inzibati xəta haqqında materiala baxaraq, məhkəmə MÜƏYYƏN ETDİ: Şəxs Azərbaycan Respublikasının İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətanı törətməsi ilə bağlı Şamaxı rayon Polis Şöbəsində tərtib olunmuş 04.03.2022-ci il tarixli, MN ******* saylı inzibati xəta haqqında protokol baxılması üçün Şamaxı Rayon Məhkəməsinə göndərilmişdir. Məhkəmə iclasında inzibati xəta haqqında protokolu tərtib etmiş şəxs Şamaxı rayon Polis Şöbəsinin İTB-nin sahə rəisi X5 izahatında göstərdi ki, Şəxs 03.03.2022-ci il tarixdə 18:15 radələrində Şamaxı şəhəri, Təbriz küçəsində sərxoş vəziyyətdə, uca səslə nalayiq ifadələr işlətmiş, polis əməkdaşlarının qanuni taləblərinə qəsdən tabe olmamışdır. Buna görə də Şəxs barəsində Azərbaycan Respublikası İnzibati Xətalar Məcəlləsinin 510 və 535.1-ci maddələri ilə inzibati xəta haqqında protokol tərtib edilmişdir. Məhkəmə iclasında iştirak edən barəsində inzibati xəta haqqında iş üzrə icraat aparılan şəxs Şəxs izahat verib bildirdi ki, 03.03.2022-ci il tarixdə günorta saatlarında xalası oğlu Elçin ilə birlikdə nahar yeməyi zamanı hərəsi təxminən bir litr spirtli içki olan pivə içmişlər, daha sonra təxminən 18:00 radələrində Şamaxı şəhəri Təbriz küçəsində xalası oğlu Elçini evə çağırmışlar, bu zaman Elçin ilə atası arasında mübahisə yaranmış və Elçin uca səslə nalayiq ifadələr işlətməyə başlamış, qonşular çölə çıxmış, bu zaman polis əməkdaşları hadisə yerinə yaxınlaşmış və Elçini avto patrula otuzduran zaman o, polis əməkdaşlarına nə səbəbə onu avtomaşına otuzdurmaqlarını soruşmuş, bu zaman onunla polis əməkdaşları arasında mübahisə yaranmış və onları polis şöbəsinə gətişmişlər. Törətdiyi əməldən peşmandır. Bir daha bu cür əməllər törətməyəcəyinə söz verir. Odur ki, onun barəsində cərimə növündə inzibati tənbeh tətbiq edilməsini xahiş edir. Məhkəmə iclasında şahid qismində dindirilmiş Şamaxı RPŞ-nin PPXB-nin polis nəfəri X3 izahat verib bildirdi ki, 03.03.2022-ci il tarixdə saat 18:00 radələrində Şamaxı şəhəri M.Ə.Rəsulzadə küçəsində PPXB-nin polis nəfərləri polis serjantları Şaiq Əliyev, Babaqədir Dəmirov və Şamaxı RPŞ-nin PPXB-nin manqa komandiri Vüsal Ağacanov ilə birlikdə xidmətdə olarkən Təbriz küçəsi ilə kəsişmədə bir qrup şəxsin toplaşdığını görüb, Təbriz küçəsi istiqamətinə dönmüşlər və həmin küçədə iki nəfər şəxsin mübahisə edərək ictimai qaydanı pozmalarını görmüşlər, həmin şəxslərə yaxınlaşıb, özlərini təqdim etmişlər, onları nizam intizama dəvət etsələrdə onlar onların qanuni tələblərinə tabe olmayaraq öz hərəkətlərini davam etmişlər və polisin ünvanına da nalayiq ifadələr işlətmişlər. Onlar dərhal həmin şəxsləri rayon polis şöbəsinə dəvət etmişlər. Məhkəmə iclasında şahid qismində dindirilmiş Şamaxı RPŞ-nin PPXB-nin manqa komandiri X6, Şamaxı RPŞ-nin PPXB-nin polis nəfərləri X4 və X14 şahid X2 ilə eyni məzmunlu izahat verdi. İş materiallarında olan Şamaxı RPŞ-nin PPXB-nin manqa komandiri polis baş serjantı X6 tərəfindən tərtib edilmiş 03.03.2022-ci il tarixli raportdan görünür ki, 03.03.2022-ci il tarixdə saat 18:15 radələrində Şamaxı RPŞ-nin PPXB-nin polis nəfərləri polis serjantı Cəlal Adıgözəlov, polis kiçik serjantı Şaiq Əliyev və polis kiçik serjantı Babaqədir Dəmirov ilə birlikdə Təbriz küçəsində xidmətdə olan zaman bir qrup şəxsin