Şəki Rayon Məhkəməsi Qərar — İş №3(075)-91/2021

Azərbaycan Respublikası adından QƏRAR Şəki şəhəri İş № 3(075)-91/2021 11.02.2021 ŞƏKİ RAYON MƏHKƏMƏSİ Hakim Hacıyev Pərviz Vaqif oğlunun sədrliyi, məsləhətçi (iclas katibi) Nuriyev Rahib Pənah oğlunun katibliyi, zərərçəkmiş şəxs xxxqızının, barəsində inzibati xəta haqqında iş üzrə icraat aparılan şəxs Şəxs və onun müdafiəçisi Şəki Regional Vəkil Bürosunun vəkili Vəkil iştirakları ilə xx xxxx 1970-cı il tarixdə Şəki rayonu Baş Göynük kəndində anadan olmuş, Azərbaycan Respublikası vətəndaşı, orta təhsilli, evli, işləməyən, il ərzində inzibati məsuliyyətə cəlb edilməyən, əlilliyi olmayan, Şəki rayonu Baş Göynük kəndində qeydiyyatda olan Şəxs barəsində Azərbaycan Respublikasının İnzibati Xətalar Məcəlləsinin 528.1-ci maddəsi ilə tərtib edilmiş inzibati xəta haqqında protokola əsasən Şəki rayonu üzrə İcra və Probasiya Şöbəsindən daxil olmuş inzibati xətaya dair işə açıq məhkəmə iclasında baxaraq, məhkəmə MÜƏYYƏN ETDİ: Şəki rayonu üzrə İcra və Probasiya Şöbəsinin böyük icra məmuru X3 tərəfindən tərtib edilmiş xx xxxxxx 2021-ci il tarixli, MN seriyalı, ******* nömrəli inzibati xəta haqqında protokoldan görünür ki, Şəki Rayon Məhkəməsi tərəfindən verilmiş 2(075)-52/2013 nömrəli, xx xxxxxx 2013-cü il tarixli icra sənədinə əsasən Şəxs 2 uşağın saxlanılması üçün hər ay 100 manat aliment tutularaq tələbkar X1 verilməlidir. Məhkəmə qərarının icrası ilə əlaqədar borclu Şəxs dəfələrlə xəbərdarlıq edilməsinə baxmayaraq o, tələbkara ödəməli olduğu borclarının ödənişindən qərəzli olaraq yayınaraq Azərbaycan Respublikasının İXMnin 528.1-ci maddəsində nəzərdə tutulan inzibati xətanı törətmişdir. Qeyd edilən material baxılması üçün Şəki rayonu üzrə İcra və Probasiya Şöbəsindən Şəki Rayon Məhkəməsinə göndərilmişdir. xx xxxxxx 2021-ci il tarixli, MN seriyalı, ******* nömrəli inzibati xəta haqqında protokoldan görünür ki, Şəki Rayon Məhkəməsinin 2(075)-52/2013 saylı, xx xxxxxx 2013cü il tarixli icra sənədinə əsasən borclu Şəxs 2 uşağın saxlanılması üçün hər ay 100 manat aliment tutularaq tələbkar X1 verilməlidir. Hal-hazırkı tarixə icra sənədi üzrə borclu Şəxs 1050 manat məbləğində borcu mövcuddur. Qeyd edilən icra sənədi xx xxxxxxx 2020-ci il tarixdə Şəki rayonu üzrə İcra və Probasiya Şöbəsinin icraatına daxil olmuşdur. Həmin tarixdə icraata başlamaq haqqında qərar qəbul edilərək tələbin könüllü icrası haqqında müvafiq bildirişlə birlikdə borclu Şəxs göndərilmişdir. Lakin borclu Şəxs könüllü icra müddəti ərzində icra sənədi üzrə tələbi icra etməmişdir. Borclu Şəxs dəfələrlə rəsmi və şifahi qaydada xəbərdarlıqlar edilməsinə, barəsində tətbiq edilmiş digər məcburi icra tədbirlərinə baxmayaraq icra sənəd üzrə tələbin icrasını təmin etməmiş, qanuni qüvvəyə minmiş məhkəmə qətnaməsini icra etməkdən qərəzli olaraq boyun qaçırmışdır. İcra sənədi üzrə tələbi icra etməməklə yanaşı çağırış üzrə gəlməkdən qərəzli olaraq boyun qaçıran borclu Şəxs olduğu yeri müəyyən etmək mümkün olmadığı üçün borclunun məcburi gətirilməsi barədə qərar qəbul edilərək icra edilməsi üçün Şəki şəhər-rayon Polis Şöbəsinə göndərilmiş, borclu Şəxs xx xxxxxx 2021-ci il tarixdə məcburi qaydada Şəki rayonu üzrə İcra və Probasiya Şöbəsinə gətirilmişdir. Borclu Şəxs verdiyi izahatında icra sənədi üzrə borc məbləğini hal-hazırda tam olaraq ödəyə bilməyəcəyini bildirmiş, borcundan 200 manat ödəmiş, qalan borcu hissə-hissə ödəyəcəyini bildirmişdir. Həmçinin, borclu verdiyi izahatında çağırış üzrə gəlməməsini maddi imkansızlığı ilə əlaqələndirmişdir. Məhkəmə iclasında zərərçəkmiş şəxs xxxqızı bildirdi ki, Şəki Rayon Məhkəməsinin 2(075)-52/2013 saylı, xx xxxxxx 2013-cü il tarixli icra sənədinə əsasən borclu Şəxs 2 uşağın saxlanılması üçün hər ay 100 manat aliment tutularaq ona verilməlidir. 