Şəki Rayon Məhkəməsi Qərar — İş №3(075)-136/2022

Azərbaycan Respublikası adından QƏRAR Şəki şəhəri İş № 3(075)-136/2022 12.04.2022 ŞƏKİ RAYON MƏHKƏMƏSİ Hakim Hacıyev Pərviz Vaqif oğlunun sədrliyi, Hüseynəliyeva Günay Asif qızının katibliyi, inzibati xəta haqqında protokol tərtib etmiş şəxs Azərbaycan Respublikası Dövlət X5 Regional Reklam İdarəsinin etibarnamə üzrə nümayəndəsi X1, barəsində inzibati xəta haqqında iş üzrə icraat aparılan vəzifəli şəxs Şəxs iştirakları ilə xx xxxxx 1972-ci il tarixdə Şəki şəhərində doğulmuş, Azərbaycan Respublikasının vətəndaşı, evli, Şəki şəhəri, A.Əfəndiyev küçəsi, ev 50 ünvanında qeydiyyatda olan, VÖEN ********** Şəxs haqqında Azərbaycan Respublikası İnzibati Xətalar Məcəlləsinin 428.7.1-ci maddəsi ilə Azərbaycan Respublikası Dövlət X5 Regional Reklam İdarəsindən daxil olmuş inzibati xətaya dair işə Şəki Rayon Məhkəməsinin inzibati binasında açıq məhkəmə iclasında baxaraq, məhkəmə MÜƏYYƏN ETDİ: Şəxs Şəki şəhəri Salman Mümtaz küçəsində yerləşən, ona məxsus “İ.R.İ İnşaat” adlı sahibkarlıq obyektində açıq məkanda icazəsiz reklam yerləşdirmiş və onun barəsində inzibati xəta haqqında protokol tərtib edilmişdir. Qeyd edilən material üzrə Şəxs barəsində Azərbaycan Respublikası İnzibati Xətalar Məcəlləsinin 428.7.1-ci maddəsi ilə inzibati xəta haqqında protokol tərtib edilərək baxılması üçün Azərbaycan Respublikası Dövlət X5 Regional Reklam İdarəsindən Şəki Rayon Məhkəməsinə göndərilmişdir. İnzibati xəta haqqında protokol tərtib etmiş şəxs Azərbaycan Respublikası Dövlət X5 Regional Reklam İdarəsinin etibarnamə üzrə nümayəndəsi X2 məhkəmə iclasında verdiyi izahatında göstərdi ki, Şəki şəhəri Salman Mümtaz küçəsində yerləşən “İ.R.İ İnşaat” adlı sahibkarlıq obyektində cəmi 5 sayda, ümumi ölçüsü 20.57 m2 ölçüdə fasad reklamı icazəsiz reklam yerləşdirilməsi və yayımı faktı aşkar edilmiş, bununla bağlı akt tərtib edilmiş, icrası məcburi olan göstəriş obyekt sahibinin ünvanına göndərilərək törədilmiş pozuntunun aradan qaldırılması tələb edilmiş, lakin Şəxs göstərişi icra etməmişdir. Nəticədə həmin obyektin sahibi Şəxs bu əməlinə görə Azərbaycan Respublikası Dövlət X5 Regional Reklam İdarəsi tərəfindən Azərbaycan Respublikasının İXM-nin 428.7.1-ci maddəsində nəzərdə tutulmuş inzibati xəta törətməsi ehtimalına görə 11 mart 2022-ci il tarixli, MN seriyalı, ******* saylı inzibati xəta haqqında protokol tərtib edilmiş və toplanmış materiallar aidiyyəti üzrə baxılması üçün Şəki Rayon Məhkəməsinə göndərilmişdir. İnzibati xəta haqqında protokolu müdafiə edir və Azərbaycan Respublikasının İXM-nin 428.7.1-ci maddəsinin sanksiyası çərçivəsində Şəxs barəsində inzibati tənbeh tətbiq edilməsini xahiş etdi. Barəsində inzibati xəta haqqında iş üzrə icraat aparılan vəzifəli şəxs Şəxs məhkəmə iclasında verdiyi izahatında göstərdi ki, X6 İdarəsi ilə arasında əvvəllər də reklam barədə müqavilə bağlanmışdır. O, yeni müqavilə bağlanması zərurəti ilə bağlı xəbərdar olunmuş, bundan sonra 15 mart 2022-ci il tarixdə X6 İdarəsinə müraciət etmiş, mağazasında açıq məkanda reklam yerləşdirməsi üçün icazə almışdır. Lakin bildirir ki, protokol tərtib olunmasından bir və ya iki