həmin ərazidə cəmləşdiklərini görmüşlər. Həmin yerə yaxınlaşdıqda onların sərxoş olduqlarını hiss etmişlər və özlərini təqdim etsələrdə onlar onlara məhəl qoymamışlar. Həmin iki nəfər şəxsi dəfələrlə nizama dəvət etsələrdə onlar onların qanuni tələblərinə tabe olmayaraq öz hərəkətlərini davam etdirərək polisin ünvanınada nalayiq ifadələr işlətmişlər. Ona görədə həmin şəxslər tərəflərindən RPŞ-nə gətirilmişlər. RPŞ-də məlum olmuş ki, onlar Şamaxı sakinləri X7 və Şəxsdur. İş materiallarında olan sərxoşluğun xüsusi texniki vasitə ilə müəyyən edilməsi barədə qəbzdən görünür ki, 03.03.2022-ci il tarixdə Şəxs qanında alkoqolun konsentrasiyasının həcmi 0.981 promildir. İş materiallarında olan 03.03.2022-ci il tarixli BB 018991 nömrəli inzibati qaydada tutma haqqında protokoldan görünür ki, inzibati xəta haqqında iş üzrə icraatın gedişatını təmin etmək məqsədi ilə Şəxs 03.03.2022-ci il tarixdə saat 19:00 radələrində inzibati qaydada tutulmuşdur. Beləliklə, məhkəmə hesab edir ki, Şəxs tərəfindən Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulan inzibati xətaların törədilməsi özünün etirafedici izahatı ilə yanaşı, şahidlərin izahatları, inzibati xəta haqqında protokol və işin digər materialları ilə tam sübuta yetirilir. Azərbaycan Respublikası İnzibati Xətalar Məcəlləsinin 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə əlli manatdan yüz manatadək məbləğdə cərimə, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. Həmin Məcəllənin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Həmin Məcəllənin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Azərbaycan Respublikası İnzibati Xətalar Məcəlləsinin 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz Qeyd edilən Məcəllənin 32.1.1-ci maddəsinə əsasən inzibati xəta törətmiş şəxsin səmimi peşmançılığı inzibati tənbeh tətbiq edilərkən məsuliyyəti yüngülləşdirən hal hesab edilir. Azərbaycan Respublikası İnzibati Xətalar Məcəlləsinin 33.1.7-ci maddəsinə əsasən inzibati xətanın sərxoş halda olan şəxs tərəfindən törədilməsi məsuliyyəti ağırlaşdıran hal hesab edilir. Azərbaycan Respublikası İnzibati Xətalar Məcəlləsinin 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Ona görə də, Şəxs Azərbaycan Respublikası İnzibati Xətalar Məcəlləsinin 535.1-ci maddəsinin sanksiyası çərçivəsində tənbeh edilməlidir. Beləliklə, məhkəmə Şəxs inzibati tənbeh tətbiq edərkən törədilmiş inzibati xətaların xarakterini, təqsirinin dərəcəsini, əmlak vəziyyətini, məsuliyyəti yüngülləşdirən və ağırlaşdıran halları nəzərə alıb, hesab edir ki, Şəxs Azərbaycan Respublikası İnzibati Xətalar Məcəlləsinin 510 və 535.1-ci maddəri ilə təqsirli bilinməli və ona İXM-nin 535.1-ci maddəsinin sanksiyasının hədləri daxilində inzibati cərimə növündə inzibati tənbeh tətbiq edilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 43, 114, 115, 129 və 130-cu maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətaları törətməkdə təqsirli bilsin və İnzibati Xətalar Məcəlləsinin 535.1-ci maddəsinin sanksiyası çərçivəsində 150 (yüz əlli) manat məbləğində cərimə edilsin. Qərardan rəsmi qaydada verildiyi gündən 10 gün müddətində Şamaxı rayon Məhkəməsi vasitəsilə və ya birbaşa Sumqayıt Apelyasiya Məhkəməsinə şikayət və ya protest verilə bilər. Sədrlik edən Natiq İsmayılov