2019-cu ilin iyun ayınadək borclu alimenti gecikdirmədən ödəmişdir. Bundan sonra aralarında razılıq əldə edilmiş, icra şöbəsinə birlikdə gedərək icra sənədi üzrə tələbdən imtina etmişdir. Həmçinin, uşaqlardan biri atasının yanına getmiş, onunla yaşamağa başlamışdır. Borclu məhkəmədə ona qarşı uşaq tələbi qaldırdığından, icra şöbəsinə müraciət edərək icra sənədi üzrə icraat tədbirlərinin davam etdirilməsini xahiş etmişdir. Borclunun xx xxxxxxx 2020-ci il tarixə 1700 manat borcu olmuşdur. Bununla bağlı icra şöbəsinə müraciət edərək onun inzibati məsuliyyətə cəlb edilməsini xahiş etmişdir. Həmin borcdan 650 manat ödənilmiş, 1050 manat borc qalıq qalmışdır. Borclu aliment borcundan ödənişlər etsə də, borcunu tam şəkildə ödəməmişdir. Borcunu tam tələb edir. Məhkəmədən onun barəsində inzibati həbs tətbiq edilməsini xahiş edir. Barəsində inzibati xəta haqqında iş üzrə icraat aparılan şəxs Şəxs izahat verərək bildirdi ki, Şəki Rayon Məhkəməsi tərəfindən verilmiş 2(075)-52/2013 nömrəli, xx xxxxxx 2013-cü il tarixli icra sənədinə əsasən ondan 2 uşağın saxlanılması üçün hər ay 100 manat aliment tutularaq tələbkar X1 verilməlidir. 2019-cu ilin iyun ayınadək alimenti gecikdirmədən ödəmişdir. Bundan sonra aralarında razılıq əldə edilmiş, icra şöbəsinə birlikdə gedərək tələbkar icra sənədi üzrə tələbdən imtina etmişdir. 2020-ci ilin avqust ayında qızı anasının yanından qaçaraq artıq onunla yaşamaq istədiyini bildirmişdir. 2021ci ildə qızının 18 yaşı tamam olmuş və ailə həyatı qurmuşdur. Hazırda bir uşağa görə 50 manat aliment ödəməlidir. Məhkəmə tərəfindən verilmiş suallara cavab olaraq bildirdi ki, borcundan xx xxxxxx 2021-ci il tarixdə 100 manat, bu gün isə 200 manat ödəmişdir. İcra məmurunun çağırışlarına gəlməməsinin səbəbi yol pulunun olmamasıdır. Lakin keçən müddət ərzində iki dəfə icra məmurunun yanına gəlmiş, izahat vermişdir. Sonuncu dəfə gələrkən Şəki şəhərində post qurulduğundan polislər onu şəhərə buraxmamış, geri qayıtmalı olmuşdur. Əlavə olaraq bildirdi ki, özü yenidən nikaha daxil olmuş, həmin nikahdan üç uşağı var. Alimenti ödəməkdən boyun qaçırmır və belə bir niyyəti də yoxdur. Bundan sonra da mütəmadi ödənişlər həyata keçirəcəkdir. Bütün bunları nəzərə alaraq məhkəmədən ədalətli qərar çıxarılmasını xahiş etdi. Məhkəmə iclasında Şəxs müdafiəçisi Şəki Regional Vəkil Bürosunun vəkili Vəkil bildirdi ki, Şəxs hərəkətlərində qərəz yoxdur. Odur ki, iş üzrə icraata xitam verilməsini məhkəmədən xahiş edir. Məhkəmə inzibati proses tərəflərinin izahatlarını dinləyərək, işdə olan materiallara baxaraq hesab edir ki, inzibati xəta üzrə işə xitam verilməlidir. Belə ki, Azərbaycan Respublikası İXM-nin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 12-ci maddəsinə görə bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 75-ci maddəsinə əsasən inzibati xəta haqqında iş üzrə aşağıdakılar müəyyən edilməlidir: inzibati xəta hadisəsi (inzibati xəta törədilmişdirmi); inzibati xəta törətmiş şəxs; inzibati xəta törətməkdə şəxsin təqsiri; inzibati məsuliyyəti ağırlaşdıran və yüngülləşdirən hallar; inzibati xəta nəticəsində vurulan zərərin xarakteri və miqdarı; inzibati xətalar haqqında işlər üzrə icraatı rədd edən hallar; işin düzgün həlli üçün əhəmiyyətli olan digər hallar, habelə inzibati xətanın törədilməsinə kömək edən səbəblər və şərait. