Şəmkir Rayon Məhkəməsi Qərar — İş №3(076)-882/2024

Azərbaycan Respublikası adından QƏRAR Şəmkir rayon İş № 3(076)-882/2024 05.08.2024 ŞƏMKİR RAYON MƏHKƏMƏSİ Hakim Musayev Taleh Valeh oğlunun sədrliyi İbrahimli Güləsər Rəhim qızının katibliyi ilə Şəxs-nin X2 və X1 İdarəsinin Azərbaycan Respublikası İXM–nin 347–ci maddəsi ilə nəzərdə tutulmuş inzibati xətanı törətməsinə dair Şəmkir Rayon Polis Şöbəsindən daxil olmuş inzibati xəta haqqında protokola açıq məhkəmədə iclasında baxaraq, MÜƏYYƏNETDİ: Şəmkir Rayon Məhkəməsinə Şəxs-nin X2 və X1 İdarəsinin barəsində Azərbaycan Respublikası İXM–nin 347–ci maddəsi ilə inzibati xəta haqqında protokol daxil olmuşdur. İnzibati xəta haqqında protokola görə, Şəxs-nin X2 və X1 İdarəsi mülkiyyətində və istifadəsində olan nəqliyyat vasitəsini inzibati xətanın törədilməsi zamanı idarə etmiş fiziki şəxs haqqında məlumatı səlahiyyətli orqanın (vəzifəli şəxsin) bu barədə sorğusu daxil olduğu vaxtdan 5 gün müddətində verməmişdir. Barəsində inzibati xəta haqqında iş üzrə icraat aparılan Şəxs-nin X2 və X1 İdarəsinə və Şəmkir Rayon Polis Şöbəsinə məhkəmə iclasının vaxtı və yeri barədə lazımi qaydada məlumat verilməsinə baxmayaraq, nümayəndələri məhkəmə iclasına gəlməmiş, gəlməmələrinin səbəbləri haqda məhkəməyə hər hansı məlumat verməmişlər. Məhkəmə işə Şəxs-nin X2 və X1 İdarəsinin və Şəmkir Rayon Polis Şöbəsinin nümayəndələrinin iştirakı olmadan baxılmasını mümkün hesab etmişdir. Məhkəmə, inzibati xəta haqqında işin materiallarını nəzərdən keçirib hesab edir ki, Şəxs-nin X2 və X1 İdarəsinin barəsində Azərbaycan Respublikası İnzibati Xətalar Məcəlləsinin 347–ci maddəsi ilə inzibati xəta haqqında işin icraatına xitam verilməlidir. Belə ki, Azərbaycan Respublikası İXM–nin 347–ci maddəsində hüquqi şəxsin mülkiyyətində və ya istifadəsində, yaxud dövlət qurumunun istifadəsində olan nəqliyyat vasitəsini inzibati xətanın törədilməsi zamanı idarə etmiş fiziki şəxs haqqında məlumatın səlahiyyətli orqanın (vəzifəli şəxsin) bu barədə sorğusu daxil olduğu vaxtdan 5 gün müddətində verilməməsi nəticəsində inzibati məsuliyyət nəzərdə tutulmuşdur. Hazırki inzibati işdə isə polis şöbəsi tərəfindən nəqliyyat vasitəsi, habelə sürücü barəsində məlumatların əldə edilməsinə dair Şəxs-nin X2 və X1 İdarəsinə sorğu göndərilməsi müəyyən edilməmişdir. Belə ki, iş materiallarına X2 və X1 İdarəsinə ünvanlanmış xəbərnamə olsa da, həmin xəbərnamənin kim tərəfindən qəbul edilməsi müəyyən edilmir, həmçinin xəbərnamənin üzərindəki ştrix koda (SX009917205AZ kodu) əsasən “Azərpoçt” saytı üzrə “Poçt göndərişlərinin izlənməsi” axtarışı aparılmış və məlumatın tapılmaması müəyyən edilmişdir. Bu isə bir daha onu deməyə əsas verir ki, X2 və X1 İdarəsinə məlumatların əldə edilməsinə dair sorğu göndərilməmiş, dolayısı ilə X2 və X1 İdarəsi tərəfindən nəqliyyat vasitəsi, habelə sürücü haqqında məlumatların səlahiyyətli orqanın (vəzifəli şəxsin) bu