Naxçıvan MR Sədərək Rayon Məhkəməsi Qərar — İş №3(088)-2/2024

Azərbaycan Respublikası adından QƏRAR Heydərabad qəsəbəsi İş № 3(088)-2/2024 10.01.2024 NAXÇIVAN MR SƏDƏRƏK RAYON MƏHKƏMƏSİ Sədərək Rayon Məhkəməsinin hakimi Zülfüqarov Hüseyn Nadir oğlunun sədrliyi, İsmayılov Çingiz Məhərrəm oğlunun katibliyi və barəsində inzibati xəta haqqında iş üzrə icraat aparılan şəxs Şəxs iştirakı ilə. xx xxxx 1995-ci il tarixdə Sədərək Rayonu Sədərək kəndində anadan olmuş, Azərbaycan Respublikasının vətəndaşı, orta təhsilli, ailəli, iki uşaq anası, işsiz, Sədərək Rayonu Sədərək kəndində pasport qeydiyyatda olan və yaşayan Şəxs haqqında Azərbaycan Respublikası İnzibati Xətalar Məcəlləsinin 510-cu maddəsi ilə Sədərək Rayon Polis şöbəsi tərəfindən daxil olmuş inzibati xəta haqqında protokola açıq məhkəmə iclasında baxaraq, müəyyən etdim: Vətəndaş Şəxs xx.xx.2024-cü il tarixdə Naxçıvan Baş Gömrük İdarəsinin Sədərək gömrük keçid məntəqəsində ucadan səs-küy salaraq ictimai qaydanı pozduğundan barəsində protokol tərtib edilmişdir. Beləliklə də Şəxs Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulan inzibati xətanı törətmişdir. Barəsində inzibati xəta haqqında iş üzrə icraat aparılan şəxs Şəxs məhkəmə iclasında izahat verərək bildirdi ki, Sədərək Rayonu Sədərək kəndində qeydiyyatda olduğunu və haliyədə həmin kənddə yaşadığını, xx.xx.2024-cü il tarixdə ailə üzvüləri ilə birlikdə öz evinə ərzaq almaq məqsədilə Türkiyə Respublikasına getdiyini, orada işlərini bitirdikdən sonra öz kəndəlinə qayıtmaq məqsədilə Sədərək Rayon Gömrük keçid məntəqəsinə gəldiyini, yanında uşaqları və qardaşı Elnurun olduğunu o, özü üçün aldığı veşləri manitora gətirdiyini, sonra gömrük əməkdaşlarının sumkaları açaraq içərisinə baxdıqlarını, gömrük əməkdaşının həmin veşlərin anbara getməli olduğunu dediyini, həmin veşləri satmaq üçün yox, öz evi üçün uşaqları üçün aldığını desədə xeyri olmadığını, anbara təhvil verilməsinə razı olmadığını, sonra növbə rəisinin gəldiyini oda anbarara təhvil verilməli olduğunu dediyini, polisə şikayət üçün gədəcəyini dedidiyini, gömrük əməkdaşı olan Pərvizin onun üstünə hücum çəkdiyini və veşlərini hirsinən yerə çırpıb qırdığını, sonra polisə zəng edərək onu polisə apardıqlarını, törətdiyi əməldən bir qadın olaraq peşman olduğunu, himayəsində iki azyaşlı övladı olduğunu nəzərə alıb barəsində yüngül cəza verilməsini bildirdi. Məhkəmə iclasında şahid qismində dindirilən Şahid1 izahatında bildirdi ki, 09 yanvar 2024-cü il tarixdə Türkiyə Respublikasından Naxçıvan Muxtar Respublikasına gələn tanımadığı bir qadının gətirdiyi veşlərin normadan artıq olduğunu gördüyünü, gətirdiyi məhsulların normadan artıq olduğunu və Azərbaycan Respublikası Nazirlər Kabinetinin 305 nömrəli qərarına əsasən gətirdiyi veşlərin rəsmiləşdirməyə getməli olduğunu, həmin qadının gömrük əməkdaşına qışqıraraq uca səslə təhqir edərək keçid zalında səs-küy salmaqla içtimai qaydanı pozduğunu, sonra həmin veşlər anbara təhvil verilərkən xanım onun və gömrük əməkdaşlarının ünvanına nalayiq ifadələr işlətdiyini, sonra gömrük rəhbərliyi tərəfindən polis əməkdaşlarına zəng vuraraq şikayətlərini bildirdiklərini, polis əməkdaşlarının gələrək həmin xanımı polis şöbəsinə apardıqlarını bildirdi. Məhkəmə iclasında şahid qismində dindirilən Şahid2 izahatında Şahid1 verdiyi izahata tam uyğun olaraq izahat verərək, Hüseynovun verdiyi izahatı bir daha təsdiq etdi. Şəxs tərəfindən Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulan inzibati xətanın törədilməsi özünün etiraf etməsi və şahidlərin izahatları ilə yanaşı iş materialları ilə də tam təsdiq edildi. Materiala əlavə olunmuş Naxçıvan Baş Gömrük İdarəsinin “Sədərək” gömrük postunun əməkdaşlarının Şəxs qanunsuz hərəkətləri barədə tərtib etdiyi 09 yanvar 2024cü il tarixli aktı, Qədimovanın izahatı və Sədərək Rayon Polis Şöbəsi tərəfindən tərtib edilmiş 10 yanvar 2024-cü il tarixli protokolu C. Qədimovanın inzibati xəta törətməsini bir daha təsdiq edir. Azərbaycan Respublikası İnzibati xətalar Məcəlləsinin 9.1-ci maddəsinə əsasən, İnzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Azərbaycan Respublikası İnzibati Xətalar Məcəlləsinin 12.1-ci maddəsinə görə, İXM ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. 