gün qabaq, o, agentlikdə olmuş, müqavilə bağlamaq istəyini şifahi bildirmişdir. Ona reklamlardan bir ədədinin rəngi solduğundan həmin reklamın sökülməsini tələb etmişlər. Ona demişlər ki, hətta digər reklamlara görə müqavilə bağlasa da bir ədəd solmuş reklama görə onun barəsində hər bir halda protokol tərtib olunacaq. Bu səbəbdən də, onunla həmin gün müqavilə bağlamamışlar. Solmuş reklamın sökülməsi üçün isə müvafiq texnikaya ehtiyac var. Kran tapmadığına görə müddəti ötürmüş, qeyd olunan vaxt reklamı sökdürə bilməmişdir. Üzürlü səbəbi olduğu halda buna məhəl qoymayaraq onun barəsində protokol tərtib edib X6 İdarəsi onu məhkəməyə vermişdir. Hesab edir ki, gecikmənin səbəbi üzürlüdür, onun təqsiri yoxdur. Bundan başqa müqavilə bağlandığından artıq barəsində inzibati araşdırma aparılması zərurəti aradan qalxmışdır. İstənilən halda agentliklə razılığa gəlməyə hazırdır. Odur ki, məhkəmədən icraata xitam verilməsini xahiş edir. İş materiallarında olan vergi uçotuna alınmış vergi ödəyiciləri barədə məlumatdan görünür ki, Şəxs (VÖEN **********) vergi ödəyicisi kimi qeydiyyata alınmışdır. İş materiallarında olan 25 fevral 2022-ci il tarixli fotoşəkillərdən görünür ki, Şəxs Şəki şəhəri Salman Mümtaz küçəsində yerləşən, ona məxsus “İ.R.İ İnşaat” adlı sahibkarlıq obyektində açıq məkanda icazəsiz reklam yerləşdirmişdir. İş materiallarında olan 25 fevral 2022-ci il tarixli, İRY 001901 nömrəli icazəsiz, həmçinin icazə müqaviləsi bağlanılmadan və ya müvafiq haqqı vaxtında ödəmədən açıq məkanda reklam yayımı hallarının müəyyən edilməsi haqqında aktdan görünür ki, Şəxs “Reklam haqqında” Azərbaycan Respublikası Qanununun 26-cı maddəsinin tələblərinə zidd olaraq Şəki şəhəri Salman Mümtaz küçəsində yerləşən, ona məxsus “İ.R.İ İnşaat” adlı sahibkarlıq obyektində açıq məkanda icazəsiz reklam yerləşdirməsi və yayımı faktı aşkar edilmişdir. İş materiallarında olan 25 fevral 2022-ci il tarixli, İMG 001901 nömrəli “Reklam haqqında” Azərbaycan Respublikasının mövcud qanunvericiliyinin pozulmasına dair icrası məcburi olan göstərişdən görünür ki, Şəxs aktda qeyd olunan qanun pozuntuların 05 (beş) gün ərzində aradan qaldırmadığı təqdirdə İXM-nin 428.7.1-ci maddəsi ilə barəsində inzibati xəta haqqında protokol tərtib edilməsi ilə bağlı xəbərdar edilmişdir. İş materiallarında olan SS710227290AZ nömrəli xəbərnamədən görünür ki, Şəxs qeydiyyatda olduğu ünvana (ünvan 1diriş 04 mart 2022-ci il tarixdə ünvan sahibi tərəfindən qəbul edilmişdir. İş materiallarında olan TF-13/2022 nömrəli telefonoqramdan görünür ki, Şəxs 11 mart 2022-ci il tarixdə, saat 11:00-da barəsində İXM-nin 428.7.1-ci maddəsi ilə protokol tərtib ediləcəyi barədə xəbərdar edilmişdir. İş materiallarında olan 11 mart 2022-ci il tarixli, MN seriyalı, ******* nömrəli inzibati xəta haqqında protokoldan görünür ki, Şəxs Şəki şəhəri Salman Mümtaz küçəsində yerləşən, ona məxsus “İ.R.