barədə sorğusu daxil olduğu vaxtdan 5 gün müddətində verilməməsi halı müəyyən edilməmişdir. Azərbaycan Respublikası İnzibati Xətalar Məcəlləsinin 75–ci maddəsində inzibati xəta törətməkdə şəxsin təqsirli olması inzibati xətalar haqqında işlərin icraatı üzrə sübut edilməli olan hal kimi müəyyən edilmişdir. Azərbaycan Respublikası İnzibati Xətalar Məcəlləsinin 3–cü maddəsinə əsasən yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Həmin Məcəllənin 8.2–ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3–cü maddəsinə əsasən inzibati məsuliyyətə cəlb olunan şəxsin təqsirli olması barəsində olan şübhələr onun xeyrinə həll olunur. Həmin Məcəllənin 13–cü maddəsində göstərilmişdir ki, inzibati xəta törətmiş şəxs öz əməlinin (hərəkətinin və ya hərəkətsizliyinin) hüquqazidd xarakterini dərk etmiş, onun zərərli nəticələrini qabaqcadan görmüş və bunları arzu etmişdirsə, yaxud belə nəticələrin baş verməsinə şüurlu surətdə yol vermişdirsə, bu xəta qəsdən törədilmiş xəta hesab olunur. Göründüyü kimi Şəxs-nin X2 və X1 İdarəsinin balansında olan nəqliyyat vasitəsi və sürücü haqqında məlumatların Şəmkir RPŞ–nin DYPB–nə təqdim edilməsinə dair X2 və X1 İdarəsinə sorğu göndərilməsi müəyyən edilmir. Belə olan halda Şəxs-nin X2 və X1 İdarəsi tərəfindən hər hansı inzibati xətanın törədilməsi halı istisna edilir. Ona görə də məhkəmə hesab edir ki, Şəxs-nin X2 və X1 İdarəsinin əməlində ona istinad olunan inzibati xətanın tərkibi yoxdur. Azərbaycan Respublikasının İXM–in 105.1–ci maddəsinə əsasən bu Məcəllənin 53– cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Həmin Məcəllənin 53.1.2–ci maddəsində göstərilmişdir ki, inzibati xəta tərkibi olmadıqda inzibati xəta haqqında iş üzrə icraata xitam verilir. Həmin Məcəllənin 114.2.1–ci maddsəsinə görə bu Məcəllənin 53–cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarlır. Belə olan halda məhkəmə tərəfindən müəyyən edilənlərə və qanunvericiliyin normalarına əsasən barəsində inzibati xəta haqqında iş üzrə icraat aparılan Şəxs-nin X2 və X1 İdarəsinin əməlində Azərbaycan Respublikasının İnzibati Xətalar Məcəlləsinin 347– ci maddəsində nəzərdə tutulan inzibati xətanın tərkibi olmadığından, həmin maddə ilə barəsində olan inzibati xəta haqqında iş üzrə icraata xitam verilməlidir. Qeyd olunanlara əsasən və Azərbaycan Respublikası İnzibati Xətalar Məcəlləsinin 48–50, 53, 106, 112, 114, 117 və 128–130–cu maddələrini rəhbər tutaraq, məhkəmə Q Ə R A R A A L D İ: Şəxs-nin X2 və X1 İdarəsinin Azərbaycan Respublikası İnzibati Xətalar Məcəlləsinin 347–ci maddəsi ilə təqsirləndirilməsinə dair inzibati xəta haqqında iş üzrə icraata, əməldə inzibati xətanın tərkibi olmaması əsası ilə xitam verilsin. Qərarın surəti təqdim edildiyi və ya alındığı gündən 10 (on) gün müddətində həmin qərarı qəbul etmiş məhkəmə vasitəsilə və ya birbaşa Gəncə Apellyasiya Məhkəməsinə şikayət və ya protest verilə bilər. Hakim Taleh Musayev