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 76.2-ci maddəsinə əsasən, qanuna zidd olaraq əldə edilmiş sübutların istifadə edilməsinə yol verilmir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 145.1.4-cü maddəsinə əsasən inzibati tənbeh tətbiq etmə haqqında qərarı qəbul etmiş hakim, səlahiyyətli orqan (vəzifəli şəxs) bu Məcəlləyə əsasən şəxsin inzibati məsuliyyətdən azad edilməsi üçün əsaslar yarandıqda, qərarın icrasına xitam verilir. Həmin Məcəllənin 53.0.2-ci maddəsinə əsasən inzibati xəta tərkibi olmadıqda inzibati xəta haqqında işin icraatına xitam verilməlidir. Şəxs inzibati məsuliyyətə cəlb edilməsinin əsası kimi onun Azərbaycan Respublikası İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətməsi olmuşdur. Yəni, o barəsində çıxarılmış məhkəmə qərarının icrası ilə əlaqədar icra məmurunun qanuni tələblərini yerinə yetirmədiyinə və icra sənədini üzürsüz səbəbdən icra etmədiyinə görə onun barəsində inzibati xəta haqqında protokol tərtib edilmişdir. İş materiallarına əlavə edilmiş sənədlərdən də göründüyü kimi Şəxs icra sənədi üzrə ödənişləri 2019-cu ilin iyun ayınadək mütəmadi icra etmiş, həmin vaxtda heç bir borcu olmamışdır. Bundan sonra tərəflər arasında razılaşma əldə olunmuş, icra sənədi üzrə ödənişlər dayandırılmışdır. Zərərçəkmiş şəxsin ərizəsi əsasında icra sənədi yenidən icraya yönəldilmiş, 2020-ci ilin oktyabr ayına borclunun 1700 manat yığılmış borcu qalmışdır. Lakin borclu keçən müddət ərzində borcunun bir hissəsini, bu gün isə 200 manat ödəmişdir. 2020-ci ilin oktyabr ayından bugünədək bir neçə dəfə icra məmurunun çağırışlarına gəlmiş, izahatlar vermişdir. Yalnız 2021-ci ilin yanvar ayında çağırışa gələ bilməmiş, buna səbəb şəhərdə karantin postların olması olmuşdur. Bu da Şəxs məhkəmə qərarının icrası ilə əlaqədar icra məmurunun qanuni tələblərini yerinə yetirməsinin və icra sənədini üzürlü səbəbdən icra etməsinin bariz nümunəsidir. Göründüyü kimi Şəxs icra sənədini icra etməkdən yayınmır. Azərbaycan Respublikası İnzibati Xətalar Məcəlləsinin 528.1-ci maddəsinin dispozisiyasında göstərilmişdir ki, məhkəmə və digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzürsüz səbəbdən icra edilməməsinə görə, fiziki, vəzifəli şəxslər və ya hüquqi şəxslər inzibati məsuliyyət daşıyırlar. İş materiallarından da göründüyü kimi, Şəxs barəsində inzibati xəta haqqında protokol tərtib edilməsinə əsas yoxdur. Belə ki, o, icra sənədi üzrə müəyyən vaxtlarda ödəniş etmişdir. Belə olan halda həmin icra sənədinin icrası ilə əlaqədar icra məmurunun qanuni tələblərinin yerinə yetirilməməsi və ya icra məmuru tərəfindən müəyyən olunmuş müddətdə icra sənədinin üzrsüz səbəbdən icra edilməməsi halları aradan qalxmışdır. Bu səbəbdən də Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə inzibati məsuliyyətə cəlb edilməsi ilə bağlı Şəki rayonu üzrə İcra və Probasiya Şöbəsindən daxil olmuş inzibati xətaya dair iş üzrə icraata xitam verilməlidir. Qeyd edilənlərə əsasən və Azərbaycan Respublikası İnzibati Xətalar Məcəlləsinin 43 və 109-cu maddələrini rəhbər tutaraq, məhkəmə QƏRARA ALDİ: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə başlanmış inzibati xəta haqqında iş üzrə icraata xitam verilsin və o, inzibati məsuliyyətdən azad edilsin. Qərardan surəti təqdim edildiyi və ya alındığı gündən 10 (on) gün müddətində Şəki Apellyasiya Məhkəməsinə şikayət və ya protest verilə bilər. Sədrlik edən Pərviz Hacıyev