İ İnşaat” adlı sahibkarlıq obyektində açıq məkanda icazəsiz reklam yerləşdirmiş və onun barəsində İXM-nin 428.7.1-ci maddəsi ilə inzibati xəta haqqında protokol tərtib edilmişdir. “Reklam haqqında” Azərbaycan Respublikası Qanununun 26.1-ci maddəsinə əsasən açıq məkanda reklam avtomobil yollarının torpaq sahəsində, şəhər, kənd, qəsəbə və digər yaşayış məntəqələrində olan reklam daşıyıcıları üzərində yerləşdirilir. Açıq məkanda ölçülərindən asılı olmayaraq reklam qurğularının tikintisinə, quraşdırılmasına, onlara konstruktiv dəyişikliklərin edilməsinə icazəni Azərbaycan Respublikasının Şəhərsalma və Tikinti Məcəlləsində nəzərdə tutulmuş hallarda və qaydada müvafiq icra hakimiyyəti orqanının yaratdığı qurum verir. Həmin Qanunun 26.2-ci maddəsinə əsasən açıq məkanda reklam yerləşdirmək üçün reklam yayıcısı müvafiq icra hakimiyyəti orqanının yaratdığı qurumdan icazə almalıdır. İcazə reklam yayıcısının tələbatına uyğun, lakin bir ildən artıq olmayan müddətə verilir. İcazənin verilməsinə görə “Dövlət rüsumu haqqında” Azərbaycan Respublikasının Qanunu ilə müəyyən edilmiş məbləğdə və qaydada dövlət rüsumu tutulur. İcazə verilərkən müvafiq icra hakimiyyəti orqanının yaratdığı qurum reklama dair texniki şərtlər pasportunu hazırlayaraq reklam yayıcısına təqdim edir və reklam yayıcısı ilə icazə müqaviləsini bağlayır. İcazə müqaviləsi bağlanılmadıqda, açıq məkanda reklam yerləşdirmək üçün verilmiş icazə və texniki şərtlər pasportu hüquqi nəticələr yaratmır. Həmin Qanunun 26.8-ci maddəsinə görə birbaşa aid olduğu xidmət, ticarət və ya digər obyektlərin giriş hissəsində, divarında yerləşdirilən və həmin obyektlərin adını, mənsubiyyətini, fəaliyyət növünü, ünvanını və iş rejimini istehlakçıya çatdıran sayı 1-dən, ümumi ölçüsü 2 kvadratmetrdən artıq olmayan lövhələr (yazılar), habelə ölçüsündən asılı olmayaraq, şəhər informasiya stendlərində qeyri-kommersiya məqsədi ilə yerləşdirilən plakatlar, siyasi reklamlar, qeyri-hökumət təşkilatlarının, hüquqi və fiziki şəxslərin kommersiya fəaliyyəti ilə bağlı olmayan elanlar, həmçinin dövlət orqanlarına aid olan lövhələr və Azərbaycan Respublikası Şəhərsalma və Tikinti Məcəlləsinin 86.1-ci maddəsində nəzərdə tutulmuş məlumat lövhələri reklam daşıyıcıları və yerləşdirilməsinə icazə alınması tələb olunan reklam hesab edilmir. Həmin Qanunun 34.2-ci maddəsinə görə Azərbaycan Respublikasında reklam (açıq məkanda reklam istisna olmaqla) fəaliyyətinə dövlət nəzarəti müvafiq icra hakimiyyəti orqanı, açıq məkanda reklam sahəsində nəzarət isə müvafiq icra hakimiyyəti orqanının yaratdığı qurum tərəfindən həyata keçirilir. Həmin Qanunun 39.1-ci maddəsinə görə reklamverici təqdim etdiyi məlumatın məzmununa və həqiqiliyinə, reklam istehsalçısı reklamın bu Qanunun tələblərinə uyğun hazırlanmasına, reklam yayıcısı reklamın bu Qanunla müəyyən edilmiş yerdə, vaxtda, vasitələr və üsullarla yayımlanmasına görə Azərbaycan Respublikasının İnzibati Xətalar Məcəlləsinə, Azərbaycan Respublikasının Cinayət Məcəlləsinə və Azərbaycan Respublikasının Mülki Məcəlləsinə uyğun olaraq məsuliyyət daşıyırlar. Azərbaycan Respublikası İnzibati Xətalar Məcəlləsinin 428.7.1-ci maddəsinə görə müvafiq icazə, texniki şərtlər pasportu və icazə müqaviləsi olmadan, həmçinin onların tələbləri pozulmaqla açıq məkanda reklam yerləşdirilməsinə görə fiziki şəxslər üç yüz manatdan beş yüz manatadək məbləğdə, vəzifəli şəxslər min beş yüz manatdan iki