12.2. Bu Məcəllənin Xüsusi hissəsində nəzərdə tutulan əməllərə görə inzibati məsuliyyət o halda yaranır ki, bu əməllər cinayət məsuliyyətinə səbəb olmasın. Azərbaycan Respublikası İnzibati xətalar Məcəlləsinin 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İnzibati xətalar Məcəlləsinin 30.1-ci maddəsinə görə, inzibati həbs, yalnız müstəsna hallarda bu Məcəllənin Xüsusi hissəsinin müvafiq maddələrində nəzərdə tutulan inzibati xətaların ayrı-ayrı növlərinə görə üç gündən üç ay müddətinədək hakim tərəfindən tətbiq edilir. Həmin məcəllənin 30.2-ci maddəsinə əsasən, hamilə qadınlar və ya himayəsində on dörd yaşınadək uşağı olan qadınlar, on dörd yaşına çatmamış uşağını təkbaşına böyüdən kişilər, on səkkiz yaşına çatmayan şəxslər, orqanizmin funksiyalarının 61-80 faiz və ya 81- 100 faiz pozulmasına görə əlilliyi müəyyən edilmiş şəxslər, 18 yaşınadək əlilliyi müəyyən edilmiş şəxslər, altmış yaşına çatmış qadınlar və altmış beş yaşına çatmış kişilər, habelə bu Məcəllənin 41-ci fəslində nəzərdə tutulmuş inzibati xətalar istisna olmaqla digər inzibati xətalara görə hərbi qulluqçular barəsində inzibati həbs tətbiq edilə bilməz. Məhkəmə materiala əlavə edilmiş barəsində inzibati xəta haqqında iş üzrə icraat aparılan şəxs Şəxs övladlarının Sədərək Rayon Qeydiyyat şöbəsi tərəfindən verilmiş AZ- İİİ № 080310 saylı və AZ-İİİ № 304867 saylı döğum haqqında şəhadətnamələrdən məlum olur ki, onun 14 yaşına çatmamış övladları var. Məhkəmə Azərbaycan Respublikası İnzibati xətalar Məcəlləsinin 31.2-ci maddəsinə əsasən, fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran halları nəzərə almışdır. Barəsində inzibati xəta haqqında iş üzrə icraat aparılan şəxs Şəxs ilk dəfə inzibati xəta törətməsini, himayəsində iki azyaşlı uşağının olmasını Azərbaycan Respublikası İnzibati xətalar Məcəlləsinin 32-ci maddəsinə əsasən, məsuliyyəti yüngülləşdirən hallar kimi nəzərə almışdır. Adı çəkilən məcəllənin 32.2-ci maddəsinə əsasən, inzibati tənbeh tətbiq edilərkən bu Məcəllənin 32.1.1 - 32.1.7-ci maddələrində göstərilməmiş başqa hallar da hakim tərəfindən məsuliyyəti yüngülləşdirən hal qismində nəzərə alına bilər. Barəsində inzibati xəta haqqında iş üzrə icraat aparılan şəxs Şəxs barəsində Azərbaycan Respublikası İnzibati xətalar Məcəlləsinin 33-cü maddəsində nəzərdə tutulan məsuliyyəti ağırlaşdıran hallar müəyyən edilmədi. Ona görə də Şəxs Azərbaycan Respublikası İnzibati Xətalar Məcəlləsinin 510-cu maddəsinin sanksiyası çərçivəsində tənbeh edilməlidir. Şərh edilənləri nəzərə alaraq, Şəxs Azərbaycan Respublikası İnzibati Xətalar Məcəlləsinin 510-cu maddəsinin sanksiyasında nəzərdə tutulmuş cərimə növündə inzibati tənbeh tədbirinin tətbiqini qanuni, əsaslı və ədalətli hesab edirəm. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 40, 43, 48-51, 114, 128-130-cu maddələrini rəhbər tutaraq qərara aldım : Şəxs Azərbaycan Respublikası İXM-nin 510-cu maddəsi ilə təqsirli bilinib, inzibati tənbeh tədbiri olaraq 50 (əlli) manat məbləğində cərimə edilsin. Qərar qanuni qüvvəsini aldıqdan sonra icrası üçün Sədərək Rayon İcra və Probasiya bölməsinə göndərilsin. Qərardan, qərarın surəti təqdim edildiyi və ya alındığı gündən 10 (on) gün müddətində qərarı qəbul etmiş hakim vasitəsi ilə və ya birbaşa Naxçıvan Muxtar Respublikası Ali Məhkəməsinin Cinayət kollegiyasına apelyasiya şikayəti və ya protesti verilə bilər. Sədrlik edən: Hüseyn Zülfüqarov.