min beş yüz manatadək məbləğdə, hüquqi şəxslər beş min manatdan on min manatadək məbləğdə cərimə edilir. İşin müəyyən edilmiş mübahisəsiz hallarına və qanunvericiliyin sadalanmış normalarının tələblərinə əsasən məhkəmə hesab edir ki, vəzifəli şəxs Şəxs icrası məcburi olan göstərişi aldığı vaxtdan 5 gün ərzində açıq məkanda reklam yayımını dayandırmalı olduğu halda bunu etməmiş, beləliklə, müvafiq icazə olmadan açıq məkanda reklam yerləşdirilməklə Azərbaycan Respublikası İnzibati Xətalar Məcəlləsinin 428.7.1-ci maddəsində nəzərdə tutulmuş inzibati xəta törətmişdir. Məhkəmə qeyd edir ki, barəsində inzibati xəta haqqında iş üzrə icraat aparılan vəzifəli şəxs Şəxs qeyd etdiyi hallar, reklam yerləşdirmək üçün müvafiq icra hakimiyyəti orqanından barəsində protokol tərtib edilərək məhkəməyə göndərildikdən sonra icazə alması, həmçinin müqavilə bağlanması üçün onun şifahi müraciəti olsa da onunla müqavilə bağlamaqdan solmuş reklamın çıxarılmamsı səbəbi ilə imtina olunması onu məsuliyyətdən azad etmir. Azərbaycan Respublikası İnzibati Xətalar Məcəlləsinin 17-ci maddəsinə əsasən vəzifəli şəxslər öz vəzifələrinin yerinə yetirilməməsi və ya lazımınca yerinə yetirilməməsi ilə bağlı inzibati xətalara görə inzibati məsuliyyətə cəlb olunurlar. Həmin maddənin qeyd hissəsində göstərilmişdir ki, dövlət hakimiyyətinin nümayəndəsi funksiyasını həyata keçirən şəxslər, dövlət orqanlarında, bələdiyyələrdə, Azərbaycan Respublikasının Silahlı Qüvvələrində və Azərbaycan Respublikasının qanunvericiliyinə uyğun olaraq yaradılmış başqa silahlı birləşmələrdə, dövlət və qeyri-dövlət təşkilatlarında, idarə və müəssisələrində, o cümlədən publik hüquqi şəxslərdə təşkilati-sərəncamverici və ya inzibati-təsərrüfat vəzifələrində daimi və ya müvəqqəti işləyən şəxslər və ya həmin vəzifələri xüsusi səlahiyyət əsasında həyata keçirən şəxslər, habelə hüquqi şəxs yaratmadan sahibkarlıq fəaliyyəti ilə məşğul olaraq belə səlahiyyətləri yerinə yetirən fiziki şəxslər vəzifəli şəxs hesab edilirlər. Həmin Məcəllənin 21-ci maddəsinə görə inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İnzibati Xətalar Məcəlləsinin 25.2-ci maddəsinə görə inzibati cərimə manatla və ya digər meyarlarla ifadə oluna bilər. Məhkəmə sözügedən Məcəllənin 31.2-ci maddəsinə əsasən vəzifəli şəxs Şəxs barəsində inzibati tənbeh tətbiq edərkən, xətanın xarakterini, inzibati xəta törədən şəxsin şəxsiyyətini xarakretizə edən halları, onun təqsirinin dərəcəsini, əmlak vəziyyətini, habelə məsuliyyəti yüngülləşdirən və ağırlaşdıran hallar nəzərə alır. Məhkəmə vəzifəli şəxs Şəxs məsuliyyətini yüngülləşdirən və ağırlaşdıran hal müəyyən etmir. Şərh olunanlara əsasən və Azərbaycan Respublikası İnzibati Xətalar Məcəlləsinin 114, 128-130-cu maddələrini rəhbər tutaraq, məhkəmə QƏRARA ALDİ : İnzibati xəta törətmiş vəzifəli şəxs Şəxs Azərbaycan Respublikasının İXM-nin 428.7.1-ci maddəsi ilə təqsirli bilinib 1500 (bir min beş yüz) manat miqdarında inzibati cərimə edilsin. Qərardan surəti rəsmi qaydada verildiyi vaxtdan 10 (on) gün müddətində Azərbaycan Respublikası Şəki Apellyasiya Məhkəməsinə şikayət və ya protest verilə bilər. Sədrlik edən Pərviz Hacıyev